N̄kpọ Ndomokiet Ikekemeke Ndikpan Mmọ

Enyene mbụn̄ọ emi ekesitiede ke usụn̄ kiet emi ẹsisan̄ade ẹdụk temple eben̄e n̄kpọ kpukpru usen. Ke ini Peter ye John ẹdide ndibe ndụk temple uwemeyo usen kiet, enye ama ọdọhọ mmọ ete: ‘Mbọk ẹyom n̄kpọ ẹnọ mi.’ Peter ama ọdọhọ ete: ‘Nyom ndinọ fi n̄kpọ emi ọfọnde akan okụk. Ke enyịn̄ Jesus ndọhọ fi nte, daha da san̄a!’ Peter ama omụm enye adaha ada, enye onyụn̄ ọtọn̄ọ ndisan̄a. Otuowo ẹma ẹnem esịt etieti ke ntak utịben̄kpọ oro, ediwak mmọ ẹnyụn̄ ẹkabade ẹdi mbet Jesus.

Edi mme oku ye mme Sadducee ẹma ẹyat esịt etieti. Mmọ ẹma ẹmụm Peter ye John ẹda ẹka esop Sanhedrin ẹkebụp mmọ ẹte: ‘Anie inọ mbufo odudu ẹnam ete emi asan̄a?’ Peter ama ọdọhọ ete: ‘Jesus Christ emi mbufo ẹkewotde ọkọnọ nnyịn odudu.’ Mmọ ẹma ẹduat Peter ye John ẹte: ‘Ẹkûdedei utịn̄ n̄kpọ uban̄a Jesus oro aba!’ Edi apostle iba oro ẹma ẹdọhọ mmọ ẹte: ‘Nnyịn iditreke nditịn̄ mban̄a Jesus.’

Ndondo emi ẹsanade Peter ye John ẹyak, mmọ ẹma ẹbịne mme mbet eken ẹketịn̄ se iketịbede. Kpukpru mmọ ẹma ẹbọn̄ akam ẹdọhọ Jehovah ẹte: ‘Mbọk n̄wam nnyịn inyene uko inam utom fo.’ Jehovah ama ọnọ mmọ edisana spirit; mmọ ẹma ẹka iso ẹkwọrọ ikọ ẹnyụn̄ ẹkọk mme owo udọn̄ọ. Mme owo efen efen ẹma ẹkabade mbet Jesus. N̄kpọ oro ama abiak mme Sadducee tutu mmọ ẹmụm mme apostle ẹtop ẹsịn ke ufọk-n̄kpọkọbi. Edi angel Jehovah ama ediberede usụn̄ okoneyo oro osion̄o mmọ onyụn̄ ọdọhọ mmọ ẹte: ‘Ẹfiak ẹka temple ẹkekpep mme owo n̄kpọ.’

Ke usenubọk, ẹma ẹdọhọ mbon Sanhedrin ẹte: ‘Usụn̄ ufọk-n̄kpọkọbi osụk ọkọkọbọ edi mmọ isịneke do! Ikụt mmọ ẹkpepde mme owo n̄kpọ ke temple!’ Ẹma ẹfiak ẹkemụm mme apostle ẹdi esop Sanhedrin. Akwa Oku ama ọdọhọ mmọ ete: ‘N̄kọ ima idọhọ mbufo ẹtre nditịn̄ n̄kpọ mban̄a Jesus?’ Peter ama ọbọrọ ete: ‘Ana ikop uyo Abasi utu ke uyo owo.’

Esịt ama ayat mbon Sanhedrin tutu mmọ ẹyom ndiwot mme apostle. Edi Pharisee kiet emi ekekerede Gamaliel ama adaha ada ọdọhọ ete: ‘Ẹkpeme idem-o! Etie nte Abasi odu ye ibon emi. Ndi mbufo ẹyom ndin̄wana ye Abasi?’ Ikọ oro ama anam mmọ iwotke mme apostle. Edi mbemiso ẹsanade mme apostle ẹyak, ẹma ẹkama n̄kpọ ẹtịm mmọ ẹnyụn̄ ẹfiak ẹdọhọ mmọ ẹtre ndikwọrọ ikọ. Edi mme apostle iketreke. Mmọ ẹma ẹka iso ẹkwọrọ eti mbụk uko uko ke temple ye ke ufọk ke ufọk.