Constantine Akakabade Esịt—Etiene Nso?
NDITỌ ukpepn̄kpọ ido ukpono ke anyanini ẹmenyene udọn̄ ẹban̄a esịt oro ẹdọhọde ke Constantine, andikara Rome ama akabade. Nte mbụk esiemọ ọdọhọde, ke mbubịteyo usen ekọn̄ oro ke 312 C.E., emi enye akakande, Constantine okpono ndem ama okụt cross ke n̄kukụt ye ikọ ufiet oro: “Ke [idiọn̄ọ] emi kan.” Enye ama “akabade esịt” ibio ibio ini ke oro ebede (ke 313 C.E.) onyụn̄ etre ukọbọ oro ẹkekọbọde mme Christian ke obio ukara Rome. Constantine ama emenede idaha orụk Ido Ukpono Christian eke ini oro ndikabade ndi ido ukpono Ukara, idem esịnde ubọk akpan utọk esịt ufọkederi. Nte ededi, enye n̄ko ama anam mme ido oro akanamde ẹyịk m̀mê esịt oro enye akakabarede akakam edi ata edikabade esịt, ndien owo ikonịmke enye baptism ibọhọke tutu ke ini enye okoyomde ndikpa, n̄kpọ nte isua 24 ke ukperedem.
Ke ibuotikọ kiet ke Bible Review, Stanley A. Hudson, emi edide ekpepn̄kpọ mban̄a okụk onyụn̄ edide eyen ukpepn̄kpọ ido ukpono ye akwa n̄weditoro, ama ayarade nte okụk oro ẹkenamde ke ini ukara Constantine okotịpde ndusụk inem inem ntọt esịn ke se ẹnemede ẹban̄a emi. Tutu edisịm eyo Constantine, ekedi ọsọ n̄kpọ okụk mbon Rome ndiwụt mme ọwọrọetop abasi mbon Rome. Edi Hudson ọkọtọt ete ke Constantine ama akakabade esịt, mme ibuotikọ ukpono ndem ama osụhọde ubọk—ke mîbọhọke kiet kpọt. Okụk emi owụtde Sol, abasi utịn—emi Constantine akamade akan ke mbemiso—ekedi se ẹbotde uwak uwak. Ntak-a?
Hudson ama ọnọ ntak iba. Akpa, anaedi edikabade esịt eke Constantine akada itie ata sụn̄sụn̄—kpa ye n̄wọrọnda n̄kukụt esie. Mîdịghe, ekeme ndidi Constantine ikọdiọn̄ọke ukpụhọde ke ufọt Sol ye Jesus. Edibuak nsio nsio n̄kpọ oro ẹnịmde ke akpanikọ ikam idịghe esen n̄kpọ mfịn. Ke uwụtn̄kpọ, ke Latin America, ke enyịn̄ Edisana Mary, ẹsụk ẹtatuak ibuot ẹnọ eka-abasi Pacha-Mama ye eka-abasi Tonantzin ẹmi ẹkedude mbemiso ini Columbus. Ke ukem usụn̄ oro, ekeme ndidi Constantine akatuak ibuot ọnọ Sol ke enyịn̄ Jesus.
Utọ edibuak nsio nsio n̄kpọ oro ẹnịmde ke akpanikọ ntre akpanam an̄wan̄a ntak ẹkemekde December 25, kpa ‘usen emana abasi utịn,’ nte usen editi emana Jesus. Emi n̄ko akpan̄wam nnyịn ndikụt ntak emi uwetn̄kpọ oro “DV Constantine” (“Edisana Constantine”) odude ke okụk oro ẹkebotde ndida nti n̄kpa Constantine. Emi owụt ete, kpa ye edikabade esịt esie ye edina baptism ke akpatre, ẹkeda Constantine nte abasi ke enye ama akakpa, ukem nte mme okpono ndem mme andikara oro ẹkedude mbemiso enye.
[Ebiet Ẹdade Ndise Ẹto ke page 7]
The Metropolitan Museum of Art Bequest of Mrs. F. F. Thompson. 1926 (26.229)