Kere Ban̄a Ererimbot Emi Idiọkitọn̄ Mîdụhe

NTE afo emekeme ndikere mban̄a ererimbot oro mme owo ẹdianade kiet utu ke ndimia mbuba? Emi mme owo ẹnamde n̄kpọ ye kiet eken nte emi mmọ ẹkpemade ẹnam ye mmọ? Ẹmi ẹdi se ẹdade ẹdiọn̄ọ ererimbot oro idiọkitọn̄ mîdụhe. Nso utọ ererimbot ke enye edidi ntem! Ndi enye eyedi tutu amama? Ih, enye eyedi. Edi didie ke ẹkeme ndisio idiọkitọn̄​—emi otịmde ọdọn̄ n̄kam ke ubonowo—​ẹfep?

Man inyene ibọrọ, ana nnyịn ibemiso idiọn̄ọ ntọn̄ọ idiọkitọn̄. Bible owụt ete ke enye ikawakke ndidi edu ekpụk ubonowo. Prọfet Moses eti nnyịn ete ke ntọn̄ọ ntọn̄ọ owo ikekwe ndo ndomokiet, utọ nte idiọkitọn̄ ke idem akpa owo oro, kpa mfọnmma edibotn̄kpọ oro Andibot emi mîdiọkke itọn̄ okobotde: “Akwa itiat, utom esie ọfọn ama: koro kpukpru usụn̄ esie ẹnende.” Ntre, ndien, idiọkitọn̄ okoto m̀mọ̀n̄? Akpa owo iba oro ẹma ẹyak enye ọkọri ke idemmọ​—Eve ye idiọkitọn̄ ama ekere se enye edinyenede oto edidia mfri emi Abasi akakpande, Adam ke idiọkitọn̄ ikoyomke nditaba ediye an̄wan esie. Moses ama adian do, ke ikọ ẹmi ẹkedide akpanikọ nko aban̄a Adam ye Eve ete: “Enye amakabade ọdiọk ye enye, ndo mmọ idịghe eke nditọ esie: ke edi emana itụn ye ukwan̄.” -Deuteronomy 32:4, 5; 1 Timothy 2:14.

Etisịm ini Ukwọ ofụri ererimbot eke eyo Noah, idiọkitọn̄ ye ọkpọsọn̄ udọn̄ ẹma ẹkọri ekesịm udomo oro ‘idiọkn̄kpọ owo okponde ke isọn, kpukpru n̄kpọ ke ekikere esịt mmọ ẹnyụn̄ esụk ẹdi idiọk kpukpru ini.’​—Genesis 6:5

Edu idiọkitọn̄ emi akarade owo mi amakaiso tutu osịm emi, etiede nte ke enye omosịm etịn̄e esie ke anana-esịtekọm ye ọdiọkitọn̄ n̄kaowo eke eyomfịn.

Ndisio Idiọkitọn̄ Mfep Ebe ke Ndinọ Ukpep

Kpasụk nte idiọkitọn̄ ke otu mme owo ọkọride-kọri, ntre edisio enye mfep edi mmemmem n̄kpọ. Ekeme ndikan idiọkitọn̄ ubọk. Edi, man emi ada itie, oyom ẹnọ ukpep ye ntụnọ oro odotde, ẹtienede ndausụn̄ m̀mê mme ibet ido uwem ket-ket. Emi ekeme nditie nte n̄kpọ oro ekemede nditịbe, edi anie ekeme ndinọ utọ ukpep oro nnyụn̄ n̄kụt nte ke ẹda se ẹkpepde ẹsịn ke edinam​—idem ẹnyịkde-nyịk mme owo edieke oro edide se ẹyomde?

Ana utọ ukpepn̄kpọ oro ọwọrọ oto itie oro idiọkitọn̄ mîdụhe. Inaha ẹnyene ibụk ibụk udọn̄ m̀mê ẹdori enyịn ndibọ n̄kpọ ke usiene nto utọ ukpepn̄kpọ oro. Ke adianade do, ana ẹkpep ẹnyụn̄ ẹnanam ẹwụt nte unana ibụk enyenede ufọn. Oyom andibọ ukpep emi onịm ke akpanikọ nte ke utọ usụn̄uwem emi idịghe se ẹkemede ndinyene kpọt edi nte ke enye edi usụn̄ oro ọfọnde, enyenede ufọn ọnọ enye ye mbon oro ẹdude ye enye.

Edi Abasi emi odude ke heaven ikpọn̄îkpọn̄ ekeme ndinọ utọ ukpep emi, koro ewe owo m̀mê n̄ka ke isọn̄ ekpekeme ndinyene mme n̄kpọ ye idaha ẹyomde mi. Kpukpru owo idotke ke ntak akpanikọ Bible emi: “Koro kpukpru owo ẹma ẹnam idiọkn̄kpọ, ẹnyụn̄ ẹtaba ubọn̄ Abasi.”​—Rome 3:23.

Ke idara, Jehovah, kpa Abasi enyọn̄, ọmọnọ utọ ukpep oro ke n̄wed esie, m̀mê n̄wed ndausụn̄, kpa Edisana Bible. Eyen esie, Jesus Christ, ama ada ọnọ utọ ukpepn̄kpọ emi ke ini enye ekedide owo ke isọn̄. Ke Jesus osụk ọnọde ọwọrọetop ukwọrọikọ esie ke Obot, enye ama etịn̄ aban̄a usụn̄uwem oro eketiede esen esen ke utọn̄ ediwak mbon oro ẹkekpan̄de utọn̄ ẹnọ enye, koro enye ekesịnede ediwụt unana ibụk nnọ idem mme asua m̀mê mme andibiọn̄ọ. Jesus ọkọdọhọ ete: “Ẹma mme asua mbufo, ẹnyụn̄ ẹbọn̄ akam ẹyom ufọn mmọ eke ẹnamde mbufo isịnenyịn: man mbufo edi nditọ Ete mbufo emi odude ke heaven; koro Enye anamde utịn Esie asiaha ọnọ mme idiọk owo ye nti owo, onyụn̄ anamde edịm edep ọnọ ndinen owo ye mme anam ukwan̄ido. Koro edieke mbufo ẹmade mmọ eke ẹmade mbufo, nso utịp ke ẹnyene? Nte kpa mme publican inamke sụk ntre?”​—Matthew 5:44-46.

Ubak utom oro Jesus ekedide isọn̄ ndinam ekedi ndinọ mme anditeme oro mînyeneke ibụk ukpep man mmọ n̄ko ẹkpekeme ndinọ mbon efen ukpep ke anana-ibụk usụn̄uwem emi. Ndusụk ini ke n̄kpa ye ediset ke n̄kpa Jesus ama ekebe, apostle Paul ama akabade edi kiet ke otu mme ọnọ utọ item oro. Ke ediwak leta eke odudu spirit oro enye ekewetde, Paul ama ọsọn̄ọ etịn̄ aban̄a edisio idiọkitọn̄ mfep. Ke uwụtn̄kpọ, enye ekewet ọnọ ẹsọk mbon Ephesus ete: “Edi ama edi use, ye kpukpru mbubiam ido, m̀mê edisịn esịt ke n̄kpọ owo, ẹkûyak ẹtịn̄ ẹban̄a n̄kpọ oro ke otu mbufo, nte odotde ikọt Abasi.”​—Ephesus 5:3.

Ukem ntre mfịn, Mme Ntiense Jehovah ke ẹkpep irenowo ye iban ndikan mme ntụhọ idiọkitọn̄. Nte ini akade, mbon ẹmi n̄ko eyedot ndiwọrọ n̄ka n̄kekpep mbon en̄wen mme utọ edu Abasi oro.

Mme Akpanikọ Bible ke Edinam

Edi afo emekeme ndibụp ete: ‘Nte mme anana mfọnmma owo, ẹmi idiọkitọn̄ ama ọkọdọn̄ n̄kam ke idem mmọ, ẹkeme ndinen̄ede n̄wụbede enye mfep ke edu uwem mmọ?’ Ih, mmọ ẹkeme. Idịghe ofụri ofụri, nte ededi, edi ke udomo oro edide n̄wọrọnda. Ẹyak nnyịn ikere uwụtn̄kpọ kiet aban̄ade emi.

Inọ kiet okodụn̄ ke Spain. Ufọk esie ọkọyọhọ ye mme n̄kpọ oro ẹkeyịpde. Ekem enye ama ọtọn̄ọ ndikpep Bible ye Mme Ntiense Jehovah. Nte utịp, ubieresịt esie ama afịna enye, ntre enye ama ebiere ndida mme n̄kpọ oro enye okoyịpde n̄kayak nnọ mme andinyene. Enye ama aka ebịne akani eteutom esie onyụn̄ etịn̄ nte enye okoyịpde obufa ukwak uyetọfọn̄ esie. Sia ukpụhọde emi okotụkde eteutom emi ke idem, enye ama ebiere ete ke imọ idisianke mme borisi edi n̄kukụre ndidọhọ yak akani inọ emi ekpe ekọmurua ukwak uyetọfọn̄ oro.

Ekem, inọ emi anamde ukpụhọde mi ama ebiere ndika mbịne kpukpru mbon oro enye etide ke ima iyịp n̄kpọ mmọ onyụn̄ ọkọkpọn̄ mme n̄kpọ oro enye okoyịpde ọnọ mmọ. Kpukpru mbon oro enye akafiakde okosobo ẹkedu ke n̄kpaidem ndikụt nte ke otode ke ndida mme edumbet Bible nsịn ke edinam, eren emi ama anam akwa ukpụhọde.

Idahaemi enye ama osobo ata ọkpọsọn̄ mfịna. Enye ikọdiọn̄ọke mme andinyene ediwak n̄kpo ẹmi ẹkesụk ẹdude ye enye. Ntre, ke ama ọkọbọn̄ akam ọnọ Jehovah, enye ama aka ibuot itieutom mme borisi onyụn̄ akayak radio stereo itiokiet oro enye okoyịpde ke moto ọnọ mmọ. Idem ama akpa mme borisi oro, sia enye mînịmke idiọk mbụk ye mmọ. Mmọ ẹma ẹbiere ẹte ke enye enyene ndikpe isop nnyụn̄ mbiat esisịt ini ke ufọk-n̄kpọkọbi.

Akani owo inọ emi emenyene eti ubieresịt idahaemi, ke ama ọkọkpọn̄ uwem ubiatibet ye idiọkitọn̄ esie man akabade edi andibuana ke esop ofụri ererimbot eke Mme Ntiense Jehovah.

Ẹkeme ndinọ mbiet uwụtn̄kpọ emi ke mme itie tọsịn. Okposụkedi mbon oro ẹnamde uto ukpụhọde ntre ẹdide ekpri ibat ke otu mme andidụn̄ isọn̄, akpanikọ oro nte ke ediwak owo ẹma ẹnam ntre owụt eti odudu oro otode edidiọn̄ọ ye edida mme edumbet Bible nsịn ke edinam.

Nte isua kiet kiet ebede, ata ediwak owo ẹmedidiọn̄ọ usụn̄uwem emi. Ẹnọnọ item a-Bible ke se ibede esop Mme Ntiense Jehovah 60,000 ke ofụri isọn̄. Mme Ntiense kemi idorike enyịn ndikpụhọde ofụri ererimbot, ẹsiode idiọkitọn̄ ẹfep ke otu ediwak tọsịn million owo ẹmi ẹdude uwem idahaemi. Edi, prọfesi Bible owụt ete ke ibịghike, usụn̄uwem oro idiọkitọn̄ mîdụhe eyedu ke ofụri isọn̄!

Obufa Ererimbot oro Idiọkitọn̄ Mîdụhe

Ufan̄ ididụhe inọ idiọkitọn̄ ye ibụk ke obufa ererimbot oro edide. Apostle Peter ọsọn̄ọ ọnọ nnyịn nte ke edinen ido idịghe idiọn̄ọ “obufa enyọn̄” kpọt edi n̄ko eke “obufa isọn̄.” (2 Peter 3:13) Idiọkitọn̄ edidi kiet ke otu mme “ebeiso n̄kpọ” ẹmi edibede ifep, ọkọrọ ye udọn̄ọ, eseme, ye idem n̄kpa.​—Ediyarade 21:4.

Ntem, edieke afo okopde ubiak ke n̄kọri idiọkitọn̄ ye ibụk ibụk usụn̄uwem oro ikụtde ẹkanarede nnyịn ẹkụk, sọn̄ esịt! Tọn̄ọ idahaemi ndidu uwem nnọ obufa ererimbot emi edide, oro edisọpde ndidi ata idem n̄kpọ. Ye un̄wam Abasi, domo ndisio idiọkitọn̄ mfep ke uwem fo. Buana ke ndin̄wam mbon efen ẹkụt mme ufọn oro ẹkemede ndinyene idahaemi ke ndidu uwem Christian. Kọn̄ mbuọtidem ke un̄wọn̄ọ Jehovah Abasi nte ke ibịghike idiọkitọn̄ eyedi kiet ke otu ediwak anana inemesịt n̄kpọ oro ‘owo mîditịghi aba, mîdinyụn̄ idụkke owo ke esịt.’​—Isaiah 65:17.

[Ndise on page 5]

Jesus ama etịn̄ aban̄a usụn̄uwem oro emenerede unana ibụk ke enyọn̄, idịghe idiọkitọn̄.

[Ndise on page 7]

Ibịghike​—ererimbot oro idiọkitọn̄ mîdụhe eyedu