Nte Afo Omodot Ndinam Utom?

“Ukeme nnyịn oto Abasi.”​—1 Corinth 3:5.

1. Nso utọ mme owo ke esop Christian mînyeneke ufan̄ inọ?

JEHOVAH ABASI ye Jesus Christ ẹdi mme anamutom. Jesus ọkọdọhọ ete: “Ete Mi ke ananam utom tutu osịm emi, Ami ke nnyụn̄ nnam.” (John 5:17, 18) Abasi inyịmeke mbon oro ẹsịnde ndinam utom; m̀mê unyịme esie inyụn̄ idụhe ye mbon oro ẹyomde ifetutom man ẹnyene odudu ke idem mbon en̄wen. Esop Christian inyeneke ufan̄ inọ mbon oro efende efen m̀mê mbon oro ẹnyene ibụk ibụk udọn̄.​—Matthew 20:25-27; 2 Thessalonica 3:10.

2. Ntak enen̄erede oyom ẹnyene irenowo ndibiom mbiomo idahaemi ke esop Christian?

² Mme Ntiense Jehovah ẹnyene ‘ekese ndinam ke utom Ọbọn̄,’ akpan akpan idahaemi oro ata ediwak owo ẹbụn̄ọde ẹdọ “obot” utuakibuot akpanikọ. (1 Corinth 15:58; Isaiah 2:2-4) Enen̄ede oyom ẹnyene irenowo oro ẹdotde ke n̄kan̄ eke spirit ndibiom mbiomo ke esop. Sia mîdịghe ibụk ibụk udọn̄ ada usụn̄, utọ irenowo oro ẹsitoro Jehovah, itoroke idemmọ. (Mme N̄ke 8:13) Mmọ ẹfiọk ẹte ke Abasi an̄wam mmimọ ndidot ndinyene mme ifetutom esop, idem kpa nte enye ‘anamde mme asan̄autom obufa ediomi’ ẹdot.​—2 Corinth 3:4-6.

3. Nso inen̄ede idi mbiomo mbiowo ye mme asan̄autom unamutom?

³ Mfịn, nte ekedide ke otu mme akpa Christian, ẹmek irenowo ebe ke edisana spirit onyụn̄ ebe ke ndutịm esop Jehovah ndinam utom nte mbiowo ye mme asan̄autom unamutom. (Utom 20:28; Philippi 1:1; Titus 1:5) Mbiowo ẹbọk otuerọn̄ Abasi ke n̄kan̄ eke spirit, ẹnọde ukpeme ntịn̄enyịn. Mme asan̄autom unamutom, ẹmi utom mmọ mînen̄ekede ibuana use enyịn ke n̄kan̄ eke spirit, ẹn̄wam mmọ. (1 Peter 5:2; Men Utom 6:1-6 domo.) Nte Eyen Abasi, emi ekedide man anam n̄kpọ ọnọ owo, utọ mbon oro ẹmekde mi ẹduak ndinam n̄kpọ nnọ ekemmọ mme andinịm ke akpanikọ. (Mark 10:45) Edieke afo edide Christian eren, ndi afo emenyene edu oro?

Mme N̄kpọ Ẹnamde Kpukpru Mmọ Ẹdot

4. M̀mọ̀n̄ akpan akpan ke ikụt ẹwetde mme n̄kpọ ẹnamde mbon oro ẹyakde mbiomo esop ẹsịn ke ubọk, ẹdot?

⁴ Ke 1 Timothy 3:1-10, 12, 13 ye Titus 1: 5-9, apostle Paul ama owụt mme n̄kpọ ẹyomde akpan akpan ẹto mbon oro ẹyakde mbiomo esop ẹsịn ke ubọk. Nte nnyịn ikerede iban̄a mme n̄kpọ ẹmi ẹnamde owo odot mi, ẹmi ndusụk mmọ ẹnyenede mbiowo ye mme asan̄autom unamutom, nnyịn ikpesehe mmọ nte ẹkemde ye mme idaha ererimbot. Utu ke oro, nnyịn ikpese mmọ nte ẹketịmde mmọ ke akpa isua ikie ye nte ẹdade mmọ ẹnam n̄kpọ ke otu ikọt Jehovah. Ndisịm mme n̄kpọ ẹyomde mi iyomke mfọnmma ito owo, koro do owo ndomokiet ikpodotke. (1 John 1:8) Edi edieke afo edide Christian eren, edide afo emenyene mbiomo esop idahaemi m̀mê unyeneke, ntak mûdụn̄ọkede mme ọkpọ ọkpọ n̄kpọ oro ẹnamde fi odot-o?

5. Ndidi se owo mîkemeke ndidori ikọ ọwọrọ nso?

⁵ Owo emi owo mîkemeke ndidori enye ikọ; enyene eti etop ke otu mmọemi ẹdude ke esien; owo ibiomke enye ikọ. (1 Timothy 3:2, 7, 8, 10; Titus 1:6, 7) Ke ini ẹmekde ye ke adan̄aemi ẹsụk ẹnamde utom, mme asan̄autom unamutom ye mbiowo ana ẹbọhọ edori ikọ, oro edi, ẹbọhọ nduduọhọ ye n̄kpọ ekededi oro oyomde nsuannọ ke ntak nnennen edori ikọ kaban̄a idiọk edu m̀mê ukpepn̄kpọ. Nsusu edori ikọ oro “nditọete abian̄a” m̀mê mbon en̄wen ẹtịn̄de inamke owo edi se ẹkemede ndidori ikọ. Man owo okûdot ndikama ifetutom ke esop, inaha edori ikọ edi n̄kpọ mbubru, ndien enyene ndisọn̄ọ enye nte ekemde ye mme edumbet N̄wed Abasi. (2 Corinth 11:26; 1 Timothy 5:19) Ana owo oro ẹmekde ke esop “enyene eti etop ke otu mmọemi ẹdude ke esien; mbak enye ediduọ odụk ke esuene ye ke afia Satan.” Edieke owo akanamde ndusụk akwa idiọkn̄kpọ ke ini edem, ẹkeme ndimek enye n̄kukụre edieke edide enye odu eti uwem ndinam ẹfre ẹban̄a esuene ekededi onyụn̄ anam eti enyịn̄ ọnọ idemesie.

6. Ndidi ebe an̄wan kiet ọwọrọ nso?

⁶ Ebe an̄wan kiet. (1 Timothy 3:2, 12; Titus 1:6) Emi iwọrọke ite ke edi sụk irenowo oro ẹdọde ndọ ẹkeme ndidi mme asan̄autom unamutom ye mbiowo. Nte ededi, edieke ọdọde ndọ, ana erenowo enyene n̄wan kiet kpọt oro odude uwem onyụn̄ anam akpanikọ ọnọ enye. (Mme Hebrew 13:4) Ke mîbietke ediwak irenowo oro mîkedịghe mme Christian ke akpa isua ikie, enye ikemeke ndidi ọdọ uwak iban.a

7. (a) Ndi ata isua emana odu oro anamde erenowo odot ndidi ebiowo? (b) Nditịm n̄kama ufọk ke eti usụn̄ abuana nso?

⁷ Otịm akama ufọk esiemọ, onyụn̄ anam nditọ esie ẹsụk ibuot. (1 Timothy 3:4, 5, 12; Titus 1:6) Ndusụk owo ẹkeme ndikere ẹte ke ana mbiowo ke nsụhọde n̄kaha ẹdi isua 30 ke emana, edi Bible inịmke n̄kpri n̄kan isua emana. Edi, ana owo oro anam n̄kpọ nte akwa owo ke usụn̄ifiọk eke spirit. Mme asan̄autom unamutom ye mbiowo ẹkpenyene ndikpon n̄kem ndinyene nditọ. Edieke edide ọdọ-ndọ, erenowo ididotke edieke enye anamde n̄kpọ ke usụn̄ Abasi ke ebiet en̄wen edi edi owo nsọn̄ido ke ufọk. Ana enye ọbọ ukpono ke ndikara ufọk esiemọ nte ekemde ye mme edumbet Bible, ndien uduak esie ekpedi ndikụt unen ke n̄kan̄ eke spirit ye kpukpru mbonufọk. Nte edumbet ke ofụri ofụri, akpana ebiowo oro edide ete enyene n̄kpri nditọ oro ẹdude eti uwem ẹnyụn̄ “ẹnịmde ke akpanikọ.” Ẹkpenyene ndidi mmọ ke ẹnam n̄kọri ẹbịne uyakidem nnọ Abasi mîdịghe ẹma ẹnana baptism nte Mme Ntiense Jehovah. Owo oro mîkemeke ndibọp mbuọtidem nsịn ke esịt nditọ esie ikemeke ndinam ntre ye mbon en̄wen.

8. Mbemiso erenowo oro enyenede ubon ekeme ndikabade ndi ebiowo, nso ke ana enye ekpep ndinam?

⁸ Mbemiso erenowo oro enyenede ubon ekeme ndidi ebiowo oro odotde ndinọ ndausụn̄ eke spirit ke esop, ana enye ekpep ndinọ ubon esie ndausụn̄. ‘Edieke owo mîfiọkke nte akamade ufọk esiemọ, enye edikeme didie ndikpeme esop Abasi?’ (1 Timothy 3:5) Edi akpanikọ, n̄wan oro mînịmke ke akpanikọ ekeme ndibiọn̄ọ erenowo. (Matthew 10:36; Luke 12:52) Mîdịghe eyen esie kiet ekeme ndinyene ubiomikpe akwa idiọkn̄kpọ, okposụkedi mbon eken ẹnamde ọfọn ke n̄kan̄ eke spirit. Edi, edieke owo oro akanamde kpukpru se ẹkpedoride enyịn enye ndinam, ndien akpan akpan edieke edide enye ama okụt unen ye mbon eken ke ubon esie, owo ubon esie kiet ndifụmi eti ndausụn̄ esie ikpanamke enye okûdot ndidi asan̄autom unamutom m̀mê ebiowo.

9. Nso ukpeme ke ana ebiowo m̀mê asan̄autom unamutom owụt ke se iban̄ade n̄kpọsọn̄ mmịn?

⁹ Inyeneke ndidi owo mmịn m̀mê ndimehe ye ediwak wine. (1 Timothy 3:3, 8; Titus 1:7) Inaha asan̄autom unamutom m̀mê ebiowo esịn idem ke un̄wọn̄ ọkpọsọn̄ mmịn. Ndinyene mbumehe ke mmọ ekeme ndisụn̄ọ ke ndiduọk ukpeme ke ekikere ye ntụk, osụn̄ọde ke utọk m̀mê en̄wan. Enye ‘ikpemeheke ye ediwak wine’ m̀mê ndiwọrọ etop nte owo oro emehede m̀mê ọn̄wọn̄de mmịn ọkpọsọn̄. (Mme N̄ke 23: 20, 21, 29-35) Ekpedi n̄kpọ mmọn̄eyet didie ntem edieke ediyụhọ mmịn otịmerede utom ubọkerọn̄! Edieke eyenete esin̄wọn̄de mmịn, enye ikpọn̄wọn̄ke ke ini abuanade ke mbonoesop, utom ukwọrọikọ, m̀mê ke edisana utom en̄wen.​—Leviticus 10:8-11; Ezekiel 44:21.

10. Ntak emi mbon oro ẹmade okụk ye mbon oro ẹdiọkde itọn̄ ẹbịne obukpo udori mîdotke ndidi mbiowo m̀mê mme asan̄autom unamutom?

¹⁰ Isịnke esịt ke okụk m̀mê ndidiọk itọn̄ mbịne idiọk udori. (1 Timothy 3:3, 8; Titus 1:7) Mme ama okụk ẹdu ke afanikọn̄ eke spirit, ‘mbon idiọkitọn̄’ idinyụn̄ idaha Obio Ubọn̄ Abasi inyene. Ntem, utọ irenowo ntre idotke ndidi mbiowo m̀mê mme asan̄autom unamutom. (1 Corinth 6:9, 10; 1 Timothy 6:9, 10) Orụn̄ ikọ usem Greek oro ẹkabarede “idiọk” akpan akpan ọwọrọ “esuene,” ndien enyeoro ẹkabarede “udori” etịn̄ aban̄a orụk udori m̀mê ufọn ekededi. (Philippi 1:21; 3:4-8) Ke akpanikọ, erenowo oro edu esie owụtde nte ke enye eyekama “erọn̄” Abasi idiọk idiọk idotke ndibiom mbiomo esop. (Ezekiel 34:7-10; Utom 20: 33-35; Jude 16) Ẹnam ufọn ndiwụt ukpeme ke nditoro owo ọwọrọ ada ke ini ifiọkde ite ke ẹkeme ndiyak okụk nsịn owo ke ubọk, inikiet ekededi oro ẹmekde, ndien ekeme ndisobo idomo ediyịp ndusụk okụk oro.​—John 12:4-6.

11. Ntak owo mîkpotoroke “obufa owo ke ido Abasi” inọ ifetutom esop-o?

¹¹ Idịghe obufa owo ke ido Abasi; ẹbemiso ẹdomo ẹfiọk m̀mê odot. (1 Timothy 3:6, 10) Owo oro anade baptism obufa obufa inyeneke ini ndiwụt nte ke imọ iyese iban̄a utom imọ ke edinam akpanikọ. Enye ekeme ndinana esịtmbọm ye mbon ukụt m̀mê oyomde-yom eti ibuot man an̄wam ekemmọ mme andituak ibuot onyụn̄ ekeme ndikam nse mbon en̄wen ke usụhọde. Ke ntre, mbemiso ẹtorode nte asan̄autom unamutom, ndien akpan akpan nte ebiowo, ana ẹbemiso “ẹdomo [erenowo] ẹfiọk m̀mê odot,” enye okponyụn̄ enyene ndinọ uyarade eti ubiereikpe ye se ekemede ndiberi edem. Owo inịmke-nịm ini inọ edidomo nse emi, ndien idaha n̄kọri eke spirit owo kiet kiet okpụhọde. Edi mbiowo ikpọsọpke itoro obufa owo “mbak enye edikohode idem, ọduọ odụk ke ubiomikpe Satan.” Yak erenowo oro ebemiso owụt ukem edu nsụhọdeidem Christ.​—Philippi 2:5-8.

Se Ẹsede Mme Asan̄autom Unamutom

12. Ndi mme asan̄autom unamutom ikpọn̄ enyene ndisịm mme n̄kpọ ẹmi ẹyomde ẹto mmọ?

¹² Ẹwet ndusụk n̄kpọ ẹyomde ẹnọ mme asan̄autom unamutom. Edi, edieke mbiowo mîkosịmke mme utọ n̄kpọ ntre, mmọ ikpodotke ndinam utom. Nte Christian eren, ndi afo omodot ke mme afan̄ ẹmi?

13. Ndidi owo emi odotde ukpono ọwọrọ nso?

¹³ Ẹdot ukpono. (1 Timothy 3:8) Erenowo oro odotde ndinam utom nte asan̄autom unamutom ikpadaha ifetutom mfefere mfefere. Enye ekpenyene ndikama idemesie ke uku uku usụn̄ oro edibọde ukpono. Okposụkedi ẹnyịmede ikọ mbubru ke ndusụk ini, enye ikpodotke edieke esinamde n̄kpọ ke mbubru mbubru usụn̄ kpukpru ini.

14. (a) Nditre ndinyene edeme ikọ iba ọwọrọ nso? (b) Ndinyene edisana esịt oyom nso?

¹⁴ Inyeneke edeme ikọ iba; enyene edisana esịt. (1 Timothy 3:8, 9) Ana mme asan̄autom unamutom (ye mbiowo) ẹtịn̄ akpanikọ, itịn̄ke ikọ edem m̀mê ndikwan̄a ikọ. Sia mînaha mmọ ẹnyene edeme ikọ iba, mmọ ke mbubịk ikpenyeneke nditịn̄ n̄kpọ kiet ye owo kiet ndien ẹtịn̄ se idide isio ye owo en̄wen. (Mme N̄ke 3:32; James 3:17) Ana irenowo ẹmi n̄ko ẹdi mme ẹnyene-ifịk andida nnọ akpanikọ oro ẹyararede, “[ẹmụmde] ndịben̄kpọ mbuọtidem ẹkama ke edisana esịt.” Esịt utọ eren oro ekpenyene nditie ntiense ke iso Abasi nte ke imọ imenen inyụn̄ inamke ndịbe ndịbe n̄kpọ ndomokiet m̀mê oro edehede. (Rome 9:1; 2 Corinth 1:12; 4:2; 7:1) Owo ndomokiet idotke ndise mban̄a otuerọn̄ Abasi ibọhọke enye ọsọn̄ọ eyịre ke akpanikọ ye ke mme edumbet Abasi.

Wụk Ntịn̄enyịn ke Mme N̄kpọ Ẹnamde Mbiowo Ẹdot

15. Mme n̄kpọ ẹnamde mmanie ẹdot ke ẹwụk ntịn̄enyịn idahaemi, ndien emi akpan akpan ẹsịne nso?

¹⁵ Ndusụk n̄kpọ ẹnamde owo odot ẹnyene mbiowo akpan akpan ẹnyụn̄ ẹnyene n̄kpọ ndinam akamba akamba utom mmọ nte mme ọbọkerọn̄ ye mme andikpep. Nte Christian eren, ndi afo omosịm mme n̄kpọ oro ẹyomde mi?

16. (a) Nso ke ẹyom man owo edi owo emi enyenede eti edu? (b) Didie ke ebiowo okpowụt mfara ke idem?

¹⁶ Enyene eti edu; afara ke idem. (1 Timothy 3:2; Titus 1:8) Ebiowo ekpenyene ndifara ke idem, idụkke ufụn inọ ndiọi edu. Ke ini enye osobode n̄kpọsọn̄ idaha, Abasi eyen̄wam enye ndida ukem ukem edieke enye ọbọn̄de akam nte andiwet psalm ọkọbọn̄de ete: “Ndutụhọ esịt mi omokpon: sio mi ke nnanenyịn mi.” (Psalm 25:17) Esenyịn n̄ko ekpenyene ndibọn̄ akam nyom spirit Abasi nnyụn̄ nsion̄o mbun̄wụm esie, esịnede mfara ke idem. (Luke 11:13; Galatia 5:22, 23) Ndikpeme mme ekikere, ikọ, ye edinam an̄wam ebiowo ndifep mme ebe ubọk edinam nte enye ọnọde esop ndausụn̄ eke spirit.

17. Owo ndinyene eti ibuot abuana nso?

¹⁷ Enyene eti ibuot. (1 Timothy 3:2) Ana ebiowo enyene ifiọk, ọniọn̄, ye asian. Enye ekpenyene ndinyene uduak ye ifiọk ke ikọ ye edinam. Sụn̄sụn̄ edu, ye ekikere esie oro adade ukem ukem ọkọn̄ọ ke ifiọk Abasi ye nti ukpepn̄kpọ Ikọ Jehovah, emi anade enye edi ifịk ifịk eyen ukpepn̄kpọ.​—Rome 12:3; Titus 2:1.

18. Nditịm nsan̄a oyom nso oto ebiowo?

¹⁸ Otịm asan̄a. (1 Timothy 3:2) Ẹkabade ikọ Greek oro ẹdade mi nte “nditịm ọfọn” ke 1 Timothy 2:9, NW. Ntre akpana ebiowo enyene eti usụn̄uwem oro otịmde ọfọn. Ke uwụtn̄kpọ, enye ekpenyene ndika n̄kpọ ke ini. Mme Christian akpa isua ikie nte an̄wan̄ade ikanamke utịm n̄wetnnịm n̄kpọ nnịm edi akpan n̄kpọ, ndien iyomke esenyịn mfịn edi ata-abatokụk m̀mê ata-ewetn̄wed. Mme asan̄autom unamutom ẹkeme ndise mban̄a mme n̄kpọ ẹyomde ke mme afan̄ ẹmi. Edi ikọ Greek oro adade ọnọ “otịmde asan̄a” ekeme ndiwọrọ eti edu uwem, ndien ke akpanikọ erenowo ikpodotke ndidi ebiowo edieke enye ọsọn̄de ibuot m̀mê asan̄ade otịme otịme.​—1 Thessalonica 5:14; 2 Thessalonica 3:6-12; Titus 1:10.

19. Ke ntak enye akamade isenowo, nso ke ebiowo anam?

¹⁹ Akama isenowo. (1 Timothy 3:2; Titus 1:8) Ebiowo ‘etiene usụn̄uwem ntatido.’ (Rome 12:13; Mme Hebrew 13:2) Ikọ Greek oro adade ọnọ “ndikama isenowo” ke ata ata usụn̄ ọwọrọ “ndidara isenowo.” Ntem, ebiowo oro akamade isenowo esidara mbufa owo oro ẹdide mme mbonoesop Christian, owụtde mbon unana ukem udọn̄ oro enye esiwụtde mme ẹnyene n̄kpọ owo. Enye akama mbon oro ẹsan̄ade-san̄a kaban̄a mme ufọn Ido Ukpono Christ isen onyụn̄ osio mmọ unyọn̄ “nte odotde owo Abasi ndinam.” (3 John 5-8) Ke akpanikọ, ebiowo akpan akpan eyewụt ekemmọ mme andinịm ke akpanikọ ntatido nte ekemde ye se mmọ ẹyomde ye nte mme idaha esie onyịmede.​—James 2: 14-17.

20. Ke mme usụn̄ ewe ke ana ebiowo odot ndikpep owo n̄kpọ?

²⁰ Odot ndikpep owo n̄kpo. (1 Timothy 3:2) Ukeme ebiowo nte andikpep eke spirit itoho ukeme ifiọkibuot m̀mê ifiọk ererimbot. (1 Corinth 2:1-5, 13) Emi oto enye “ndisọn̄ọ mmụm ikọ akpanikọ eke ẹkekpepde enye [“ikọ akpanikọ nte ekemde ye ido ukpepn̄kpọ esie,” NW ], man ekeme ndida eti ukpepn̄kpọ oro nteme mme owo, nnyụn̄ n̄kan mmọ eke ẹwanade ye enye.” (Titus 1:9; men Utom 20:18-21, 26, 27 domo.) Ana enye ekeme “ndida ata nsụkesịt nnam mmọ eke ẹbiọn̄ọde ẹnen̄ede ẹsan̄a.” (2 Timothy 2:23-26) Idem edieke ebiowo mîdịghe mfọn n̄kan ọnọ utịn̄ikọ an̄wa ke esop, enye ekpedi utọ eti eyen ukpepn̄kpọ Ikọ Abasi emi enyenede ifiọk ekem nditeme nnyụn̄ nnọ mme andinịm ke akpanikọ ẹmi n̄ko ẹsikpepde Bible, item. (2 Corinth 11:6) Ana enye odot ndinọ “eti ukpepn̄kpọ” oro an̄wamde mme ubon ye owo kiet kiet ndibịne mme ido Abasi.​—Titus 2:1-10.

21. (a) Ntak ekemede ndidọhọ nte ke ebiowo idịghe owo mfiomo-o? (b) Ndidi sụn̄sụn̄ owo ọwọrọ nso? (c) Nditre ndidi owo utọk ọwọrọ nso?

²¹ Idịghe owo mfiomo; edi enyene ndidi sụn̄sụn̄ owo, emi mîdịghe owo utọk. (1 Timothy 3:3; Titus 1:7) Ke nditie emem emem, ebiowo idiyịbike mme owo ata ediyeyịbe m̀mê ndidịghe mmọ ke esuene esuene ye uyat uyat ikọ. (Men 2 Corinth 11:20 domo.) (Se ẹketịn̄de mbemiso nte ke enye “ikpedịghe owo mmịn” owụt ete ke enye etre ndida n̄kpọsọn̄ mmịn ke idiọk usụn̄ oro esiwakde ndida n̄kosụn̄ọ ke eneni.) Ke nditie “sụn̄sụn̄” (m̀mê, “ndinyịme nnọ”), idịghe nditie ukara ukara onyụn̄ ọsọn̄ owo ndinem enye esịt, enye inamke ikọ ke n̄kpri n̄kpọ. (1 Corinth 9:12; Philippi 4:5; 1 Peter 2:13) Sia ebiowo mîdịghe owo utọk ye owo en̄wan, enye eyetre mme utọk inyụn̄ ‘isọpke iyatesịt.’​—Titus 3:2; James 1:19, 20.

22. Akpanikọ oro nte ke inaha ebiowo edi owo itụn owụt nso?

²² Inyeneke ndidi owo itụn. (Titus 1:7) Ke ata ata usụn̄, emi ọwọrọ “idịghe oyom inemesịt idemesie.” (Men 2 Peter 2:18 domo.) Inaha ebiowo etie nsọn̄ido nsọn̄ido edi ekpenyene ndiwụt ekikere nsụhọdeidem kaban̄a ukeme esie. Sia mîkereke ke imọ imese iban̄a mme n̄kpọ ọfọn akan owo en̄wen, enye ke nsụhọdeidem abuana mbiomo ye mbon en̄wen onyụn̄ ada ediwak mbonitem ke ọsọn̄urua n̄kpọ.​—Numbers 11:26-29; Mme N̄ke 11:14; Rome 12:3, 16.

23. (a) Didie ke afo akpanam owo “ama eti ido an̄wan̄a”? (b) Ndinyene edinen ido ọwọrọ nso?

²³ Ama eti ido; enyene edinen ido. (Titus 1:8) Man odot nte ebiowo, ana erenowo ama eti ido onyụn̄ enyene edinen ido. Ama eti ido esima se inende ke enyịn Jehovah, anam nti utom onyụn̄ ọnọ un̄wam, onyụn̄ owụt esịtekọm aban̄a nti ido mbon en̄wen. (Luke 6:35; men Utom 9:36, 39; 1 Timothy 5:9, 10 domo.) Ndinyene edinen ido ọwọrọ ndinam n̄kpọ ekekem ye mme ibet ye mme edumbet Abasi. Ke otu n̄kpọ en̄wen, utọ owo oro iten̄eke owo enyịn onyụn̄ enyene mme n̄kpọ oro ẹnende, ẹsanade, ẹnyụn̄ ẹnyenede eti ido ke ekikere. (Luke 1:6; Philippi 4:8, 9; James 2:1-9) Sia eti ido okpụhọrede ye edinen ido ke ntak enye akade anyan akan se unenikpe oyomde, ama eti ido anam se ikande mme n̄kpọ oro ẹyomde ẹto enye ọnọ mbon en̄wen.​—Matthew 20:4, 13-15; Rome 5:7.

24. Ndinam akpanikọ oyom nso?

²⁴ Anam akpanikọ. (Titus 1:8, NW) Erenowo oro odotde ndidi ebiowo ana esisọn̄ọ omụm uten̄e oro n̄kpọ mîbahakede emi enye enyenede ọnọ Abasi onyụn̄ ọsọn̄ọ eyịre ke ibet Abasi, inamke n̄kpọ adan̄a nte ẹsịnde nsọn̄ọnda esie ke udomo. Enye anam se Jehovah oyomde oto enye, ndien emi esịne edinam utom nte anam-akpanikọ ọkwọrọ Obio Ubọn̄.—Matthew 24:14; Luke 1:74, 75; Utom 5:29; 1 Thessalonica 2:10.

Ndisịm Mme N̄kpọ oro Ẹnamde Owo Odot

25. Ẹyom mme n̄kpọ ẹnamde owo odot oro ẹsụk ẹnemede mi ẹto mmanie, ndien didie ke ekeme ndisịm mme uto n̄kpọ ntre?

²⁵ Ekese n̄kpọ oro ẹnamde owo odot oro ẹsụk ẹnemede mi ẹsịne mme n̄kpọ oro ẹyomde ẹto kpukpru Mme Ntiense Jehovah ndien ẹnyene mmọ ẹto edidiọn̄ oro Abasi ọdiọn̄de ukpepn̄kpọ, ukeme, eti ebuana, ye akam owo kiet kiet. Owo kiet kiet ekeme ndisọn̄ idem ke ndusụk n̄kpọ ẹmi ẹnamde owo odot akan nte ọsọn̄de ke mmọ eken. Edi ke udomo oro owụtde eti ibuot, mme asan̄autom unamutom ye mbiowo ana ẹsịm kpukpru n̄kpọ oro ẹyomde akpan akpan ke ifetutom mmọ.

26. Ntak emi Christian irenowo ẹnọde idemmọ unyịme unyịme ndibiom mbiomo esop-e?

²⁶ Kpukpru Mme Ntiense Jehovah ẹkpeyom ndinam kpukpru se ekekeme ke utom Abasi. Edu emi onụk Christian irenowo ndinọ idemmọ unyịme unyịme ndibiom mbiomo esop. Nte afo edi erenowo oro ama akayak idem ọnọ, onyụn̄ ana baptism? Ke edide ntre, nyanade bịne nyụn̄ nam ofụri se ekemede ndidot ndinam utom!

[Mme Ikọ Idakisọn̄]

Didie Ke Afo Ọkpọbọrọ?

◻ Ntak enen̄erede oyom ẹnyene irenowo oro ẹnade baptism idahaemi ndinyịme ndibiom mbiomo esop-o?

◻ Nso idi mme n̄kpọ ẹnamde owo odot oro anade mme asan̄autom unamutom ẹsịm?

◻ Nso idi ndusụk n̄kpọ ẹyomde oro anade mbiowo ẹsịm?

◻ Ntak anade ebiowo ọfiọk ndikama ufọk esie nte ọfọnde-e?

◻ Nso n̄kpọ inụk Christian irenowo ndinọ idemmọ unyịme unyịme ndibiom mbiomo esop?

[Ndise ke page 24, 25]

Mbiowo ye mme asan̄autom unamutom ẹkpenyene ndikama ufọk mmọ nte ekemde ye mme edumbet Bible