Uwem ye Utom Jesus

“Enye Edue Isop N̄kpa”

ẸBỌP Jesus nte usụhọde anamidiọk ẹda ẹka iso Annas, kpa enyene-odudu akani akwa oku. Annas ekedi akwa oku ke ini Jesus nte eyenọn̄wọn̄ isua 12 akanamde idem akpa mme andikpep ke temple. Ediwak nditọ Annas ke ukperedem ẹma ẹnam utom nte akwa oku, ndien idahaemi Caiaphas, ebe eyen esie, akama itieutom emi.

Iso-ọfọn ẹbemiso ẹda Jesus ẹka ufọk Annas ke ntak uwọrọiso oro akwa oku emi enyenede ke anyanini ke uwem ido ukpono mme Jew. Ediwaha emi man ẹkụt Annas anam ini odu ọnọ Akwa Oku Caiaphas ndinam Sanhedrin osobo idem, kpa esop enyọn̄ mme Jew oro enyenede mme andibuana 71, ọkọrọ ye edikọ mme ntiense nsu mbon.

Idahaemi ọbọn̄ oku Annas obụp Jesus aban̄a mme mbet esie ye se enye ekpepde owo. Nte ededi, Jesus ke ibọrọ ọdọhọ ete: “Ami n̄ketetịn̄ n̄kpọ nnọ ererimbot an̄wan̄wa; n̄kọnọ ukpepn̄kpọ kpukpru ini ke synagogue ye ke temple, emi kpukpru mme Jew ẹkam ẹdide ẹdisobo do; n̄konyụn̄ ntịn̄ke baba n̄kpọ kiet ke ndịbe. Nsinam obụpde Mi? Bụp mmọemi ẹkopde ikọ Mi, m̀mê ntịn̄ nso nnọ mmọ. Sese, mmọ ẹfiọk se nsitịn̄de.”

Ke etịn̄de ntem, asan̄autom kiet emi adade ekpere Jesus oyịbi enye ufia ke iso, ete: “Nte ọbọrọ akwa oku ikọ ntre?”

Jesus ọbọrọ ete, “Edieke n̄ketịn̄de se idiọkde, wụt idiọk oro: edi edieke n̄ketịn̄de se inende, nsinam oyịbide Mi?” Ke emi ebede, Annas ọnọ Jesus ye urụk ẹda ẹsọk Caiaphas.

Etisịm idahaemi kpukpru ikpọ oku ye mbiowo ye mme scribe, ih, ofụri Sanhedrin, ke ẹtọn̄ọ ndisobo idem. Itie mbono mmọ ke akpanikọ edi ufọk Caiaphas. Nte ededi, ndinịm utọ ikpe oro okoneyo usen Passover nte an̄wan̄ade amatuaha ye ibet mme Jew. Edi emi ikpanke mme adaiso ido ukpono ndinam idiọk uduak mmọ.

Mi kan̄a, ediwak urua ke mbemiso, ke ini Jesus akanamde Lazarus eset ke n̄kpa, Sanhedrin ama ebiere ke otu idemmọ ẹte ke enye enyene ndikpa. Ndien n̄kpasịp usen iba ke mbemiso, ke Wednesday, mme adaiso ido ukpono ẹma ẹsop ibuot man ẹmụm Jesus ke n̄kari ẹwot. Kamse, ẹma ẹbobiom enye ikpe mbemiso ẹdade enye ẹka ikpe!

Ke ẹsịn ukeme kemi ndikụt mme ntiense ẹmi ẹdinọde ikọ ntiense nsu man ikpe ekpetịp Jesus. Nte ededi, mmọ ikwe mme ntiense ẹmi ikọ ntiense mmọ ẹdude ke n̄kemuyo. Ke akpatre, owo iba ẹwọrọ ẹdi ẹnyụn̄ ẹdọhọ ẹte: “Nnyịn ikokop nte enye ọdọhọde ete, Nyewụri temple emi ẹdade ubọk ẹbọp, ndien ke usen ita nyebọp efen emi [owo] mîdaha ubọk ibọp.”

Caiaphas obụp ete, “Nte ubọrọke ikọ? Nso idi emi eke mmọ oro ẹtịn̄de ẹdian Fi?” Edi Jesus isioroke uyo. Idem ke nsunsu edori ikọ emi, ke edide n̄kpọ esuene ọnọ Sanhedrin, mme ntiense ẹmi ikemeke ndinam mbụk mmọ ẹsan̄a kiet. Ntre akwa oku odomo usụn̄ n̄kari efen.

Caiaphas ọfiọk nte mme Jew ẹsiyatde esịt ye owo ekededi oro ọdọhọde ke idi ata Eyen Abasi. Ke idaha iba ke mbemiso, mmọ ke ibụmede ẹkedọhọ ke Jesus edi owo oro osụn̄ide Abasi onyụn̄ odotde n̄kpa, inikiet ko ẹkerede ke ndudue ẹte ke enye ọkọdọhọ ke imọ idi n̄ka ye Abasi. Caiaphas ke n̄kari obụp idahaemi ete: “Mmowụk Fi ke enyịn̄ Abasi emi odude uwem, nte, asian nnyịn m̀mê afo edi Christ, Eyen Abasi.”

Sededi oro mme Jew ẹkerede, Jesus ke akpanikọ edi Eyen Abasi. Ndien ndidop uyo ekeme ndiwọrọ ke enye akakan̄ idaha esie nte Christ. Ntre Jesus ọbọrọ uko uko ete: “Ndi Enye; mbufo ẹyenyụn̄ ẹkụt nte Eyen Owo etiede ke ubọk nnasia Odudu, onyụn̄ edide ke ikpaenyọn̄ heaven.”

Ke emi, Caiaphas, ke ndinanam n̄wụt, awai ekụra esie, onyụn̄ ofiori ete: “Enye ama etịn̄ n̄kpọ esuene Abasi: nnyịn iyom nso aba ye ntiense? Sese, mbufo ẹmekop ikọ esuene eke Enye etịn̄de. Mbufo ẹse didie?”

“Enye edue isop n̄kpa,” ntre ke Sanhedrin ọbọrọ. Ekem mmọ ẹtọn̄ọ ndida enye nnam mbubru ndien mmọ ẹtịn̄ ediwak ikọ isụn̄i ẹdian enye. Mmọ ẹyịbi enye ufia ẹnyụn̄ ẹtọ enye etap ke iso. Mbon eken ẹda n̄kpọ ẹfụk enye ofụri iso ẹnyụn̄ ẹtọn̄ọ enye ita ẹnyụn̄ ẹtịn̄ ikọ ebiari ẹte: “Siak enyịn̄ owo emi oyịbide Fi, O Christ.” Esuene emi, ye edinam oro mîkemke ye ibet mi ada itie ke ini ikpe okoneyo oro. Matthew 26:57-68; 26:3, 4; Mark 14:53-65; Luke 22:54, 63-65; John 18:13-24; 11:45-53; 10:31-39; 5:16-18.

◆ M̀mọ̀n̄ ke ẹbemiso ẹda Jesus ẹka, ndien nso itịbe inọ enye do?

◆ M̀mọ̀n̄ ke ẹfiak ẹda Jesus ẹka, ndien kaban̄a nso uduak?

◆ Didie ke Caiaphas ekeme ndinam Sanhedrin ọtọt ete ke Jesus odot ndikpa?

◆ Nso esuene ye edinam oro mîkemke ye ibet ada itie ke ini ikpe emi?