Ẹsịn Idem Ẹbịne Utịtmbuba Oro!
Mme Akpan N̄kpọ Ẹtode N̄wed Mbon Philippi
APOSTLE Paul okoyom mme Christian ke Philippi ẹka iso ẹsịn idem ẹbịne utịtmbuba edide utịp nsinsi uwem. Ntem, enye ekewet n̄wed ọnọ ẹsọk mmọ ke n̄kpọ nte 60 m̀mê 61 C.E., ke akpa n̄kpọkọbi esie ke Rome. Ẹkenọ n̄wed esie ẹsọk esop emi enye ọkọtọn̄ọde ke n̄kpọ nte isua duop ke edem ke Philippi, kpa obio emi Philip eke Macedon (ete Akwa Alexander) akasiakde. Etisịm akpa isua ikie C.E., enye ama akabade edi ‘ebeiso obio ke edem Mecedonia,’ idahaemi edide ubak edem edere Greece ye edem usụk Yugoslavia.—Utom 16:11, 12.
Mme andinịm ke akpanikọ ẹtode Philippi ẹkedi ubuene edi ẹtat ubọk. Ke se ibede inikiet, mmọ ẹma ẹnọ n̄kpọ ndiyụhọ udọn̄ Paul. (Philippi 4:14-17) Edi n̄wed esie ama akan n̄wed ekọm ọ-sọsọn̄ọ. N̄wed oro n̄ko ama ọnọ nsịnudọn̄ owụt ima, onyụn̄ ọnọ item.
Uyarade Mme Edu Christian
N̄wed Paul ọkọtọn̄ọ ye uyarade ima oro enye akamade mme andinịm ke akpanikọ ẹtode Philippi. (1:1-30) Enye ama ọkọm Jehovah aban̄a ẹtịbe mmọ ndinam eti mbụk akaiso onyụn̄ ọbọn̄ akam ete ima mmọ ọkọri. Paul ama enem esịt nte n̄kpọkọbi esie akanamde mmọ “ẹsọn̄ esịt ẹkaha etịn̄ ikọ Abasi ye uko, ẹnana ndịk.” Enye ama enyene udọn̄ ndidu ye Christ edi ama ọdọn̄ enye nte ikemede ndinam n̄kpọ mmọ kan̄a. Paul n̄ko ama oyom mmọ “ẹda esịt kiet ẹn̄wana ẹn̄wan ẹban̄a mbuọtidem emi odude ke gospel.”
Se itienede ekedi item ke edu ye edinam. (2:1-30) Ẹma ẹsịn udọn̄ ẹnọ mbon Philippi ndiwụt ọkpọ ọkpọ udọn̄ ke idem mmọ en̄wen ndinyụn̄ nnyene nsụhọdeidem ukem nte Christ. Mmọ ẹkenyene ‘ndiyama nte ntantaọfiọn̄ ke ererimbot’ ẹkenyụn̄ ẹkpak mmọ ndikaiso “nsọn̄ọ mmụm ikọ uwem n̄kama.” (NW) Paul ama odori enyịn ndidọn̄ Timothy edi ke ọtọ mmọ okonyụn̄ onịm ke imọ iyewara idi ke idem imọ. Man afiak ọsọn̄ọ mmọ idem aban̄a Epaphroditus, emi ọkọdọn̄ọde etieti, Paul ama ọnọ anam akpanikọ asan̄autom emi aka ebịne mmọ.
Ẹkaiso Ndisịn Idem Mbịne Utịtmbuba Oro
Ekem apostle oro ama owụt mbon Philippi ebiet emi mmọ ẹkpekọn̄de mbuọtidem mmọ nte mmọ ẹsịnde idem ẹbịne utịtmbuba oro. (3:1-21) Ẹkpenyene ndikọn̄ mbuọtidem ke Jesus Christ, idịghe ke obụkidem m̀mê mbobi nte ndusụk mmọ ẹkenamde. Paul akabat mme n̄wed itoro obụkidem oro enye ekenyenede ke mbio ke ntak “akan ifiọk Christ.” Apostle oro ke ‘ekesịn ifịk akaiso ebịne utịtmbuba, man ọkpọbọ utịp akwa ikot eke Abasi okokotde enye ke Christ Jesus’ onyụn̄ esịn udọn̄ ọnọ mbon Philippi ndinyene ukem edu oro.
Ndida akpatre item Paul emi nsịn ke edinam eyen̄wam mbon Philippi ndinịm utịtmbuba ye utịp oro ke ekikere. (4:1-23) Enye ama akpak mmọ ndiyak editịmede esịt mmọ nnọ Abasi ke akam nnyụn̄ nyọhọ esịt mmọ ye nti ekikere. Paul ama afiak otoro mmọ aban̄a ntatubọk mmọ onyụn̄ etre ye ekọm ye eben̄e nte mfọn Ọbọn̄ Jesus Christ oro owo mîdotke odu ye spirit oro mmọ ẹwụtde.
N̄wed oro Paul ekewetde ọnọ ẹsọk mbon Philippi esịn udọn̄ ọnọ ntatubọk, ima, ye nsụhọdeidem. Enye esịn udọn̄ ọnọ mbuọtidem ke Christ ye edibọn̄ akam ke ofụri esịt nnọ Abasi. Ikọ Paul ke akpanikọ ẹnyụn̄ ẹn̄wam Mme Ntiense Jehovah ndikaiso nsịn idem mbịne utịtmbuba edide utịp nsinsi uwem.
[Ekebe/Ndise ke page 25]
Ndibịne Utịtmbuba: Paul ekewet ete, “Mfefre se idude mi ke edem, nnyụn̄ nnyanade mbịne se inade mi ke iso; mmesịn ifịk n̄kaiso mbịne utịtmbuba, man n̄kpọbọ utịp akwa ikot eke Abasi okokotde mi ke Christ Jesus.” (Philippi 3:13, 14) Apostle oro ekesịn̄ede idemesie nte owo emi efehede mbuba. Enye ikabiatke ini ye ukeme ndise edem edi ekesịn idem ebịne utịtmbuba esie—nte efehe mbuba anyanarede ndibe akpatre urụk. Ye Paul ye mme Christian eken oro ẹyetde aran, utịp oro ekedi uwem eke heaven ebe ke ediset ke n̄kpa ke ẹma ẹkekụre utom mmọ ke isọn̄ ke edinam akpanikọ nnọ Abasi. Edide idotenyịn nnyịn edi eke heaven m̀mê eke isọn̄, ẹyak nnyịn imụm nsọn̄ọnda nnyịn ye Jehovah ikama inyụn̄ isịn idem ibịne utịtmbuba oro nte Mme Ntiense esie.—2 Timothy 4:7.