Didie ke Nnyịn Ikeme Ndinam N̄kpọ ye Unana Ibụk Mban̄a Ima Abasi?
“Edieke Abasi akamade nnyịn ntem, nnyịn nde ikpama kiet eken.”—1 JOHN 4:11.
1, 2. Nso ke ẹyom ẹto nnyịn man inam n̄kpọ ye unana ibụk iban̄a mme uyarade ima Abasi?
JEHOVAH edi ata uwụtn̄kpọ ima. Ke akpanikọ, ke ibuotikọ oro ekebemde iso, nnyịn ima ikụt adan̄a nte uyarade ima esie ẹtịmde ẹwak. Nnyịn ima ikụt n̄ko nte Moses, David, ye Jesus Christ ẹkenamde n̄kpọ ye unana ibụk ẹban̄a mme uyarade ima oro. Nte owo Ntiense Jehovah kiet kiet ikpanamke kpa ntre? Ke akpanikọ akpanam!
2 Nso ke ẹyom edieke anade nnyịn inam n̄kpọ ye unana ibụk iban̄a mme edinam ima Abasi? Akpa kan̄a, ana nnyịn inọ enye akpa itie ke uwem nnyịn, imade enye ke ofụri esịt, ukpọn̄, ekikere, ye odudu nnyịn. (Mark 12:29, 30) Oro ọwọrọ ndinam n̄kpọ Abasi, inyenede ọkpọ ọkpọ eti itie ebuana ye Jehovah. Nte ọdọn̄ nnyịn nditịn̄ ikọ nnọ Ete nnyịn eke heaven ke akam? Nte nnyịn imesibọn̄ akam kpukpru ini inyụn̄ ikọbọ ke edibọn̄ akam? Mîdịghe nte nnyịn isibọn̄ akam nnyịn itọk itọk, ndusụk ini inanade ifet ikaha ndibọn̄ akam? (Rome 12:12; 1 Thessalonica 5:17) Nte nnyịn imesiwọn̄ọde ntịn̄enyịn nnyịn iwụt Jehovah, inọde enye ye esop esie itoro ke se nnyịn ikemede ndinam? (1 Corinth 3:7; 4:7) Ke akpanikọ, nte esitie nnyịn ke idem ukem nte eketiede andiwet psalm? Emi enye ọkọdọhọde aban̄a Abasi ete: “Ntoro Fi utịm ikatiaba ke usen.”—Psalm 119:164.
3. Ke ini nnyịn isopde idem ọtọkiet ke edinam otuowo, didie ke nnyịn ikeme ndiwụt nte ke nnyịn ke inam n̄kpọ ye unana ibụk iban̄a ima Abasi?
3 Edide nnyịn imanam n̄kpọ ye unana ibụk iban̄a ima Abasi m̀mê inamke, emi ekeme nditịm n̄wụt idem ke ini nnyịn isopde idem ọtọkiet ke edinam mboho otuowo. Nte nneme nnyịn adan̄aoro esikọn̄ọ ke mbubehe utom idịbi udia m̀mê mme n̄kpọ eke spirit? Emi iwọrọke ite ke ana nnyịn isinyene ata ukpepn̄kpọ Bible kpukpru ini emi nnyịn isopde idem ọtọkiet ye ekemmọ mme Christian. Edi ke akpanikọ nnyịn imekeme ndinyene ndusụk inem inem n̄kpọ eke spirit ndibuan ke nneme nnyịn. Nso kaban̄a edinọ mme ifiọkutom an̄wautom, edineme itien̄wed Bible oro imade ikan, inemede iban̄a nte nnyịn ikọbọde akpanikọ, m̀mê isiakde mme uyarade ima ima ukpeme ye edidiọn̄ Abasi?
4. Didie ke nnyịn ikpese n̄kpọ edieke ẹkpude nnyịn ke se iban̄ade ndusụk ifetutom?
4 Idaha en̄wen oro ẹkemede ndiyarade udomo esịtekọm oro nnyịn inyenede iban̄a ima Abasi edi ke ini ẹfụmide ndinọ nnyịn ndusụk ifetutom ke esop Jehovah. Didie ke nnyịn isinam n̄kpọ? Edieke akpan udọn̄ nnyịn edide ndikpono Jehovah, nnyịn iyenyịme ite ke anaedi owo ekededi oro enyenede ifetutom oro eyekpono Abasi ukem ntre. (Men Luke 9:48 domo.) Edi edieke nnyịn ikerede iban̄a ufọn m̀mê enyịn̄ idem nnyịn nte mîdotke, nnyịn iyekop mfụhọ, ikerede ite ke ẹfụmi nnyịn. Nnyịn ikpenyene nditi nte ke Jehovah ama nnyịn onyụn̄ ekeme idem ndifiọk ke nnyịn kan̄a kemi ikemeke ndibiom ndusụk ndodobi mbiomo ifetutom ukara Abasi. Enye ekeme ndidiọn̄ nnyịn uwak uwak ke mme usụn̄ en̄wen, ndien mme utọ uyarade ima esie emi ẹkpenyene ndin̄wam nnyịn imụm edida ukem ukem nnyịn ke n̄kan̄ eke spirit ikama.—Mme Nke 10:22!
Ndima se Inende, Ndisua se Ikwan̄ade
5. Uyarade ima Abasi ẹkpenyene nso odudu ke eduuwem nnyịn?
5 Mme uyarade ima Abasi kaban̄a nnyịn ẹkpenyene ndinụk nnyịn ndikpebe Christ ke ndima se inende nnyụn̄ nsua se ikwan̄ade. (Mme Hebrew 1:9) Edi akpanikọ, nnyịn ikemeke ndinam emi ke mfọnmma usụn̄, nte Jesus akanamde. Edi imekeme ndinam edi utịtmbuba nnyịn ndisana, ndinam akpanikọ, nnyụn̄ nnịm ewụhọ nte ikekeme ke idaha unana mfọnmma nnyịn. Man inam emi, inaha nnyịn ikọri ima inọ se inende ye nti n̄kpọ ikpọn̄îkpọn̄, edi n̄ko ndikọri usua, unana udọn̄, edu itekesịt, nnọ se idiọkde. Kpa nte apostle Paul ekewetde ete: “Ẹsua se idiọkde; ẹyịre se ifọnde.” (Rome 12:9b) “Ẹsua” edi ata ọkpọsọn̄ ikọ, ọwọrọde “edida ke ata n̄kpọ itekesịt.”—Webster’s New Collegiate Dictionary.
6. Nso idin̄wam nnyịn ndibiọn̄ọ mme idomo ẹmi ererimbot, anamidiọk ikpọkidem nnyịn, ye Devil ẹdade ẹtiene nnyịn?
6 Nso idin̄wam nnyịn ndibiọn̄ọ mme idomo oro ererimbot, anamidiọk ikpọkidem nnyịn, ye Devil ẹdade ẹtiene nnyịn? Ndinam akpanikọ nnọ Jehovah Abasi. Enye ekpe nnyịn ubọk ete: “Eyen mi, nyene ibuot, nyụn̄ dat mi esịt, man n̄kụt se ndibọrọde owo eke osụn̄ide mi.” (Mme Nke 27:11) Ih, ndinam akpanikọ nnọ Jehovah eyenụk nnyịn ndimek usụn̄ ọniọn̄ ke ndisua se enye asuade. Akande oro, ekpedi edibiat kiet ke otu ibet Abasi etie nte ọnọ inemesịt m̀mê aduai owo idem nte adaduai, ana nnyịn ikaiso itịn̄ inọ idem nnyịn nte ke edinam ntre ikam idotke. (Galatia 6:7, 8) Esịt owo abian̄a, akwan̄a, akama n̄kari, idem nte ẹtịn̄de ẹnọ nnyịn ke Jeremiah 17:9. Esịt Christian esima nti, ndiye, ndisana n̄kpọ. Edi ndusụk ini ntụk idiọkn̄kpọ esinam enye enyene udọn̄ n̄ko aban̄a se idiọkde. Ukem nte esịt nditọ Israel emi ẹketuakde ibuot ẹnọ Jehovah edi ẹsụk ẹnịmde “edikon̄ ebiet” ukpono ndem mmọ, ntre esịt nnyịn ekeme nditie ibụk ibụk onyụn̄ enyene n̄kari. (1 Ndidem 22:43; Deuteronomy 12:2) Esịt unana mfọnmma nnyịn ekeme ndiyom mme ntak nnọ man ada nnyịn esịn ke idomo. Enye ekeme ndidomo nditehede ube idiọk edinam ẹmi ẹdade ẹdomo nnyịn mi. Mîdịghe esịt nnyịn ekeme ndidomo ndinam nnyịn inịm ite ke ufen ekededi oro idibọde edidi ke ekpri ibio ini kpọt.
7. Ntak anade nnyịn idu ke ukpeme mbak idinyene udọn̄ ke se idiọkde-e?
7 Ke ntak esịtekọm oro inyenede inọ ima Abasi, ana nnyịn idu ke ukpeme mbak idinyene udọn̄ iban̄a se idiọkde, utọ nte ediyak idem nnọ oburobụt ido idan̄, edide nnyịn idi mbon oro mîdọhọ ndọ m̀mê mme ọdọ ndọ. Ediwak ini, mbre ye owo isio uduot oro ọkọtọn̄ọde nte n̄kpọ oro mîkemeke ndinọ unan esisụn̄ọ ke Christian iba ndinyene ọkpọsọn̄ udọn̄ ke idem kiet eken tutu eyedi se mmọ ẹnamde idiọkn̄kpọ ẹnyụn̄ ẹdide se ẹbịnde ẹfep. Idem mbiowo, ẹmi ẹkpedide uwụtn̄kpọ emi owo mîdorike ikọ ẹnọ otuerọn̄, ẹmesobo mfịna ke ntak n̄kpọ emi! Men 1 Ndidem 15:4, domo.
8. Nso ntọt uwụtn̄kpọ ke apostle Paul ọnọ nnyịn, ndien didie ke ẹkeme ndinam utọ mfịna oro an̄wan̄a?
8 Kere ban̄a apostle Paul, emi ẹkedade n̄kukụt ye odudu emi akande eke owo ẹdiọn̄ ye ẹnọ odudu spirit Abasi. Man akan ke en̄wan oro enye akan̄wanade ye mme ntụhọ idiọkn̄kpọ, akana enye ọtọn̄ọ idemesie ita—ih, amia idemesie—idiọk idiọk. Nte nnyịn imenyene uko ikem ndinam se mîsụhọkede ikan oro? (Rome 7:15-25; 1 Corinth 9:27) Ekpetie nte n̄kpọ eke nnyịn isịnede ke ekpri ubom ke nsọsọp akpa inyan̄ibom emi onyụn̄ odụride nnyịn aka idon̄ode mmọn̄ esie. Man ibọhọ afanikọn̄, ana nnyịn iwat odudu odudu ibiọk usọpmmọn̄ oro. Ekeme nditie nte ke nnyịn inamke ekese n̄kọri, edi adan̄a nte nnyịn ikade iso ndisịn̄ede idem nnyịn ọkpọsọn̄ ọkpọsọn̄, udem oro idimenke nnyịn isụhọde ke nsobo. Ke akpanikọ, mme uyarade ima oro Jehovah Abasi amade nnyịn ekpenyene ndinam nnyịn isịn̄ede idem ọkpọsọn̄ ọkpọsọn̄ ndinam akpanikọ nnọ enye ke ndisua se ikwan̄ade nnyụn̄ mma se inende.
Wụt Ima Nditọete
9. Nso item ke apostle John ọnọ kaban̄a edima nditọete nnyịn?
9 Uyarade ima Abasi ekpenyene ndinụk nnyịn ndima nditọete nnyịn n̄ko ukem nte Jesus Christ akamade mme mbet esie. (John 13:1) Nte otịmde odot, apostle John ọdọhọ ete: “Ima odu ke orụk usụn̄ emi, itoho ke emi nnyịn ikamade Abasi, edi oto ke emi Abasi akamade nnyịn, onyụn̄ osiode Eyen Esie ọdọn̄, ete, edidi usio isop mme idiọkn̄kpọ nnyịn. Ndima, edieke Abasi akamade nnyịn ntem, nnyịn nde ikpama kiet eken.” (1 John 4:10, 11) Ke akpanikọ, Jesus ọkọdọhọ ete ke usụn̄ oro ẹkemede ndifiọk mme ata anditiene imọ edi ke ima oro mmọ ẹnyenede ke otu idemmọ.—John 13:34, 35.
10, 11. Nso idi ndusụk usụn̄ emi nnyịn ikemede ndiwụt ima nditọete?
10 Nnyịn imọfiọk ite ke mme Christian ẹkpenyene ndiwụt ima nditọete. Edi idiọkke nditi idem nnyịn mban̄a nsio nsio usụn̄ emi nnyịn ikemede ndiwụt kiet eken mbiet ima Christ emi. Utọ ima oro eyen̄wam nnyịn ndifụmi utọk aban̄ade orụk, idụt, ifiọkn̄wed, ido obio, idaha ke ndutịm uforo. Akande oro, ima nditọete eyeda nnyịn adian ọtọkiet ke mme mbonoesop. Edieke nnyịn imade nditọete nnyịn ke akpanikọ, nnyịn idiyakke idiọk enyọn̄ m̀mê ekpri mfịna ikpọkidem anam nnyịn itaba idara edisobo ye mmọ nnyụn̄ mbuana nsịnudọn̄ edem mbiba. (Rome 1:11, 12) Ke akande oro, ima nditọete eyenam nnyịn itịm idem mfọn mfọn inọ mme mbonoesop inyụn̄ inyene ufiop ufiop ebuana man ikpekeme ndidemede kiet eken nnọ ima ye nti utom.—Mme Hebrew 10:23-25.
11 Nso kaban̄a edin̄wam nditọete nnyịn ke an̄wautom? Emekụt ẹte ke mbiowo ye mme asan̄autom unamutom ẹsiwak ndisan̄a ye kiet eken ke utom eke ufọk-ke-ufọk m̀mê ke idemmọ ke mmọ ẹkemede, ye ndutịm, ẹsikot mme asuanetop Obio Ubọn̄ ẹmi ẹyomde un̄wam ndisan̄a ye mmọ ke an̄wautom. Ndiwụt ima ke usụn̄ emi eyenọ utom an̄wautom eke mbiowo ye mme asan̄autom unamutom adiana-iba utịp. Ndien nso kaban̄a edida obufa asuanetop n̄ka ukpepn̄kpọ Bible?—Rome 15:1, 2.
12. Didie ke 1 John 3:16-18 akpan̄wan̄a nnyịn?
12 Ima n̄ko eyenam nnyịn in̄wam nditọete nnyịn oro ẹdude ke ata unana ke n̄kan̄ n̄kpọ obụkidem. Apostle John ekewet ete: “Nnyịn ida emi ifiọk ima, koro Enye akayakde uwem Esie ọnọ kaban̄a nnyịn: nnyịn nde ikponyụn̄ iyak uwem nnyịn inọ kaban̄a nditọete. Edi owo eke enyenede inyene ererimbot emi, onyụn̄ okụtde eyenete esie ke unana, onyụn̄ eberide mbọm abaha enye, ima Abasi ekeme didie ndidụn̄ owo oro ke esịt? N̄kpri nditọ mi, ẹyak nnyịn ikûma ke ikọ-inua ye ke edeme, edi ẹyak nnyịn ima ke edinanam ye ke akpanikọ.” (1 John 3:16-18) Ekeme ndidi owo ididọhọke nnyịn iyak uwem nnyịn inọ ke ibuot mmọ idahaemi, edi ndusụk ini imesinyene ifet ndiyarade ima oro imade mmọ ke mme usụn̄ en̄wen, idịghe ke ikọ-inua m̀mê ke edeme kpọt edi n̄ko ke edinam. Idiọkke ndima nditọete nnyịn ke ikọ inua, edi nnyịn iyomke ima nnyịn etre mi ke ini mmọ ẹdude ke unana ke n̄kan̄ n̄kpọ obụkidem. Utịn̄ikọ Jesus oro nte ke “ọfọn ndinọ akan ndibọ” abuana n̄ko edinọ un̄wam ke n̄kan̄ n̄kpọ obụkidem.—Utom 20:35.
13. (a) Nso idi ndusụk n̄wọrọnda akpanikọ ẹmi nnyịn ikpepde ye un̄wam esop Jehovah oro ẹkụtde ke enyịn? (b) Nso akpan n̄kpọ oro enyenede ufọn ke Charles Taze Russell eketịn̄?
13 Nnyịn imenyene ifet ndiwụt ima nnọ nditọete nnyịn oro ẹdade usụn̄ ke esop m̀mê ke ebuana ye esop Jehovah eke ofụri ererimbot oro ẹkụtde ke enyịn. Emi esịne edinam akpanikọ nnọ “asan̄autom emi anamde akpanikọ, onyụn̄ enyenede ọniọn̄.” (Matthew 24:45-47) Eyak nnyịn inyịme akpanikọ oro nte ke ekpedi nnyịn ikot Bible nte ikokot, nnyịn ikpọfiọkke akpanikọ ke idem nnyịn. Nnyịn ikpedịghe idikụt akpanikọ oro aban̄ade Jehovah, mme uduak ye edu esie, se enyịn̄ esie ọwọrọde ye nte edide akpan n̄kpọ, Obio Ubọn̄, ufak Jesus, ukpụhọde oro odude ke ufọt esop Abasi ye eke Satan, m̀mê ntak emi Abasi ayakde idiọk ido odu. Edi ata ukem nte akpa etieibuot Watch Tower Society, Charles Taze Russell, ekewetde ke 1914 ete: “Nte nnyịn idịghe mbon idatesịt oro ẹdiọn̄de? Nte Abasi nnyịn idịghe anam-akpanikọ? Edieke owo ekededi ọfiọkde n̄kpọ eke otịmde ọfọn akan, yak enye anam oro. Edieke edide owo ekededi odu ke otu mbufo oro okụtde n̄kpọ eke ọfọnde, nnyịn imodori enyịn ite ke mbufo ẹyetịn̄ ẹnọ nnyịn. Nnyịn ifiọkke n̄kpọ eke ọfọnde akan m̀mê se ifọnde ke mbahade kiet ke itie iba ikan se ikụtde ke N̄wed Abasi. . . . Idụhe edeme m̀mê eton̄wed ndomokiet emi ekemede ndibụk mban̄a emem, idatesịt ye edidiọn̄ ẹmi in̄wan̄în̄wan̄ ifiọk akpanikọ oro Abasi ọnọde esịt ye uwem nnyịn. Mbụk aban̄ade Ọniọn̄, Unenikpe, Odudu ye Ima Abasi oyụhọ udọn̄ ibuot ye esịt nnyịn ọyọhọ ọyọhọ. Nnyịn iyomke n̄kpọ efen ikan oro. Idụhe n̄kpọ ndomokiet efen oro ikpoyomde ikan ediyak ndyọ ndyọ Mbụk emi esịne ata in̄wan̄în̄wan̄ ke esịt nnyịn.” (Enyọn̄-Ukpeme, Ikọmbakara eke December 15, 1914, page 377-378) Ikọ ẹmi ẹketịmde ẹwet mi ẹdi akpanikọ didie ntem!
Ndikwọrọ Ikọ Nnọ Mbonan̄wa
14. Uyarade ima Abasi ẹkpenụk nnyịn ndinam n̄kpọ didie ye mbonan̄wa?
14 Uyarade ima Abasi emi nnyịn inyenede ekpenyene ndinụk nnyịn ndiwụt ima mbọhọidụn̄ nnọ mbon oro mîdụhe ke esịt esop. Didie ke ikeme ndinam emi? Idaha ẹkeme ndiwụt ke nnyịn imekeme ndin̄wam mme mbọhọidụn̄ nnyịn ke n̄kan̄ eke obụkidem. Edi, ke otịmde edi akpan n̄kpọ akan, nnyịn imekeme ndiwụt ima mbọhọidụn̄ ke ndida eti mbụk Obio Ubọn̄ Abasi nsọk mbon en̄wen nnyụn̄ n̄n̄wam mme ama edinen ido ndikabade ndi mbet Jesus Christ. Ndi imesibuana kpukpru ini ke an̄wa an̄wa utom ukwọrọikọ emi, mîdịghe nte nnyịn ifofụmi enye? Ndi enye amakabade edi ikpîkpu ido edinam m̀mê ekpri uduot utom? Mîdịghe, nte ima mbọhọidụn̄ enen̄ede onụk nnyịn? Nte nnyịn imowụt mbọm? Nte nnyịn imesinyene ime, ibetde mme owo ẹnyene se ẹtịn̄de? Nte nnyịn imesisịn udọn̄ inọ mme enyeneufọk nditịn̄ se idude mmọ ke esịt? Ih, utu ke ndimen kpukpru ntịn̄, ẹyak nnyịn iyak ima mbọhọidụn̄ onụk nnyịn ndikpan̄ utọn̄ nnyụn̄ nnyene nneme Bible oro ọnọde utịp ye mme owo oro isobode ke an̄wautom ukwọrọikọ nnyịn.
15. (a) Ntak emi enyịn̄ oro “ikọ ntiense ido nneme” ọfọnde akan “mbabuat ikọ ntiense”? (b) Ntak emi akpadade ifet emi ebederede ọnọ ikọ ntiense ido nneme-e?
15 Nte nnyịn imodu ke edidemede nte ikpodude man ikpada ifet emi eberede inọ ikọ ntiense ido nneme? Ekpenyene ndifiọk nte ke emi idịghe ikpîkpu mbabuat ikọ ntiense, ọnọde ekikere aban̄a utom oro owo mîtịmke idem m̀mê se mîdịghe akpan n̄kpọ. Ikọ ntiense ido nneme edi ata akpan n̄kpọ, ndien ima emi inyenede inọ ekemmọ owo eyenụk nnyịn ndifet ufan̄ ntiene mbuana ke enye. Utọ ikọ ntiense oro esin̄wụm mfri didie ntem! Ke uwụtn̄kpọ, ke adan̄aemi okodụkde mbono Mme Ntiense Jehovah ke n̄kan̄ edem edere Italy, eyenete kiet ama aka efe udiọn̄ moto ndikpụhọ ikan̄ iso moto. Ke adan̄aemi okosụk ebetde, enye ama ọnọ mbon ẹkedude ẹkpere enye ikọ ntiense onyụn̄ ọnọ mmọ n̄wedikot ndidụk utịn̄ikọ an̄wa Bible ke Sunday. Ke mbono ofụri ererimbot oro ẹkenịmde ke Rome ke isua kiet ama ekebe, eyenete oro enye mîkọfiọkke ama ọkọm enye ufiop ufiop. Eyenete emi ekedi anie? Kamse, enye ekedi kiet ke otu mbon oro enye ọkọnọde n̄wedikot ke efe udiọn̄ moto ke isua kiet emi ekebede! Eren oro ama aka okokop utịn̄ikọ an̄wa oro, ama onyụn̄ ayak enyịn̄ esie ọnọ kaban̄a ukpepn̄kpọ Bible. Idahaemi enye ye n̄wan esie ẹdi Mme Ntiense Jehovah oro ẹyakde idem ẹnọ. Mfan̄a ndomokiet idụhe nte ke ikọ ntiense ido nneme ekeme ndinọ utịp ata etieti!
Kaiso Ndinam N̄kpọ Mban̄a Ima Abasi
16. Mme mbụme ewe ke nnyịn idinam ọfọn ndibụp idem nnyịn?
16 Jehovah ke akpanikọ esitat ubọk ke ndiyarade ima oro enye amade mme edibotn̄kpọ esie. Nte nnyịn ima ikokụt, N̄wed Abasi ọmọnọ nnyịn nti uwụtn̄kpọ aban̄a mbon oro ẹkenamde n̄kpọ ye unana ibụk ẹban̄a mme uyarade ima Abasi. Nte otịmde odot, andiwet psalm ke odudu spirit ọkọdọhọ ete: “Yak owo ẹkọm Jehovah ke ima esie, ye ke mme utịben̄kpọ ẹmi enye anamde ye nditọ owo.” (Psalm 107:8, 15, 21, 31) Ẹyak nnyịn ikûdedei ibọ mfọn ido Abasi inyụn̄ itaba uduak esie? Oro okûdedei otịbe! (2 Corinth 6:1) Ntre ẹyak nnyịn owo kiet kiet ibụp idem nnyịn ite: ‘Nte ami mmenen̄ede n̄wụt esịtekọm mban̄a uyarade ima Abasi emi ami mma n̄kenyenyene nnyụn̄ ndori enyịn ye mbuọtidem ndikaiso nnyene ke ini iso? Nte mmọ ke ẹdemede mi ndima Jehovah ke ofụri esịt, ukpọn̄, ekikere, ye odudu mi? Ndi ami ke akpanikọ ke nnam n̄kpọ Abasi? Nte ami mmama se inende nyụn̄ nsua se ikwan̄ade? Ndi ami ke n̄wụt ima nditọete? Nko didie ke ami ndomo ndisan̄a ke nde ikpat Jesus ket-ket ke se iban̄ade utom ukwọrọikọ mi?’
17. Nso ididi utịp edieke nnyịn inamde n̄kpọ ye unana ibụk iban̄a mme uyarade ima Jehovah Abasi?
17 Ke akpanikọ, ediwak usụn̄ ẹdu ndiwụt ata esịtekọm mban̄a ofụri uyarade ima Abasi oro nnyịn ikụtde. Ke ndida ifet ẹbederede nnam n̄kpọ ọyọhọ ọyọhọ ke ndiwụt utọ esịtekọm oro, nnyịn iyenam esịt Ete nnyịn eke heaven adat, iyedi edidiọn̄ inọ mbon en̄wen, inyụn̄ ibọ idatesịt, emem, ye uyụhọ ke idem nnyịn. Nnyịn ke ntre ikpakam ikaiso ndinam n̄kpọ ye unana ibụk mban̄a mme uyarade ima Abasi.
Didie ke Afo Ọkpọbọrọ?
◻ Nso ke ẹyom man ẹnam n̄kpọ ye unana ibụk ẹban̄a ima Abasi?
◻ Didie ke nnyịn ikeme ndidu ke ukpeme mbak idomo?
◻ Nso idi ndusụk usụn̄ ndiwụt ima nditọete?
◻ Mme uyarade ima Jehovah ẹkpenụk nnyịn ndinam n̄kpọ didie ye mme mbọhọidụn̄ nnyịn?
[Ndise ke page 17]
Ana nnyịn in̄wana ibiọn̄ọ mme ntụhọ unam idiọk, man ibọhọ afanikọn̄
[Ndise ke page 18]
Mbiowo ẹsiwụt ima nditọete ke ndisan̄a ye mbon en̄wen ke utom ukwọrọikọ Obio Ubọn̄
[Ndise ke page 19]
Charles Taze Russell, akpa etieibuot Watch Tower Society, ama odụri ntịn̄enyịn owụt emem, idatesịt, ye edidiọn̄ ẹmi Abasi ikpọn̄îkpọn̄ ekemede ndinọ