Nte Spirit Abasi Ekemede Nditụk Fi

“KE EDITỌN̄Ọ Abasi okobot enyọn̄ ye isọn̄. Isọn̄ ekedi ikpîkpu ye ukpọk, ekịm onyụn̄ odu ke enyọn̄ inyan̄; spirit Abasi onyụn̄ okụbọ ke enyọn̄ mmọn̄.” (Genesis 1:1, 2, Revised Standard Version) Ikọ N̄wed Abasi emi osio owụt n̄wọrọnda usụn̄ emi ofụri mme andidu uwem ẹdiade ufọn ẹto edisana spirit. Spirit oro ama odu ke edinam ke ini edibotn̄kpọ, ndien ke ntak edinam esie, isọn̄ ama akabade edi inem inem ebietidụn̄ ọnọ ubonowo.

Edi mme owo ẹkeme ndidia ufọn oro otịmde okpon akan ẹto edisana spirit. N̄ke kiet eke odudu spirit ọdọhọ ete: “Mbufo ẹkabade ke nduari mi, sese, nyen̄wan̄a spirit mi nduọk mbufo ke idem, nyenam mbufo ẹfiọk ikọ mi.” (Mme N̄ke 1:23) Ke eyo nnyịn “ikọ” Abasi oro ẹtan̄de ẹbok ẹdọn̄ọ ke Edisana Bible, emi mme owo ẹkewetde nte “edisana spirit esịnde mmọ” ewet. (2 Peter 1:21; Mark 12:36; 2 Timothy 3:16) Ini ekededi oro owo nsụkidem okotde Bible, enye adia ufọn oto edisana spirit.

Edisana Spirit ye Utom Ukwọrọikọ

Ke ini kiet ke otu Mme Ntiense Jehovah awahade ufọk fo man etịn̄ aban̄a eti mbụk Obio Ubọn̄, edisana spirit ekeme nditụk uwem fo ke usụn̄ efen. Nnyịn isan̄a didie idiọn̄ọ? Ọfọn, ke ini Jesus Christ ọkọtọn̄ọde ndikwọrọ eti mbụk, enye ama ada ikọ prọfet Isaiah etịn̄ aban̄a idemesie, ọdọhọde ete: “Spirit Jehovah odoro Mi ke idem, koro Enye emeyet Mi aran onịm, ete, n̄kwọrọ eti mbụk nnọ nditọ ubuene: . . . n̄kwọrọ isua mfọnido Jehovah.” (Luke 4:18, 19; Isaiah 61:1, 2) Ih, ẹma ẹyet Jesus aran ke edisana spirit man ọkwọrọ eti mbụk.

Akande oro, Jesus ama ebemiso etịn̄ ete ke edikwọrọ eti mbụk eyekaiso ke n̄kpa imọ ebede. Enye ama etịn̄ prọfesi ete: “Ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.” (Matthew 24:14) Ibio ini mbemiso Jesus ọkọdọkde ke enyọn̄, enye ama ọnọ mme anditiene enye utom emi ndinam: “Mbufo ẹka ẹkanam kpukpru mme idụt ẹdi mbet Mi, ẹnịm mmọ baptism ẹsịn ke enyịn̄ Ete ye Eyen ye edisana spirit: ẹnyụn̄ ẹkpep mmọ ẹnam kpukpru n̄kpọ eke n̄ketemede mbufo.” (Matthew 28:19, 20) Ntre, ke Christ ọdọkde ke enyọn̄, mme mbet esie ẹma ẹkaiso ke utom edikwọrọ ikọ ye edikpep owo n̄kpọ oro spirit ọnọde odudu. Mme Ntiense Jehovah mfịn ẹkpebe mme akpa mbet Jesus oro ke ndikwọrọ eti mbụk ke ofụri ererimbot.

Baptism ye Edisana Spirit

Ke ini owo onyịmede eti mbụk mfọn mfọn, Jesus ọkọdọhọ ke ẹkpenịm enye baptism ẹsịn “ke enyịn̄ Ete ye Eyen ye edisana spirit.” Ntre, edisana spirit esikaiso nditụk mbufa mbet. Ikọ oro, “ke enyịn̄,” enen̄ede ọwọrọ “ke odudu” m̀mê “ndifiọk itie.”a Ntem, ndina baptism ke enyịn̄ Ete ọwọrọ ndinyịme itie edikara Abasi ke uwem nnyịn ye unana eyịghe. Ndina baptism ke enyịn̄ Eyen ọwọrọ ndinyịme Jesus nte Andinyan̄a, Uwụtn̄kpọ, ye Edidem. Ndina baptism ke enyịn̄ edisana spirit onyụn̄ abuana ndiberi edem ke spirit nnyụn̄ nsụk idem nnọ odudu esie.b

Edisana Spirit ke Uwem Fo

Ke mfụhọ, unana edinam akpanikọ, oburobụt ido uwem, afai, ye ubiatibet ke ofụri ofụri oro nnyịn ikụtde ke mme idụt “Christian” ẹwụt akpanikọ oro nte ke ediwak mbon oro ẹdọhọde nte idide Christian ke akpanikọ ẹbọbiọn̄ọ edisana spirit. Edi ẹdiọn̄ mbon oro ẹsụkde idem ẹnọ enye akamba akamba. N̄kpọ kiet edi-o, mmọ ẹda se mmọ ẹkotde ke Bible oro ẹkewetde ke ndausun̄ spirit nte akpan n̄kpọ ẹnyụn̄ ẹda enye ẹsịn ke edinam ke uwem mmọ. Ntem, mmọ ẹnyene ọniọn̄, ikike, ubiere, ifiọkibuot, ifiọk, ye ukeme ukere n̄kpọ. (Mme N̄ke 1:1-4) Mmọemi ẹdi ata nti inyene ke mfịna mfịna eyo nnyịn.

Edisana spirit n̄ko an̄wam mme utọ owo ẹmi ndikan n̄kpọsọn̄ mfịna. Ke mme ini eset, Abasi ama owụt ikọt esie nte mmọ ẹkpekemede ndinam ata ọkpọsọn̄ utom. Jehovah ọkọdọhọ ke edinam emi “itoho ke odudu, inyụn̄ itoho ke nsọn̄idem, edi oto spirit [esie].” (Zechariah 4:6) Edieke nnyịn isụkde idem inọ Abasi ye spirit esie, ẹyen̄wam nnyịn n̄ko ndinam n̄kpọsọn̄ utom nnyụn̄ n̄kan mme n̄kpọ ubiọn̄ọ oro ke mîdịghe ntre ẹkpekponde ẹkan nnyịn.—Matthew 6:33; Philippi 4:13.

N̄ko-n̄ko, spirit Abasi an̄wam nnyịn ndinyene ubọhọ-ufụn oro ererimbot ke ofụri ofụri mîdiọn̄ọke. Apostle Paul ekewet ete: “Ọtọ nte spirit Ọbọn̄ [“Jehovah,” NW] odude, ubọhọ-ufụn etiene odu do n̄ko.” (2 Corinth 3:17) Mbon oro ẹsụkde idem ẹnọ spirit Abasi ẹnyene ubọhọ-ufụn otode nsunsu ido ukpono, nsunsu ekikere, ndịk kaban̄a ini iso, ye ediwak n̄kpọ eken oro ẹsịnde owo ke ufụn. Spirit Abasi ke akpanikọ edi nsinsi odudu! Enye ekeme idem ndikpụhọde mme owo. Bible etịn̄ otụk emi ke ini enye ọdọhọde ete: “Mbun̄wụm spirit edi ima, ye idatesịt, ye emem, ye ime [“anyanime,” NW], ye mfọnido, ye eti ido, ye edinam akpanikọ [“mbuọtidem,” NW], ye ifụre ifụre ido, ye mfara ke idem; baba ibet kiet ibiọn̄ọke orụk edu emi.” (Galatia 5:22, 23) Ererimbot emi okpokpụhọde didie ntem edieke kpukpru owo ẹkpesụkde idem ẹnọ odudu oro spirit Abasi enyenede!

Nte otu kiet, mme ata Christian n̄ko ẹnyene “emem nte urụk ẹbọp idem ẹdian ọtọkiet ke spirit.” (Ephesus 4:3) Edidianakiet ye emem edi n̄kpọ ananade etieti mfịn. Edi mmọ ẹsidu ke ebiet oro spirit Abasi odude ke edinam. Ke akpanikọ, ke otu Mme Ntiense Jehovah, mbọbọ edidianakiet otode edisana spirit amatan̄ mme owo ẹtode kpukpru orụk, usem, ye idụt edidọn̄ ke ata ebuana “nditọete.”—1 Peter 2:17.

Spirit Abasi ye Afo

Nte afo omokụt ufọn odude ke ndinyene ọniọn̄ oro Abasi ọnọde ye ke ndinyene ata ubọhọ-ufụn? Nte ikpedịghe utịben̄kpọ ndinyene un̄wam Abasi ke ndikọk mme mfịna nnyụn̄ n̄kọri ima, idatesịt, emem, anyanime, mfọnido, eti ido, mbuọtidem, ifụre ifụre ido, ye mfara ke idem? Do sụk idem nnọ odudu otode edisana spirit Abasi. Edi didie ke owo ekeme ndinam emi?

Yak Ikọ Abasi, kpa Bible, enyene odudu ke ekikere ye esịt fo. Buana ye mbon oro ẹyakde edisana spirit enyene odudu ke idemmọ. Nam mme usio-ukot idahaemi ndikpep nnyụn̄ nnanam uduak Abasi. Ndien, “Abasi idori-enyịn akpakam ọyọhọ mbufo ye kpukpru idatesịt ye emem ke mbuọtidem mbufo, man mbufo ẹnyene uwak idori-enyịn oto ke odudu edisana spirit.”—Rome 15:13.

[Mme Ikọ idakisọn̄]