Uwem ye Utom Jesus

Ayak Ọnọ Ndien Ẹda Ẹdaha

KE INI Pilate, ke sụn̄sụn̄ uku Jesus oro ẹtụhọrede onụkde, afiakde odomo ndisana enye nyak, ikpọ oku ẹkabade ẹkop iyatesịt ẹkan. Mmọ ẹbiere nditre ndiyak n̄kpọ ndomokiet ọbiọn̄ọ idiọk uduak mmọ. Ntre mmọ ẹtọn̄ọ ntak ẹfiori ẹte: “Wot enye ke eto! Wot enye ke eto!”—NW.

“Mbufo ke idem mbufo ẹda Enye ẹwot,” Pilate ọbọrọ ke itekesịt. Ke okpụhọrede ye mbemiso ikọ mmọ, mme Jew ẹkeme ndinyene odudu ndiwot mme abiatibet oro ẹbiatde ewụhọ ido ukpono oro okponde ekem. Ekem, ke nsụhọde n̄kaha ọyọhọ utịm ikotion, Pilate ọdọhọ ke Jesus iduehe, ọdọhọde ete: “Ami n̄kwe enye idiọk ke idem.”

Mme Jew, ke ẹkụtde ete ke edori ikọ ukaraidem mmimọ omokpu ndinyene utịp, ẹfiak ẹbịne ẹdori ikọ ido ukpono aban̄ade isụni oro ẹkedade hour ifan̄ ke mbemiso ke ẹkpede ikpe Jesus ke iso Sanhedrin. Mmọ ẹdọhọ ẹte, “Nnyịn imenyene ibet, ndien nte ibet oro owụkde, Enye odot ndikpa; koro Enye onịmde Idemesie ke Eyen Abasi.”

Edori ikọ emi edi obufa ọnọ Pilate, ndien emi ọdọdiọn̄ anam ndịk anam enye. Etisịm idahaemi enye ọmọdiọn̄ọ ke Jesus idịghe uke uke owo, idem nte ndap n̄wan esie ye utịbe odudu Jesus ẹwụtde. Edi “Eyen Abasi”? Pilate ọdiọn̄ọ ete ke Jesus oto Galilee. Edi, nte ekeme ndidi enye ama ododu uwem mbemiso? Afiakde edem ada enye odụk ufọk ubọn̄, Pilate obụp ete: “Afo oto m̀mọ̀n̄?”

Jesus isioroke uyo. Enye ama asian Pilate ke mbemiso ete ke imọ idi edidem, edi nte ke Obio Ubọn̄ imọ idịghe eke ererimbot emi. Idahaemi n̄kaiso edinam an̄wan̄a inyeneke ufọn ndomokiet. Nte ededi, editre ndinọ ibọrọ anam Pilate okop iyatesịt, ndien enye obụbede asak ye Jesus ye ikọ emi: “Ubọrọke mi ikọ? Nte ufiọkke ete mmenyene odudu ndisana fi nyak, mmonyụn̄ nnyene odudu ndiwot Fi?”

“Ukpenyeneke odudu ndinam Mi n̄kpọ, ke Abasi mîkpetiehe ke enyọn̄ inọ fi odudu,” Jesus ọbọrọ ukpono ukpono. Enye etịn̄ aban̄a Abasi ndinọ mme andikara ẹdide owo odudu ndikara mbubehe isọn̄. Jesus adian do ete: “Mmọdo idiọkn̄kpọ owo emi adade Mi edisịn fi ke ubọk okpon akan.” Ke akpanikọ, akwa oku oro, Caiaphas, ye mme nsan̄a esie ye Judas Iscariot ẹnyene nduduọhọ okponde akan eke Pilate ke ntak ukwan̄ usụn̄ unam n̄kpọ ye Jesus.

Ke Jesus otịmde-tịm odụk enye esịt onyụn̄ okopde ndịk ete ke ekeme ndidi Enye oto Abasi, Pilate ọtọn̄ọ ntak esịn ukeme ndisana Enye nyak. Mme Jew, nte ededi, ẹtọhọ ye Pilate. Mmọ ẹtọn̄ọ ntak ẹtịn̄ edori ikọ ukaraidem mmọ, n̄kari n̄kari ẹtịn̄de ikọ ndịk ete: “Edieke asanade owo emi ayak, udịghe ufan Caesar; kpukpru owo eke ẹnịmde idem ke edidem ẹn̄wana ye Caesar.”

Kpa ye ndịk usịn idem ke afanikọn̄, Pilate ada Jesus ọwọrọ an̄wa inikiet efen. “Sese, Edidem mbufo do,” enye afiak anam n̄kpeubọk efen efen.

“Men Enye fep, men Enye fep, Wot Enye,” edi ibọrọ ẹnọde.

“Nte n̄wot Edidem mbufo?” Pilate obụp ke n̄kịmenyịn.

Mme Jew ẹsikop iyatesịt ke ndidu ke idak ukara mbon Rome. Ke akpanikọ, mmọ ẹsịn ukara Rome ke ndek! Edi, ke mbubịk, ikpọ oku ẹdọhọ ẹte: “Nnyịn inyeneke edidem efen ibe Caesar.”

Okopde ndịk ke ntak ifụm ukara ye enyịn̄ esie, Pilate ke akpatre emem idem ọnọ uyịre uyịre, ndịk ndịk, udọn̄esịt mme Jew. Enye ayak Jesus ọnọ. Mbonekọn̄ ẹfọrọde Jesus ididuot ekụra ke idem ẹnyụn̄ ẹsịne enye ọfọn̄idem esiemọ. Nte ẹdade Jesus ẹwọrọ ẹka ndiwot ke eto, ẹnọ enye eto ndutụhọ esie ẹte obiom.

Etisịm idahaemi enye edi ufọt usenubọk ke Friday, Nisan 14; eyedi ufọt uwemeyo asan̄a ekpere. Jesus akadaha ada tọn̄ọ ke tụhi tụhi usenubọk Thursday, ndien enye omokụt ubiak ubiak ukụt ke utọ ke utọ. Nte an̄wan̄ade, odudu esie okụre ke ntak udobi eto emi. Ntre ẹmụm owo kiet emi asan̄ade ebe, Simon, emi otode Cyrene ke Africa, ndibiom eto emi nnọ Jesus. Nte mmọ ẹsan̄ade ẹka, ata ediwak owo ẹtiene ke edem, esịnede ediwak iban ẹmi ẹtuan̄ade ẹnyụn̄ ẹsemede Jesus.

Ọwọn̄ọde ese iban ẹmi, Jesus ọdọhọ ete: “Nditọ iban Jerusalem, ẹkûtua Mi; ẹtua idem mbufo ye nditọ mbufo. Koro sese, mme usen ke ẹdi eke ẹdidọhọde ẹte, Ọfọfọn ye mme ada, ye mme idịbi eke akanam mîmanke eyen, ye mme eba eke akanam nditọ mîwapke. Adan̄aoro mmọ ẹyetọn̄ọ ndidọhọ ikpọ obot ẹte, Ẹduọ ẹtọ nnyịn: ẹyenyụn̄ ẹdọhọ n̄kpri obot ẹte, Ẹfụk nnyịn. Koro edieke ẹnamde n̄kpọ emi ye nsehe eto, edinam didie ye nsat eto?”

Jesus etịn̄ otụk eto emi edide idụt mme Jew, emi osụk enyenede nsehe uwem ke esịt ke ntak edidu Jesus ye nsụhọ oro ẹnịmde enye ke akpanikọ. Edi ke ini ẹsion̄ode mmọemi ẹfep ke idụt oro, ke n̄kan̄ eke spirit n̄kpakpa eto kpọt osụhọ, ih, nsat idụt. Oh, nso ntuan̄a ididu ntem ke ini mbonekọn̄ Rome, oro ẹnamde n̄kpọ nte mme ebiereikpe Abasi, ẹsobode idụt mme Jew! John 19:6-17; 18:31; Luke 23:24-31; Matthew 27:31, 32; Mark 15:20, 21.

◆ Nso edori ikọ ke mme adaiso ido ukpono ẹdori Jesus ke ini mme edori ikọ ukaraidem mmọ ẹkpude ndinyene utịp?

◆ Eyedi ntak ewe anam Pilate akabade okop ndịk akan?

◆ Idiọkn̄kpọ mmanie okpon akan kaban̄a se itịbede inọ Jesus?

◆ Didie ke mme oku ẹnam Pilate ayak Jesus ọnọ mmọ man ẹkewot?

◆ Nso ke Jesus ọdọhọ iban oro ẹtuan̄ade enye, ndien nso ke ikọ esie ọwọrọ ke nditịn̄ ntụk eto nte edide “nsehe” ndien ekem ‘nsat’?