Nte Afo Emeti?
Nte afo ama okụt mme nsiondi Enyọn̄-Ukpeme eke ndondo emi nte enyenede akpan ufọn? Do ntak mûdomoke ibuot uti-n̄kpọ fo ye se itienede emi-e?
◻ Mme akpanikọ ewe ẹfan̄a ye edida oro ẹdade itie emi ẹkerede nte Jesus akamanade ke edisana?
Bible isiakke nnennen itie emana Jesus. Mme mbụk Gospel eke Matthew ye Luke ẹtịn̄ ndusụk akpan n̄kpọ kpọt. (Matthew 2:1, 5; Luke 2:4-7) Ndikot John 7:40-42 owụt nte ke mme owo ke ofụri ofụri ikọfiọkke ebiet emana esie, ndusụk owo ẹkerede ẹte ke enye akamana ke Galilee. N̄ko, ke ini eyouwem Jesus ke isọn̄, enye ikasuanke etop mbụk emana esie.—12/15, page 5.
◻ Didie ke Christian ekeme ndimụm idara esie n̄kama ke adan̄aemi ọyọde mme mfịna udọn̄ọ ikpọkidem, mfụhọ, ye nsọn̄ọn̄kpọ ndutịm uforo?
Ikọ Abasi ọnọ ndọn̄esịt ye ndausụn̄ oro ẹyomde. Ndikot m̀mê ndikpan̄ utọn̄ n̄kop nte ẹkotde psalm, ekeme ndinọ ọkpọsọn̄ odudu oro ẹyomde. David ọkọnọ nnyịn item ete: “Top mbiomo fo nọ Jehovah, ndien enye eyekama fi.” Enye n̄ko ama ọn̄wọn̄ọ ọnọ nnyịn ete ke Jehovah ke akpanikọ edi ‘Andikop Akam.’ (Psalm 55:22; 65:2) Ebede ke mme n̄wed ye mbiowo esop esie, esop Jehovah odu kpukpru ini ke mben̄eidem ndin̄wam nnyịn in̄wana ye mme mfịna nnyịn.—1/1, page 14-15.
◻ Ikọ Jesus ọkọwọrọ nso ke ini enye ọkọdọhọde nte asan̄ade ke usụn̄ oro ẹdade enye ẹka ndiwot, ete: “Edieke ẹnamde n̄kpọ emi ye nsehe eto, edinam didie ye nsat eto?” (Luke 23:31)
Jesus eketịn̄ otụk eto emi edide idụt mme Jew. Ke ntak oro Jesus ye nsụhọ mme Jew oro ẹnịmde enye ke akpanikọ ẹdude, idụt oro ke okosụk enyene ndusụk nsehe uwem. Nte ededi, ke ini ẹkesion̄ode mmọemi ẹfep ke idụt oro, ke n̄kan̄ eke spirit n̄kpakpa eto kpọt okosụhọ, kpa nsat ndutịm idụt.—1/15, page 9.
◻ Didie ke “mmọ eke esịt mmọ asanade,” emi ẹtịn̄de ẹban̄a ke Matthew 5:8, ẹkeme ‘ndikụt Abasi’?
Mmọ ‘ẹkụt Abasi’ ke ini mmọ ẹkụtde nte enye anamde n̄kpọ ke ibuot mbon nsọn̄ọnda. (Men Exodus 33:20; Job 19:26; 42:5 domo.) Nte ededi, ikọ Greek ke Matthew 5:8 emi ẹkabarede ‘kụt’ n̄ko ọwọrọ “ndida ekikere n̄kụt n̄kpọ, ndikop, ndifiọk.” Sia Jesus ke mfọnmma usụn̄ okowụtde edu Abasi, ndinyene ikike ke edu emi an̄wam “mmọ eke esịt mmọ asanade [ndi]kụt Abasi.” (John 14:7-9)—1/15, page 16.
◻ Ntak emi nnyịn isịmde ubiere nte ke Jesus edi Michael, akwa angel?
Ikọ Abasi asiak akwa angel kiet kpọt, ndien enye etịn̄ aban̄a angel oro ke ebuana ye Ọbọn̄ Jesus oro ẹnamde eset ete: “Koro Ọbọn̄ ke Idemesie eyeto ke heaven osụhọde ye n̄kpo, ye uyo archangel [akwa angel], ye ukorowo Abasi.” (1 Thessalonica 4:16) Ke Jude 9 nnyịn ikụt ite ke enyịn̄ akwa angel emi edi Michael.—2/1, page 17.
◻ Nso idi ikpehe inan̄ ẹmi nnyịn ikemede ndiwụt mbon en̄wen ukpono?
Nnyịn ikpenyene ndiwụt mme akara ukaraidem, mme eteutom, mme andibuana ke ekpụk ubon nnyịn, ye mbon oro ẹdude ke esop ukpono.—2/1, page 20-22.
◻ Ibio ini mbemiso n̄kpa Jesus, nso eti uwụtn̄kpọ ke enye okonịm ọnọ mbon oro ẹnyenede ete ye eka oro ẹsọn̄de ke emana?
Ke adan̄aemi Jesus okosụk ọkọn̄ọde ke eto enye ama ekere aban̄a mfọnọn̄kpọ obụkidem ye eke spirit eka esie ke ndiyak enye nsịn ke ukpeme apostle John oro enye amade. (John 19:25-27)—2/15, page 8.
◻ Ntak okoyomde Jesus ọbọ ufen-e?
Ufen Jesus akanam n̄kpọ ndibiere eneni nsọn̄ọnda mme asan̄autom Abasi. Mmọ n̄ko ẹma ẹtịm enye idem ẹben̄e udeme oro enye enyenede nte Akwa Oku ubonowo oro owụtde mbọm. (Mme Hebrew 4:15)—2/15, page 14-15.
◻ Mme akpan eneni ewe ke nsọn̄ibuot oro ke Eden ekedemede?
Nte owo ekeme ndikara idemesie uforo uforo ke ẹsiode Abasi ẹfep? Nte enen ke n̄kan̄ Abasi ndiyom ẹsụk ibuot ẹnọ itie edikara esie? Ke usụn̄ atarade, ndi owo ekededi ye unana ibụk ekpemek ndinam n̄kpọ Abasi ye ifụre ekikere mmọ?—3/1, page 6.
◻ Ntak emi ndusụk owo ẹdiade n̄kpọ idiọn̄ọ Editi ke ukwan̄ usụn̄?
Ndusụk mbon oro mîkọrike isịm ọyọhọ idaha ẹkeme ndidi inyeneke ifiọk uduak Abasi oro adade ukem ukem. Ekeme ndidi mmọ ifiọkke ite ke ediyet owo aran “itoho owo emi oyomde-yom, inyụn̄ itoho owo emi efehede itọk, edi oto Abasi.” (Rome 9:16) Inaha inọ owo ndibiere nte ke ikpama ẹda imọ ẹsịn ke obufa ediomi inyụn̄ ikabade idi ada udeme ye Christ. Edimek otode Jehovah edi akpan n̄kpọ, ndien spirit esie etie ntiense ọnọ edimek oro. (Rome 8:16; 1 Corinth 12:18)—3/15, page 21.
◻ Nso idi “edisana usem” oro ẹtịn̄de ẹban̄a ke Zephaniah 3:9, NW?
Enye edi nnennen ifiọk akpanikọ aban̄ade Abasi ye mme uduak esie.—4/1, page 21-22.