Ẹnem Jehovah Esịt ke Ndiwụt Mfọnido
“Nso ke Jehovah oyom ye afo, ke mîbọhọke ndinam se inende, nnyụn̄ mma ima Abasi [“mma mfọnido,” NW], nnyụn̄ nsụk idem nsan̄a ye Abasi fo?”—MICAH 6:8.
1. Ntak emi mîkpakpaha nnyịn idem nte ke Jehovah odori enyịn ndikụt ikọt esie ẹwụtde mfọnido?
JEHOVAH odori enyịn ndikụt ikọt esie ẹwụtde mfọnido. Emi ikpekpaha nnyịn idem. Abasi ke idemesie ọfọn ido ye kpukpru owo, idem ye mme anamidiọk owo oro mîwụtke esịtekọm. Ke se iban̄ade emi, Jesus Christ ama asian mme mbet esie ete: “Ẹma mme asua mbufo, ẹnyụn̄ ẹnam ufọn ẹnọ mmọ, ẹnyụn̄ ẹbuọt, ekûdori enyịn ndifiak mbọ; ndien utịp mbufo eyekpon: mbufo ẹyenyụn̄ ẹdi nditọ Andikon̄-n̄kan: koro Enye ọfọnde ido kpa ye mmọ eke mîkọmke Enye ye mme idiọkowo. Ẹtua owo mbọm ndien, kpa nte Ete mbufo atuade owo mbọm.”—Luke 6:35, 36.
2. Mme mbụme ewe ẹban̄ade mfọnido ẹdot nnyịn ndikere mban̄a?
2 Nte Micah 6:8 ọdọhọde, ana mmọ oro ẹsan̄ade ye Abasi ẹnen̄ede ‘ẹma mfọnido.’ Nte an̄wan̄ade, Jehovah esidat esịt ke ini mme asan̄autom esie ẹwụtde mfọnido ẹnyụn̄ ẹmade enye ke usụn̄ esịt akpanikọ. Edi nso idi mfọnido? Mme ufọn ewe isụn̄ọ ito ediwụt enye? Ndien didie ke ẹkeme ndiwụt edu emi?
Se Mfọnido Edide
3. Didie ke afo akpanam mfọnido an̄wan̄a?
3 Mfọnido edi edu edinyene ọkpọsọn̄ udọn̄ ke idem mmọ en̄wen. Ẹwụt enye ke mme edinam oro ọnọde un̄wam ye ke mme ikọ oro ẹwụtde edikere mban̄a. Ndiwụt mfọnido ọwọrọ ndinam se ifọnde utu ke n̄kpọ ekededi oro ọnọde unan. Owo mfọnido etie ufan ufan, sụn̄sụn̄, owụt mbọm ye eti ido. Enye owụt mmọ en̄wen ntatubọk ye edikere mban̄a. Ndien mfọnido edi ubak mbọbọ ndamban̄a edisịnen̄kpọ kpukpru ata Christian, koro Paul akakpak ete: “Ẹda ndien esịt mbọm ẹsịne, ye mfọnido, ye nsụkidem, ye ifụre ifụre ido, ye ime.”—Colossae 3:12.
4. Didie ke Jehovah ada iso ke ndiwụt ubonowo mfọnido?
4 Jehovah ada iso ke ndiwụt mfọnido. Nte apostle Paul ọkọdọhọde, ekedi “ke ini mfọnido Abasi Andinyan̄a nnyịn ama ọbiọn̄ọde, ye ima emi Enye amade nnyịn” ke “oto ke mbọm Esie ke Enye akanyan̄a nnyịn, ọtọn̄ọ ntak obot nnyịn ke ediyet nnyịn isana, onyụn̄ anam nnyịn iwọrọ idi obufa ke odudu edisana spirit.” (Titus 3:4-6) Abasi anam mme Christian oro ẹyetde aran ẹsana, m̀mê ‘eyet’ ke iyịp Jesus, adade ufọn uwa ufak Christ anam n̄kpọ ke ibuot mmọ. Ẹnam mmọ ẹsana n̄ko ebe ke edisana spirit, ẹkabarede ẹdi “obufa edibotn̄kpọ” nte nditọ Abasi oro ẹbonde ke spirit. (2 Corinth 5:17, NW) Ke akpanikọ, mfọnido oro Abasi enyenede ọnọ owo n̄ko atara osịm “akwa otuowo” eke ofụri ererimbot emi “ẹyetde ọfọn̄idem mmọ ẹnam afia ke iyịp Eyenerọn̄.” (Ediyarade 7:9, 14; 1 John 2:1, 2) Akande oro, mbon oro ẹyetde aran ye akwa otuowo, ẹmi ẹnyenede idotenyịn eke isọn̄, kpukpru ẹdu ke idak ‘mmemmem’ ọkpọnọ Jesus.—Matthew 11:30.
5. Ntak emi nnyịn ikpodoride enyịn ndikụt mbon oro spirit Abasi adade usụn̄ nte ẹwụtde mmọ en̄wen mfọnido?
5 Mfọnido n̄ko edi ubak mbun̄wụm edisana spirit, m̀mê anamutom odudu Abasi. Paul ọkọdọhọ ete: “Edi mbun̄wụm spirit edi ima, ye idatesịt, ye emem, ye ime, ye mfọnido, ye eti ido, ye edinam akpanikọ, ye ifụre ifụre ido, ye mfara ke idem; baba ibet kiet ibiọn̄ọke orụk edu ẹmi.” (Galatia 5:22, 23) Ntre, nso ke nnyịn ikpodori enyịn ndikụt nte mbon oro spirit Abasi adade usụn̄ ẹnamde? Ke akpanikọ, mmọ ẹkpewụt mmọ en̄wen mfọnido.
6. Mfọnido okponụk mbiowo ye mme Christian eken ndinam n̄kpọ ke nso usụn̄?
6 Ẹkeme ndiwụt mfọnido ke ediwak usụn̄. Nnyịn iwụt mfọnidọ ke ini nnyịn iwụtde mbọm. Ke uwụtn̄kpọ, mbiowo Christian ẹfọn ido ke ini mmọ ẹnamde mbọm atara osịm anamidiọk oro akabarede esịt ẹnyụn̄ ẹyomde ndin̄wam enye ke n̄kan̄ eke spirit. Edu mfọnido oro Abasi ọnọde anam mme esenyịn ẹnyene ime, edikere mban̄a, mbọm, ẹnyụn̄ ẹtie sụn̄sụn̄. Enye onụk mmọ “[nditua] otuerọn̄ mbọm.” (Utom 20:28, 29) Ke akpanikọ, mfri spirit edide mfọnido ekpenyene ndinam kpukpru mme Christian ẹnyene mbọm, ime, edikere mban̄a, imemesịt, ufan ufan edu, ye ntatubọk.
Fep Mfọnido Oro Ẹwụtde ke Idiọk Usụn̄
7. Ntak emi afo ọkpọdọhọde ke mfọnido oro ẹwụtde ke idiọk usụn̄ edi mmeme?
7 Ndusụk owo ẹse mfọnido nte mmeme. Mmọ ẹkere ke ana owo edi ọkpọsọn̄, idem ọsọn̄de ido ke ndusụk ini, man odudu esie okpotụk mbon en̄wen. Edi ẹsitịn̄ mfọn mfọn ẹte ke “nsọn̄ido edi usụn̄ oro owo mmemidem ekpebede ndiwụt odudu.” Ke akpanikọ, esida ata ukeme ndiwụt ata mfọnido nnyụn̄ mfep mfọnido oro ẹwụtde ke idiọk usụn̄. Mfọnido oro edide mbun̄wụm spirit Abasi idịghe mmemmem, edu unyịme idiọkido. Utu ke oro, mfọnido oro ẹwụtde ke idiọk usụn̄ edi mmeme oro anamde owo onyịme idiọk edinam.
8. (a) Kaban̄a nditọ-iren esie, didie ke Eli eketek ubọk ke ndinọ ntụnọ? (b) Ntak anade mbiowo ẹkpeme ẹbiọn̄ọ ediyak idem nnọ mfọnido oro ẹwụtde ke idiọk usụn̄-o?
8 Eli, akwa oku Israel ama etek ubọk ke nditụnọ nditọiren esie, Hophni ye Phinehas, ẹmi ẹkenamde utom nte mme oku ke efe esop. Ke mîyụhọke ye udeme uwa oro Ibet Abasi ọkọnọde mmọ, mmọ ẹma ẹsidọhọ mme anamutom ẹbọ mbon oro ẹdide ndifọp ikpọn̄ ke itieuwa ndisi unam. Nditọ-iren Eli n̄ko ẹma ẹnyene oburobụt ebuana idan̄ ye iban ẹkenamde utom ke enyịn̄usụn̄ efe esop. Utu ke ndisio Hophni ye Phinehas mfep ke itieutom, nte ededi, Eli n̄kukụre akasua ọnọ mmọ ke sụn̄sụn̄ uyo, okponode nditọiren esie akan Abasi. (1 Samuel 2:12-29) Eyịghe idụhe “ikọ Jehovah mîkawakke ke mme usen oro”! (1 Samuel 3:1, NW) Ntre inaha mbiowo Christian ẹyak idem ẹnọ nsunsu ekikere m̀mê ediwụt mfọnido ke idiọk usụn̄ oro ekemede ndisịn idaha eke spirit esop ke itiendịk. Ata mfọnido idịghe nnan ndifiọk ndiọi ikọ ye mme edinam oro ẹbiatde mme edumbet Abasi.
9. (a) Nso edu ikeme ndin̄wam nnyịn ndifep ediyak idem nnọ mfọnido oro ẹwụtde ke idiọk usụn̄? (b) Didie ke Jesus okowụt ukeme ke ndise mban̄a mbon nsọn̄ibuot ido ukpono?
9 Edieke anade nnyịn ifep ediwụt mfọnido ke idiọk usụn̄, ana nnyịn ibọn̄ akam iyom un̄wam Abasi man inyene utọ ukeme oro ikọ andiwet psalm okowụtde ete: “Mbufo, mme anamidiọk, ẹwọn̄ọde ẹkpọn̄ mi: ndien nyenịm mbet Abasi mi.” (Psalm 119:115) Oyom nnyịn n̄ko itiene uwụtn̄kpọ Jesus Christ, emi akananam mînyeneke ubiomikpe ediwụt mfọnido ke idiọk usụn̄. Ke akpanikọ, Jesus ekedi ata uwụtn̄kpọ ata mfọnido. Ke uwụtn̄kpọ, ‘enye ama atua mme owo mbọm, koro mmọ ẹkedude ke nnanenyịn ẹnyụn̄ ẹsuanade nte erọn̄ eke mînyeneke andikpeme.’ Ke ntre, mbon nti esịt ẹma ẹnyene ifụre ndika mbịne Jesus, idem ẹdade n̄kpri nditọ mmọ ẹsọk enye. Ndien kam kere ban̄a mfọnido ye mbọm oro enye okowụtde nte “Enye [ekemende] mmọ akama, odori mmọ ubọk, onyụn̄ ọdiọn̄ mmọ”! (Matthew 9:36; Mark 10:13-16) Okposụkedi Jesus ọkọfọnde ido, enye kpa ye oro ama ọsọn̄ọ ada ke se inende ke enyịn Ete esie eke heaven. Akananam Jesus ikonyịmeke idiọk edinam; enye ama enyene ukeme otode Abasi ndisua nnọ mbubịk mme adaiso ido ukpono. Ke Matthew 23:13-26, ekese ini enye ama etịn̄ afiak etịn̄ ubiomikpe oro ete: “Eyedọdiọk ọnọ mbufo, mme scribe ye mme Pharisee, mbon mbubịk.” Ke ini kiet kiet, Jesus ama ọnọ ntak ubiereikpe Abasi oro.
Ẹyịri Mfọnido ye Ima
10. Didie ke mme mbet Jesus ẹwụt ekemmọ mme andituak ibuot mfọnido ye ima?
10 Kaban̄a mme anditiene enye, Jesus ọkọdọhọ ete: “Mbufo ẹma ẹma kiet eken, kpukpru owo ẹyeda oro ẹfiọk ẹte mbufo ẹdi mbet Mi.” (John 13:35) Ndien nso idi usụn̄ kiet emi ima oro anamde ẹdiọn̄ọ mme ata mbet Jesus? Paul ọkọdọhọ ete: “Ima enyenyene anyanime, onyụn̄ ọfọn ido.” (1 Corinth 13:4) Ndinyene anyanime nnyụn̄ mfọn ido ọwọrọ ete nnyịn iyọ mme unana mfọnmma ye ndudue mbon en̄wen idem nte Jehovah anamde ntre ke mfọnido. (Psalm 103:10-14; Rome 2:4; 2 Peter 3:9, 15) Ima ye mfọnido Christian n̄ko ẹsiwụt idem ke ini nsọn̄ọn̄kpọ omụmde ekemmọ mme andinịm ke akpanikọ ke ebiet ekededi ke isọn̄. Ke ẹnamde n̄kpọ ke usụn̄ okponde akan ‘mfọnido eke owo,’ mme Christian ke mme ebiet en̄wen ẹsiwụt ima nditọete ke ndinọ mme n̄kpọ obụkidem man ẹda ẹn̄wam mme utọ andituak ibuot nnọ Jehovah oro.—Utom 28:2.
11. Ke nditịn̄ ke ekikere N̄wed Abasi, nso idi ima-mfọnido?
11 Ẹyịri mfọnido ye ima ke ikọ oro, “ima-mfọnido,” oro ẹwakde ndida ke N̄wed Abasi. Emi edi mfọnido ọwọrọde oto ima akpanikọ. Ikọenyịn̄ Hebrew oro ẹkabarede “ima-mfọnido” (cheʹsedh) esịne se ikponde ikan ima ima edikere mban̄a. Enye edi mfọnido oro ke ima ima usụn̄ adiande idemesie ke n̄kpọ tutu uduak esie kaban̄a n̄kpọ oro osu. Ẹwụt ima-mfọnido, m̀mê ima akpanikọ Jehovah ke nsio nsio usụn̄. Ke uwụtn̄kpọ, ẹwụt enye ke mme edinam edinyan̄a ye ukpeme esie.—Psalm 6:4; 40:11; 143:12.
12. Ke ini mme asan̄autom Jehovah ẹbọn̄de akam ẹyom un̄wam m̀mê edinyan̄a, nso ke mmọ ẹkeme ndidori enyịn ndinyene?
12 Eyịghe idụhe ima-mfọnido Jehovah odụride mme owo ọsọk enye! (Jeremiah 31:3) Ke ini mme anam-akpanikọ asan̄autom Abasi ẹyomde edinyan̄a m̀mê un̄wam, mmọ ẹfiọk ẹte ke ima-mfọnido esie ke akpanikọ edi ima akpanikọ, emi mîdikpụhe mmọ. Ntre, mmọ ẹkeme ndibọn̄ akam ke mbuọtidem, nte andiwet psalm ọkọbọn̄de emi ọkọdọhọde ete: “Edi ami mbuọt idemmi ke ima [“ima-mfọnido,” NW] fo; esịt eyedat mi ye edinyan̄a fo.” (Psalm 13:5) Sia ima Abasi edide akpanikọ, mme asan̄autom esie ibuọtke idem ke ima-mfọnido esie ke ikpîkpu. Ke ini mmọ ẹbọn̄de akam ẹyom un̄wam m̀mê edinyan̄a, mmọ ẹnyene nsọn̄ọ emi: “Koro Jehovah mîdiduọkke ikọt esiemmọ, mîdinyụn̄ ikpọn̄ke udeme esie.”—Psalm 94:14.
Mme Utịp Mfọnido
13, 14. Ntak emi owo mfọnido enyenede mme ufan akpanikọ?
13 Ke ndikpebe Jehovah, mme asan̄autom esie “ẹnam n̄kpọ ye kiet eken ke ima-mfọnido ye mbọm.” (Zechariah 7:9, NW; Ephesus 5:1) “Edi mfọnido [“ima-mfọnido,” NW] owo esịn ẹyom owo,” ndien owo emi owụtde edu emi esidọk uwak edidiọn̄. (Mme N̄ke 19:22) Nso idi ndusụk mmọemi?
14 Mfọnido anam nnyịn inyene usọ ndien ke ntre an̄wam nnyịn ndisọn̄ọ mmụm eti itie ebuana ye mmọ en̄wen n̄kama. Owo oro enyenede usọ esitịn̄ onyụn̄ anam mme n̄kpọ m̀mê esise aban̄a n̄kpọsọn̄ idaha ke ima ima usụn̄ ye unana ediwụt iyatesịt. Ke adan̄aemi “owo afai” esitụhọre idemesie, “owo mfọnido [“ima-mfọnido,” NW] anam se ifọnde ye ukpọn̄ esiemmọ.” (Mme N̄ke 11:17) Mme owo ẹsifep owo afai ẹdi ẹsịk ẹkpere enyeoro owụtde mmọ ima-mfọnido. Ntre, owo mfọnido esinyene mme ufan akpanikọ.—Mme N̄ke 18:24.
15. Nso utịp ke mfọnido ekeme ndinyene ke idem ubon oro abaharede ke ntak ido ukpono?
15 Christian an̄wanndọ emi enyenede nsan̄andọ emi mînịmke ke akpanikọ ekeme ndidụri enye nnọ akpanikọ Abasi oto ke utọ edu nte mfọnido. Mbemiso enye ekekpepde akpanikọ onyụn̄ emende “obufa owo esịne, emi ẹbotde ebiet Abasi ke edinen ido ye edisana ido akpanikọ,” ekeme ndidi enye ikesiwụtke mfọnido, idem esitọhọde utọk. (Ephesus 4:24) Edieke ebe esie ọkọfiọkde ndusụk n̄ke, enye nte ọfọnde okpokonyịme ke “utọk an̄wanndọ etie nte ndụt ndụt ọkọmufọk oro ebịnde owo efep” ndien “ndidụn̄ ke esịtikọt ọfọn akan ndidụn̄ ye n̄wan utọk ye iyatesịt. (Mme N̄ke 19:13, NW; 21:19) Edi idahaemi edisana ido ye ntotụn̄ọ ukpono Christian an̄wanndọ oro, ọkọrọ ye mme utọ edu nte mfọnido, ẹkeme ndidụri nsan̄andọ esie nnọ ata mbuọtidem. (1 Peter 3:1, 2) Ih, emi ekeme ndidi utịp kiet ke enye ndiwụt mfọnido.
16. Didie ke nnyịn ikeme ndibọ ufọn nto mfọnido oro ẹwụtde nnyịn?
16 Mfọnido oro ẹwụtde nnyịn ekeme ndinyene ufọn ke ndinam nnyịn itotịm iwụt mbọm ye edifen nnọ. Ke uwụtn̄kpọ, edieke nnyịn ikoyomde un̄wam eke spirit ẹkenyụn̄ ẹnamde n̄kpọ ye nnyịn ke mfọnido ye sụn̄sụn̄ edu, nte oro idinamke nnyịn itotịm iyịre ke ndinam n̄kpọ ye mbon en̄wen ke ukem usụn̄ oro? Ọfọn, ẹkeme ndidori enyịn ndikụt irenowo ẹmi ẹdotde ke n̄kan̄ eke spirit ndinam n̄kpọ ke mfọnido ye ke sụn̄sụn̄ ido, koro Paul ekewet ete: “Nditọete, edieke ẹkụtde owo ke ndudue ekededi, mbufo, ẹmi ẹdide mbon spirit, ẹsan̄a ke spirit ifụre ifụre ido, ẹda enye ẹfiak ẹsịn ke itie; nyụn̄ kpeme idem, mbak ẹdidomo fi n̄ko.” (Galatia 6:1) Mbiowo oro ẹmekde ẹsitịn̄ ikọ ke sụn̄sụn̄ ido ye mfọnido ke ini mmọ ẹyomde ndin̄wam ekemmọ mme andinịm ke akpanikọ oro ẹnamde idiọkn̄kpọ. Edide nnyịn ke idem nnyịn ima ibọ utọ un̄wam oro m̀mê ikọbọhọ, nte ededi, nso ke Abasi odori enyịn ndikụt nte kpukpru mbon oro ẹnamde n̄kpọ ẹnọ enye ẹnamde? Akpana kpukpru Christian ẹwụt mbon en̄wen mfọnido ẹnyụn̄ ẹnam item Paul emi: “Ẹfọn ido ye kiet eken, ẹnyụn̄ ẹnyene esịtmbọm, ẹnyụn̄ ẹfen kiet eken, kpa nte Abasi okonyụn̄ efende mbufo ke Christ.” (Ephesus 4:32) Ke akpanikọ, edieke edide owo ama efen ọnọ nnyịn mîdịghe ẹma ẹn̄wam nnyịn ẹsio ke mfịna eke spirit ke usụn̄ mfọnido, emi ekpenyene ndikọri udomo oro nnyịn ifende owo, iwụtde mbọm, ye mfọnido.
Ẹwụt Esịtekọm Ẹnọ Mfọnido Abasi Oro Owo Mîdotke
17. Sia nnyịn idide mme anamidiọk toto ke emana, ewe mfọnido ke nnyịn ikpowụt esịtekọm iban̄a akpan akpan?
17 Sia kpukpru nnyịn ikamanade nte mme anamidiọk oro ẹbiomde ikpe n̄kpa, odu mfọnido oro ẹyomde nnyịn iwụt esịtekọm inọ akpan akpan. Enye edi mfọnido Jehovah Abasi oro owo mîdotke. Man ẹnyan̄a mme anamidọk ẹsio ke ubiomikpe n̄kpa ẹnyụn̄ ẹbat ke edinen edi mfọnido emi ke ofụri ofụri owo mîdotke. Paul, emi akasiakde mfọnido Abasi oro owo mîdotke utịm ike-90 ke n̄wed 14 esie eke odudu spirit, ama asian mme Christian ke Rome eset ete: “Kpukpru owo ẹma ẹnam idiọkn̄kpọ, ẹnyụn̄ ẹtaba ubọn̄ Abasi. Edi ẹtebe mmọ ikpe ke ikpîkpu ke mfọn Esie [“mfọnido oro owo mîdotke,” NW], oto ke edifak emi odude ke Christ Jesus.” (Rome 3:23, 24) Nnyịn ikpowụt esịtekọm didie ntem ke mfọnido oro owo mîdotke emi Jehovah Abasi owụtde!
18, 19. Didie ke nnyịn ikeme ndifep editaba uduak mfọnido Abasi oro owo mîdotke?
18 Ke nditre ndiwụt esịtekọm, nnyịn imekeme nditaba uduak mfọnido Abasi oro owo mîdotke. Ke se iban̄ade emi, Paul ọkọdọhọ ete: “Ntre ke nnyịn idi mme isụn̄utom ẹmi idide ke enyịn̄ Christ, nte n̄kpọ eke Abasi adade nnyịn ekpe ye mbufo: imekpe mbufo ubọk ke ibuot Christ, ẹkabade ẹtie ke emem ye Abasi. Abasi akanam Enyeemi mîkọfiọkke idiọkn̄kpọ akabade edi idiọkn̄kpọ ke ntak nnyịn; man nnyịn ikabade idi edinen ido Abasi ke Enye. Nte mme abuana utom ye Abasi, nnyịn ikpe mbufo ubọk ite, ẹkûyak mfọn Abasi [“mfọnido Abasi owo mîdotke,” NW], emi mbufo ẹkebọde, ọwọrọ ikpîkpu; koro Enye ọdọhọ ntem ete [ke Isaiah 49:8, Septuagint], Mma nyere fi ke ini mfọnido, mma nnyụn̄ nnyan̄a fi ke usen edinyan̄a. Sese, ini mfọnido mi; sese, usen edinyan̄a mi. Nnyịn inịmke ubiọn̄ọ baba kiet ke afan̄ mbufo, mbak owo editịn̄ n̄kpọ abiat utom eke inamde: edi ke kpukpru usụn̄ imowụt ite idi ata mme asan̄autom Abasi.” (2 Corinth 5:20–6:4) Nso ke Paul ekenyene ke ekikere?
19 Mme Christian oro ẹyetde aran ẹdi mme isụn̄utom oro ẹdade ke ibuot Christ, ndien akwa otuowo edi mme udiana isụn̄utom esie. Mmọ ke edidianakiet ẹkpak mme owo ndikabade ntie ke emem ye Abasi man ẹnyene edinyan̄a. Paul ikoyomke owo ndomokiet ọbọ mfọnido Jehovah Abasi oro owo mîdotke ebe ke Jesus Christ ndien ataba uduak esie. Oro ekeme nditịbe nnọ nnyịn edieke nnyịn ikpụde ndinam utom emi mfọnido oro owo mîdotke mi anamde nnyịn idot ndinam. Ke inyenede eti itie ebuana ye Abasi nte mbon oro ẹnamde ẹtie ke emem ye enye, nnyịn idibọhọ mfọnido esie oro owo mîdotke ke ikpîkpu edieke nnyịn inamde “utom edinam owo etie ke emem, oro edi, nte ke Abasi ebe ke Christ ama anam ererimbot etie ke emem ye enye.” (2 Corinth 5:18, 19, NW) Nnyịn n̄ko iyewụt mbon en̄wen mfọnido ebe ke ndin̄wam mmọ ẹkabade ẹtie ke emem ye Abasi.
20. Nso ke nnyịn ididụn̄ọde ini efen?
20 Mme asan̄autom Jehovah ẹsida ini ye mme inyene mmọ ẹnam n̄kpọ ke mme edinam mfọnido ke ini mmọ ẹn̄wamde mme owo ke n̄kan̄ eke spirit ebe ke utom ukwọrọikọ Christian. Edi nso ke nnyịn ikeme ndikpep nto mme uwụtn̄kpọ N̄wed Abasi aban̄ade edisịn mfọnido ke edinam? Ẹyak nnyịn ndien idụn̄ọde ndusụk mmọemi inyụn̄ ikere iban̄a mme usụn̄ en̄wen ndinem Jehovah esịt ke ndiwụt mfọnido.
Didie ke Afo Ọkpọbọrọ?
◻ Nso idi mfọnido?
◻ Didie ke nnyịn ikeme ndifep ndiyak idem nnọ mfọnido oro ẹwụtde ke idiọk usụn̄?
◻ Ntak emi ikọt Jehovah ẹkemede ndibuọt idem ke ima-mfọnido esie?
◻ Nso idi ndusụk utịp mfọnido?
◻ Ke ndinam nso ke nnyịn mîditabake uduak mfọnido Abasi oro owo mîdotke?
[Ndise ke page 13]
Mfọnido anam mbiowo Christian ẹme ime, ẹwụt edikere mban̄a, ẹnyụn̄ ẹwụt mbọm
[Ndise ke page 15]
Mfọnido Christian an̄wanndọ ekeme ndin̄wam ndidụri nsan̄andọ esie nda nnọ ata mbuọtidem
[Ndise ke page 17]
Nnyịn imekeme ndiwụt mbon en̄wen n̄kponn̄kan mfọnido ke ndin̄wam mmọ ẹkabade ẹtie ke emem ye Abasi