“N̄wam Unana Mbuọtidem Mi”
“Ete eyen oro ofiori ete, Mmọbuọt idem; n̄wam unana mbuọtidem mi.”—MARK 9:24.
1. Nso ikanam ete kiet ofiori ete, “N̄wam unana mbuọtidem mi”?
ETE eyeneren oro ekenyenede demon akada Jesus Christ ke iso. Ọkọdọn̄ eren oro didie ntem ndikụt nte ẹkọkde udọn̄ọ eyen esie. Mme mbet Jesus ẹma ẹnana mbuọtidem oro ekemde ndibịn demon oro nduọk, edi ete ama ofiori ete: “Mmọbuọt idem; n̄wam unana mbuọtidem mi.” Ebede ke odudu oro Abasi ọkọnọde, Jesus ama ebịn demon oro ọduọk, nte eyịghe mîdụhe ọsọn̄ọde mbuọtidem ete eyeneren oro.—Mark 9:14-29.
2. Kaban̄a mbuọtidem, ke ewe usụn̄ iba ke Christian mîkpokopke bụt?
2 Ukem nte enyene-idotenyịn ete eyeneren oro, anam-akpanikọ asan̄autom Jehovah ikopke bụt ndidọhọ ete: “Mmọbuọt idem.” Mbon nsahi ẹkeme ndineni mban̄a odudu Abasi, nte Ikọ esie edide akpanikọ, ye idem ata edidu esie. Edi mme ata Christian ẹsisọp ndinyịme ke mmimọ imenyene mbuọtidem ke Jehovah Abasi. Edi, ke ini mmọ ke ndịbe ẹnemede nneme ye Ete mmọ eke heaven, mme ukem owo ẹmi ẹkeme ndiben̄e ẹte: “N̄wam unana mbuọtidem mi”! Mmọ n̄ko ẹnam emi ye unana edikop bụt, ẹfiọkde ẹte ke idem mme apostle Jesus Christ ẹma ẹben̄e ẹte: “Nam mbuọtidem nnyịn okpon akan.”—Luke 17:5.
3. Nso idi akpan n̄kpọ kaban̄a nte John akadade “mbuọtidem” ke n̄wed esie, ndien ntak emi okodotde?
3 N̄wed Abasi Christian usem Greek akpan akpan enyene ekese nditịn̄ mban̄a mbuọtidem. Ke akpanikọ, Gospel John ada nsio nsio ikọ oro abuanade “mbuọtidem” ke se iwakde ikan mbahade 40 eke ikie ndien ndien akan nte mme Gospel ita eken ẹdade ke ẹtan̄de ẹdian kiet. Ke ndida ikọedinam oro kpukpru ini, John ọkọsọn̄ọ etịn̄ ete ke ndinyene mbuọtidem ikemke; ndiwowụt enye edi akpan n̄kpọ. Ke ewetde n̄wed ke n̄kpọ nte 98 C.E., enye ama okụt nnyọninyọ ibọk-n̄kpa nsọn̄ibuot nte ọwọrọde aka nditap mme Christian oro ẹmemde ke mbuọtidem. (Utom 20:28-30; 2 Peter 2:1-3; 1 John 2:18, 19) Ntre ekedi akpan n̄kpọ ndiwụt mbuọtidem, ndiwụt uyarade esie ebe ke mme utom uten̄e Abasi. N̄kpọsọn̄ ini ke ẹkedi ke iso.
4. Ntak emi n̄kpọ mîsọn̄ke ikan mbon ẹmi ẹnyenede mbuọtidem?
4 Mbuọtidem an̄wam mme Christian ndiyọ nsọn̄ọn̄kpọ ekededi. Jesus akasian mme mbet esie ete ke edieke mmọ “ẹkpenyenede mbuọtidem nte n̄kpasịp mustard,” n̄kpọ ndomokiet ikpọsọn̄ke ikan mmọ. (Matthew 17:21) Ke usụn̄ oro, enye ọkọsọn̄ọ etịn̄ odudu oro mbuọtidem, kpa mfri spirit enyenede. Jesus ke ntre ọkọsọn̄ọ etịn̄, idịghe se mme owo, edi se spirit Abasi, m̀mê anamutom odudu, ekemede ndinam. Mbon oro enye adade usụn̄ inamke n̄kpri ubiọn̄ọ ye mfịna ẹkabade ẹdi ikpọ mfịna. Ndida eti ibuot oro spirit ọnọde nsịn ke edinam an̄wam mmọ ndinịm mme n̄kpọ ke nnennen idaha. Idem ikpọ mfịna ẹsikabade ẹkpri ke ini ẹyakde idem ẹnọ odudu mbuọtidem oro omụmde owo akama.—Matthew 21:21, 22; Mark 11:22-24; Luke 17:5, 6.
Ndibọn̄ Akam Nte Mbuọtidem Okûkpu
5-7. (a) Mme ikọ ntọt ewe ẹban̄ade mbuọtidem ke Jesus eketịn̄ ke ini enye ọkọtọn̄ọde Editi? (b) Didie ke mbuọtidem Peter akan̄wam enye ndisọn̄ọ nditọete esie idem?
5 Ke 33 C.E., Jesus ama onịm akpatre Passover ye mme mbet esie. Ekem, ke ama ekebịn Judas Iscariot osio, enye ama ọtọn̄ọ usọrọ Editi, ọdọhọde ete: “Kpa nte Ete Mi okonịmde Obio Ubọn̄ ọnọ Mi, kpasụk ntre ke Ami nnyụn̄ nnịm nnọ mbufo . . . Simon, Simon, sese, Satan ekeben̄e mbufo ọbọ, man asak mbufo nte ibokpot: edi n̄kekpe ubọk nnọ fi nte mbuọtidem okûbọhọ fi: ndien afo n̄ko, ke ini editọn̄ọde ntak akabade, sọn̄ọ nditọete fo idem.”—Luke 22:28-32.
6 Jesus ọkọbọn̄ akam ete mbuọtidem Simon Peter okûbọhọ. Okposụkedi Peter ke ediwụt mbuọtidem mbeubọk akanamde inua ete ke imọ idikan̄ke Jesus tutu amama, esisịt ini ke oro ebede enye ama anam ntre utịm ikata. (Luke 22:33, 34, 54-62) Ke akpanikọ, ye ediwot Ekpemerọn̄ oro ẹkebemde iso ẹtịn̄, mme erọn̄ ẹma ẹsuana. (Zechariah 13:7; Mark 14:27) Nte ededi, ke Peter ama akafiak okop nsọn̄idem ke iduọ oro enye ọkọduọde odụk afia ndịk, enye ama ọsọn̄ọ nditọete esie eke spirit idem. Enye okodụri ntịn̄enyịn̄ owụtkpọ aban̄ade edimek owo nsịn ke itie Judas Iscariot oro mîkanamke akpanikọ. Ke anamde n̄kpọ nte etịn̄ikọ ke ibuot mme apostle ke Pentecost eke 33 C.E., Peter ama ada akpa ke otu “mme ukpọhọde” oro Jesus ọkọnọde enye anam n̄kpọ, ọkpọhọrede usụn̄ ọnọ mme Jew ndikabade ndi mme andibuana ke Obio Ubọn̄. (Matthew 16:19; Utom 1:15–2:41) Satan ekeben̄e ete ẹnọ imọ mme apostle man isak mmọ nte ibokpot, edi Abasi ama okụt ete ke mbuọtidem mmọ ikpụhe.
7 Kere nte eketiede Peter ke idem ke ini okokopde nte Jesus ọdọhọde ete: “N̄kekpe ubọk nnọ fi, nte mbuọtidem okûbọhọ fi.” Kam kere! Ọbọn̄ ye Eteufọk esie ọkọbọn̄ akam ete mbuọtidem Peter okûkpu. Ndien enye ikokpụhe, m̀mê ikọbọhọke. Ke akpanikọ, ke usen Pentecost, Peter ye mmọ eken ẹma ẹkabade ẹdi akpa mbon oro ẹkeyetde aran ke edisana spirit ndikabade ndi nditọ Abasi eke spirit, kpa mme ada udeme ye Christ ke ubọn̄ eke heaven ke ini iso. Edisana spirit adan̄aoro ama anam utom ke idemmọ ke udomo oro owo mîkọfiọkke mbemiso, mmọ ẹma ẹkeme ndiwụt mfri esie, esịnede mbuọtidem, akan nte akanam ẹwụtde. Nso utịbe utịbe ibọrọ ke eben̄e mmọ oro: “Nam mbuọtidem nnyịn okpon akan,” ke emi ekedi ntem—Luke 17:5; Galatia 3:2, 22-26; 5:22, 23.
Ndisak Iso Nse Mme Idomo ke Iso ye Mbuọtidem
8. Nso ekemini ntọt ke esop ọnọ nnyịn kaban̄a edisu 1 Thessalonica 5:3?
8 Ke edisu prọfesi Bible, nnyịn iyesọp ndikop mfiori “emem ye ifụre.” (1 Thessalonica 5:3) Nte emi ekeme ndisịn mbuọtidem nnyịn ke udomo? Ih, koro nnyịn idu ke itiendịk edidi se n̄kpọ oro etiede nte edikụt unen oro mme idụt ẹkemede ndinyene ke ndida emem ndi emende ke mbuari. Edi nnyịn idibuanake ye edu mme utọ anditan̄a emi edieke nnyịn inyenede ke ekikere nte ke Jehovah Abasi idaha n̄kpọutom ererimbot emi ndomokiet ke ndinam oro. Enye enyene usụn̄ idemesie ndida ata emem ndi, ndien oro edidi n̄kukụre ebe ke Obio Ubọn̄ esie ke idak Jesus Christ. Ntre, sededi unen oro mme idụt ẹkemede ndinyene ke ndiwụk emem, edidi ibio ibio ye enyọn̄ enyọn̄ kpọt. Man ẹn̄wam nnyịn idu ke ukpeme ke afan̄ emi, “asan̄autom emi anamde akpanikọ, onyụn̄ enyenede ọniọn̄” eyeka iso ndimịn̄ mme ekemini ntọt man abian̄a abian̄a mfiori “emem ye ifụre” emi mme idụt akani editịm n̄kpọ emi ẹdifioride edimen mme asan̄autom Jehovah ke mbuari.—Matthew 24:45-47.
9. Ntak emi nsobo Akwa Babylon ediyomde uko ye mbuọtidem ke n̄kan̄ nnyịn-e?
9 Mfiori “emem ye ifụre” edidi idiọn̄ọ ọnọ ‘mbabuat nsobo’ oro edidide ebịne Akwa Babylon, kpa ukara ererimbot eke nsunsu ido ukpono. (Ediyarade 17:1-6; 18:4, 5) Emi n̄ko eyedomo mbuọtidem Christian. Ye nsunsu ido ukpono ọduọde odụk nsobo, nte Mme Ntiense Jehovah ẹyesọn̄ọ ẹda ke mbuọtidem? Ke akpanikọ mmọ ẹyesọn̄ọ ẹda. N̄kpọntịbe emi—emi n̄wakn̄kan owo mîkodorike enyịn mînyụn̄ idiọn̄ọke—iditoho owo. Ana mme owo ke akpanikọ ẹdiọn̄ọ ẹte ke enye edi ubiereikpe Jehovah, ke ndinam enyịn̄ oro nsunsu ido ukpono ke anyanini ẹkesabarede asana. Edi mme owo ẹkpekeme didie ndifiọk ke owo mîsianke mmọ? Ndien mmanie ke ẹsiode Mme Ntiense Jehovah ẹfep ke ẹkpedori enyịn ndisian mmọ mban̄a oro?—Men Ezekiel 35:14, 15; Rome 10:13-15 domo.
10. Didie ke en̄wan oro Gog edin̄wanade ye ikọt Jehovah edidi n̄ko udomo mbuọtidem?
10 Mme Ntiense Jehovah oro ẹyetde aran ye nsan̄a mmọ ẹmi ẹnyenede idotenyịn eke isọn̄ ẹmenyene uko oro ẹyomde man ẹsian mmọ en̄wen ẹban̄a ubiereikpe nsobo Jehovah emi ekperede ọnọ Akwa Babylon ye nsụhọ editịm n̄kpọ Satan eken. (2 Corinth 4:4) Ke udeme esie nte Gog eke Magog, owụtde usụhọde idaha esie eke idahaemi, Satan eyetịm udịmekọn̄ esie eke isọn̄ idem ọnọ akpatre en̄wan ye ikọt Abasi. Ẹyesịn mbuọtidem oro Mme Ntiense Jehovah ẹnyenede ke odudu ukpeme Abasi ke ibuot mmọ ke udomo. Edi nnyịn imekeme ndinyene mbuọtidem ke nte Ikọ Abasi ekebemde iso etịn̄, Jehovah eyenyan̄a ikọt esie.—Ezekiel 38:16; 39:18-23.
11, 12. (a) Nso ikọsọn̄ọ edinyan̄a Noah ye ubon esie ke ini Ukwọ? (b) Nso ke mîkpanaha nnyịn ifịna idem iban̄a ke ini akwa ukụt?
11 Mfịn, nnyịn idiọn̄ọke nnennen nte Jehovah edikpemede ikọt esie ke ini “akwa ukụt,” edi emi idịghe ntak ndomokiet ndiyịk m̀mê enye eyenam ntre. (Matthew 24:21, 22) Idaha mme asan̄autom Abasi eyomfịn editie nte enyeoro Noah ye ubon esie ẹkekụtde idemmọ ke ini Ukwọ. Ke ẹberide usụn̄ ẹbaha mmọ ke esịt ubom ye ikpọ eboho mmọn̄ nsobo akande mmọ okụk, anaedi odudu Abasi oro okowụtde mi ama anam mmọ ndịk ndien anaedi mmọ ẹma ẹbọn̄ akam ifịk ifịk. Idụhe Itien̄wed Abasi ndomokiet oro owụtde nte ke mmọ ẹma ẹfịna idem ẹnyụn̄ ẹbup idemmọ ẹte: ‘Nte ubom enen̄ede ọsọn̄idem ekem ndibọhọ mme odudu nsobo? Nte nnyịn imenyene udia oro edikemde tutu Ukwọ ebe? Nte nnyịn iyekeme ndiyọ mme ukpụhọde idaha ke isọn̄ ke emi ebede?’ Mme n̄kpọntịbe oro ẹketienede ẹma ẹwụt nte ke mme utọ mfịna idem oro ikodụhe.
12 Man mmọ ẹbọ edinyan̄a, ama oyom Noah ye ubon esie ẹwụt mbuọtidem. Emi ọkọwọrọ nditiene item ye mme ndausụn̄ edisana spirit Abasi. Ke ini akwa ukụt, eyekam edi se ẹyomde ẹte nnyịn itiene mme ndausụn̄ edisana spirit inyụn̄ inam item Jehovah ebe ke esop esie. Ndien nnyịn idinyeneke ntak ndomokiet ndifịna idem ndọhọ ete: ‘Didie ke ẹdiyụhọ mme udọn̄ eke spirit ye eke obụkidem nnyịn? Nso ndutịm ke ẹdinam ẹnọ mbonusọn̄ m̀mê mbon oro ẹyomde san̄asan̄a ibọkusọbọ m̀mê edise enyịn? Didie ke Jehovah edinam nnyịn ikeme ndibọhọ ndụk obufa ererimbot?’ Ye ọkpọsọn̄ mbuọtidem, kpukpru mme anam-akpanikọ asan̄autom Jehovah ẹyeyak kpukpru n̄kpọ ẹsịn enye ke ubọk.—Men Matthew 6:25-33 domo.
13. Ndondo oro akwa ukụt ọtọn̄ọde, ntak ediyomde nnyịn inyene mbuọtidem nte eke Abraham?
13 Ndondo oro akwa ukụt ọtọn̄ọde, eyịghe idụhe mbuọtidem nnyịn ke Abasi eyekop nsọn̄idem akamba akamba. Idem n̄kpọ, nnyịn iyekụt nte ke Jehovah eyenam se enye ọkọdọhọde ke imọ iyenam. Nnyịn iyekụt nte enye ebierede ikpe ke enyịn nnyịn! Edi nte nnyịn ke idem nnyịn iyenyene mbuọtidem oro ekemde ndinịm ke akpanikọ nte ke adan̄aemi osobode mme anamidiọk, Abasi eyenyan̄a ikọt esie? Nte nnyịn iyetie nte Abraham emi ekenyenede mbuọtidem ete ke ‘Ebiereikpe ofụri ererimbot eyenam se inende,’ idisoboke ndinen owo ọkọrọ ye ndiọi owo?—Genesis 18:23, 25.
14. Nso mme mbụme ikpanam nnyịn idụn̄ọde mbuọtidem nnyịn inyụn̄ inam utom ọkpọsọn̄ ndisọn̄ọ enye?
14 Edi akpan n̄kpọ didie ntem ete nnyịn ibọp mbuọtidem nnyịn idahaemi! Ye utịt idiọk editịm n̄kpọ emi otịmde ekpere, ẹyak nnyịn iyak spirit Abasi onụk nnyịn esịn ke “edisana ido ye ke uten̄e Abasi.” (2 Peter 3:11-14) Do nnyịn ididịgheke ke ini akwa ukụt ye mme utọ ntịme ntịme ekikere nte mmọemi: ‘Nte ami mmodot ndibọ ukpeme Jehovah? Nte ami n̄kpekekeme ndinam se ikande oro ke utom esie? Nte ami mma nnen̄ede nnam utom ọkpọsọn̄ n̄kem man n̄kpemen “obufa owo nsịne”? Nte ami ndi orụk owo oro Jehovah oyomde ke obufa ererimbot?’ Mme utọ mbụme esịt akpanikọ oro ẹkpenyene ndinam nnyịn idụn̄ọde mbuọtidem nnyịn ise inyụn̄ inam utom ndisọn̄ọ enye idahaemi!—Colossae 3:8-10.
Mbuọtidem Ndinam Nnyịn Isọn̄ Idem
15. Nso ke Jesus ndusụk ini ekesisian mbon oro enye ọkọkọkde udọn̄ọ, edi ntak emi mîsọn̄ọke ukọkudọn̄ọ mbuọtidem?
15 Jesus ikanamke utom ukọkudọn̄ọ ikpọkidem ikpọn̄îkpọn̄ ye mbon oro ẹnyenede mbuọtidem. (John 5:5-9, 13) Ntre utom esie inọhọ ukpepn̄kpọ ukọkudọn̄ọ mbuọtidem oro mîkemke ye n̄wed Abasi ibetedem ndomokiet. Edi akpanikọ, Jesus ndusụk ini ama esisian mbon oro enye ọkọkọkde udọn̄ọ ete: “Mbuọtidem fo amanam fi okop nsọn̄idem.” (Matthew 9:22; Mark 5:34; 10:52; Luke 8:48; 17:19; 18:42) Edi ke ndidọhọ ntem, enye n̄kukụre akanyan ubọk owụt in̄wan̄în̄wan̄ akpanikọ emi: Edieke mbon udọn̄ọ oro mîkenyeneke mbuọtidem ke ukeme ukọkudọn̄ọ Jesus, mmọ ikpekekaha ibịne enye man ẹkọk mmọ ke akpa itie.
16. Nso ndutịm ukọkudọn̄ọ ke Jesus adausụn̄ mfịn?
16 Mfịn, Jesus Christ ke ọnọ ndutịm ukọkudọn̄ọ eke spirit ndausụn̄, ndien se iwakde ikan mme owo 4,000,000 ke ẹdu ke idaha ndibọ ufọn nto enye. Nte Mme Ntiense Jehovah, mmọ ke ẹdara nsọn̄idem eke spirit kpa ye udọn̄ọ ikpọkidem ekededi oro mmọ ẹnyenede. Mme Christian oro ẹyetde aran ke otu mmọ ẹnyene idotenyịn eke heaven, ndien mmọ ‘ẹdọn̄ ẹnyịn ke se owo mîkwe ke enyịn oro edibịghide ke nsinsi.’ (2 Corinth 4:16-18; 5:6, 7) Ndien mme Christian ye idotenyịn eke isọn̄ ẹsak iso ẹse mme utịbe utịbe edinam ukọkudọn̄ọ ikpọkidem oro edidade itie ke obufa ererimbot Abasi.
17, 18. Ewe ndutịm Jehovah ke ẹtịn̄ ke Ediyarade 22:1, 2, ndien didie ke ẹyom mbuọtidem man nnyịn ibọ ufọn ito enye?
17 Apostle John ama etịn̄ aban̄a mme ndutịm Abasi kaban̄a nsinsi uwem ke mme ikọ ẹmi ke Ediyarade 22:1, 2 ete: “Angel owụt mi akpammọn̄ uwem, emi asakde nte Crystal, emi otode ke ebekpo Abasi ye eke Eyenerọn̄, asan̄a ebe ke ufọt efak obio. Eto uwem ada ke n̄kan̄ akpa emi ye ke n̄kan̄ oko, on̄wụm orụk mfri duopeba, on̄wụm mfri esie ke ọfiọn̄ ke ọfiọn̄; ẹnyụn̄ ẹda ikọn̄ eto oro ẹkọk mme idụt udọn̄ọ.” “Akpammọn̄ uwem” oro esịne akpanikọ Ikọ Abasi ye kpukpru ndutịm Jehovah eken ndinyan̄a okopitem ubonowo nsio ke idiọkn̄kpọ ye n̄kpa nnyụn̄ nnọ mmọ nsinsi uwem ke isọn̄ uwa ufak Jesus. (Ephesus 5:26; 1 John 2:1, 2) Ke adan̄aemi ẹdude ke isọn̄, mme anditiene Jesus 144,000 oro ẹyetde aran ẹma ẹn̄wọn̄ ndutịm Abasi ndinọ uwem ebe ke Christ ndien ẹkot mmọ “ofriyo eti ido.” (Isaiah 61:1-3; Ediyarade 14:1-5) Mmọ ẹmesion̄o ekese mbun̄wụm spirit ke isọn̄. Nte mbon oro ẹnamde ẹset ke heaven, ke ini Tosịn Isua Ukara Christ, mmọ ẹyebuana ke ndideme ndutịm ufak oro edinamde n̄kpọ ke “[ndi]kọk mme idụt udọn̄ọ” nsio ke idiọkn̄kpọ ye n̄kpa.
18 Nte mbuọtidem nnyịn ọsọn̄de idem akan ke mme ndutịm Abasi ẹmi, ntre ke unyịmesịt nnyịn edikpon akan ke nditiene ndausụn̄ spirit esie ke ndidia mmọ. Mfọnmma ikpọkidem nte an̄wan̄ade eyedi nte owo owụtde mbuọtidem ke Christ onyụn̄ anamde n̄kọri eke spirit. Okposụkedi ẹdikọkde ikpọ udọn̄ọ owo ke utịbe utịbe usụn̄, ẹdida enye isịk ikpere mfọnmma nte enye anamde se inende. Enye kpukpru ini eyebuana ke ndutịm Abasi ke ndikọk udọn̄ọ ebe ke uwa Christ. Ntre mbuọtidem edikara nnyịn ndidi se ẹkọkde udọn̄ọ ẹnyụn̄ ẹnamde ifọn ima ke n̄kan̄ eke ikpọkidem.
‘Ẹnyan̄a Oto ke Mbuọtidem’
19. Ntak edide akpan n̄kpọ ndisọn̄ọ ndu ke mbuọtidem?
19 Tutu ke usiereyo obufa ererimbot oro Abasi edibịnde ekịm idiọk ererimbot emi efep ke nsinsi, edi akpan n̄kpọ didie ntem ete ikọt Jehovah ẹsọn̄ọ ẹdu ke mbuọtidem! Ẹyetop mbon oro “mînyeneke mbuọtidem” ẹsịn ke “akwa n̄kpọdiọhọ emi asakde ye ikan̄ ye brimestone,” kpa udiana n̄kpa. Ke akpatre, emi editịbe ke akpatre udomo ama ekebe ke utịt Tọsịn Isua Ukara Christ. (Ediyarade 20:6-10; 21:8, NW) Ediọn̄ utịp mbon oro ẹkade iso ndiwụt mbuọtidem ẹnyụn̄ ẹbọhọde ndidara anana-utịt ini iso didie ntem!
20. Didie ke 1 Corinth 13:13 edinyene san̄asan̄a se ọwọrọde ke utịt Tọsịn Isua Ukara Christ?
20 Adan̄aoro mme ikọ Paul ẹmi ke 1 Corinth 13:13 ẹyenyene san̄asan̄a se ẹwọrọde: “Ntem ke mbuọtidem, ye idotenyịn, ye ima ẹsụk ẹdu, mmọ mbita; edi andikpon n̄kan ke otu mmọ edi ima.” Idiyomke nnyịn iwụt mbuọtidem aba nte ke ntịn̄nnịm un̄wọn̄ọ ke Genesis 3:15 eyekabade edi ata idem n̄kpọ m̀mê ndidori enyịn aba nte ke enye eyesu. Oro ama ototịbe. Nte mbon oro ẹmụmde nsọn̄ọnda ẹkama, nnyịn iyekaiso ndidori enyịn ke Jehovah, inyene mbuọtidem ke enye ye ke Eyen esie, inyụn̄ ima mmọ nte mbon oro ẹnamde prọfesi emi osu. Akande oro, ntotụn̄ọ ima ye esịtekọm kaban̄a edinyan̄a nnyịn eyebọp nnyịn adian ye Abasi ke utuakibuot oro mîbahakede ke nsinsi.—1 Peter 1:8, 9.
21. Nso ke nnyịn mfịn ikpanam man ‘ẹnyan̄a nnyịn oto ke mbuọtidem’?
21 Ebede ke esop esie oro ẹkụtde ke enyịn, Jehovah amanam utịbe utịbe ndutịm ndisọn̄ọ mbuọtidem. Da kpukpru mmọ nam n̄kpọ ọyọhọ ọyọhọ. Dụk nyụn̄ buana kpukpru ini ke mme mbonoesop ikọt Abasi. (Mme Hebrew 10:24, 25) Kpep Ikọ esie ye mme n̄wed Christian ifịk ifịk. Ben̄e Jehovah edisana spirit esie. (Luke 11:13) Kpebe mbuọtidem mbon oro ke nsụhọdeidem ẹdade usụn̄ ke esop. (Mme Hebrew 13:7) Biọn̄ọ mme idomo ererimbot. (Matthew 6:9, 13) Ih, nyụn̄ nam ọkpọkpọ itie ebuana fo ye Jehovah ke kpukpru usụn̄ otụn̄ọ akan nte ekekeme. Ke akande kpukpru n̄kpọ, kaiso ndiwụt mbuọtidem. Ndien afo emekeme ndidu ke otu mbon oro ẹnemde Jehovah esịt ẹnyụn̄ ẹnyenede edinyan̄a, koro Paul ọkọdọhọ ete: “Ke mfọn [“mfọnido oro owo mîdotke,” NW] ke ẹma ẹnyan̄a mbufo oto ke mbuọtidem: edinyan̄a emi inyụn̄ itoho mbufo; edi Abasi ọnọnọ.”—Ephesus 2:8.
Nso Idi Mme Ibọrọ Fo?
◻ Nso udomo mbuọtidem isak iso ise nnyịn nnennen nnennen?
◻ Ke nso usụn̄ iba ke mbuọtidem nnyịn ekeme ndinam nnyịn ikop nsọn̄idem?
◻ Nte ekemde ye 1 Peter 1:9, adan̄a didie ke ana nnyịn inyene mbuọtidem?
◻Nso ndutịm ke nnyịn inyene ndisọn̄ọ mbuọtidem nnyịn?
[Ndise ke page 15]
Nte ete oro Jesus ọkọkọkde eyen esie udọn̄ọ, nte afo omokụt ọkpọkpọ ufọn ndinyene mbuọtidem oro okponde akan?
[Ndise ke page 17]
Eyeyom mbuọtidem nte eke Noah ye ubon esie man ẹbọhọ “akwa ukụt”