Nso Idi Ukpọhọde Ata Ido Ukpono Christ?
MFỊN, ata ediwak owo ẹdọhọ nte ibuanade ke Ido Ukpono Christ akan nte edide ye mme otu ido ukpono efen ekededi. Edi se mme okot-idem Christian ẹmi ẹnịmde ke akpanikọ ẹdu ke ntuaha, mmọ idianake kiet, ndusụk ini mmọ ẹsikam ẹwọt kiet eken. Nte an̄wan̄ade, ediwak idịghe mme ata Christian. Jesus ama ọdọhọ nte ke eyo nnyịn, ediwak owo ẹyedọhọ enye ẹte, “Ọbọn̄, Ọbọn̄,” ke ikọ efen, ẹdọhọ ẹte ke idi mme Christian, edi enye eyedọhọ mmọ ete: “Akananam ndiọn̄ọke mbufo: ẹdianade Mi, mbufo mme anam ukwan̄n̄kpọ.” (Matthew 7:21, 23) Ke akpanikọ, owo nnyịn ndomokiet ikpoyomke ndidu ke otu mmọemi! Ntre didie ke nnyịn ikeme ndifiọk m̀mê nnyịn idi ata Christian?
Akpanikọ edi-o, oyom ekese n̄kpọ man owo edi ata Christian. Ata Christian enyene ndinyene ọkpọsọn̄ mbuọtidem koro “ke mbuọtidem mîdụhe, owo ikemeke ndinem Abasi esịt.” (Mme Hebrew 11:6) Ọkpọsọn̄ mbuọtidem oro enyene ndisan̄a ye nti utom. Mbet James okodụri owo utọn̄ ete “edinịm ke akpanikọ [“mbuọtidem,” NW] eke mîsan̄ake ye edinam n̄kpọ onyụn̄ akpa.” (James 2:26) Akande oro, Christian enyene ndifiọk odudu oro “asan̄autom emi anamde akpanikọ, onyụn̄ enyenede ọniọn̄” enyenede. (Matthew 24:45-47) Edi ukpọhọde ata Ido Ukpono Christ edi n̄kpọ efen ke ẹsiode mme n̄kpọ ẹmi ẹfep.
Nso idi ukpọhọde oro? Apostle Paul ama anam an̄wan̄a ke akpa n̄wed oro enye ekewetde ọnọ ẹsọk mbon Corinth ete: “N̄kpesem usem mme owo ye eke mme angel, ndien nnyeneke ima, mmakabade nyomo uyom nte akpan̄kpan̄, nnyụn̄ nsioro uyo nte ekpri n̄kanika. N̄kponyụn̄ nnyene ukeme ndisiak uduak Abasi, ndinyụn̄ mfiọk kpukpru ndịbe ndịbe n̄kpọ ye kpukpru ifiọk; n̄kponyụn̄ nnyene ọyọhọ mbuọtidem, tutu n̄keme ndimen ikpọ obot ke itie nduọk, ndien nnyeneke ima, ndịghe baba n̄kpọ kiet. N̄kponyụn̄ nyak ofụri inyene mi nnọ ẹda ẹbọk nditọ ubuene, n̄kponyụn̄ nnyak ikpọkidem mi nnọ ẹfọp ke ikan̄, ndien nnyeneke ima, idoroke mi baba n̄kpọ kiet.”—1 Corinth 13:1-3.
Ntem ima edi ukpọhọde ata Ido Ukpono Christ. Mbuọtidem, mme utom, ye nnennen ebuana ẹdi akpan n̄kpọ, se ẹyomde. Edi ke ima mîdụhe, owo ikwe ufọn mmọ. Ntak edide ntre?
Ke akpan, oto ntak utọ Abasi oro nnyịn ituakde ibuot inọ. Apostle John eketịn̄ aban̄a Jehovah, kpa Abasi ata Ido Ukpono Christ, ke ikọ ẹmi ete: “Abasi edi ima.” (1 John 4:8) Jehovah Abasi enyene ediwak edu efen, utọ nte odudu, unenikpe, ye ọniọn̄, edi sia enye enen̄erede edi Abasi ima, nso orụk owo ke enye okpoyom mme andituak ibuot nnọ enye ẹdi? Ke akpanikọ, mbon oro ẹkpebede enye ẹnyụn̄ ẹnyenede ima.—Matthew 5:44, 45; 22:37-39.
Nnennen Uduakesịt
Ih, ima anam mme Christian ẹtie nte Abasi oro mmọ ẹtuakde ibuot ẹnọ. Emi ọwọrọ nte ke mme uduakesịt mmọ ẹdi ukem ye mme uduakesịt Abasi. Ewe uduakesịt ke akande kpukpru okonụk Jehovah Abasi ndidọn̄ Jesus edi isọn̄ man ọkpọnọ nnyịn ifet ndinyene nsinsi uwem? Ima. “Abasi akamama ererimbot ntem, tutu Enye osio ikpọn̄îkpọn̄ Eyen emi Enye obonde ọnọ, man owo ekededi eke ọbuọtde idem ye Enye okûtak, edi enyene nsinsi uwem.” (John 3:16) Nso, ndien, ikpedi uduak nnyịn ke ndinam uduak Abasi. Ini kiet efen, ima. “Ndima Abasi edi emi, ete nnyịn inịm mbet Esie.”—1 John 5:3.
Ndi ẹkeme ndinam n̄kpọ Abasi ye idiọk uduakesịt? Ih. Paul ama asiak ndusụk owo ke eyo esie oro ẹkanamde ke ntak ufụp ye ndomoidem. (Philippi 1:15-17) Oro ekeme nditịbe nnọ nnyịn. Ererimbot emi enen̄ede akama ndomoidem, ndien edu oro ekeme nditụk nnyịn. Nnyịn imekeme nditan̄ idem ke ndikere nte ke nnyịn idi mfọnn̄kan etịn̄ikọ mîdịghe ke imekeme ndinịm n̄wed ikan mmọ en̄wen. Nnyịn imekeme ndimen mme ifetutom nnyịn ndomo ye enyeoro mmọ en̄wen ẹnyenede inyụn̄ ikabade ikụt idem ke akpan n̄kpọ ikan—mîdịghe ifụbe ufụp. Ebiowo ekeme ndifụbe ufụp mban̄a itie odudu esie, idem osịmde udomo oro ọbiọn̄ọde akparawa oro enyenede ukeme ndinam n̄kọri. Udọn̄ kaban̄a ufọn idem owo ekeme ndinam nnyịn inam ufan ye mme Christian oro ẹdide imọ ke adan̄aemi isịnde mbon oro ẹdide ubuene.
Mme n̄kpọ ẹmi ẹkeme nditịbe koro nnyịn idide mme anana mfọnmma owo. Nte ededi, edieke—nte Jehovah—nnyịn inamde ima edi akpan uduakesịt nnyịn, nnyịn iyen̄wana ye mme utọ ntụhọ oro. Ibụk, udọn̄ edinọ idem nnyịn ubọn̄, m̀mê iseri iseri ntan̄idem ẹkeme ndimen ima mfep, tutu eyede se ‘mîdoroke nnyịn baba n̄kpọ kiet.’—Mme N̄ke 11:2; 1 Corinth 13:3.
Ima ke Ibụk Ibụk Ererimbot
Jesus ọkọdọhọ ete ke mme anditiene imọ ‘idịghe eke ererimbot.’ (John 17:14) Didie ke nnyịn ikeme nditre ndidi se ererimbot oro akande nnyịn okụk akarade? Ima eyen̄wam ndinam. Ke uwụtn̄kpọ, mfịn mme owo “ẹma mbre ẹkan Abasi.” (2 Timothy 3:4) John ama odụri nnyịn utọn̄ ete ikûtie ntre. Enye ọkọdọhọ ete: “Ẹkûma ererimbot, ye se idude ke ererimbot. Edieke owo ekededi amade ererimbot, ima Ete idụhe enye ke esịt. Koro ofụri ofụri se idude ke ererimbot, mbumek obụkidem, ye mbumek enyịn, ye ikpîkpu ubọn̄ uwem emi, itoho Ete, edi oto ke ererimbot.”—1 John 2:15, 16.
Edi, imemke utom ndiwọn̄ọde edem nnyịn n̄wụt “mbumek obụkidem” ye “mbumek enyịn.” Ẹma mme n̄kpọ ẹmi akpan akpan koro mmọ ẹnemde obụkidem nnyịn. Akande oro, ata ediwak nsio nsio mbumek ẹdu mfịn ẹkan nte ekedide ke eyo John, ntre edieke mbumek enyịn ekedide mfịna adan̄aoro, enye ototịm edi ntre kemi.
Nte enemde, ediwak unọ idem inemesịt oro ererimbot ọnọde mfịn ikwan̄ake ke idemmọ. N̄kpọ ndomokiet ikwan̄ake ke ndinyene akamba ufọkidụn̄, ediye moto, television, m̀mê ukwak ubre usan ikwọ. M̀mê enye ndidi ubiat ibet Bible ekededi ndika inem inem, anyan isan̄, nnyụn̄ n̄ka nduọkodudu oro ẹnọde inemesịt. Nso idi akpan n̄kpọ ke item John, ndien? N̄kpọ kiet edi-o, edieke mme utọ n̄kpọ oro ẹkabarede ẹdi akpan n̄kpọ ẹkaha ẹnọ nnyịn, mmọ ẹyekọri edu ibụk, uma inyene, ye ntan̄idem ke idem nnyịn. Ndien ukeme oro nnyịn isịnde man inyene okụk ndinyene mmọ ekeme ndibiọn̄ọ utom oro inamde inọ Jehovah. Idem ndikop inem mme utọ n̄kpọ oro esida ini, ndien ke adan̄aemi ukeuke udomo edinọ idem inemesịt ọnọde nduọkodudu, ini nnyịn edi esisịt ke ndikpep Bible, nsop idem ye ekemmọ mme Christian kaban̄a utuakibuot, nnyụn̄ n̄kwọrọ eti mbụk Obio Ubọn̄.—Psalm 1:1-3; Matthew 24:14; 28:19, 20; Mme Hebrew 10:24, 25.
Ke eyo uma inyene emi, oyom ubiere man ‘ẹbemiso ẹyom Obio Ubọn̄’ ẹnyụn̄ ẹbiọn̄ọ ‘edida ererimbot nnam n̄kpọ ọyọhọ ọyọhọ.’ (Matthew 6:33; 1 Corinth 7:31) Ọkpọsọn̄ mbuọtidem eyen̄wam. Edi akpan akpan, ata ima oro inyenede inọ Jehovah ye mbọhọidụn̄ nnyịn ẹyesọn̄ọ nnyịn idem ndibiọn̄ọ n̄kpọ etabi oro, ke adan̄aemi mîkwan̄ake ke idemmọ, ẹkeme ndibiọn̄ọ nnyịn ‘ndinam utom nnyịn ọyọhọ ọyọhọ mma.’ (2 Timothy 4:5) Ke utọ ima oro mîdụhe, utom ukwọrọikọ nnyịn ekeme ndikabade mbiara tutu eyedi sụk ubak ubak ukeme.
Ima ke Esịt Esop
Jesus ama owụt nte ima edide akpan n̄kpọ ke ini enye ọkọdọhọde ete: “Mbufo ẹma ẹma kiet eken, kpukpru owo ẹyeda oro ẹfiọk ẹte mbufo ẹdi mbet Mi.” (John 13:35) Ntak emi mbiowo ẹkpebiatde utọ uwak ini oro ndibọk nnyụn̄ n̄kpeme ekemmọ mme Christian edieke mmọ mîkpamaha mmọ? Ntak emi esop ọkpọyọde ndudue ekemmọ owo—esịnede mbiowo—ke mîkpedịghe ntak ima? Ima esinụk mme Christian ndin̄wam kiet eken ke n̄kan̄ obụkidem ke ini mmọ ẹkopde ẹte ke mmọ eken ẹdu ke unana. (Utom 2:44, 45) Ke mme ini ukọbọ, mme Christian ẹsikpeme kiet eken ẹnyụn̄ ẹsikam ẹkpa ke ibuot kiet eken. Ntak-a? Ke ntak ima.—John 15:13.
Ndusụk ini n̄kponn̄kan uyarade ima esiwụt idem ke n̄kpri n̄kpọ. Ekemmọ Christian ekeme ndifiak n̄ka mbịne ebiowo, oro okopde mfịghe ke ntak ọkpọsọn̄ utom, nditọt mfịna oro ekemede nditie ebiowo oro nte inen̄ekede idi akpan n̄kpọ. Nte ebiowo oro ekpenyene ndiyat esịt? Utu ke ndiyak emi akabade edi ntak ubahade, enye esinam n̄kpọ ke ime ye mfọnido ye eyenete esie. Mmọ ẹneme mfịna oro ọtọkiet, ndien emi n̄ko esisọn̄ọ itie ufan mmọ akan. (Matthew 5:23, 24; 18:15-17) Utu ke owo kiet kiet ndiyịre ke ndikụt unen nnọ idemesie, kpukpru owo ẹkpenyene ndidomo ndinyene mmemmem esịt oro Jesus okotorode, ẹnyụn̄ ẹdu ke mben̄eidem ndifen nnọ nditọete mmọ “tutu osịm ikatiaba ke itie ata-ye-duop.” (Matthew 18:21, 22) Ntem, mme Christian ẹdomo ọkpọsọn̄ ndisịne ima, kpa “se ibọpde uwem adiana inam ọfọn ama.”—Colossae 3:14.
Ndinam Ima oro Inyenede Inọ Kiet Eken Okop Odudu
Ih, ima edi nnennen uduakesịt ke ndinam n̄kpọ Jehovah. Ima eyesọn̄ọ nnyịn idem ndida san̄asan̄a n̄kpọn̄ ererimbot, ndien ima eyekụt ete ke esop ke akpanikọ edi eke Christian. Ke adan̄aemi mîsehekede ikpọn̄ nnennen edinam, enye eyen̄wam mmọ oro ẹkamade odudu ẹkûkabade ẹkere ọkpọsọn̄ ọkpọsọn̄ ẹkaha ẹban̄a nnennen edinam tutu eyedi se mmọ ẹfrede ẹban̄a mfọnido ye ifụre ifụre ido ke ndinam n̄kpọ ye mmọ en̄wen. Ima esin̄wam nnyịn ‘ndikop uyo mme andida usụn̄, nnyụn̄ nsụk ibuot.’—Mme Hebrew 13:17.
Apostle Peter ama akpak nnyịn ete ‘inyene ufiop ufiop ima’ inọ kiet eken koro “ima ofụkde ekese idiọkn̄kpọ.” (1 Peter 4:8) Didie ke nnyịn ikeme ndinam emi? Ẹkebot owo ke mbiet Abasi ndien ke ntre enyene ndammana ukeme ndima ima. Edi orụk ima oro nnyịn itịn̄de iban̄a mi oyom n̄kpọ efen efen. Ke akpanikọ, enye edi akpan mbun̄wụm spirit Abasi. (Galatia 5:22) Ntem, man inyene ima, ana nnyịn iyak idem nnyịn inọ spirit Abasi. Didie? Ebe ke ndikpep Bible, emi ẹkewetde ke odudu spirit Jehovah. (2 Timothy 3:16) Ebe ke ndibọn̄ akam nnyom spirit Jehovah ndikọri ima oro nnyịn inyenede inọ Jehvah ye oro inyenede inọ nditọete nnyịn. Onyụn̄ ebe ke ndibuana ye esop Christian, emi spirit oro ọfiọrọde ifụre ifụre.
Nnyịn n̄ko inyene ndidụn̄ọde idem nnyịn man ifiọk mme edinam m̀mê ekikere unana ima ekededi. Ti, ete ke ima edi edu otode esịt, ndien “esịt abian̄a akan kpukpru n̄kpọ, onyụn̄ abiara fap.” (Jeremiah 17:9) Kpa ye ofụri un̄wam oro Jehovah ọnọde, nnyịn iyenam n̄kpọ ndusụk ini ke usụn̄ oro mîwụtke ima. Nnyịn imekeme nditịn̄ ikọ ke iyatesịt nte mîdotke ye ekemmọ Christian, mîdịghe nnyịn imekeme ndidaha ide inyụn̄ itọhọ ke n̄kpọ oro ẹtịn̄de. Ntem, nnyịn iyenam ọfọn ndidian uyo ke akam David emi: “O Abasi, dụn̄ọde mi, nyụn̄ fiọk esịt mi: domo mi, nyụn̄ fiọk ekikere mi: Nyụn̄ se m̀mê usụn̄ ukwan̄ odu mi ke esịt, nyụn̄ da mi usụn̄ nsinsi uwem.”—Psalm 139:23, 24.
Nte Bible ọdọhọde, “ima idibehe ifep [ke] nsinsi.” 1 Corinth 13:8) Edieke nnyịn ikpepde ndima kiet eken, nnyịn tutu amama idinanake ukeme ke mme ini idomo. Ima oro odude ke otu ikọt Abasi etịp n̄kpọ esịn akamba akamba ke paradise eke spirit oro odude mfịn. Mmọ oro ẹnyenede ufiop ufiop ima oro otode esịt ẹnọ kiet eken kpọt ẹdinyene idatesịt ndidụn̄ ke obufa ererimbot. Ntem, kpebe Jehovah ke ndiwụt utọ ima oro ndien ke ntre ọsọn̄ọde mbọbọ edidianakiet. Kọri ima, nyụn̄ nyene ukpọhọde ata Ido Ukpono Christ.