Mbon Ifụre Ifụre Ido Ẹkop Inemesịt Didie Ntem!
“Ọfọfọn [“Inemesịt odu,” NW] ọnọ mmọ eke ẹnyenede ifụre ifụre ido: koro mmọ ẹyeda isọn̄ ẹnyene.”—MATTHEW 5:5.
1. Nso idi ifụre ifụre ido oro Jesus eketịn̄de aban̄a ke Ukwọrọikọ esie ke Obot?
KE UKWỌRỌIKỌ esie ke Obot, Jesus Christ ọkọdọhọ ete: “Ọfọfọn [“Inemesịt odu,” NW] ọnọ mmọ eke ẹnyenede ifụre ifụre ido, koro mmọ ẹyeda isọn̄ ẹnyene.” (Matthew 5:5) Ifụre ifụre ido emi, m̀mê nsụkidem, idịghe enyọn̄ enyọn̄ mbubịk mbubịk utie sụn̄sụn̄, m̀mê enye ndidi ikpîkpu ndammana edu. Utu ke oro, enye edi ata ifụre ifụre ye emem emem edu esịtidem oro ẹwụtde akpan akpan ke ndinam n̄kpọ mban̄a uduak ye ndausụn̄ Jehovah Abasi. Mbon ata ifụre ifụre ido ẹnyene ọkpọsọn̄ udọn̄ ndiberi edem ke Abasi emi owụtde idem ke sụn̄sụn̄ edu oro mmọ ẹwụtde ekemmọ owo.—Rome 12:17-19; Titus 3:1, 2.
2. Ntak emi Jesus ọkọdọhọde ke ọfọfọn ọnọ mbon ifụre ifụre ido?
2 Jesus ọkọdọhọ ke inemesịt odu ọnọ mbon ifụre ifụre ido koro mmọ ẹyeda isọn̄ ẹnyene. Nte Eyen Abasi oro enyenede ifụre ifụre ido ke mfọnmma usụn̄, Jesus edi Akpan Andida isọn̄ nnyene. (Psalm 2:8; Matthew 11:29; Mme Hebrew 1:1, 2; 2:5-9) Edi nte Messiah kpa “eyen owo,” ana enye enyene nsan̄a mme andikara ke Obio Ubọn̄ esie ke heaven. (Daniel 7:13, 14, 22, 27) Nte ‘mme enyene udeme’ ye Christ mbon ifụre ifụre ido oro ẹyetde aran mi ẹyebuana ke inyene esie eke isọn̄. (Rome 8:17) Mbon ifụre ifụre ido en̄wen, kpa mbon mbieterọn̄ ẹyedara nsinsi uwem ke Paradise ke ukara Obio Ubọn̄ eke isọn̄. (Matthew 25:33, 34, 46; Luke 23:43) Idotenyịn oro anam mmọ ẹnem esịt ke akpanikọ.
3. Abasi ye Christ ẹnịm nso uwụtn̄kpọ ẹban̄a ifụre ifụre ido?
3 Akpan Andida isọn̄ nnyene emi enyenede ifụre ifụre ido mi enyene isọn̄ oto Ete esie, Jehovah, kpa akpan uwụtn̄kpọ ifụre ifụre ido. N̄wed Abasi esiwak didie ntem ndidọhọ ke Abasi ‘isọpke iyatesịt, edi awak ima-mfọnido’! (Exodus 34:6; Nehemiah 9:17; Psalm 86:15) Enye enyene akwa odudu edi owụt utọ ifụre ifụre ido oro anamde mme andituak ibuot nnọ enye ẹkeme ndisan̄a n̄kpere enye ye unana ndịk. (Mme Hebrew 4:16; 10:19-22) Eyen Abasi, emi ‘ekenyenede ifụre ifụre ido onyụn̄ osụhọde idem ke esịt,’ ama ekpep mme mbet esie ndisụhọde idem. (Matthew 11:29; Luke 6:27-29) Ekem, ifụn Abasi ye Eyen esie emi ẹnyenede ifụre ifụre ido mi ẹma ẹwet ẹban̄a “ifụre ifụre ido ye mmemido Christ.”—2 Corinth 10:1; Rome 1:1; James 1:1, 2; 2 Peter 1:1.
4. (a) Nte ekemde ye Colossae 3:12, nso ke mbon oro ke akpanikọ ẹnyenede ifụre ifụre ido ẹnam? (b) Mme mbụme ewe ẹdot nnyịn ikere iban̄a?
4 Mfịn, oyom mme Christian oro ẹyetde aran ye nsan̄a mmọ eke isọn̄ ẹnyene ifụre ifụre ido. Ke ẹma ẹkesio udu, n̄kari, mbubịk, ufụp, ye idiọkiban̄a ekededi, edisana spirit Abasi ama an̄wam mmọ ndikabade ndi obufa ke ‘odudu oro anamde utom ke esịt mmọ.’ (Ephesus 4:22-24; 1 Peter 2:1, 2) Ẹkpak mmọ ẹte ẹda esịtmbọm ẹsịne, ye mfọnido, ye nsụkidem, ye ifụre ifụre ido, ye ime.” (Colossae 3:12) Edi nso ke ifụre ifụre ido enen̄ede esịne? Ntak enyenede ufọn ndinyene ifụre ifụre ido? Ndien didie ke edu emi ekeme nditịp n̄kpọ nsịn ke inemesịt nnyịn?
Nditịn̄ Enyịn Nse Ifụre Ifụre Ido
5. Didie ke ẹkeme ndikabade ifụre ifụre ido?
5 Owo oro enyenede ifụre ifụre ido osụhọde idem ke edu ye ke ido. Ke ndusụk edikabade Bible, edi nsan̄a ikọenyịn̄ oro pra·ysʹ ke ẹkabade nte “nsụkidem,” “mmemmem ido,” “ifụre ifụre ido,” ye “sụn̄sụn̄ ido.” Ke ata ikọ Greek, nsan̄a ikọenyịn̄ oro pra·ysʹ ekeme ndida mban̄a sụn̄sụn̄ ofụm m̀mê uyo. Enye n̄ko ekeme ndida nnọ owo oro ọfọnde ido. Eyen ukpepn̄kpọ oro, W. E. Vine ọdọhọ ete: “Ẹwụt Abasi [ikọenyịn̄ oro pra·yʹtes] akpa akpan akpan. Enye edi sụn̄sụn̄ edu oro nnyịn inyịmede mme edinam Esie ye nnyịn nte eti, ndien ke ntre ye unana edifan̄a m̀mê edibiọn̄ọ; enye enyene n̄kpet n̄kpet ebuana ye ikọ oro, tapeinophrosunē [nsụhọdeidem].”
6. Ntak ẹkemede ndidọhọ nte ke ifụre ifụre ido idịghe mmemidem?
6 Ifụre ifụre ido idịghe mmemidem. Eyen ukpepn̄kpọ oro, William Barclay, ekewet ete, “Sụn̄sụn̄ ido odu ke praus, edi ọkpọsọn̄ odudu nte ukwak odu ke edem sụn̄sụn̄ ido.” Oyom odudu man ẹnyene ifụre ifụre ido. Ke uwụtn̄kpọ, oyom odudu man ẹtie sụn̄sụn̄ ke idak iyatesịt m̀mê ke ini ẹkọbọde nnyịn. Enyene ifụre ifụre ido Eyen Abasi, Jesus Christ ama onịm eti uwụtn̄kpọ ke afan̄ emi. “Ke ini owo osụn̄ide Enye, Enye isụn̄ike mmọ usiene; ke ini Enye ebede ke ndutụhọ, Enye itịn̄ke ikọ ndịghe; edi ayak ikọ Esie esịn ke ubọk [Jehovah Abasi] Andikpe edinen ikpe.” (1 Peter 2:23) Ukem nte Jesus emi ekenyenede ifụre ifụre ido, nnyịn imekeme ndinyene mbuọtidem nte ke Abasi eyenam n̄kpọ ye mme andisụn̄i ye mme andikọbọ nnyịn. (1 Corinth 4:12, 13) Nnyịn imekeme nditie sụn̄sụn̄, nte Stephen oro ẹkekọbọde eketiede, ifiọkde ite ke edieke nnyịn inamde akpanikọ, Jehovah eyemụm nnyịn akama inyụn̄ iyakke n̄kpọ ndomokiet ọnọ nnyịn nsinsi unan.—Psalm 145:14; Utom 6:15; Philippi 4:6, 7, 13.
7. Nso ke Mme N̄ke 25:28 owụt kaban̄a owo oro ananade ifụre ifụre ido?
7 Jesus ama enyene ifụre ifụre ido, kpa ye oro enye ama owụt odudu ke ndisọn̄ọ nda ke se inende. (Matthew 21:5; 23:13-39) Owo ekededi oro enyenede “ekikere Christ” eyetie nte enye ke n̄kpọ emi. (1 Corinth 2:16) Edieke owo mîmemke ido, enye inyeneke edu Christ. Utu ke oro, enye odot ye ikọ ẹmi: “Owo eke mîmụmke esịt esie ikama, ebiet obio eke owụrede anana ibibene.” (Mme N̄ke 25:28) Utọ owo oro ananade ifụre ifụre ido mi esisọp edi se ndiọi ekikere oro ekemede ndinam enye anam n̄kpọ ke mme usụn̄ oro mîdotke ẹkande enye ubọk. Ke adan̄aemi Christian oro enyenede ifụre ifụre ido mîdịghe owo mmemidem, edi enye ọfiọk ete ke “sụn̄sụn̄ ibọrọ akabade ifiopesịt efep: edi uyat ikọ edemede iyatesịt.”—Mme N̄ke 15:1.
8. Ntak emi mîdịghe mmemmem n̄kpọ ndinyene ifụre ifụre ido?
8 Imemke utom ndinyene ifụre ifụre ido, koro nnyịn imenyene ndammana unana mfọnmma ye idiọkn̄kpọ. (Rome 5:12) Edieke nnyịn idide mme asan̄autom Jehovah, nnyịn n̄ko imenyene en̄wan ndin̄wana ye odudu ndiọi spirit oro ẹkemede ndidomo sụn̄sụn̄ ido nnyịn ebe ke ukọbọ. (Ephesus 6:12) Ndien n̄wakn̄kan ke otu nnyịn inam utom ke otu mbon oro ẹnyenede ẹdu nsọn̄ido ererimbot emi esịnede ke ubọk Devil mi. (1 John 5:19) Ntre didie ke nnyịn ikeme ndikọri ifụre ifụre ido?
Nte Ẹkemede Ndikọri Ifụre Ifụre Ido
9. Nso ekikere idin̄wam nnyịn ndikọri ifụre ifụre ido?
9 Edinịm ke akpanikọ oro ọkọn̄ọde ke Bible nte ke ẹyom nnyịn iwụt ifụre ifụre ido eyen̄wam nnyịn ndikọri edu emi. Ke usen ke usen ana nnyịn inam n̄kpọ ndikọri ifụre ifụre ido. Mîdịghe ntre, nnyịn iditie nte mbon oro ẹsede ifụre ifụre ido nte mmemidem ẹnyụn̄ ẹkerede ke edikụt unen ọkọn̄ọ ke ndiwụt idem, nsọn̄ibuot, idem nsọn̄ido. Nte ededi, ikọ Abasi obiom ntan̄idem ikpe, ndien ọniọn̄ ọniọn̄ n̄ke kiet ọdọhọ ete: “Owo mfọnido anam se ifọnde ye ukpọn̄ esiemmọ: edi owo afai otụhọde obụkidem esie.” (Mme N̄ke 11:17; 16:18) Mme owo ẹsida nsannsan ẹkpọn̄ ọsọn̄ido, anana mfọnido owo, idem ọkpọkọm mmọ ẹnam ntre akpan akpan man ẹfep ndidi se nsọn̄ido ye unana ifụre ifụre ido esie ọnọde unan.
10. Edieke anade nnyịn inyene ifụre ifụre ido, nnyịn inyene ndisụk idem nnọ nso?
10 Man inyene ifụre ifụre ido, ana nnyịn isụk idem inọ odudu edisana spirit, m̀mê anamutom odudu Abasi. Nte Jehovah akanamde isọn̄ ekeme ndisiọn̄ọ mbun̄wụm, ntre enye amanam mme asan̄autom esie ẹkeme ndision̄o mfri spirit esie, esịnede ifụre ifụre ido. Paul ekewet ete: “Mbun̄wụm spirit edi ima, ye idatesịt, ye emem, ye ime, ye mfọnido, ye eti ido, ye edinam akpanikọ, ye ifụre ifụre ido, ye mfara ke idem; baba ibet kiet ibiọn̄ọke orụk edu emi.” (Galatia 5:22, 23) Ih, ifụre ifụre ido edi kiet ke otu mfri spirit Abasi oro mbon oro ẹnemde enye esịt ẹwụtde. (Psalm 51:9, 10) Ndien nso ukpụhọde ke ifụre ifụre ido esision̄o edi ntem! Ke ndinam an̄wan̄a: Ama odu owo n̄kanubọk kiet ẹkekotde Tony emi ekesin̄wanade en̄wan, owode mme owo, adade n̄kpọsọn̄ ibọk ke ndịbe odụk obio, adade iso ke n̄ka uwat ọkpọikpọi, onyụn̄ odude ke ufọk-n̄kpọkobi ediwak ini. Edi, ke ndinyene ifiọk Bible n̄ko ye un̄wam spirit Abasi, enye ama okpụhọde edi asan̄autom Jehovah oro enyenede sụn̄sụn̄ ido. Mbụk Tony idịghe esen n̄kpọ. Nso, ndien, ke owo ekeme ndinam edieke unana ifụre ifụre ido edide akpan n̄kpọ oro adiade edu esie?
11. Ke ndikọri ifụre ifụre ido, nso udeme ke akam enyene?
11 Akam ofụri esịt oro ẹbọn̄de ẹyom spirit Abasi ye mfri esie edide ifụre ifụre ido eyen̄wam nnyịn ndikọri edu emi. Ekeme ndiyom nnyịn ikaiso ‘iben̄e, nte Jesus ọkọdọhọde,’ ndien Jehovah Abasi eyenọ eben̄e nnyịn. Ke ama akanam an̄wan̄a nte ke mme ete eke obụk ẹsinọ nditọ mmọ nti n̄kpọ, Jesus ama ọdọhọ ete: “Edieke mbufo ẹmi [ẹdide mme anamidiọk ndien ke ntre ke ndusụk udomo] ẹdiọkde ẹfiọkde ndinọ nditọ mbufo nti enọ, adan̄a didie akan oro ke Ete mbufo ke heaven ediyak edisana spirit ọnọ mmọ eke ẹben̄ede Enye?” (Luke 11:9) Akam ekeme ndin̄wam ndinam ifụre ifụre ido edi taktak ikpehe edu nnyịn—kpa edu oro otịpde n̄kpọ esịn ke inemesịt nnyịn ye eke nsan̄a nnyịn.
12. Ntak emi edinyene ke ekikere nte ke mme owo ẹdi mme anana mfọnmma ekemede ndin̄wam nnyịn ndinyene ifụre ifụre ido?
12 Nditi nte ke mme owo ẹdi mme anana mfọnmma ekeme ndin̄wam nnyịn ndinyene ifụre ifụre ido. (Psalm 51:5) Nnyịn ikemeke ndikere m̀mê ndinam n̄kpọ ke mfọnmma usụn̄, owo ndomokiet inyụn̄ ikemeke, ntre nnyịn ikpenyene ndiwụt edikere mban̄a inyụn̄ inam n̄kpọ ye mmọ nte nnyịn ikpamade ẹnam ye nnyịn. (Matthew 7:12) Ndifiọk nte ke kpukpru nnyịn inanam ndudue ekpenyene ndinam nnyịn isifen inyụn̄ inyene ifụre ifụre ido ke ini inamde n̄kpọ ye mmọ en̄wen. (Matthew 6:12-15; 18:21, 22) Idem n̄kpọ, nte nnyịn iwụtke esịtekọm nte ke Abasi enyene ima ye ifụre ifụre ido ye nnyịn?—Psalm 103:10-14.
13. Didie ke ẹkeme ndin̄wam nnyịn ndikọri ifụre ifụre ido edieke nnyịn ifiọkde ite ke Abasi akanam ubonowo ẹdi mbon ifụre uduak?
13 Ndifiọk nte ke Abasi akanam mme owo ndidi mbon oro ẹnyenede ifụre uduak ekeme n̄ko ndin̄wam nnyịn ndikọri ifụre ifụre ido. Emi iyakke owo ekededi ofụmi mme ibet Jehovah ye unana edibọ ufen, edi enye onyịme ẹnyene nsio nsio inem, se ẹmade, ye se owo mîmaha ke otu ikọt esie. Ntre ẹyak nnyịn ifiọk ite ke inaha ẹnyịk owo ndomokiet ndinyene edu oro ikemede ndikere nte ke enye ọfọn akan. Edu emi eyen̄wam nnyịn ndinyene ifụre ifụre ido.
14. Kaban̄a ifụre ifụre ido, nso ikpedi ubiere nnyịn?
14 Ubiere nditre nditop ifụre ifụre ido nduọk eyen̄wam nnyịn ikaiso ikọri edu emi. Ndiyak idem nnọ odudu spirit Jehovah ada ukpụhọde ke ekikere nnyịn edi. (Rome 12:2) Mmemmem, edu Christ kemi aman̄wam ndibiọn̄ọ nnyịn ndisịn idem ke “use, ye idiọkitọn̄, ye ediyụhọ mmịn, ye otịme otịme ido, ye edin̄wọn̄ mmịn, ye obukpo edikpono ndem.” Nnyịn ikpedehede itop ifụre ifụre ido iduọk ke ntak okụk, ebuana otuowo, m̀mê mme ntak eken mîdịghe koro mme owo ẹtịn̄ ikọ esuene ẹdian eti edu nnyịn. (1 Peter 4:3-5) Inaha nnyịn iyak n̄kpọ ndomokiet anam nnyịn ibuana ke “ubọkutom obụkidem,” anamde nnyịn itaba ifụre ifụre ido nnyịn inyụn̄ ikpu ndida Obio Ubọn̄ Abasi nnyene mîdịghe ndidara mme edidiọn̄ esie. (Galatia 5:19-21) Ẹyak nnyịn kpukpru ini ida ifet edidi mbon ifụre ifụre ido Abasi ke akpan n̄kpọ, ye idide mbon oro ẹyetde aran ẹnọ uwem eke heaven m̀mê inyenede idotenyịn eke isọn̄. Ke ntak oro, ẹyak nnyịn ikere iban̄a ndusụk ufọn ifụre ifụre ido.
Mme Ufọn Ifụre Ifụre Ido
15. Nte ekemde ye Mme N̄ke 14:30, ntak owụtde eti ibuot ndimem ido?
15 Owo mmemido osụhọde esịt, ekikere, ye idem. Emi edi ntre koro enye ibuanake ke en̄wan, iyatke esịt iban̄a edinam mbon en̄wen m̀mê nditụhọde idemesie ye ọkpọsọn̄ editịmede esịt. Ifụre ifụre ido an̄wam enye ndikara mme ntụk esie, ndien emi enyene ufọn ke ekikere ye ke ikpọkidem. N̄ke kiet ọdọhọ ete: “Sụn̄sụn̄ esịt edi uwem obụkidem.” (Mme N̄ke 14:30) Unana ifụre ifụre ido ekeme ndida n̄kosịm iyatesịt oro ekemede ndinam udomo iyịp ọdọk m̀mê ẹnyene mfịna udia nditaha ke idịbi, obun̄wek, ubiak enyịn, ye mme mfịna eken. Christian oro enyenede ifụre ifụre ido esidara nsio nsio ufọn, esịnede “emem Abasi” oro ekpemede esịt ye ekikere. (Philippi 4:6, 7) Owụt eti ibuot didie ntem ndinyene ifụre ifụre ido!
16-18. Nso utịp ke ifụre ifụre ido enyene ke itie ebuana nnyịn ye mmọ en̄wen?
16 Edu ifụre ifụre ido ofori itie ebuana nnyịn ye mmọ en̄wen. Ekeme ndidi nnyịn inikiet ima inyene edu ediyịre mme n̄kpọ tutu nnyịn inyene se iyomde. Ekeme ndidi mme owo ẹma ẹsiyat esịt ye nnyịn ke ntak nnyịn ikananade nsụhọdeidem ye ifụre ifụre ido. Ke mme utọ idaha ntre, ikpakpaha nnyịn idem edieke nnyịn ikakabarede ibuana ke eneni kiet m̀mê eken. Nte ededi, n̄ke kiet ọdọhọ ete: “Ifia ama okụre ikan̄ onịme: kpa ntre mbia okụre, en̄wan odop. Ukan̄ ke eke ebokikan̄, ye ifia ke eke ikan̄; kpa ntre owo ikọ anam utọk obụbede.” (Mme N̄ke 26:20, 21) Edieke nnyịn inyenede ifụre ifụre ido, utu ke ‘ndidọn̄ ifia ke ikan̄’ nnyụn̄ ndemede mmọ en̄wen ẹyat esịt, nnyịn iyenyene eti itie ebuana ye mmọ.
17 Owo ifụre ifụre ido awak ndinyene nti ufan. Mme owo ẹsidara ebuana ye enye koro enye enyene in̄wan̄în̄wan̄ edu, ndien ikọ esie ẹdemede ukpọn̄ ẹnyụn̄ ẹnịn̄e nte aran ọkwọk. (Mme N̄ke 16:24) Oro ekedi ntre ye Jesus, emi ekekemede ndidọhọ ete: “Ẹmen ọkpọnọ Mi ẹkọn̄ọ ke itọn̄ mbufo, ẹnyụn̄ ẹkpebe Mi; koro mmenyene ifụre ifụre ido nnyụn̄ nsụhọde idem ke esịt; ndien mbufo ẹyekụt nduọkodudu ẹnọ ukpọn̄ mbufo. Koro ọkpọnọ Mi ememem, mbiomo Mi onyụn̄ efefere.” (Matthew 11:29, 30) Jesus ikọsọn̄ke ido, ndien mbiomo esie ikefịkke owo. Ẹma ẹnam n̄kpọ ọfọn ye mbon oro ẹkedide ẹbịne enye ẹnyụn̄ ẹkụt nduọkodudu ke n̄kan̄ eke spirit. Idaha edi ukem ke ini nnyịn ibuanade ye mme ufan ẹdide Christian oro ẹnyenede ifụre ifụre ido.
18 Ifụre ifụre ido anam ekemmọ mme Christian ẹma nnyịn. Nte eyịghe mîdụhe, n̄wakn̄kan mme Christian ke Corinth ẹkesịk ẹkpere Paul koro enye ekekpede ye mmọ ke “ifụre ifụre ido ye mmemido Christ.” (2 Corinth 10:1) Anaedi mbon Thessalonica ẹkenyịme apostle oro sia enye ekedide andikpep oro ememde ido, etiede sụn̄sụn̄. (1 Thessalonica 2:5-8) Mfan̄a ndomokiet idụhe nte ke mbiowo Ephesus ikekpepke ekese n̄kpọ ito Paul inyụn̄ itịm ima enye. (Utom 20:20, 21, 37, 38) Nte afo omowụt ukem ifụre ifụre ido oro anamde mmọ en̄wen ẹma fi?
19. Didie ke ifụre ifụre ido an̄wam ikọt Jehovah ndimụm idaha mmọ n̄kama ke esop esie?
19 Owo ifụre ifụre ido an̄wam ikọt Jehovah ndiwụt nsụkidem nnyụn̄ ndiọn̄ọ itie mmọ ke esop esie. (Philippi 2:5-8, 12-14; Mme Hebrew 13:17) Ifụre ifụre ido akpan nnyịn ndiyom ubọn̄, emi ọkọn̄ọde ke ntan̄idem onyụn̄ ayatde Abasi esịt. (Mme N̄ke 16:5) Owo osụn̄sụn̄ ido idaha idemesie ke n̄kpọ ikan ekemmọ mme andinịm ke akpanikọ, ndien enye imenekede idemesie ke enyọn̄ ke ntakurua mmọ en̄wen. (Matthew 23:11, 12) Utu ke oro, enye ọdiọn̄ọ idaha esie nte anamidiọk ye udọn̄ esie kaban̄a enọ ufak Abasi.
Ifụre Ifụre Ido Emenede Inemesịt ke Enyọn̄
20. Nso utịp ke ifụre ifụre ido enyene ke uwem ubon?
20 Kpukpru mme asan̄autom Abasi ẹkpenyene nditi nte ke ifụre ifụre ido edi mfri spirit esie oro emenerede inemesịt ke enyọn̄. Ke uwụtn̄kpọ, koro ikọt Jehovah ẹwụtde mme utọ edu nte ima ye ifụre ifụre ido, ufọk ẹmi ẹnyenede inemesịt ẹdu ke otu mmọ. Ke ini ebe ye n̄wan ẹnamde n̄kpọ ye kiet eken ke mmemido, ẹbọk nditọ mmọ ke n̄kann̄kụk oro anade sụn̄-n̄, idịghe ke ubon oro ọyọhọde ye uyat uyat ikọ ye mme edinam. Nte ete ọnọde nditọ esie item ke mfọnido, emi enyene eti utịp ke nsek esịt mmọ, ndien sụn̄sụn̄ edu ekeme ndikabade ndi ubak edu mmọ. (Ephesus 6:1-4) Ifụre ifụre ido esin̄wam mme ebendọ ndikaiso mma iban mmọ. Enye esin̄wam ibanndọ ndisụk ibuot nnọ mme ebe mmọ onyụn̄ esinụk nditọ ndikop uyo mme ete ye eka mmọ. Ifụre ifụre ido n̄ko esinam mbonubon ẹnyene edu edifen nnọ oro otịpde n̄kpọ esịn ke inemesịt.—Colossae 3:13, 18-21.
21. Ke ata ata ikọ, nso item ke apostle Paul ọkọnọ ke Ephesus 4:1-3?
21 Mme ubon ye mme owo oro ẹnyenede ifụre ifụre ido ẹsimenede inemesịt ke enyọn̄ ke esop emi mmọ ẹbuanade. Ke ntre, oyom ikọt Jehovah ẹsịn ọkpọsọn̄ ukeme ndinyene ifụre ifụre ido. Nte afo ke anam ntre? Apostle Paul ama ekpe ye ekemmọ mme Christian oro ẹyetde aran ndisan̄a nte odotde ye ikot mmọ eke heaven ẹnamde ntre ye “kpukpru nsụkesịt ye ifụre ifụre ido, ye anyanime; ẹme ime ye kiet eken ke ima; ẹsịn ifịk ẹda emem nte urụk ẹbọp idem ẹdian ọtọkiet ke spirit.” (Ephesus 4:1-3) Ana mme Christian oro ẹnyenede idotenyịn eke isọn̄ n̄ko ẹwụt ifụre ifụre ido ye mme edu Abasi eken. Emi edi usụn̄uwem oro adade ata inemesịt edi. Mbon ifụre ifụre ido ke akpanikọ ẹkop inemesịt didie ntem!
Didie ke Afo Ọkpọbọrọ?
◻ Ntak emi mbon ifụre ifụre ido ẹkopde inemesịt?
◻ Ndinyene ifụre ifụre ido ọwọrọ nso?
◻ Didie ke ẹkeme ndikọri ifụre ifụre ido?
◻ Nso idi ndusụk ufọn ifụre ifụre ido?