Utom oro enyene Fi?
JEHOVAH ke mfọnmma usụn̄ ama owụt ntatubọk esie ke ndiyọhọ isọn̄ ye mme n̄kpọ kaban̄a inemesịt uwem nnyịn. Enye ke ntatubọk ama anam mme n̄kpọ ẹmi ẹsụk ẹdu idem ke Adam ye Eve ẹma ẹkesọn̄ ibuot. Akan oro, enye ama owụt uwak ima esie ke ndinọ Eyen esie ete edinyan̄a ubonowo oro onịmde ke akpanikọ osio ke afanikọn̄ idiọkn̄kpọ.—Matthew 5:45; John 3:16.
Didie ke nnyịn ikeme ndinam n̄kpọ mban̄a utọ ima oro? Jesus ọkọdọhọ ke ana nnyịn ima Jehovah Abasi nnyịn ke ofụri esịt, ukpọn̄, ekikere, ye odudu. Emi ọnọ ekikere nte ke nnyịn imakama enye isọn utuakibuot ye edinam akpanikọ nnyịn ye nte ke nnyịn ikpenyene ndidu uwem nnyịn ke n̄kemuyo ye uduak esie.—Mark 12:30: 1 Peter 4:2.
Edi nso ibuana ke ndinam uduak Abasi? Nte utom odu oro nnyịn ikemede ndinam nnọ enye—kpa utom oro nnyịn ikpabuanade ke esịt?
Ufọn Ndinyene Mme Asan̄autom
Mme ufọkederi ẹmetịmede mme owo ke nte ẹkpetuakde ibuot ẹnyụn̄ ẹnamde n̄kpọ ẹnọ Abasi. Edi, Bible owụt nte ke ido ukpono akpanikọ kiet kpọt odu, “Ọbọn̄ kiet onyụn̄ odu, ye mbuọtidem kiet, ye baptism kiet; Abasi kiet odu, kpa Ete kpukpru owo.” Jesus ọkọdọhọ ete: “Ata mme andituak ibuot [ẹdituak] ibuot ẹnọ Ete ke spirit ye ke akpanikọ.” Ntre ẹnọ mmọ item ẹte: “Mbufo kpukpru ẹnyene ikọinua kiet, ubahade okûnyụn̄ odu ke otu mbufo.”—Ephesus 4:3-6; John 4:23; 1 Corinth 1:10.
Ndutịme kaban̄a se idide ido ukpono akpanikọ ọkọtọn̄ọ ke Eden ke ini Satan ekenenide unen itie edikara Jehovah ke ndibụp mbụme mban̄a usụn̄ nte Abasi akarade. (Genesis 3: 1-6, 13) Satan kemi omụm ubiọn̄ọ oro ọbiọn̄ọde Abasi mi akama ke ndiọi ukpepn̄kpọ oro mme abian̄a abian̄a asan̄autom ido ukpono ẹmi ẹforode “mme asan̄autom edinen ido” ẹsuande. Ntre Bible ọdọhọ ete: “Ndima, ẹkûnịm kpukpru spirit ke akpanikọ . . . koro ediwak prọfet nsu ẹma ẹwọn̄ọ ẹdụk ẹdi ke ererimbot.”—2 Corinth 11:14, 15; 1 John 4:1.
Ye inemesịt, Abasi ama anam usio-ukot ndibiere eneni itie edikara emi. Ke ama ọkọdọn̄ Eyen esie ndifak ubonowo, enye kemi amanam Jesus edi Edidem Obio Ubọn̄ Abasi eke heaven, ye odudu ndisobo Satan ye mme prọfet, m̀mê mme asan̄autom esie mfep. Emi eyekụt ete ke ẹnam uduak Abasi ke isọn̄, ke nsinsi edidiọn̄ mme okopitem owo.—Daniel 7:13, 14; Mme Hebrew 2:9.
Satan omodịp akpanikọ emi. (2 Corinth 4:4) Ntem, oyom nnyịn inam utom nte mme asan̄autom Abasi, iyararede mme nsu Satan inyụn̄ itiede ntiense iban̄a akpanikọ. Jehovah ifịkke-fịk nnyịn isịn ke utom emi. Enye oyom nnyịn, ukem nte Jesus, inọ idem nnyịn unyịme unyịme oto ke esịtekọm oro nnyịn inyenede inọ enye ye ke ntak se enye anamde ọnọ nnyịn.—Psalm 110:3; Mme Hebrew 12:1-3.
Utom Christian
Jesus ama “asan̄a ke ikpọ obio ye obio-in̄wan̄, ọkwọrọ onyụn̄ obụk eti mbụk Ubọn̄ Abasi.” (Luke 8:1) Enye n̄ko ama ọnọ mme mbet esie ukpep ndidi mme asan̄autom nte enye onyụn̄ osio mmọ ọdọn̄ ẹkekwọrọ ikọ. (Matthew 10:1-14, 27) Ke ukperedem, enye ama owụk mmọ ete ẹkaiso ke utom oro tutu osịm utịt isọn̄—Matthew 28:19, 20; Utom 1:8.
Utom emi odoro mme Christian akpanikọ ke idem, ndien spirit Abasi omonụk mmọ ndikwọrọ ikọ. Nte okotịbede ke Pentecost eke 33 C.E., kpukpru mbon oro ẹkenyịmede eti mbụk ẹma ẹbiom mbiomo edinam an̄wan̄wa uyarade kaban̄a mbuọtdiem mmọ.—Utom 2:1-4, 16-21; Rome 10:9, 13-15.
N̄wakn̄kan owo, nte ededi, ikemeke ndikụt idemmọ nte idide mme asan̄autom. Peter, kiet ke otu Mme Ntiense Jehovah, ọdọhọ ete: “Irenowo ke Germany ẹsiwak ndikere ke osụhọde uku mmimọ ndineme mban̄a ido ukpono. Mmọ ẹsidọhọ ẹte, ‘Oro enyene mme ọkwọrọ ederi ndinam.’” Nte Tony, kpa isụn̄utom ke ediwak isua ọdọhọde, mme owo ke England ẹsidọhọ ẹte: “Se afo etịn̄de ọfọn, ndien ami n̄kere ke Mme Ntiense Jehovah ẹdi nti owo. Edi ndisan̄a to ke enyịnusụn̄ sịm enyịnusụn̄ n̄kwọrọ ikọ—ami n̄kam n̄kemeke ndinam oro.” Ben ama ekpep Bible ke esisịt ini ye eren Nigeria kiet emi akasiande enye ete: “N̄kemeke ndikụt idemmi nte n̄kwọrọde ikọ an̄wan̄wa to ke ufọk sịm ufọk; edi mmekeme ndinọ esop mbufo okụk ndin̄wam mbon oro ẹnyịmede ndinam oro.” Ih, n̄wakn̄kan owo ẹnana mbuọtidem ye edinịm ke akpanikọ oro ẹyomde kaban̄a utom Christian.
Edi, an̄wan̄wa ukwọrọikọ edi mbiomo kpukpru owo ke esop Christian, inamke n̄kpọ se isua emana edide m̀mê edi erenowo m̀mê n̄wan. Enye inyeneke mbiowo ye mme asan̄autom unamutom kpọt ẹmi ‘ẹdade usụn̄,’ edi n̄ko enyene mme Christian ke ofụri ofụri. Ẹnọ kpukpru owo item ete: “[Wa] uwa ekọm [nọ] Abasi kpukpru ini ke enyịn̄ Jesus, kpa mfri n̄kpọkinua eke ẹkponode enyịn̄ Esie. . . . Ẹkop uyo mme andida mbufo usụn̄.”—Mme Hebrew 13: 15, 17.
Ke etịn̄de ikọ ọnọ mbuaha otuowo ke Ukwọrọikọ esie ke Obot, Jesus ama ọdọhọ ete: “Idịghe kpukpru owo ẹmi ẹkotde Mi ẹte, Ọbọn̄, Ọbọn̄, ẹdidụk ke Obio Ubọn̄ Heaven; edi owo eke anamde uyo Ete Mi emi odude ke heaven.” Ke idaha efen enye ama owụt ete ke ndinam uduak Abasi esịne edikwọrọ ikọ nnọ mbon oro mînịmke ke akpanikọ. Mme mbet esie ẹma ẹkpak enye ẹte etre ndikwọrọ ikọ nnọ ndusụk mbon Samaria man edidia udia, edi enye ama ọdọhọ ete: “Udia Mi edi ndinam uduak Andidọn̄ Mi, nnyụn̄ mma utom Esie.”—Matthew 7:21; John 4:27-38.
Nte Enye Ekpedi Ubọkọkọ Fo?
Mme owo ẹsiwak ndima ndibịne udia ye inyene obụkidem. Edi ke ntọn̄ọ ntọn̄ọ ke Ukwọrọikọ esie ke Obot, Jesus ama ọnọ mme andikpan̄ utọn̄ nnọ enye item aban̄a editịmede esịt mbịne mme utọ n̄kpọ oro. Enye ama ọdọhọ ete, “Edi ẹbon n̄kpọuto ẹnịm ẹnọ idem ke heaven . . . Ẹkam ẹbemiso ẹyom Obio Ubọn̄ [Abasi] ye edinen ido [Abasi].”—Matthew 6: 20, 33.
Ndibemiso nyom Obio Ubọn̄ ọwọrọ nditre ndiyak mme udọn̄ efen ẹfụk utom nnyịn. Nte ededi, ndinam emi iwọrọke ndisio kpukpru n̄kpọ en̄wen mfep. Ke uwụtn̄kpọ, Bible esịn udọn̄ ọnọ nnyịn nditre ndifụmi mme ata mbiomo ubon. Kpukpru owo ẹnyene mme utọ mbiomo oro. Ndifụmi mmọ edi ndinam n̄kpọ ke usụn̄ oro atuahade ye mbuọtidem Christian. (1 Timothy 5:8) Edi, nnyịn ikpenyene ndinam kpukpru se nnyịn ikemede ke utom ukwọrọikọ ke adan̄aemi isede iban̄a mme mbiomo efen ke usụn̄ adade ukem ukem.
Jesus ọkọdọhọ ete: “Ẹyenyụn̄ ẹkwọrọ gospel Ubọn̄ Abasi . . . nte ntiense ẹnọ kpukpru mme idụt, ndien adan̄aoro ke utịt eyedi.” (Matthew 24:14) Udọn̄ikọ prọfesi oro enyene edisu esie ke eyo nnyịn. Toto ke 1914 eti mbụk edi nte ke ẹma ẹnọ Obio Ubọn̄ oro odudu ndinam n̄kpọ ke ufọn itie edikara Jehovah ye ke ndibiọn̄ọ Satan ye ererimbot esie. (Ediyarade 11:15-18) Nnyịn ikpenyene ndikere ntotụn̄ọ ntotụn̄ọ mban̄a se emi ọwọrọde. Utịt eyedi, ndien ana nnyịn inam utom ukwọrọikọ mbemiso ini oro. Uwem odu ke itiendịk; nnyịn imekeme ndin̄wam ke ndinyan̄a ediwak mmọ.
Nyanade Bịne Ọyọhọ Ọyọhọ Utom
Ediwak owo ke otu Mme Ntiense Jehovah ẹsisịn hour duop mme awakde akan oro ke kpukpru ọfiọn̄ ndibuana eti mbụk ye mmọ en̄wen. Ediwak tọsịn ẹsibiat hour iba mme akande oro ke usen ke ndikwọrọ ikọ nte asiakusụn̄ unọ un̄wam, ndien mmọ en̄wen ẹnam utom ẹkaiso nte mme asiakusụn̄ ofụri ini ye mme akpan asiakusụn̄. Mmọ ẹdiọn̄ọ nte utom emi edide usọp usọp n̄kpọ ẹnyụn̄ ẹyom ndinyene ọyọhọ ebuana nte ẹkekeme man ẹnam enye mbemiso utịt ererimbot unana inemesịt emi edi.
Nte afo emededi esịn ifịk Ntiense Jehovah? Do nyanade bịne ndinyene ọyọhọ ebuana ke utom oro. Fori ukeme fo ke ndikwọrọ ikọ ye ke ndikpep owo n̄kpọ, odomode ndinam ekese efen efen ke utom oro. Edieke afo odude ke idaha ndikabade ndi asiakusụn̄, nam ntre. Edieke mme idaha fo ke akpanikọ mîyakke fi anam, do sịn udọn̄ nọ mbon oro ẹkemede ndinyanade mbịne utom emi.
Edieke afo mûdịghe Ntiense Jehovah oro ama akayak idem ọnọ, kûdọhọ ete ke utom oro inyeneke imọ. Eren efen ẹkotde Peter, ọdiọn̄ o-moto, ama ọbiọn̄ọ n̄wan esie ọkpọsọn̄ ọkpọsọn̄ ndibuana eti mbụk ye mmọ en̄wen. Enye ama esibụp ete, “N̄keme didie ndiyak n̄wan mi ọkwọrọ ikọ to ke ufọk sịm ufọk?” Ke ediwak isua oro enye eketịn̄de enyịn ese ọkpọsọn̄ ubiere esie kaban̄a akpanikọ eke Ikọ Abasi ẹma ẹkebe, enye ama ebiere ndikpep Bible n̄ko. Idahaemi, ukem nte n̄wan esie, enye edi asan̄autom eti mbụk oro ama akayak idem ọnọ, onyụn̄ ana baptism.
Ntre kûbiọn̄ọ idemfo ndinyene ifet edinam n̄kpọ Jehovah. Nnyịn imesịn udọn̄ inọ fi ndikpep Bible nnyụn̄ mbuana ye mme Christian akpanikọ ke mme mbonoesop mmọ. Emi eyen̄wam fi ndinam uwem fo odu ke n̄kemuyo ye edinen ido Abasi nnyụn̄ mbọp ọkpọsọn̄ mbuọtidem ke mme uduak esie. Edieke afo anamde n̄kọri ke emi, afo n̄ko eyedot ndidi asan̄autom Abasi. Afo ndien eyenyene ifet edibuana ke ndinam ewụhọ Jesus emi: “Mbufo ẹka ẹkenam [mme mbet] . . . ẹkpep mmọ ẹnam kpukpru n̄kpọ eke n̄ketemede mbufo.”—Matthew 28:19, 20.
Ih, utom odu oro afo ekemede nditiene mbuana ke esịt, ndien enye edi usọp usọp n̄kpọ akan nte akanam edide ọnọ fi ndinam ntre.
[Ekebe ke page 25]
Nurse kiet emi enyenede ubon ndise enyịn ọdọhọ ete: “Ami mmesinam isan̄ ke se ibede hour kiet kpukpru usen n̄ka ufọkibọk emi nnamde utom, ntre n̄kekere ke n̄kemeke ndinam usiakusụn̄ unọun̄wam. Edi mma ndiomi utom mi ye ntịn̄enyịn man mbak mbuana ke utom an̄wautom kpukpru usenubọk mbemiso n̄kade utom, ke mme ini nduọkodudu, ye ke usen oro mmenyeneke utom. Afo emekeme ndida n̄kụt idara oro n̄kenyenede ke ini, ke utịt ọfọn̄ kiet, n̄kesịnde hour 117 ke ndikwọrọ ikọ! Mma nnịm mme magazine 263, mbọ mme etịbe magazine 22 nnyụn̄ n̄keme nditọn̄ọ ukpepn̄kpọ Bible 3.
[Ekebe ke page 27]
Michael enyene n̄kpri nditọn̄wọn̄ itiaba, ndien enye akama akpan itieutom ke akamba ufọkn̄wd Nigeria kiet. Enye n̄ko edi ebiowo ke esop Christian. Enye abuana ekikere ediwak tọsịn Mme Ntiense ete:
“Ami nse utom ukwọrọikọ nte ubọkọkọ mi mmonyụn̄ nsiti kpukpru ini nte ke Paul ọkọdọhọ ete: ‘Ami n̄kọtọ, Apollos ọkọbọk ke mmọn̄; edi Abasi akaiso ndinam enye ọkọri.’ Ami ye n̄wan mi ‘imesitọ’ ke ekpri ibio ini nneme eti mbụk eke ufọk-ke-ufọk. Nnyịn ‘imesiduọk mmọn̄’ ke ndifiak n̄kese mbon oro ẹwụtde udọn̄ man ikpep mmọ n̄kpọ ke Bible, nte Jesus ọkọdọhọde ke nnyịn ikpenyene ndinam. Ukpepn̄kpọ Bible eke urua ke urua aman̄wam ediwak owo—ke ndusụk idaha ofụri ubon—ndidi ndinyene ifiọk akpanikọ.”