Mme Andikụre Ukpep ke Gilead Ẹbọ Enọ Utom Isụn̄utom
KE MARCH 1, 1992, owo 22 ẹmi ẹbuanade ke ọyọhọ otu 92 ẹmi ẹkụrede ukpep ke Watchtower Bible School of Gilead ẹma ẹbọ enọ—enọ utom isụn̄utom. Ke ini eketịn̄de ikọ ọnọ otu oro, Lloyd Barry eke Otu Ukara ama ọdọhọ ete: “Mbufo ẹkpekam ẹbọ utịbe utịbe enọ oro ye akwa idatesịt, ndien mbufo ẹkpekam ẹda enye ẹnam n̄kpọ ke ndida idatesịt nsọk mmọ en̄wen.”
N̄kpọ nte isenowo oro ẹkenọde ikot ye mbonufọk Bethel 4,662 ẹma ẹsop idem ke Ufọkmbono Obio Jersey, ke New Jersey, kaban̄a edinam ukụre ukpep oro. Ẹma ẹyịri owo 970 efen ke ufọk Watchtower Society ke Brooklyn, Wallkill, ye Patterson ke New York, ke urụk ukopikọ. Kpukpru owo ẹma ẹnọ ọyọhọ n̄kpan̄utọn̄ nte ẹkenọde mme andikụre ufọkn̄wed oro item unyọn̄ oro ẹdin̄wamde mmọ ndida enọ utom isụn̄utom ke ata ọsọn̄urua n̄kpọ nnyụn̄ nda enye nnam n̄kpọ ọniọn̄ ọniọn̄.
Edinam oro ekeberede ye ufiop ufiop edikwọ ọyọhọ ikwọ 155, “‘Welcome One Another’!” Ke oro ebede, ama aduai kpukpru owo ke idem nte Frederick W. Franz, etieibuot Ufọkn̄wed Gilead oro ọsọn̄de ke isua 98, ọkọbọn̄de akam oro otode esịt. Ekem, etieibuot okpokoro, Carey Barber eke Otu Ukara, ama ọkọm kpukpru owo ete ẹmedi-o ke edinam ukụre ukpe oro onyụn̄ ọdọhọ ete: “Akananam udọn̄ kaban̄a mme isụn̄utom ẹkụrede Gilead ikponke ikan nte edide mfịn.” Ke etienede utịn̄ikọ esie, enye ama okot mbio mbio, utịn̄ikọ oro ẹnọde un̄wam.
Curtis Johnson eke Kọmiti Esede N̄kpọ Aban̄a Mbonufọk Bethel ekebemiso etịn̄ ikọ, enemede ke ibuotikọ oro “Tịm Kpeme In̄wan̄esa Fo.” Brọda Johnson ama osio owụt ete ke ini mbufa isụn̄utom ẹmi ẹsịmde itieutom mmọ, owo mmọ kiet kiet eyenyene in̄wan̄esa eke spirit nditọ. (1 Corinth 3:9) Ikọt Jehovah ke ofụri ererimbot ẹdi in̄wan̄esa eke spirit emi otịbede edinen ido ye itoro ke iso kpukpru idụt. (Isaiah 61:11) Etịn̄ikọ oro ama ọsọn̄ọ etịn̄ ete, ‘Nte mbufo ẹkpemede in̄wan̄esa eke spirit mbufo ke ini iso eyenen̄ede otụk unen oro mbufo ẹkụtde ke utom isụn̄utom mbufo.’ Nso idin̄wam mmọ nditịm n̄kpeme in̄wan̄esa eke spirit mmọ? ‘Jehovah ekeme ndidi ọkọ ukpeme oro akanade in̄wan̄esa eke spirit mbufo okụk. Edieke mbufo ẹbierede ndinam nti utom, ẹsịk ẹkpere enye ke akam, ndien ekem ẹnam n̄kpọ ke n̄kemuyo ye akam mbufo.’
Ekem, Lloyd Barry ama eneme ibuotikọ oro “Ẹdat Esịt ke Ọbọn̄ Kpukpru Ini.” (Philippi 4:4) Ye ifiọkutom isụn̄utom ke se iwakde ikan isua 25 ke Japan ndineme mban̄a, enye ama enyene ndusụk nti ekikere ndinọ man an̄wam mme andikụre ukpep oro ndidara enọ utom isụn̄utom. Enye ọkọdọhọ ete: ‘Mbufo ẹyekụt ẹte ke idatesịt emi mbufo ẹnyenede ke utom Abasi an̄wam mbufo ndikan mme mfịghe ndien iso-ọfọn ndusụk ata mfịna ẹmi mbufo ẹsobode.’ (Mme N̄ke 17:22) Enye ama eti mme andikụre ukpep oro ete ke mmọ ẹkeme ndisobo mme idaha ye n̄kpọ ẹmi ẹdide ata isio ye se mmọ ẹkemehede. Ekeme ndiyom mmọ ẹkpep obufa usem. ‘Mbufo ẹnyene ndikpep n̄kpọ ọkpọsọn̄ ke ndikpep usem oro. Edi ke ini mbufo ẹkemede ndinyene nneme ifụre ifụre ye mme owo ke usem mmọ, emi n̄ko eyedian n̄kpọ ke idatesịt mbufo.’
Ke enemede ibuotikọ oro “Ẹwụk Enyịn Mbufo ke Utịp Oro,” Eldor Timm eke Kọmiti Itieutom Umịn̄n̄wed ekedi etịn̄ikọ efen. Nso idi utịp oro? Nsinsi uwem! Man inyene enye ana nnyịn iwụk enyịn nnyịn ke enye. Etịn̄ikọ oro ama eneme ndusụk mbiet n̄kpọ ye ukpụhọde oro ẹdude ke ufọt mme Christian ẹmi ẹfehede mbuba uwem ye mme efehe-itọk ke mbre mbuba eke akpa isua ikie. Ukem nte mme efehe-itọk, ana mme Christian ẹbọ ukpep ọkpọsọn̄ ọkpọsọn̄, ẹnịm ibet, ẹnyụn̄ ẹbiomode ọkpọsọn̄ mbiomo ke idem ẹfep. Edi ke mîbietke mme ataata efehe-itọk, mme Christian ẹfehe itọk ofụri eyo uwem ẹnyụn̄ ẹyom utịp oro edide ke nsinsi. Utu ke owo kiet ndikan, kpukpru mbon oro ẹfehede itọk mbuba uwem tutu osịm utịt ẹyebọ utịp. Brọda Timm ama eberi ete: ‘Man ibọ utịp uwem, ana nnyịn idu ke emem ye Jehovah, kpa Andinọ utịp oro. Ndien man idu ke emem ye Jehovah, nnyịn inyene ndidu ke emem ye nditọete nnyịn.’
Etịn̄ikọ efen ekedi Milton Henschel eke Otu Ukara ke ibuotikọ oro “Ebede ke Ndọn̄esịt Otode N̄wed Abasi, Nnyịn Imenyene Idotenyịn.” (Rome 15:4) Etịn̄ikọ oro ama ọtọn̄ọ ete, ‘Ke ọfiọn̄ ition ẹmi ẹkebede, mbufo ẹma ẹsịn idem ẹda Bible ẹnam n̄kpọ. Ẹma ẹbọp ata n̄kpet n̄kpet ebuana. Mbufo ẹmenyene ọkpọsọn̄ idotenyịn. Nte mbufo ẹwọrọde ẹka efakutom mbufo, mbọk ẹti ntak emi idotenyịn mbufo ọsọn̄de ntre. Edi koro mbufo ẹma ẹsịk ẹkpere N̄wed Abasi.’ Ke ọnọde uwụtn̄kpọ mbụk Bible oro edemerede idotenyịn, etịn̄ikọ ama etịn̄ otụk Judges ibuot 6 osịm 8, ẹmi ẹbụkde nte ẹkedọn̄de Gideon ẹte akanyan̄a Israel osio ke ufịk mbon Midian. Ke ama ekeneme mbụk oro ye se enye ọwọrọde ọnọ eyo nnyịn, enye ama ọdọhọ ete: ‘Ke ini mbufo ẹnyenede ifet ndisịk n̄kpere N̄wed Abasi nnyụn̄ n̄kere mban̄a n̄kpọ ẹmi, enye eyenọ mbufo nduọkodudu. Mbufo ẹnyene uko.’
Kpukpru owo ẹkedu ke nduaidem ndikop m̀mê nso item unyọn̄ ke mme akpan andikpep iba ke ufọkn̄wed oro ẹkenyene ẹnọ nditọ ufọkn̄wed oro. Jack Redford ekebemiso etịn̄ ikọ ke ibuotikọ oro “Ẹnam Se Inende.” Enye ama eti mme andikụre ukpep oro ete: ‘Ke Gilead ẹma ẹnọ mbufo ukpep mfọn mfọn ẹban̄a se inende nte ekemde ye N̄wed Abasi. Kemi mbufo ẹmọn̄ ẹwọrọ ẹka utom isụn̄utom oro onịmde n̄kpọ-ata. Ndien nnyịn imọfiọk ite ke mbufo ẹmekeme ndisobo n̄kpọsọn̄ mfịna. Kpa ye emi, kpa ye ekikere mbufo n̄ko, nnyịn imọfiọk ite ke mbufo ẹmekeme ndinam se inende.’ Nso idin̄wam? N̄kpọ kiet edi-o, ndinyene nnennen ekikere mban̄a mmọ en̄wen. Etịn̄ikọ ama ọdọhọ ete: ‘Kûyom mfọnmma uto unana mfọnmma.’ Ndinyene nnennen ekikere mban̄a mme idomo idomo idaha ekeme n̄ko ndin̄wam. Enye ama ọdọhọ ete, ‘Kpukpru nnyịn imesinyene ini mfọnọn̄kpọ ye ini ukụt ke uwem. Owo ekededi ekeme ndinam n̄kpọ ke ini mfọnọn̄kpọ. Edi nte mbufo ẹnamde n̄kpọ ke ini ukụt edibiere m̀mê mbufo ẹmeyọ ke utom isụn̄utọm.’—James 1:2-4.
Esịn-owo enyịn̄ ke ufọkn̄wed oro, Ulysses Glass, ekemek ibuotikọ oro “Nso Idotenyịn Odu Ọnọ Ini Iso?” Ke uyoikọ ete, enye ama esịn udọn̄ ọnọ mme andikụre ukpep oro ndinam idotenyịn mmọ akakaiso ayama. (Mme N̄ke 13:12) Enye ama anam an̄wan̄a ete, ‘Ekeme ndisọn̄ ndikụt ntọn̄ọ uduọk idotenyịn. Mme idaha ẹkeme ndinam nnyịn inọ idem nnyịn ntịn̄enyịn ikaha utu ke itie ebuana nnyịn ye Abasi. Nnyịn imekeme ndidọn̄ọ mîdịghe ikere ke mbon en̄wen ẹnam n̄kpọ ye nnyịn nte mîdotke. Ndusụk owo ẹkeme ndinyene n̄kpọ obụkidem ẹkan nnyịn mîdịghe ẹnyene nti utịp ke utom ukwọrọikọ, ndien nnyịn imekeme ndifụbe ufụp ke ndusụk usụn̄. Edieke nnyịn idedede iyak mme utọ n̄kpọ ntre ẹkara nnyịn sụn̄sụn̄, idibịghike idotenyịn Obio Ubọn̄ oro edide ata idem n̄kpọ eyekpa mmọn̄ ke esịt ye ekikere nnyịn, ndien nnyịn imakam ikeme nditre ndiyọ ke mbuba uwem.’ Nso ke ẹkeme ndinam? ‘Ana ẹnam n̄kpọ in̄wan̄în̄wan̄ edieke anade ifiak idemede idotenyịn nnyịn. Ana iyọhọ ekikere ye esịt nnyịn ye mme un̄wọn̄ọ Abasi oro ẹdide akpanikọ inyụn̄ iwọn̄ọde ọyọhọ ntịn̄enyịn nnyịn inọ Obio Ubọn̄ Abasi oro edide ata idem n̄kpọ. Ndien ana nnyịn ifiak itọn̄ọ nneme nnyịn ye Jehovah, koro emi ke akpanikọ eyeda okosụn̄ọ ke idatesịt.’
Karl Klein eke Otu Ukara ọkọnọ utịn̄ikọ ukụre ukpep. Ibuotikọ esie ekedi “Ntak Ẹsụhọrede Idem?” Ndien nso idi ibọrọ mbụme oro? Enye ama anam an̄wan̄a ke ntọn̄ọikọ esie ete, ‘Koro enye edi eti ye nnennen n̄kpọ ndinam, kpa ọniọn̄ ọniọn̄ ye ima ima n̄kpọ ndinam.’ Ama aduai otuowo ke idem nte enye ekenemede uwụtn̄kpọ inan̄ kaban̄a nsụhọdeidem oro nnyịn idinamde ọfọn ndikpebe: (1) Jehovah Abasi, emi ke akpanikọ okosụhọrede idem ke ini akanamde n̄kpọ ye Abraham ye Moses (Genesis 18:22-33; Numbers 14:11-21; Ephesus 5:1); (2) Jesus Christ, emi ‘okosụhọrede idemesie onyụn̄ osụkde ibuot tutu ke n̄kpa ke eto ndutụhọ’ (Philippi 2:5-8, NW; 1 Peter 2:21); (3) apostle Paul, emi ‘akanamde n̄kpọ ọnọ Ọbọn̄ ke ata nsụkesịt’ (Utom 20:18, 19; 1 Corinth 11:1); ye (4) ‘mbon oro ẹdade nnyịn usụn̄,’ utọ nte akpa etieibuot N̄ka, Brọda Russell, emi ekewetde ini kiet ete: “Utom emi Ọbọn̄ okopde idatesịt ndida usụhọde ifiọk nnyịn nnam idịghe ntọn̄ọ edi akam edi edifiak nnam ọfọn, edinen̄ede, edinam odu ke n̄kemuyo.” (Mme Hebrew 13:7) Brọda Klein ama osion̄o mme okopodudu ntak efen ndisụhọde idem owụt. Ke akpanikọ, edida item ndisụhọde idem nsịn ke edinam eyen̄wam mme andikụre ukpep oro ndida enọ utom isụn̄utom nnam n̄kpọ ọniọn̄ ọniọn̄!
Ke etienede mme utịn̄ikọ oro, etieibuot okpokoro ama ọnọ ekọm oro ẹbọde ẹto nsio nsio ikpehe isọn̄. Ini ama edikem kemi ọnọ mme andikụre ukpep oro ndibọ n̄weditoro mmọ. Mmọ ẹketo idụt itiaba—Canada, Finland, France, Mauritius, Netherlands, Sweden, ye United States. Edi utom isụn̄utom mmọ ada mmọ aka idụt 11—Bolivia, Estonia, Grenada, Guatemala, Honduras, Hungary, Mauritius, Peru, Togo, Turkey, ye Venezuela.
Ke ini nduọkodudu ama okokụre, edinam uwemeyo ama ọtọn̄ọ ye ibio ibio Ukpepn̄kpọ Enyọn̄-Ukpeme emi Joel Adams eke Kọmiti Itieutom Utịmutom okonịmde. Ke oro ebede, mme andikụre ukpep oro ẹma ẹneme ndusụk ifiọkutom an̄wautom ẹmi mmọ ẹkenyenede ke ini ufọkn̄wed oro. Ke akpatre, ẹma ẹwụt drama oro Ntak Owụtde Ukpono Ọnọ Ndutịm Ukara Abasi? man ẹkpep ofụri otuowo n̄kpọ, esịnede mme andikụre ukpep oro.
Ke akpanikọ, mme andikụre ukpep oro ẹkedaha utom esenidụt mmọ ye item ye nsịnudọn̄ oro edin̄wamde mmọ ndida enọ utom isụn̄utom nda idatesịt nsọk idemmọ ọkọrọ ye mbon en̄wen.
[Chart ke page 22]
Idaha Nditọ Ufọkn̄wed
Ibat idụt oro mmọ ẹtode: 7
Ibat idụt oro ẹnọde mmọ ẹka: 11
Ofụri ibat nditọ ufọkn̄wed: 22
Ukem mbahade isua emana: 33.4
Ukem mbahade isua ke akpanikọ: 16.7
Ukem mbahade isua ke utom uyọhọ-ini: 11.8
[Ndise ke page 23]
Ọyọhọ Otu 92 Oro Ẹkụrede Ukpep ke Watchtower Bible School of Gilead
Ke udịm enyịn̄ ẹdude ke idak, ẹtọn̄ọ ke udịm iso ẹnọ nọmba ẹka edem, ẹnyụn̄ ẹtọn̄ọ ke ufien ẹwet enyịn̄ ẹka nnasia ke udịm kiet kiet.
(1) Chan Chin Wah, M.; Bouancheaux, N.; Chapman, B.; Östberg, A.; Cole, L.; Jackson, K.; Meerwijk, A. (2) Smith, J.; Wollin, K.; Chapman, R.; Gabour, N.; Chan Chin Wah, J.; Smith, C.; Edvik, L. (3) Bouancheaux, E.; Östberg, S.; Cole, K.; Jackson, R.; Gabour, S.; Edvik, V.; Meerwijk, R.; Wollin, G.