Mme N̄kpọntịbe Ẹtode Isọn̄ Un̄wọn̄ọ
Dia N̄kpọ Ta Uyo
KE IDAHA kiet ke ini Jesus ye mme mbet esie ẹkedude ke ufọk, mmọ ‘ikekemeke ndidia n̄kpọ’ ọnọ otuowo. (Mark 3:20) Isan̄ efen Jesus ama odụk ufọk Pharisee kiet “ndidia n̄kpọ.” (Luke 14:1) Nso orụk udia ke afo enyene ke ekikere?
Nditọ Israel eset ẹnyene ndidi ẹkpekere ẹban̄a uyo koro ikọ Hebrew ye Greek oro ẹdade ẹnọ “ndidia n̄kpọ” ọwọrọ ke ataata usụn̄ “ndita uyo.” Emi an̄wan̄a, sia uyo emi ẹkesidade wheat m̀mê barley ẹnam ekedide akpan udia mmọ.
Ediwak owo mfịn ẹkere ke mme ete-ekpụk Hebrew ekedi mme ekpemerọn̄ ndien mme mbet Jesus ẹdi mme ọkọiyak. Ndusụk owo ẹma ẹnyụn̄ ẹnam ukem utom oro edi ke akpanikọ ikedịghe kpukpru mmọ. Wheat ekedi akpan n̄kpọ ke uwem ediwak owo. Nte an̄wan̄ade oro ekedi ntre ye Isaac ye Jacob ke ndusụk ini, nte nnyịn ikemede ndibiere nto se ẹwetde ke Genesis 26:12; 27:37; ye Ge 37:7. Ndien sia utomin̄wan̄ ekedide akpan ubọkutom ke Galilee ke eyo Jesus, nte ndusụk owo oro ẹkekabarede ẹdi mme apostle ẹma ẹdi mme ọtọ wheat?
Oro ekeme ndidi ntre, koro editọ wheat ama atara asuana ke Isọn̄ Un̄wọn̄ọ, ndien ẹtịn̄ ẹban̄a ẹmi ke ediwak itie ke Bible. (Deuteronomy 8:7-9; 1 Samuel 6:13) Nso ke emi akabuana?
Ke akpa edịm ẹma ẹkedep ke October ye November ndinam isọn̄ emem, ọtọ wheat eyefụn̄ isọn̄ ndien ekem ọtọ n̄kpasịp esie. Ukperedem edịm ẹyen̄wam ndinam mfri esie ẹkọri ndien ekem, ke April ye May, mmọ ẹdat ẹkabade ẹtie nsan̄ nsan̄ mbemiso ufiop ndaeyo. Ẹma ẹtịm ẹdiọn̄ọ ukpen̄e wheat tutu afo okot aban̄a enye nte n̄kpọ ndida ndiọn̄ọ ini. (Genesis 30:14; Judges 15:1) Nte afo emekeme ndibiere ini ke isua emi ẹkesiode foto emi odude ke n̄kan̄ ubọk ufien page n̄wed emi?a Ndien ini ewe ke mme mbet Jesus ẹkekịbi ibokpot ẹta ndisi?—Matthew 12:1.
Edikpen̄e wheat esiwọrọ akamba utom ọnọ mme ọtọin̄wan̄. Mbon ukpen̄e ẹsikama ikwa ukpen̄e ẹkpok ọkpọ esie ẹnyụn̄ ẹbọp mmọ ke ebek ke ebek, nte afo okụtde ke isọn̄ isọn̄ emi. Nte ededi, ẹkeme ndibe n̄kpọn̄ ndusụk eto mîdịghe ẹduọn̄ọ ke isọn̄ ẹbe, emi edide ntak Ruth ekenyenede se atan̄de. (Ruth 2:2, 7, 23; Mark 4:28, 29) Ekem ẹma ẹsitan̄ mme ebek wheat ẹka itie ubek ibokpot, utọ nte eke Araunah. Nso ke ẹkenam do? Bible asiak “n̄kpọ ubek ibokpot ye n̄kpọ ufene.” (2 Samuel 24:18-22; 1 Chronicles 21:23) Ẹma ẹsisuan mme ebek wheat ke enyọn̄ mbatmbat isọn̄ itiat m̀mê mbot oro ẹbotde. Ayara enan̄ m̀mê unam efen eyenam isan̄ akanade, edịghide wheat oro. Enan̄ ekeme ndidodụri n̄kpọ ubek ibokpot emi ẹdade eto ẹnam oro edin̄wamde ke nditịm ikpọk esie man idem ẹwọn̄ọ.—Isaiah 41:15.
Ekem enye eyedi se ẹsakde, emi edi se ẹkesisakde ebe ke ndikama udọk mbakara m̀mê fork n̄wobi mmọ ntop ke enyọn̄, nte ẹkụtde ke enyọn̄ emi. (Matthew 3:12) Ọtọin̄wan̄ ekeme ndisak enye ke mbubịteyo ke ini ofụm edifụmede emen ikpọk mmọ efep onyụn̄ ọkpọri nsat ọkpọ oro obon n̄kan̄ kiet. Ke ẹma ẹkefiak ẹwobi idem oro ẹnyụn̄ ẹsak man ẹsion̄o nditọ itiat ekededi oro ẹdude, enye eyedi se ẹtan̄de ẹka ubet ubonn̄kpọ—mîdịghe se ẹdade ẹnam akpan udia oro, kpa uyo.—Matthew 6:11.
Edieke afo ekpedide n̄wanndọ emi utom fo edide ndinam uyo, kpukpru usen afo ekpenyene ndida urụn̄ ntịm enye akabade edi ndomuyo, ndusụk edide ndomuyo oro mînen̄ekede idọrọ emi ẹnamde ke wheat. Mîdịghe ekpekeme ndikọk “eti ndomuyo,” utọ nte enyeoro Sarah akadade anam “mfefere uyo” ọnọ mme angel oro ẹkemende idem eke owo ẹsịne mîdịghe enyeoro nditọ Israel ẹkesidade ẹnam uwa inuak udia ẹnọ Jehovah. (Genesis 18:6; Exodus 29:2; Leviticus 2:1-5; Numbers 28:12) Sarah ama abuak ndomuyo wheat ye mmọn̄ onyụn̄ obuen enye akabade edi eboho ndomuyo.
Ke isọn̄ isọn̄ emi, afo emekeme ndikụt eboho ndomuyo ye enyeoro edide mbatmbat mbatmbat, mfefere ebok ẹnịmde ebet edisan̄. Ẹkeme ndisan̄ utọ akamba, mfefere uyo oro ke usan̄uyo emi ẹdade itiat m̀mê ukwak ẹnam, nte emi n̄wan oro anamde. Nte emi an̄wam fi ndida n̄kụt ke enyịn ikike udiana n̄kpọ oro Sarah akanamde ọnọ isenowo ẹkedide mme angel ye se ubon Lot ẹkenamde ke oro ebede? Nnyịn ikot ite: “[Mme angel] ẹtiene enye ẹwaha, ẹnyụn̄ ẹdụk ke ebiet esie: ndien enye etem udia ọnọ mmọ, onyụn̄ asan̄ uyo eke leaven mîdụhe, ndien mmọ ẹdia n̄kpọ.”—Genesis 19:3.
[Mme Ikọ idakisọn̄]
a Men 1992 Calendar of Jehovah’s Witnesses domo.
[Ebiet Ẹdade Ndise Ẹto ke page 24]
Pictorial Archive (Near Eastern History) Est.
[Ebiet Ẹdade Ndise Ẹto ke page 24]
Pictorial Archive (Near Eastern History) Est.
[Ebiet Ẹdade Ndise Ẹto ke page 25]
Pictorial Archive (Near Eastern History) Est.
[Ebiet Ẹdade Ndise Ẹto ke page 25]
Garo Nalbandian