‘Nte Ami N̄kpana Baptism?’
KE KPUKPRU ubiere oro ẹyomde nnyịn inam ke uwem, eyedi idụhe efen oro edide akpan n̄kpọ akan emi: ‘Nte ami n̄kpana baptism?’ Ntak oro edide akpan n̄kpọ ntre? Koro ubiere nnyịn kaban̄a mbụme emi otụk nnyịn nnennen nnennen idịghe ke usụn̄uwem nnyịn idahaemi ikpọn̄îkpọn̄ edi n̄ko kaban̄a nsinsi mfọnọn̄kpọ nnyịn.
Nte afo asak iso ese ubiere emi? Iso-ọfọn afo emekpep Bible ye Mme Ntiense Jehovah ke ndusụk ini. Mîdịghe ekeme ndidi ete ye eka fo ẹma ẹkpep fi N̄wed Abasi toto ke uyen. Idahaemi afo omosịm idaha oro anade anam ubiere kaban̄a se afo edinamde. Man afo anam nnennen ubiere, eyeyom afo ọdiọn̄ọ se baptism esịnede ye owo emi akpanade baptism.
Se Baptism Abuanade
Ukem nte udian ndọ, baptism edi edinam oro ọsọn̄ọde itie ebuana. Kaban̄a udian ndọ, erenowo ye n̄wan oro ẹbuanade ẹma ẹkọkọri n̄kpet n̄kpet itie ebuana. Edinam udian ndọ n̄kukụre owụt an̄wan̄wa se ẹma ẹkenyenyịme ke ndịbe, oro edi, nte ke mmọ mbiba kemi ẹdụk ata mbọbọ ndọ. Enye n̄ko eberede mme ifet ọnọ mme ọdọ ndọ oro ndidara onyụn̄ ada mme mbiomo oro anade mmọ ẹdu uwem ekekem ke uwem emi mmọ ẹdude ọtọkiet edi.
Idaha oro edi ukem ye eke baptism. Nte nnyịn ikpepde Bible, nnyịn imedifiọk ima ima n̄kpọ oro Jehovah akanamde ọnọ nnyịn. Enye inọhọ nnyịn uwem ye kpukpru n̄kpọ oro ẹyomde man ẹnam enye akaiso ikpọn̄îkpọn̄ edi n̄ko ọnọ ikpọn̄îkpọn̄ edibon Eyen esie man eberede usụn̄ ọnọ anamidiọk ubonowo ndidụk ke itie ebuana ye Enye nnyụn̄ nnyene nsinsi uwem ke paradise isọn̄. Ke ini ikerede iban̄a kpukpru emi, nte idemekede nnyịn ndinam n̄kpọ?
Nso ke nnyịn ikeme ndinam? Eyen Abasi, Jesus Christ, asian nnyịn ete: “Edieke owo ekededi oyomde nditiene Mi, yak enye otụk idemesie, onyụn̄ emen [eto ndutụhọ, NW] esie, etiene Mi.” (Matthew 16:24) Ih, nnyịn imekeme ndikabade ndi mme mbet Jesus Christ, itienede uwụtn̄kpọ esie ke ndinam se Ete esie, Jehovah, oyomde. Man inam emi, nte ededi, oyom nnyịn ‘ikan̄’ idem nnyịn, oro edi, ke unyịmesịt ibierede ndinam uduak Abasi edi ebeiso akan eke nnyịn; emi abuana ndiwa, m̀mê ndiyak uwem nnyịn nnọ ndinam uduak esie. Man ẹnam ẹdiọn̄ọ ọkpọkpọ ubiere unyịmesịt emi, esinam an̄wan̄wa edinam. Baptism mmọn̄ edi edinam oro ndiyarade uyakidem oro inamde inọ Abasi an̄wan̄wa.
Mmanie Ẹkpena Baptism?
Jesus Christ ama eteme mme anditiene enye ete ‘ẹka ẹkenam mme owo ke kpukpru idụt ẹdi mbet, ẹnịm mmọ baptism ke enyịn̄ Ete ye Eyen ye edisana spirit, ẹkpep mmọ ẹnam kpukpru n̄kpọ oro enye eketemede mmọ.’ (Matthew 28:19, 20) Nte an̄wan̄ade, ẹyom ndusụk udomo edikọri nsịm ọyọhọ idaha ke esịt ye ke ekikere ẹto mbon oro ẹdinade baptism. Ebede ke ọkpọkpọ ukpepn̄kpọ Ikọ Abasi, mmọ ẹdi ẹdidiọn̄ọ ufọn ‘editua n̄kpọfiọk nnyụn̄ n̄kabade esịt’ n̄kpọn̄ akani usụn̄uwem mmọ. (Utom 3:19) Ekem, mmọ ẹkụt ufọn ndinam utom ukwọrọikọ oro Jesus Christ akanamde, ẹkabarede ẹdi mme mbet esie. Kpukpru emi ada itie mbemiso baptism.
Nte afo emedisịm idaha emi ke n̄kọri eke spirit fo? Nte ọdọn̄ fi ndinam n̄kpọ Abasi? Ke edide ntre, kere ke akam ban̄a mbụk Bible aban̄ade eunuch owo Ethiopia, nte ẹwetde ke Utom Mme Apostle ibuot 8. Ke ini ẹkenamde mme prọfesi ẹban̄ade Jesus kpa Messiah an̄wan̄a eren emi, enye ama odụn̄ọde esịt ye ekikere esie ndien ekem obụp ete: “Nso ibiọn̄ọ mi ndina baptism?” Nte an̄wan̄ade n̄kpọ baba kiet ikọbiọn̄ọke enye; ntre enye ama ana baptism.—Utom 8:26-38.
Mfịn ediwak owo ke ẹbụp ukem mbụme oro ete: “Nso ibiọn̄ọ mi ndina baptism?” Nte utịp, owo 300,945 ẹmi ẹkeyakde idem ẹnọ obufa obufa ẹma ẹna baptism ke 1991. Emi ama ada akwa idatesịt ọsọk ofụri ikọt Jehovah, ndien mbiowo ke mme esop ẹkop inemesịt ndin̄wam mbon nti esịt efen ndinam n̄kọri nnyụn̄ nsịm mme n̄kpọ oro ẹyomde kaban̄a baptism.
Nte ededi, ekeme ndidi nte ke mbiowo ke esop mbufo ẹnọ ekikere ẹte afo ebet kan̄a. Mîdịghe, edieke afo edide uyen, ete ye eka fo ẹkeme ndidọhọ fi ete ebet kan̄a. Nso ndien? Kûyak idem emem fi. Nyene ke ekikere ete ke edinyene ọkpọkpọ itie ebuana ye Ata Edikon̄ edi ata akpan n̄kpọ. Ana ẹsịm n̄kokon̄ edumbet ẹnyụn̄ ẹmụm mmọ ẹkama. Ntre kpan̄ utọn̄ ke mme ekikere oro ẹnọde nyụn̄ da mmọ nam n̄kpọ ke ofụri esịt. Edieke afo mûnen̄ekede udiọn̄ọ ntak ẹmi ẹnọde, kûkop bụt, edi bụp mbụme tutu afo enen̄ede ọdiọn̄ọ se ntịmidem oro ẹyomde afo anam.
Ke n̄kan̄ eken, ndusụk owo ẹsimen̄e ndinam akamba usioukot emi, nte mmọ ẹsikotde enye. Nte afo edi kiet ke otu mmọ? Nte ededi, ekeme ndidi mme in̄wan̄în̄wan̄ ntak ẹdu ẹmi anade afo esịk uyakidem ye baptism onịm kan̄a. Edi edieke afo odotde edi osụk esịkde ini onịm, ọkpọfọn ndibụp idemfo ete: “Nso ibiọn̄ọ mi ndina baptism?” Dụn̄ọde idaha fo ke akam nyụn̄ se m̀mê eti ntak enen̄ede odu ọnọ fi ndisịk ediyere ikot oro Jehovah ọnọde fi ete edidụk ke ọkpọkpọ itie ebuana ye enye nnịm.
‘Ami Nsụk Ndi Uyen’
Edieke afo edide akparawa owo, afo emekeme ndikere ete, “Ami nsụk ndi uyen.” Edi akpanikọ nte ke adan̄a nte n̄kparawa owo ẹsụkde ibuot ẹnyụn̄ ẹkopde uyo mme ete ye eka mmọ ẹdide Christian ẹnyụn̄ ẹdade Itien̄wed Abasi ẹsịn ke edinam adan̄a nte mmọ ẹkekeme, mmọ ẹkeme ndinyene mbuọtidem nte ke Jehovah ese mmọ nte ‘edisana.’ Ke akpanikọ, Bible asian nnyịn ete ke unyịme oro Abasi ọnọde mme ete ye eka ẹdide ndinen owo ebe osịm nditọ mmọ oro ẹsụk ẹdude ke idak mmọ. (1 Corinth 7:14) Nte ededi, owo inịmke adan̄a isua emana ke Bible kaban̄a ini emi edisịne ke idak ete ye eka enyenede nditre. Ke ntre, edi akpan n̄kpọ ọnọ mme uyen ẹdide Christian ndikere ọkpọsọn̄ ọkpọsọn̄ mban̄a mbụme emi: ‘Nte ami n̄kpana baptism?’
Bible esịn udọn̄ ọnọ mme uyen ete ‘eti Akwa Andibot mmọ ke ini mmọ ẹdide n̄kparawa owo.’ (Ecclesiastes 12:1) Kaban̄a emi, nnyịn imenyene uwụtn̄kpọ ekpri Samuel, emi “[akanamde] n̄kpọ ke iso Jehovah, nte eyenọwọn̄.” Uwụtn̄kpọ Timothy odu n̄ko, emi toto ke uyen akadade akpanikọ oro eka ye ekaeka esie ẹkekpepde enye esịn ke esịt.—1 Samuel 2:18; 2 Timothy 1:5; 3:14, 15.
Kpasụk ntre mfịn, ediwak n̄kparawa owo ẹmeyak uwem mmọ ẹsịn ke ndinam n̄kpọ Jehovah. Akifusa, emi edide isua 15 ke emana, ama etịn̄ ete ke ikpehe kiet ke Esoputom akan̄wam imọ ndinam ubiere ndina baptism. Ayumi akana baptism ke ini enye ekedide isua duop ke emana. Enye okoyom ndinam n̄kpọ Jehovah koro enye ama enen̄ede edi edima enye. Idahaemi enye edi isua 13 ndien ke ndondo emi ama okụt eyen ukpepn̄kpọ Bible esie, emi n̄ko ekedide edima Jehovah, anade baptism ke edide isua 12 ke emana. Hikaru, ekpri eyeneka eren Ayumi akana baptism n̄ko ke edide isua duop ke emana. Enye eti ete, “Ndusụk owo ẹkedọhọ ẹte ke mmekpri n̄kaha, edi Jehovah ama ọfiọk nte eketiede mi ke idem. Mma mbiere ndina baptism ndondo oro n̄kebierede ndiyak uwem mi nnọ ndinam n̄kpọ esie ye kpukpru se n̄kenyenede.”
Uwụtn̄kpọ ete ye eka n̄ko edi akpan n̄kpọ, nte ẹkemede ndikụt nto ifiọk n̄kpọntịbe ekpri eyenete an̄wan kiet. Ete esie ama akpan eka eyenan̄wan emi ndikpep Bible ye enye ye eyeneka esie eren ye n̄wan. Enye ama esimia mmọ onyụn̄ ọfọp mme n̄wed mmọ. Edi ke ntak ime ye mbuọtidem eka mmọ, nditọwọn̄ ẹmi ẹma ẹkeme ndikụt nte edide akpan n̄kpọ ndinam n̄kpọ Jehovah Abasi. Ekpri eyenan̄wan emi ama ana baptism ke edide isua 13 ke emana, ndien ekpri eyeneka esie eren ye enyeemi edide n̄wan ẹma ẹtiene uwụtn̄kpọ esie.
‘Ami Mmọsọn̄ N̄kaha’
Andiwet psalm ọkọdọhọ ete: “N̄kani iren, ye nditọwọn̄ . . . ẹtoro enyịn̄ Jehovah.” (Psalm 148:12, 13) Ih, ana n̄kani iren n̄ko ẹdiọn̄ọ ufọn oro odude ke ndida ke n̄kan̄ Jehovah. Ndusụk n̄kani owo, nte ededi, ẹnyene ntụhọ edifep edinam mme ukpụhọde. Mmọ ẹkere ete ke “afo ukemeke ndikpep akani ebua obufa n̄kari.” Edi, ti ete ke anam-akpanikọ Abraham ekedi isua 75 ke emana ke ini Jehovah ọkọdọhọde enye ete: “Daha ke isọn̄ fo ye ke ebiet emana fo, ye ke ufọk usọ, ka ke isọn̄ eke ndiwụtde fi.” (Utom 7:3; Genesis 12:1, 4) Moses ekedi isua 80 ke ini Jehovah ọkọdọn̄de enye utom ete: “Osio ikọt [esie] . . . ke isọn̄ Egypt efep.” (Exodus 3:10) Irenowo ẹmi ye mmọ eken ẹma ẹnyene iwụk ke usụn̄ uwem mmọ ke ini Jehovah ọkọdọhọde mmọ ẹwụt ima ye uten̄e oro mmọ ẹnyenede ẹnọ enye. Mmọ ikemen̄eke ndiyere ikot oro Jehovah okokotde.
Nso kaban̄a mfịn? Shizumu ekedi owo Ido Ukpono Buddha ke isua 78 ke ini enye ọkọtọn̄ọde ndikpep Bible. Ubon esie ẹma ẹbiọn̄ọ enye, inyụn̄ iyakke enye ekpep n̄kpọ ke ufọk esie. Ke isua kiet kpọt ama ekebe, enye ama okụt ufọn ndiyak idemesie nnọ Jehovah, ndien enye ama ana baptism. Ntak emi enye akanamde ukpụhọde emi-e? Enye ọkọdọhọ ete: “Ke ediwak isua nsunsu ido ukpono ama anam mi n̄kabade ndi nditen̄, ndien ami mma nyom ndikaiso mbọ akpanikọ otode Jehovah ke nsinsi.”
“Oro ke Ẹda Ẹnyan̄a Mbufo Kemi”
Ini ke ebe. Uwem, ọkọrọ ye okwo, ẹdu ke itiendịk. Edi usọp usọp n̄kpọ ete afo enen̄ede ekere aban̄a n̄kpọ aban̄ade ediyak idem nnọ Jehovah nnyụn̄ nyarade emi ebe ke mmọn̄ baptism. Apostle Peter ama ọsọn̄ọ etịn̄ emi ọdọhọde ete: “Oro ke ẹda ẹnyan̄a mbufo kemi, oro edi baptism.” Enye ama akaiso anam an̄wan̄a ete “emi mîdịghe ediyet ọkọp ikpọkidem mfep” (enyene ndidi owo ama ananam oro mbemiso odotde ndina baptism) “edi edide ediben̄e eke nnyịn iben̄ede Abasi anam nnyịn inyene edisana esịt ke iso Esie.”—1 Peter 3:21.
Ke ama ekesịm mme n̄kpọ oro Jehovah oyomde, mbet oro anade baptism edi edinyene edisana esịt. Ebede ke ndikaiso nnam ukeme esie ke ndinam n̄kpọ Jehovah, enye enyene emem eke ekikere ye uyụhọ. (James 1:25) Ke akande kpukpru n̄kpọ, enye ye mbuọtidem ekeme ndisak iso nse anana-utịt edidiọn̄ otode Jehovah ke obufa editịm n̄kpọ oro edide. Oro akpakam edi udeme fo nte afo anamde n̄kpọ ke in̄wan̄în̄wan̄ usụn̄ aban̄a mbụme oro: ‘Nte ami n̄kpana baptism?’
[Ndise ke page 21]
Nte eyenọwọn̄, Samuel ama anam utom ke iso Jehovah
[Ndise ke page 22]
Moses ekedi isua 80 ke ini Jehovah ọkọdọn̄de enye utom
[Mme Ndise ke page 23]
Mfịn ikpọ ye n̄kpri ẹmi ẹnade baptism ẹkeme ndisak iso nse anana-utịt edidiọn̄ ke obufa editịm n̄kpọ Abasi