Anie Enyene Uma Abasi?
KPUKPRU nnyịn imoyom mme ufan nnyịn ẹma nnyịn. Amaedi Christian ata ọkpọsọn̄ udọn̄ esie edi ndinyene uma ye Abasi. Kaban̄a Jehovah Abasi, ẹtịn̄ ke Psalm 84:11 ẹte: “Jehovah ọmọnọ ufọn ye ubọn̄: amaedi mmọ eke ẹnen̄erede ẹsan̄a, enye isịnke mmọ nti n̄kpọ.” Ke emana Jesus, idara idara mfiori eke mme angel ke heaven ọkọn̄wọn̄ọ ete “emem odu ke isọn̄ ọnọ mme owo ẹmi enye owụtde uma!”—Luke 2:14, Moffatt.
Edi mmanie ke Abasi esiwụt uma? Nte mme idaha eke Abasi ẹdi ukem ye eke owo? Nte an̄wan̄ade, mmọ idịghe, nte se ẹkenemede ke ibuotikọ oro ekebemde iso owụtde. Ke akpanikọ, sia ẹnọde mme Christian item ẹte “ẹdi mme andikpebe Abasi,” nnyịn owo kiet kiet ikpanam ọfọn ndibụp ite, Nte ami mmowụt uma nnọ mme owo oro Abasi owụtde uma, mîdịghe nte ami nnyene ntụhọ editiene mme idaha ererimbot ke nte ami nsede mme owo? (Ephesus 5:1) Man inyene uma ye unyịme Jehovah, ana nnyịn iwụt ukpeme ke ndise mme n̄kpọ ke usụn̄ esie.
Mme N̄kokon̄ Idaha eke Abasi
Apostle Peter ọkọdọhọ ete, “Abasi iten̄eke owo enyịn: edi ke kpukpru idụt Enye adadara owo ekededi eke abakde Enye onyụn̄ anamde nti ido.” (Utom 10:34, 35; 17:26) Edi se ikam iwụtde eti ibuot ndibiere, ke ntre, nte ke kpukpru owo ẹdi ukem ke enyịn Abasi inamke n̄kpọ m̀mê edu ikpọkidem mmọ ẹtie didie. Ke oro edide ntre, ikpodotke Christian ndiwụt owo uma nte mîdotke n̄kukụre koro owo oro oto akpan ikpehe mîdịghe enyene ndusụk uduot ikpọkidem m̀mê oto orụk efen. Utu ke oro, enye eyenam ọfọn nditiene Uwụtn̄kpọ esie, Jesus Christ, emi idem mme asua ẹkenyịmede ẹte ke enye iten̄eke owo enyịn.—Matthew 22:16.
Ẹsida ikọ oro “enyọn̄ enyọn̄” ke ndusụk ini nditịn̄ mban̄a se mîtụn̄ọke m̀mê se mîdịghe akpan n̄kpọ. Uduot ikpọkidem etie kpa ntre; edi enyọn̄ enyọn̄ kpọt. Uduot ikpọkidem owo inyeneke n̄kpọ ndomokiet ndinam ye se owo edide m̀mê mme edu esịtidem esie. Ke ini edide edisịm edimek mme owo nte nsan̄a, edidia udia, m̀mê edikọm owo ubọk, nnyịn ke akpanikọ ikpenyeneke ndise uduot ikpọkidem akpan akpan. Ti ete, ke eyenan̄wan emi akanamde ẹwet ndusụk inem inem ye edemede-owo udọn̄ uto oro akanam ẹwetde ọkọdọhọ aban̄a idemesie ete: “Ami mmebịre, edi mmeye, . . . koro mbịrede, koro eyo ama ọfọp mi.” (Ikwọ Solomon 1:5, 6) Orụk m̀mê uduot idem inọhọ eti isọn̄ ndiwụt owo uma. Se itịmde idi akpan n̄kpọ ikan edi m̀mê owo oro abak Abasi onyụn̄ anam se inende.
Didie ke Abasi ese edinyene inyene obụkidem? Ke otu kpukpru owo oro Abasi amade onyụn̄ owụtde uma, Eyen esie, Jesus Christ, edi akakan. Edi, ke ini okodude ke isọn̄, Jesus “[ike]nyeneke ọtọ eke odoride ibuot Esie.” (Matthew 8:20) Enye ikenyeneke isọn̄, ufọk, in̄wan̄, eto mfri, m̀mê ufene ndomokiet. Kpa ye oro, Jehovah ama okpono enye onyụn̄ emenede enye onịm ke itie oro okon̄de akan eke owo efen ekededi ke ekondo ke ẹsiode Abasi ke idemesie ẹfep.—Philippi 2:9.
Jesus Christ ama enyene uma ke iso Abasi koro enye ikoforoke ke mme n̄kpọ obụkidem edi ke nti utom. (Men 1 Timothy 6:17, 18 domo.) Enye ama ọnọ mme anditiene enye item ete: “Ẹkûbon n̄kpọuto ẹnịm ẹnọ idem ke isọn̄, ke ọtọ nte utan̄kpọ ye n̄karafan̄ ẹbiatde n̄kpọ, inọ ẹnyụn̄ ẹbụn̄de, ẹdụk, ẹyịp: edi ẹbon n̄kpọuto ẹnịm ẹnọ idem ke heaven, ke ọtọ nte utan̄kpọ ye n̄karafan̄ mîbiatke n̄kpọ, inọ mînyụn̄ ibụn̄ke, idụk, iyịp.” (Matthew 6:19, 20) Ntem, utu ke ndiwụt uma nnọ mbon oro ẹnyenede inyene ererimbot emi kpọt, mme Christian iditọhọ ubahade ndomokiet ke ntak inyene ererimbot. Mmọ ẹyeyom mbon oro ẹnyenede inyene ke n̄kan̄ Abasi edide mmọ ẹdi mme enyene n̄kpọ owo m̀mê ẹdi mme ubuene ke n̄kan̄ obụkidem. Kûdede ufre ute ke “Abasi [ekemek] mmọemi ẹbuenede ke n̄kpọ ererimbot emi, [ete] mmọ ẹforo ke mbuọtidem, ẹnyụn̄ ẹnyene Obio Ubọn̄.” (James 2:5) Edieke afo enyenede ekikere Abasi, afo ududehede uduọ ke afia ọsọ edinam ediwụt uma m̀mê ndiyom ndinyene uma mbon oro ẹnyenede inyene obụkidem.
Amaedi ifiọkn̄wed, Bible owụt in̄wan̄în̄wan̄ ete ke Abasi akpak nnyịn ete iyom ifiọk ye eti ibuot ye nte ke Jesus Christ ekedi akakan andikpep oro akanam odude ke isọn̄. (Mme N̄ke 4:7; Matthew 7:29; John 7:46) Edi idịghe eti ibuot m̀mê ifiọkn̄wed eke ererimbot enyene uma Abasi. Ke edide isio ye oro, Paul asian nnyịn ete ke “ikotke ediwak mmọemi owo ẹbatde ke mbon eti ibuot, . . . edi Abasi ekemek n̄kpọ oro edide ndisịme ke ererimbot man Enye esuene mbon eti ibuot.”—1 Corinth 1:26, 27.
Abasi owụt uma ọnọ mbon oro ẹnyenede ifiọkn̄wed, idịghe ke mme ukpepn̄kpọ ererimbot oro ẹkpepde ke ikpọ ufọkn̄wed, edi ke “edisana usem” akpanikọ oro ẹkụtde ke Ikọ esie, kpa Bible. (Zephaniah 3:9, NW) Ke akpanikọ, Jehovah ke idemesie ke ekpep ikọt esie mfịn ebe ke ndutịm unọ ukpep oro atarade osịm ata utịt isọn̄. Nte prọfet Isaiah ekebemde iso etịn̄, mme owo eke kpukpru idụt ke ẹnam n̄kpọ ẹban̄a ke ndidọhọ ete: “Mbufo ẹdi, nnyịn idọk ke obot Jehovah, ke ufọk Abasi Jacob; ndien enye eyekpep nnyịn ido esiemmọ, nnyịn iyenyụn̄ isan̄a ke usụn̄ esie.” Ke ntre, utu ke ndinọ ifiọkn̄wed ererimbot ubọn̄, mme Christian ẹyeyom mbon oro ẹwụtde ẹto ikọ ye edinam mmọ nte ke mmimọ idi ‘mbon oro Jehovah ekpepde n̄kpọ.’ Ke ndinam ntre, mmọ ẹyenyene ‘ediwak emem’ oro Abasi ọnọde.—Isaiah 2:3; 54:13.
Nnyịn Imekeme Ndinyene Uma Abasi
Ih, mme idaha eke Abasi kaban̄a ediwụt mmọ en̄wen uma ẹnen̄ede ẹkpụhọde ye eke owo. Edi, ana nnyịn idomo ndiyak mme usụn̄ edinam esie ẹda nnyịn usụn̄ edieke nnyịn iyomde ndinyene uma ke enyịn esie. Oro ọwọrọ ke ana nnyịn ikpep ndise mbon en̄wen nte Abasi esede inyụn̄ idịghe ke mme idaha eke owo, ẹmi ẹkemede ndidi se ibụk ye usua ẹkarade. Didie ke nnyịn ikeme ndinam oro?
Jehovah Abasi esidụn̄ọde esịt owo onyụn̄ owụt uma ọnọ mbon oro ẹnyenede mme utọ edu nte ima, eti ido, mfọnido, ye anyanime. Nnyịn ikpenyene ndinam kpa ntre. (1 Samuel 16:7; Galatia 5:22, 23) Oyom nnyịn ise edu esịtidem owo, ke udomo oro nnyịn nte mme owo ikemede, inyụn̄ idịghe uduot ikpọkidem m̀mê idaha eke orụk esie. Utu ke ndiyom mbon oro ẹnyenede inyene obụkidem, nnyịn iyenam ọfọn ndinyene ekikere Abasi aban̄ade inyene ke ekikere inyụn̄ idomo ‘ndinam nti utom uwak uwak, inyụn̄ itat ubọk, inyịme ndinọ owo n̄kpọ.’ (1 Timothy 6:18) Man inyene uma Abasi, ana nnyịn ikaiso ndiyom nnennen ifiọk aban̄ade Abasi ye Eyen esie, Jesus Christ, ikabade inyene ifiọk nte ọfọnde ke ndisem edisana usem akpanikọ. (John 17:3, 17) Ke ndinam ntre, nnyịn n̄ko iyedu ke otu mbon oro Abasi owụtde uma.