Ntak Emi Anamde N̄kpọ Jehovah?
“USEN Jehovah emekpere! ‘Akwa ukụt’ emekpere, afo udunyụn̄ ubọhọke enye edieke mûnamke n̄kpọ Abasi.” Edieke owo ọkpọdọhọde fi ntre, didie ke afo akpanam n̄kpọ?—Zephaniah 2:2, 3; Matthew 24:21.
Edi akpanikọ, akpana nnyịn inyene usen Jehovah ke ekikere, ndien edibọhọ akwa ukụt oro asan̄ade ekpere ọkọn̄ọ ke edinam utom Abasi ke edinam akpanikọ. Edi nte mme akpanikọ ẹmi ẹkpedi akpan ntak emi nnyịn inamde n̄kpọ Jehovah Abasi? Ntak emi afo anamde n̄kpọ Jehovah?
Ufọn Ndinyene Nnennen Uduakesịt
Edieke owo mînamke n̄kpọ Abasi ye nnennen uduakesịt, enye ekeme ndikpọn̄ utom edieke mme idotenyịn esie mîwọrọke iwụt idem ke ndusụk ikpehe ini. Ke uwụtn̄kpọ, ndusụk owo ẹkedori enyịn Jesus Christ ndifiak ndi ke 1843 m̀mê 1844, kpa mme usenọfiọn̄ ẹmi ẹkebede ye unana mmọ ndikụt idotenyịn mmọ. Se idide n̄kpọ udọn̄ ke afan̄ emi edi se George Storrs ekewetde, kpa andimịn̄ Bible Examiner ye ọdiọn̄ọ Charles Taze Russell, akpa etieibuot Watch Tower Society ke ukperedem. Ke Bible Examiner eke September 1846, Storrs ekewet ete:
“Mbiomo ndinam n̄kpọ Abasi ọkọn̄ọ ke se inen̄erede ikpon ikan akpanikọ oro nte ke usen oro edikem. . . . Edinam oro edidade itie edieke 1846 ye 1847 ebede nte mmọ ẹkemede ndibe, ye unana edikụt edifiak ndi ọyọhọ ikaba eyediọk akan kpukpru se ẹkemede ndikere mban̄a. Ifiọk n̄kpọntịbe ọsọn̄ọ emi—ndọhọ ifiọk n̄kpọntịbe eke 1843 ye 1844. M̀mọ̀n̄ ke ata ediwak mbon oro, nte ẹdọhọde, ‘ẹkedemerede ndinam n̄kpọ Abasi’ nte akpanade mmọ ẹnam ebe ke mfiori oro nte ke ini edidi Ọbọn̄ ama ekem ẹdu idahaemi? Ndien uyo afiak ọdọhọ ete—M̀MỌ̀N̄!!! Sụk kiet ke duop ke otu mmọ oro ke ẹkụt idahaemi nte ẹsan̄ade man ẹwụt ukpono ẹnọ edidọhọ oro mmọ ẹdọhọde ke idi Christian. Ntak mîsan̄ake? Idiọk uduakesịt ẹkedemerede mmọ. Ibụk mmọ ekedi akpan n̄kpọ oro ekedemerede onyụn̄ onụkde mmọ. Mmọ ẹkekam ẹbiet anamidiọk oro ekerede ke imọ imekpere n̄kpa ke nna udọn̄ọ m̀mê ke oyobio ke inyan̄ibom. Edieke anade enye akpa, enye eyekabade edi Christian. Edieke enye ọkọfiọkde ete imọwọrọ ke itiendịk, enye eyenana udọn̄ nte eke akpa.”
Ndinam N̄kpọ ye Nnennen Uduakesịt
Ibụk ye ndịk nsobo ẹkeme ndinụk ndusụk owo ndikere ndinam uduak Jehovah. Mbon en̄wen ẹkeme ndikop nduaidem etieti ye idotenyịn uwem ke Paradise tutu mmọ ẹnam n̄kpọ Abasi n̄kukụre ke ntak oro. Edi, edieke mbon oro utọ uduakesịt ẹmi akpan akpan ẹnụkde ẹkerede ẹte ke usen Jehovah ye akwa ukụt itịmke ikpere, mmọ ẹkeme nditre ndinyene ntụhọ edinam n̄kpọ Abasi ifịk ifịk.
Nte ededi, ndidara ke mme un̄wọn̄ọ Abasi ye mme edidiọn̄ oro ẹkebemde iso ẹtịn̄ idịghe ibụk. Enye oyom nnyịn ikop inemesịt iban̄a mme idotenyịn oro ẹnịmde nnyịn ke iso nte mme anditiene Eyen esie, kpa Jesus Christ. Apostle Paul ọkọdọhọ ete, “Ẹdat esịt ke idotenyịn,” adiande do ete: “Ẹnyene ime ke ukụt; ẹkọbọ ke edibọn̄ akam.” (Rome 12:12) Adianade ye akam, “idatesịt Jehovah” aman̄wam nnyịn ndiyọ mme idomo nnyụn̄ mbet edisu mme un̄wọn̄ọ Abasi ye ime. (Nehemiah 8:10) Kan̄a kemi, nnyịn imenyene ediwak ntak ndinam n̄kpọ Jehovah. Nso idi ndusụk ke otu mmọemi?
Utom ye Ifet
Nte Andikara Ekondo, Jehovah odot onyụn̄ oyom san̄asan̄a utuakibuot. (Exodus 20:4, 5) Ntre Christian kiet kiet enyene ukem udomo mbiomo ọnọ Abasi edide akwa ukụt ọtọn̄ọ n̄kpọn̄, isua efen, m̀mê nte ini akade. Enye enyene mbiomo edinam n̄kpọ Jehovah ye unana ibụk ke ntak amade Abasi ke ofụri esịt, ukpọn̄, ekikere, ye odudu esie. (Mark 12:30) Ndusụk akpa Christian ẹkekere ke usen Jehovah emekpere, edi idotenyịn mmọ ikọwọrọke isu, ndien mmọ ẹma ẹkpan̄a ye unana edikụt n̄kpọntịbe oro. (1 Thessalonica 5:1-5; 2 Thessalonica 2:1-5) Edieke mmọ ẹkenamde akpanikọ tutu osịm n̄kpa, nte ededi, mme anditiene Christ oro ẹyetde aran do ke akpatre ẹma ẹbọ utịp ediset ke n̄kpa n̄ka uwem eke heaven.—Ediyarade 2:10.
Mme Ntiense Jehovah oro ẹnade baptism ẹkpenam n̄kpọ esie ke edinam akpanikọ sia mmọ ke unyịmesịt ẹkemende mbiomo edinam uduak esie ẹbiom. Kam kere! Ukem nte ndisana angel, nnyịn imekeme ndinam uduak Andikara Ekondo. (Psalm 103:20, 21) Jesus ama enen̄ede okpono utọ ifet oro tutu enye ọkọdọhọ ete: “Udia Mi edi ndinam uduak Andidọn̄ Mi, nnyụn̄ mma utom Esie.” (John 4:34) Edieke nnyịn inyenede ukem edu oro, nnyịn iyetan̄a itoro Jehovah ifịk ifịk inyụn̄ isian mbon en̄wen mme uduak esie, nte ẹyararede ke N̄wed Abasi. Ke usụn̄ emi, nnyịn imenyene ifet n̄ko ndin̄wam mbon en̄wen ke n̄kan̄ eke spirit. Ndien ke akpanikọ, ndinam uduak Abasi ke ntak ima oro ẹmade enye edi utịbe ifet, inamke n̄kpọ m̀mê ini ewe ke usen Jehovah ọtọn̄ọ.
Esịtekọm Ọnọ Uduakesịt
Esịtekọm ke ima Abasi ke ndinọ Eyen esie ke uwa ufak ekpenyene ndinụk nnyịn n̄ko ndinam n̄kpọ Jehovah. Ini kiet nnyịn ima idianade ikpọn̄ Jehovah Abasi ke ntak idiọkn̄kpọ. Nte ededi, Jesus ọkọdọhọ ete: “Abasi akamama ererimbot [ubonowo] ntem, tutu Enye osio ikpọn̄îkpọn̄ Eyen emi Enye obonde ọnọ, man owo ekededi eke ọbuọtde idem ye Enye okûtak, edi enyene nsinsi uwem.” (John 3:16) Jehovah akanam usio-ukot ke afan̄ emi, nte Paul ekewetde ete: “Abasi otịm ayarade ima eke amade nnyịn, kemi Christ akpade ke ibuot nnyịn ke adan̄aemi nnyịn isụk idide mme idiọkowo kan̄a.” (Rome 5:8) Esịtekọm ke ima Abasi oro ẹwụtde mi ekpenyene ndinụk nnyịn ndinam n̄kpọ esie ke ofụri esịt.
Esịtekọm ke mme enọ Jehovah ke n̄kan̄ eke spirit ye ke n̄kan̄ eke obụk ọnọ nnyịn ntak efen efen ndinam n̄kpọ esie ke edinam akpanikọ. Ikọ Abasi edi ndausụn̄ akpanikọ—kpa un̄wana usụn̄ nnyịn. Mme n̄wed oro ẹnọde ebe ke “asan̄autom emi anamde akpanikọ, onyụn̄ enyenede ọniọn̄” an̄wam nnyịn ndidu uwem ekekem ye uduak Abasi. (Matthew 24:45-47; Psalm 119:105) Sia nnyịn inyụn̄ inịmde Obio Ubọn̄ akpa, Jehovah n̄ko ọmọnọ nnyịn n̄kpọ ke n̄kan̄ eke obụk. (Matthew 6:25-34) Nte afo omowụt esịtekọm ke mme n̄kpọ ẹmi?
Esịtekọm ke ifụre oro Abasi ọnọde ndiwọrọ ke nsunsu ido ukpono ọmọnọ ntak efen ndinam n̄kpọ Jehovah ke edinam akpanikọ. Akwa Babylon kpa akpara ido ukpono “[etie] ke enyọn̄ ediwak mmọn̄,” emi ọwọrọde “mbio obio, ye otuowo, ye mme idụt ye usem.” (Ediyarade 17:1, 15) Edi, enye itiehe ke enyọn̄ mme asan̄autom Jehovah, ke n̄kan̄ ido ukpono enyenede odudu onyụn̄ akarade mmọ. Ke uwụtn̄kpọ, mmọ ẹmesịn ukpepn̄kpọ nsunsu ido ukpono oro nte ke ukpọn̄ owo ikemeke ndikpa. Mmọ ẹfiọk ẹte ke ẹkebot owo nte “ukpọn̄ eke odude uwem,” nte ke mme akpan̄kpa “ifiọkke baba n̄kpọ kiet,” ye nte ke ediset ke n̄kpa eyedu. (Genesis 2:7; Ecclesiastes 9:5, 10; Utom 24:15) Ntre mmọ ibakke inyụn̄ ituakke ibuot inọ mme akpan̄kpa. Nte esịtekọm ke utọ ifụre eke spirit oro anam fi esịn nsọn̄ibuot onyụn̄ ọsọn̄ọ eyịre ke edisana utuakibuot Jehovah?—John 8:32.
Esịtekọm ke un̄wam Jehovah eke usen ke usen ekpenyene ndinam ubiere nnyịn ndinam n̄kpọ Jehovah ke edinam akpanikọ ọkọri. David andiwet psalm ọkọdọhọ ete: “Ekọm enyene Jehovah, oro obiomde mbiomo nnyịn kpukpru usen.” (Psalm 68:19, NW) Ke ebiet efen andiwet psalm ọkọdọhọ ete: “Ete mi ye eka mi [ẹkpekpọn̄ mi, Jehovah eyemen, NW] mi akama.” (Psalm 27:10) Ih, owo oro anamde n̄kpọ Jehovah ke edinam akpanikọ ekeme nditop ndamban̄a mbiomo esie, utọ nte editịmede esịt ye mme idomo, ndori Abasi. Nte afo omowụt esịtekọm ke un̄wam Jehovah oro mîkpụho ke ndinam n̄kpọ esie ke edinam akpanikọ?—Psalm 145:14.
Toro Jehovah ye Itie Edidem Esie
Udọn̄ nditoro Jehovah ekpenyene n̄ko ndinụk nnyịn ndinam n̄kpọ esie. Ẹwụt mme edibotn̄kpọ eke heaven nte ẹtorode Abasi ye mme ikọ ẹmi: “Ọbọn̄ ye Abasi nnyịn, Afo omodot ndibọ ubọn̄ ye ukpono ye odudu, koro Afo okobotde kpukpru n̄kpọ; ndien oto uduak Fo ke mmọ ẹdu, ẹkenyụn̄ ẹboro.” (Ediyarade 4:10b) Edidem David ama otoro Abasi ke ndidọhọ nte: “O Jehovah, ubom, ye odudu, ye ubọn̄, ye akakan, ye uten̄e ẹdi okuommọ . . . O Jehovah, itie edidem edi okwo . . . Inyene ye ukpono ẹto fi ke iso, afo onyụn̄ edi andikara kpukpru . . . Nnyịn imọkọm fi, ndien, O Abasi nnyịn, inyụn̄ itoro enyịn̄ ubọn̄ fo.” (1 Chronicles 29:10-13) Nte mme asan̄autom Jehovah, ndi nnyịn imekeme ndinam n̄kpọ efen ikan nditoro enye ke ikọ ye ke edinam ke adan̄aemi ibetde edisu mme un̄wọn̄ọ esie?—1 Corinth 10:31.
Ọkpọsọn̄ udọn̄ nditịn̄ mban̄a Obio Ubọn̄ Abasi n̄ko ọnọ ntak efen ndinam n̄kpọ Jehovah. Ẹwụt eti uduakesịt oro mfọn mfọn ke mme ikọ andiwet psalm ẹmi: “O Jehovah, kpukpru se afo anamde ẹkọm fi: mbonima fo ẹnyụn̄ ẹtoro fi. Mmọ ẹbụk ubom ubọn̄ fo, ẹnyụn̄ ẹtịn̄ ẹban̄a odudu fo. Ẹnyụn̄ ẹnam nditọ owo ẹfiọk ese esie, ye ubom uyai ubọk esie. Ubọn̄ fo edi ata nsinsi ubọn̄, afo onyụn̄ akara ke ofụri emana.” (Psalm 145:10-13) Nditan̄a etop Obio Ubọn̄ edi utom Christian ye ata akpan utom oro ẹnamde ke usen nnyịn. (Matthew 24:14; 28:19, 20) Nte afo emenyene ọkpọsọn̄ udọn̄ nditoro Jehovah nnyụn̄ ntịn̄ nnọ mbon efen mban̄a Obio Ubọn̄ esie?
Edinam enyịn̄ Jehovah asana ye ediwụt unen itie edikara esie ẹkpenyene ndidi ata akpan n̄kpọ nnọ nnyịn tutu nnyịn iyom ndinam n̄kpọ esie ke edinam akpanikọ. Nnyịn imekeme ndibọn̄ akam nyom edinam enyịn̄ Jehovah asana ye ediwụt unen itie edikara esie. (Matthew 6:9) Nnyịn imekeme ndidu uwem ekekem ye akam nnyịn ke ndibuana ke utom Christian kpukpru ini ye ke ndisuan akpanikọ aban̄ade mme utọ akpan n̄kpọ oro.—Ezekiel 36:23; 39:7.
Idatesịt ye Uyụhọ
Ke ndinam n̄kpọ Jehovah ke edinam akpanikọ, nnyịn imenyene uyụhọ edinam esịt esie adat ye ediwụt Devil nte osu nsu. Okposụkedi Satan ke nsu ọdọhọde ete ke mme owo ẹnam n̄kpọ Abasi ke mme ntak ibụk, utom oro nnyịn inamde inọ Jehovah ke edinam akpanikọ, ke ntak ima, owụt ekikere osụn̄i isụn̄i oro nte edide nsu. (Job 1:8-12) Emi ọnọ nnyịn eti ntak ndikaiso nnam se ẹdọhọde ke Mme N̄ke 27:11: “Eyen mi, nyene ibuot, nyụn̄ dat mi esịt, man n̄kụt se ndibọrọde owo eke osụn̄ide mi.” Adianade do, ke ini nnyịn ke edinam akpanikọ inamde n̄kpọ Jehovah kpa ye kpukpru se Satan anamde ndibiọn̄ọ nnyịn, usụn̄uwem nsọn̄ọnda nnyịn eyenam ekemmọ mme andinịm ke akpanikọ ẹsọn̄ idem.—Philippi 1:12-14.
Idatesịt ye uyụhọ edibuana ke idọk eke spirit ekpenyene n̄ko ndinụk nnyịn ndinam n̄kpọ Jehovah ke edinam akpanikọ. Jesus ama okụt inemesịt ke ndin̄wam mme owo, akpan akpan ke mme usụn̄ eke spirit. Matthew 9:35-38 ọdọhọ ete: “Jesus asan̄a akanade kpukpru obio ye obio-in̄wan̄, ekpep owo n̄kpọ ke mme synagogue mmọ, onyụn̄ ọkwọrọ gospel Ubọn̄ Heaven, onyụn̄ anam kpukpru orụk mmemidem ẹkụre. Edi ke adan̄aemi Enye okụtde mme otuowo, atua mmọ mbọm, koro mmọ ẹdude ke nnanenyịn ẹnyụn̄ ẹsuanade, nte erọn̄ eke mînyeneke andikpeme. Ekem Enye ọdọhọ mbet Esie, ete, Ke akpanikọ idọk okpon, edi mme anamautom iwakke. Ẹben̄e ndien Enyene idọk ẹte, Enye osio mme anamutom ọdọn̄ ẹdi ke idọk Esie.” Edieke utom idọk ebịghide akan nte nnyịn ikodoride enyịn, emi eyenọ nnyịn ifet efen efen ndikụt idatesịt ye uyụhọ ke ndin̄wam mbon en̄wen ke n̄kan̄ eke spirit. Emi n̄ko edi usụn̄ ndiwụt ima mbọhọidụn̄ oro ẹdoride enyịn ẹto nnyịn.—Matthew 22:39.
Ntak Emi Afo Anamde N̄kpọ Abasi?
Nnyịn imekere iban̄a ibat ibat kpọt ke otu ediwak akpan ntak oro ẹdude ke ndinam n̄kpọ Jehovah ke edinam akpanikọ. Ọfọn ndikere ke akam mban̄a ọkpọkpọ ntak nnyịn ke ndinam n̄kpọ Abasi, koro owo nnyịn kiet kiet eyenam ibat ọnọ enye. (Rome 14:12; Mme Hebrew 4:13) Ndien mbon oro ẹkọbọde ke ndinyene mme ikpîkpu ibụk ibụk uduakesịt idinyeneke mfọn Abasi.
Nso ke ẹkeme ndidori enyịn ndikụt edieke nnyịn idọn̄de enyịn akpan akpan ke ndinam enyịn̄ Jehovah asana ye ke ndinam edisana utom nnọ Abasi ye mme uduakesịt oro ẹnanade ibụk? Kamse, Jehovah eyediọn̄ nnyịn ye utom nnyịn! (Mme N̄ke 10:22) Nnyịn n̄ko iyebọ uwem nsinsi koro nnyịn ikanamde n̄kpọ Jehovah ke edinam akpanikọ.
[Ndise ke page 9]
Ediwak tọsịn ke ẹnam n̄kpọ Jehovah ke Japan
[Ndise ke page 10]
Ndinam n̄kpọ Jehovah ke Côte d’Ivoire
[Ebiet Ẹdade Ndise Ẹto ke page 8]
SIX SERMONS, eke George Storrs (1855)