Ima (Agape)—Se Enye Mîdịghe ye Se Enye Edide
“Ẹdian . . . ima ke ima nditọete mbufo.”—2 PETER 1:5, 7, NW.
1. (a) Ewe edu ke Bible ada ke n̄wọrọnda? (b) Ewe ikọ Greek inan̄ ke ẹwak ndikabade nte “ima,” ndien ewe ke ẹtịn̄ ẹban̄a ke 1 John 4:8?
EDIEKE edide odu edu m̀mê ido kiet oro Ikọ Abasi, kpa Bible, etịn̄de n̄kpọ aban̄a ke n̄wọrọnda usụn̄, enye edi ima. Ke usem Greek, kpa akpa usem oro ẹkedade ẹwet N̄wed Abasi eke mme Christian, ikọ inan̄ ẹdu oro ẹsiwakde ndikabade nte “ima.” Ima oro ebehede nnyịn idahaemi idịghe eke eʹros (ikọ oro owo mîkwe ke N̄wed Abasi Usem Greek), emi ọkọn̄ọde ke udọn̄ idan̄; inyụn̄ idịghe stor·geʹ, kpa ntụk oro ọkọn̄ọde ke ebuana eke obụk; inyụn̄ idịghe phi·liʹa, ufiop ufiop ima itie ufan emi ọkọn̄ọde ke ukpono edem mbiba, oro ẹkenemede ke ibuotikọ oro ekebemde iso. Utu ke oro, enye edi a·gaʹpe—kpa ima oro ọkọn̄ọde ke edumbet, emi ẹkemede ndidọhọ ke edi ukem ye unana ibụk, kpa ima oro apostle John eketịn̄de aban̄a ke ini enye ọkọdọhọde ete: “Abasi edi ima.”—1 John 4:8.
2. Nso ke ẹtịn̄ nte odotde ẹban̄a ima (a·gaʹpe)?
2 Kaban̄a ima emi (a·gaʹpe), Prọfesọ William Barclay ọdọhọ ke New Testament Words esie ete: “Agapē enyene n̄kpọ ndinam ye ekikere: enye idịghe ikpîkpu ntụk oro edemerede ke idemesie ke esịt nnyịn [nte ekemede ndidi ye phi·liʹa]; enye edi edumbet oro nnyịn ikoide-koi ida idu uwem. Agapē enyene n̄kpọ ndinam akamba akamba ye uduak. Enye edi edikan, edikụt unen, edinyene se ẹyomde. Akananam owo ndomokiet ikoho-koi ima mme asua esie. Owo ndima mme asua esie edi edikan ke otu kpukpru mme ndammana ntụhọ ye ntụk nnyịn. Agapē emi . . . ke akpanikọ edi odudu ndima se mîdịghe mmemmem n̄kpọ ndima, ndinyene ima nnọ mme owo oro nnyịn mîmaha.”
3. Nso nsọn̄uyo ke Jesus Christ ye Paul ẹkedori ke ima?
3 Ih, ke otu mme n̄kpọ oro ẹnamde edisana utuakibuot Jehovah okpụhọde ye kpukpru orụk utuakibuot eken edi nsọn̄uyo oro enye odoride ke orụk ima emi. Nte enende Jesus Christ ama etịn̄ se idide n̄kponn̄kan ibet iba: “Ebeiso edi, . . . nyụn̄ ma Jehovah Abasi fo ke ofụri esịt fo, ye ke ofụri ukpọn̄ fo, ye ke ofụri ekikere fo, ye ke ofụri odudu fo. Udiana akpa edi emi, Ma mbọhọidụn̄ fo nte idemfo. Ibet en̄wen eke okponde akan mmọemi idụhe.” (Mark 12:29-31) Apostle Paul ama odori ukem nsọn̄uyo oro ke ima ke 1 Corinth ibuot 13. Ke ama ọkọsọn̄ọ owụt ete ke ima edi akpan edu oro mînaha anana, enye ama eberi ke ndidọhọ: “Ntem ke mbuọtidem, ye idotenyịn, ye ima ẹsụk ẹdu, mmọ mbita; edi andikpon n̄kan ke otu mmọ edi ima.” (1 Corinth 13:13) Jesus ama etịn̄ nte enende ete ke ẹdida ima ẹdiọn̄ọ mme anditiene imọ.—John 13:35.
Mme N̄kpọ Oro Ima Mîdịghe
4. Etikwo etikwo ye in̄wan̄în̄wan̄ ikpehe ima ifan̄ ke Paul akasiak 1 Corinth 13:4-8?
4 Ẹma ẹtetịn̄ akpanikọ oro nte ke edi mmemmem n̄kpọ nditịn̄ se ima mîdịghe akan nditịn̄ se enye edide. Akpanikọ ẹdu ke ikọ oro, koro apostle Paul ke ibuot uwetn̄kpọ esie oro enemede aban̄a ima, 1 Corinth 13, ke 1Co 13 ufan̄ikọ 4 osịm 8, asiak n̄kpọ usụkkiet oro ima mîdịghe ye n̄kpọ itiaba oro enye edide.
5. Didie ke ẹkabade “ufụp,” ndien didie ke ẹda enye ẹtịn̄ ikọ ke eti usụn̄ ke N̄wed Abasi?
5 Akpa n̄kpọ oro Paul ọdọhọde nte ima mîdịghe edi nte ke enye “ifụbeke ufụp.” Oro oyom esisịt edinam an̄wan̄a koro eti ye idiọk ufụp ẹdu. N̄wed ukabadeikọ kiet akabade “ufụp” nte “unana edikeme ndiyọ ndomoidem” ye nte “ediyom san̄asan̄a utuakibuot.” Ntem, Moses ama ewet ke Exodus 34:14 ete: “Kûnyụn̄ utuak ibuot unọ abasi efen baba kiet: koro Jehovah, emi enyịn̄ esie ekerede Ufụp, edi Abasi ufụp.” Ke Exodus 20:5 (NW), Jehovah ọdọhọ ete: “Ami Jehovah Abasi mbufo ndi Abasi emi oyomde san̄asan̄a utuakibuot.” Ke ukem usụn̄ oro, apostle Paul ama ewet ete: “Koro mmenyene ufụp Abasi mban̄a mbufo.”—2 Corinth 11:2.
6. Ewe uwụtn̄kpọ N̄wed Abasi ẹwụt ntak emi ima mîfụbeke ufụp?
6 Nte ededi, ke ofụri ofụri, “ufụp” enyene n̄kpọ ndinam ye se idiọkde, emi edi ntak anamde ẹsiak enye esịn ke mme utom obụkidem ke Galatia 5:20. Ih, utọ ufụp oro edi ibụk onyụn̄ edemede usua, ndien usua edi isio n̄kpọ ye ima. Ufụp akanam Cain asua Abel tutu okosịm idaha ndiwot enye, ndien enye ama anam nditọete Joseph duop ẹsua enye tutu okosịm idaha oro ẹkeyomde ndiwot enye. Ima isịnke enyịn ke inyene mmọ efen m̀mê ufọn oro mmọ ẹkpenyenede ke ntak ufụp, nte Edidem Ahab ekesịnde Naboth enyịn aban̄a in̄wan̄ esie ke ntak ufụp.—1 Ndidem 21:1-19.
7. (a) N̄kpọntịbe ewe owụt nte ke Jehovah inemke esịt iban̄a edinam inua? (b) Ntak emi ima mînamke inua idem ye unana editie n̄kere?
7 Ekem Paul asian nnyịn ete ke ima “inamke inua.” Edinam inua owụt unana ima, koro enye anamde owo onịm idemesie ke itie oro okon̄de akan mmọ en̄wen. Jehovah inemke esịt ye mbon oro ẹnamde inua, nte ekemede ndikụt nto usụn̄ nte enye okosụhọrede Edidem Nebuchadnezzar itie ke ini emi enye akanamde inua. (Daniel 4:30-35) Esiwak ndinam inua ye unana editie n̄kere ke ntak edikop ebeubọk inemesịt mban̄a idaha oro owo osịmde ke uwem m̀mê mme inyene esie. Ndusụk owo ẹkeme ndinam ndudue ke ndikpọ inua ke unen oro mmọ ẹkụtde ke utom ukwọrọikọ Christian. Mmọ en̄wen ẹtie nte ebiowo oro eketịn̄de ọnọ mme ufan esie ke urụk ukopikọ nte ke imọ imedep obufa moto oro ekọmurua esie ekperede ndisịm $50,000. Kpukpru utọ n̄kpọ oro iwụtke ima koro enye onịmde owo emi anamde inua mi ke itie oro okon̄de akan mbon oro enye etịn̄de ikọ ọnọ.
8. (a) Nso idi edu Jehovah kaban̄a mbon oro ẹkohorede idem? (b) Ntak emi ima mîsinamke n̄kpọ ke utọ usụn̄ oro?
8 Ndien ẹtịn̄ ẹnọ nnyịn ẹte ke ima “ikohokede idem.” Owo oro okohorede idem, mîdịghe atan̄de idem, emenede idemesie ke enyọn̄ akan mmọ en̄wen ke usụn̄ oro mîwụtke ima. Utọ edu oro enen̄ede anana eti ibuot koro “Abasi ọbiọn̄ọ mbon iseri, edi ọnọ mbon nsụhọdeidem mfọn.” (James 4:6) Ima esinam n̄kpọ ke usụn̄ oro edide isio ye oro; enye esida mmọ en̄wen nte mbon oro ẹfọnde ẹkan. Paul ekewet ke N̄wed Mbon Philippi 2:2, 3 ete: “Yak mbufo ẹdi mbon esịt kiet, ẹmi ẹnyụn̄ ẹnyenede ima kiet, ẹnyụn̄ ẹnyenede iwụk kiet, ye ekikere kiet. Ẹkûnam baba n̄kpọ kiet ke ndomoidem m̀mê ke ntan̄idem, edi yak owo kiet kiet ada nsụhọde esịt abat ete, owo en̄wen ọfọn akan imọ.” Utọ edu oro anam mmọ en̄wen ẹkop inem, ke adan̄aemi owo ntan̄idem ke ntak edidemede utọk anamde mmọ en̄wen ẹtre ndikop inem.
9. Ntak emi ima mîsinamke se mîdotke?
9 Paul akaiso ọdọhọ ete ke ima “inamke ido eke mîdotke.” N̄wed ukabadeikọ akabade “ido eke mîdotke” nte “ata idiọk ido oro owo mîyomke mîdịghe se ituahade ye eti edu m̀mê eti ido uwem.” Owo oro anamde ido eke mîdotke (oro mîwụtke ima) iwụtke ukpono inọ ekikere mmọ en̄wen. Ediwak edikabade Bible ẹkabade ikọ Greek oro nte “nsọn̄ido.” Utọ owo oro iwụtke ukpono inọ se ẹdade nte eti n̄kpọ oro onyụn̄ enyenede inem. Ke akpanikọ, ima ima edikere mban̄a mmọ en̄wen ọwọrọ ndifep kpukpru n̄kpọ oro ẹwụtde nsọn̄ido m̀mê oro mîdotke, mme n̄kpọ oro ẹyatde owo esịt ẹnyụn̄ ẹkemede ndimụm owo n̄kpen̄eyen̄.
Mme N̄kpọ Eken Oro Ima Mîdịghe
10. Ke nso usụn̄ ke ima mîyomke ufọn esiemmọ?
10 N̄kpọ efen oro ẹtịn̄de ẹnọ nnyịn edi nte ke ima “iyomke ufọn esiemmọ,” oro edi, ke ini mbụme edemerede aban̄a ọkpọkpọ udọn̄ nnyịn ye eke mmọ en̄wen. Apostle oro ama ewet ke ebiet en̄wen ete: “Akananam baba owo kiet isuaha obụkidem esie, edi ọbọbọk enye, onyụn̄ otịm ekpeme enye.” (Ephesus 5:29) Nte ededi, ke ini mme udọn̄ nnyịn ẹtuahade ye mme udọn̄ mmọ en̄wen ndien idụhe edumbet Bible efen oro abuanade, nnyịn ikpenyene ndinam nte Abraham akanamde ye Lot, ke ima ima usụn̄ yak owo enye eken ebemiso anam edimek.—Genesis 13:8-11.
11. Nte ke ima isọpke iyatesịt ọwọrọ nso?
11 Ima n̄ko isisọpke iyatesịt. Mmọdo Paul ọdọhọde nnyịn ete ke ima “isọpke iyatesịt.” Enye iyatke esịt nte mîdotke. Enye enyene mfara ke idem. Mme ọdọndọ akpan akpan ẹkpenyene ndinen̄ede n̄kere mban̄a item emi ebe ke nditre nditịn̄ ikọ uyat uyat m̀mê ndifiori n̄kpo ye kiet eken. Mme idaha ẹsidu oro anamde owo ọsọp ndiyat esịt, emi akanamde Paul ọnọ Timothy item ete: “Ndien owo Ọbọn̄ inyeneke ndidi owo utọk; enye enyene ndinyene sụn̄sụn̄ ido ye kpukpru owo; enye enyene ndifiọk nditeme owo, nnyụn̄ mme ime ke ini ẹnamde enye idiọk: enye onyụn̄ enyene ndida ata nsụkesịt nnam mmọemi ẹbiọn̄ọde ẹnen̄ede ẹsan̄a.”—2 Timothy 2:24, 25.
12. (a) Ke nso usụn̄ ke ima mîkamake udu? (b) Ntak emi mîwụtke eti ibuot ndikama udu?
12 Ke akade iso nditịn̄ mme n̄kpọ oro ima mîdịghe, Paul ọnọ item ete: “Ima . . . ikamake udu.” Oro iwọrọke nte ke ima idiọn̄ọke ke ini ẹnamde enye idiọk. Jesus ama owụt nte nnyịn ikpanamde n̄kpọ ke ini ẹnamde nnyịn ata idiọkn̄kpọ. (Matthew 18:15-17) Edi ima idiyakke nnyịn ikaiso ndiyat esịt, ndisịn owo ke esịt. Nditre ndikama udu ọwọrọ ndifen nnyụn̄ mfre mban̄a ke ẹma ẹkese ẹban̄a mfịna oro ke usụn̄ emi N̄wed Abasi etemede. Ih, kûtụhọde idemfo m̀mê ndinọ idemfo mfụhọ ke ndifiak n̄kere mban̄a idiọk oro ẹkenamde, akamade udu!
13. Nso ke nditre ndidara se ikwan̄ade ọwọrọ, ndien ntak emi ima mînamke oro?
13 Akan oro, ẹsian nnyịn ete ke ima “idarake se ikwan̄ade.” Ererimbot esidara se ikwan̄ade, nte ẹkemede ndikụt nto uwọrọetop oro ẹnọde afai ye n̄wed ndise idan̄, ndise senima, ye mme edinam TV. Kpukpru utọ idatesịt oro edi ibụk, iwụtke ukpono inọ ndinen edumbet Abasi m̀mê mfọnọn̄kpọ mbon en̄wen. Kpukpru utọ ibụk ibụk idatesịt oro ẹdi editọ nnọ obụkidem ndien ke ekemini ẹyedọk mbiara ẹto obụkidem.—Galatia 6:8.
14. Ntak emi ẹkemede ndidọhọ uko uko nte ke ima idibehe ifep ke nsinsi?
14 Idahaemi akpatre n̄kpọ oro ima mînamke: “Ima idibehe ifep nsinsi.” N̄kpọ kiet edi, ima idibehe ifep ke nsinsi m̀mê ndinyene utịt koro Abasi edi ima, ndien enye edi “Edidem emi akarade ke kpukpru eyo.” (1 Timothy 1:17) Ke N̄wed Mbon Rome 8:38, 39, ẹsọn̄ọ ẹnọ nnyịn ẹte ke ima oro Jehovah enyenede ọnọ nnyịn idibehe ifep ke nsinsi: “Koro mmotịm mbụre mfiọk nte, n̄kpa ye uwem, ye mme angel ye mbọn̄, ye n̄kpọ eke ẹdude ke emi, ye n̄kpọ eke edidide, ye mme odudu, ye ukon̄ ye utụn̄ọ, ye n̄kpọ efen ekededi eke ẹbotde, idikemeke ndidianade nnyịn ke ima Abasi, emi odude ke Christ Jesus Ọbọn̄ nnyịn.” N̄ko, ima idibehe ifep ke nsinsi koro akananam enye idịghe n̄kpọ oro ananade. Ima ekeme ndiyọ mme idaha ekededi, ndikan n̄kpọ-ata ekededi.
Mme N̄kpọ Oro Ima Edide
15. Ntak emi Paul ebemde iso asiak anyanime ke otu mme n̄kpọ oro ima edide?
15 Ke idide idahaemi idisịm n̄kan̄ oro edide eti, mme n̄kpọ oro ima edide, Paul ama ọtọn̄ọ ke ndidọhọ: “Ima enyenyene anyanime.” Ẹsidọhọ ete ke n̄kpọ nte ebuana Christian ikpodụhe ke anyanime mîkpodụhe, oro edi, ye edime ime ye kiet eken. Oro edi ntre koro kpukpru nnyịn idi mme anana mfọnmma owo, ndien unana mfọnmma nnyịn ye mme ndudue nnyịn esisịn mmọ efen ke udomo. Eyịghe idụhe ndien apostle Paul akasiakde emi nte akpa ke mme n̄kpọ oro ima edide!
16. Ke mme usụn̄ ewe ke mme andibuana ke ubon ẹkeme ndiwụt mfọnido nnọ kiet eken?
16 Paul ọdọhọ n̄ko ete ke ima “ọfọn ido.” Oro edi, ima an̄wan̄wam, esitịm ekere n̄kpọ, owụt edikere mban̄a ọnọ mmọ en̄wen. Mfọnido esiwụt idem ke ikpọ ye n̄kpri n̄kpọ. Mbọhọidụn̄ owo Samaria oro ama enen̄ede owụt mfọnido ọnọ owo oro mbon n̄wo ẹkemiade ẹnịm ke mbenusụn̄. (Luke 10:30-37) Ima esikop inem ke ndidọhọ “mbọk.” Ndidọhọ, “Men bred oro nọ mi” edi ewụhọ. Ndibem iso ndọhọ “mbọk” anam enye edi eben̄e. Mme ebendọ ẹwụt mfọnido ẹnọ iban mmọ ke ini mmọ ẹnamde item oro ke 1 Peter 3:7: “Kpasụk ntre, mbufo mme ebe ẹdu uwem ye iban mbufo nte mme enyene ibuot owo; ẹnọ iban ukpono, nte mmọemi ẹmemde ẹkan mbufo, sia mmọ ẹnyụn̄ ẹtienede mbufo ẹbuana ke ufọn uwem; mbak n̄kpọ edibiọn̄ọ akam mbufo.” Ibanndọ ẹwụt mfọnido ẹnọ mme ebe mmọ ke ini ‘ẹten̄ede’ mmọ. (Ephesus 5:33) Mme ete ẹwụt mfọnido ẹnọ nditọ mmọ ke ini mmọ ẹtienede item oro ke Ephesus 6:4: “Mme ete, ẹkûfiomo nditọ mbufo, edi ẹkama mmọ ke ntụnọ ye item Ọbọn̄.”
17. Ewe ẹdi usụn̄ iba emi ima adarade ye se idide akpanikọ?
17 Ima idarake se ikwan̄ade edi “adadara se idide akpanikọ.” Ima ye akpanikọ ẹsan̄a ikpat kiet—Abasi edi ima, ndien ke ukem ini oro, enye edi “Abasi akpanikọ.” (Psalm 31:5) Ima esidara ndikụt nte akpanikọ enyenede edikan onyụn̄ ayararede nsu; emi ke n̄kan̄ kiet omotịp n̄kpọ esịn ke akwa n̄kọri oro adade itie ke ibat mme andituak ibuot nnọ Jehovah mfịn. Nte ededi, sia akpanikọ edide isio ye se ikwan̄ade, emi ekeme ndinọ ekikere n̄ko nte ke ima adadara se inende. Ima esidara ke ini edinen ido enyenede edikan, nte ẹwụkde mme andituak ibuot nnọ Jehovah ndinam ke ini Akwa Babylon ọduọde.—Ediyarade 18:20.
18. Ke nso usụn̄ifiọk ke ima eme kpukpru n̄kpọ?
18 Paul n̄ko asian nnyịn ete ke ima “ememe kpukpru n̄kpọ.” Nte Kingdom Interlinear owụtde, enye ọnọ ekikere nte ke ima ofofụk kpukpru n̄kpọ. Enye “isuanke ndudue” oro eyenete anamde, nte idiọkowo akpanamde. (Psalm 50:20, NW; Mme N̄ke 10:12; 17:9) Ih, ekikere oro ẹnọde mi edi ukem nte eke 1 Peter 4:8: “Koro ima ofụkde ekese idiọkn̄kpọ.” Nte ededi, edinam akpanikọ eyenam nnyịn itre ndidịp akwa idiọkn̄kpọ oro ẹnamde ẹdian Jehovah ye esop Christian.
19. Ke nso usụn̄ ke ima onịm kpukpru n̄kpọ ke akpanikọ?
19 Ima “ononịm kpukpru n̄kpọ ke akpanikọ.” (NW) Ima edi in̄wan̄în̄wan̄, idịghe ekikwo etikwo. Emi iwọrọke ite ke ima ana edi se ẹbian̄ade mmemmem mmemmem. Enye isọpke ndinịm mme ikọ oro ẹtịn̄de ẹto ntụk ke akpanikọ. Edi man otodo owo enyene mbuọtidem ke Abasi, ana owo oro onyịme ndinịm ke akpanikọ. Ntre ima itiehe eyịghe eyịghe, etịn̄de ikọ abiat n̄kpọ nte mîdotke. Enye ifan̄ake edinịm ke akpanikọ nte mbon oro mînịmke edidu Abasi ke akpanikọ ẹsinamde, emi ke ekikere mmọ ẹdọhọde ke Abasi idụhe, m̀mê enye ndibiet mbon oro ẹdọhọde ke owo idiọn̄ọke m̀mê Abasi odu m̀mê idụhe, emi ke ekikere mmọ ẹdọhọde ke idịghe mmemmem n̄kpọ ndifiọk ebiet oro nnyịn itode, ntak emi nnyịn idude mi, ye se ini iso edidade edi. Ikọ Abasi ọnọ nnyịn nsọn̄ọ kaban̄a kpukpru n̄kpọ ẹmi. Ima n̄ko eben̄e idem ndinịm ke akpanikọ koro enye enyenede mbuọtidem, itiehe eyịghe eyịghe nte mîdotke.
20. Didie ke ima enyene ebuana ye idotenyịn?
20 Apostle Paul akaiso ọnọ nnyịn nsọn̄ọ nte ke ima “ododori enyịn aban̄a kpukpru n̄kpọ.” Sia ima anamde n̄kpọ nnennen nnennen, idịghe etikwo etikwo, enye enyene ọkpọsọn̄ idotenyịn aban̄a kpukpru n̄kpọ oro ẹn̄wọn̄ọde ke Ikọ Abasi. Etịn̄ ẹnọ nnyịn ete: “Koro odotde ofụn̄isọn̄ ofụn̄ isọn̄ ye idotenyịn, onyụn̄ odotde otịm ibokpot otịm ye idotenyịn ete iyenyene udeme idia.” (1 Corinth 9:10) Kpa nte ima enyenede mbuọtidem, enye n̄ko enyene idotenyịn, odoride enyịn kpukpru ini ke se ifọnde ikan.
21. Nso nsọn̄ọ N̄wed Abasi odu nte ke ima ememe ime?
21 Ke akpatre, ẹsọn̄ọ ẹnọ nnyịn ete ke ima “ememe ime ke kpukpru n̄kpọ.” Enye emekeme ndinam ntre etienede se apostle Paul etịn̄de ọnọ nnyịn ke 1 Corinth 10:13: “Idomo ikosịmke mbufo ibọhọke se inade owo ndibiom; edi Abasi edi akpanikọ, idinyụn̄ iyakke ẹdomo mbufo ẹbe se ukeme mbufo edide; edi Enye eyesiak usụn̄ ubọhọ ọnọ mbufo ke ufọt idomo, man mbufo ẹkeme ndibiom enye.” Ima eyenam nnyịn ise ediwak uwụtn̄kpọ oro ẹdude ke N̄wed Abasi oro aban̄ade mme asan̄autom Abasi ẹmi ẹkeyọde, emi etubom ke otu mmọ edide Jesus Christ, nte etide nnyịn ke Mme Hebrew 12:2, 3.
22. Nte nditọ Abasi, nso n̄wọrọnda edu ke nnyịn ikpekere iban̄a ndiwụt kpukpru ini?
22 Ke akpanikọ, ima (a·gaʹpe) edi n̄wọrọnda edu oro oyomde nnyịn nte mme Christian, Mme Ntiense Jehovah, ikọri, kaban̄a se enye mîdịghe ye se enye edide. Nte nditọ Abasi, nnyịn ikpakam ikere iban̄a ndiwụt mbun̄wụm spirit Abasi emi kpukpru ini. Ndinam oro edi ndibiet Abasi, koro, ti ete, “Abasi edi ima.”
Nte Afo Emeti?
◻ Didie ke Jesus Christ ye Paul ẹwụt nte ima edide n̄wọrọnda?
◻ Ima ifụbeke ufụp ke nso usụn̄ifiọk?
◻ Didie ke ima ‘eme kpukpru n̄kpọ’?
◻ Ntak emi ẹkemede ndidọhọ nte ke ima idibehe ifep ke nsinsi?
◻ Ke ewe usụn̄ iba ke ima adara ye se idide akpanikọ?
[Ekebe ke page 21]
IMA (AGAPE)
Se Enye Mîdịghe Se Enye Edide
1. Ifụbeke ufụp 1. Enyenyene anyanime
2. Inamke inua 2. Ọfọn ido
3. Ikohokede idem 3. Adadara se idide akpanikọ
4. Inamke n̄kpọ eke mîdotke 4. Ememe kpukpru n̄kpọ
5. Iyomke ufọn esiemmọ 5. Ononịm kpukpru n̄kpọ ke akpanikọ
6. Iyatke esịt 6. Odori enyịn ke kpukpru n̄kpọ
7. Ikamake udu 7. Eme ime ke kpukpru n̄kpọ
8. Idarake se ikwan̄ade
9. Idibehe ifep ke nsinsi
[Ndise ke page 18]
Jehovah ama osụhọde Nebuchadnezzar onịm ke ntak akanamde inua