Buọt Idem Ke Jehovah Ndisu Uduak Esie
“Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.”—PSALM 37:29.
1. Nso idi uduak Jehovah kaban̄a mme owo ye isọn̄ emi?
KE INI Jehovah okobotde akpa ete ye eka nnyịn, Adam ye Eve, enye ama anam mmọ ẹfọn ẹma. Ndien enye okobot mmọ man mmọ ẹkpekeme ndidu uwem ke nsinsi ke isọn̄ emi—edieke mmọ edisụkde ibuot ẹnọ ibet esie. (Genesis 1:26, 27; 2:17) N̄ko-n̄ko, Abasi okonịm mmọ ke n̄kann̄kụk oro ekedide paradise. (Genesis 2:8, 9) Jehovah ọkọdọhọ mmọ ete: “Mbufo ẹtọt, ẹnyụn̄ ẹwak, ẹnyụn̄ ẹyọhọ ke isọn̄, ẹnyụn̄ ẹkan enye.” (Genesis 1:28) Ntem, ke akpatre nditọ mmọ ẹkpeyọhọ ofụri isọn̄, ndien ekondo emi akpakabade edi paradise emi ọyọhọde ye mfọnmma, mme okop inemesịt ubonowo. Nso eti ntọn̄ọ ke ubonowo ekenyene ntem! “Abasi okụt kpukpru se enye akanamde, ndien, sese ẹfọn etieti.”—Genesis 1:31.
2. Mme idaha mbubehe owo ẹdemede mme mbụme ewe?
2 Edi, idaha oro mme mbubehe owo ẹdude ke ediwak tọsịn isua ibietke akpa uduak Abasi ndomo esisịt. Ubonowo ada ata nsannsan ọkpọn̄ mfọnmma onyụn̄ anana inemesịt ofụri ofụri. Mme idaha ererimbot ẹtie mfụhọ mfụhọ, ndien nte ẹkebemde iso ẹtịn̄, mmọ ẹmediọk ke usụn̄ ẹnanade mbiet ke eyo nnyịn. (2 Timothy 3:1-5, 13) Ntre didie ke nnyịn ikeme ndinịm ke akpanikọ nte ke uduak Abasi kaban̄a owo eyesu ke n̄kpet n̄kpet ini iso? Nte ata anyanini n̄kaiso mfụhọ mfụhọ idaha eyebe?
Nso Ikedi Mfịna?
3. Ntak emi Jehovah mîketreke nsọn̄ibuot ubonowo ke ndondo oro?
3 Mbon ẹmi ẹnyenede nnennen ifiọk eke Ikọ odudu spirit Abasi ẹfiọk ntak emi Jehovah ayakde mme idiọk idaha ẹmi ẹdu ke isọn̄. Mmọ n̄ko ẹfiọk se enye edinamde aban̄a mmọ. Otode ke mbụk Bible, mmọ ẹmekpep nte ke akpa ete ye eka nnyịn ẹma ẹda utịbe utịbe enọ ifụre umek n̄kpọ oro Abasi ọkọnọde owo ẹnam n̄kpọ ke ukwan̄ usụn̄. (Men 1 Peter 2:16 domo.) Mmọ ke ukwan̄ usụn̄ ẹma ẹmek usụn̄ edida ke idem n̄kpọn̄ Abasi. (Genesis, ibuot 2 ye 3) Nsọn̄ibuot mmọ ama edemerede ikpọ mbụme, utọ nte: Nte Andikara Ekondo enyene unen ndikara owo? Nte ukara esie edi mfọnn̄kan ọnọ mmọ? Nte ukara owo ekeme ndikụt unen ye unana Abasi ndise enyịn? Eti usụn̄ ndinyene mme ibọrọ nnọ mme mbụme ẹmi ekedi ndiyak mme owo ẹkara ke ediwak isua ikie. Mme utịp ẹdude ẹwụt ke usụn̄ oro eyịghe mîdụhe m̀mê mme owo ẹkeme ndikụt unen ke ẹsiode Andinam mmọ ẹfep.
4, 5. (a) Owo ndisịn ukara Abasi osụn̄ọ ke nso? (b) Nso ke ini oro ebede owụt ke usụn̄ oro eyịghe mîdụhe?
4 Ke ini Adam ye Eve ẹkekpọn̄de Abasi, enye ikonịmke mmọ aba ke idaha mfọnmma. Ye unana un̄wam esie, mmọ ẹma ẹtọn̄ọ ndikpa mmọn̄. Utịp ekedi unana mfọnmma, usọn̄, ye n̄kpa ke akpatre. Ebede ke ibet ubon, akpa ete ye eka nnyịn ẹma ẹkpọn̄ ndiọi edu ẹmi ẹnọ kpukpru nditọ mmọ, ọkọrọ ye nnyịn. (Rome 5:12) Ndien nso kaban̄a utịp eke ediwak tọsịn isua ukara owo? Enye akama afanikọn̄, ukem nte Ecclesiastes 8:9 (NW) ọdọhọde nte enende ete: “Owo amakara owo tutu ọnọ unan.”
5 Ini oro ebede owụt ke usụn̄ oro eyịghe mîdụhe nte ke owo inyeneke ukeme ndise mban̄a mme mbubehe mmọ uforo uforo ke esiode Andibot mmọ efep. Jeremiah andiwet Bible eke odudu spirit ọkọdọhọ ete: “O Jehovah, mmọfiọk nte ke usụn̄ owo idụhe owo ke ubọk: owo eke asan̄ade inyụn̄ ikemeke ndinen̄ede ikpat esiemmọ.”—Jeremiah 10:23; Deuteronomy 32:4, 5; Ecclesiastes 7:29.
Uduak Abasi Ikpụhọkede
6, 7. (a) Nte ediwak tọsịn isua eke mbụk ẹkpụhọde uduak Jehovah? (b) Nso isịne ke uduak Jehovah?
6 Nte ediwak tọsịn isua ẹmi ẹbede ke mbụk owo—oro ẹyọhọde ye ndiọi ido ye ndutụhọ—ẹma ẹkpụhọde uduak Abasi? Ikọ esie ọdọhọ ete: “Emi edi uyo Jehovah andibot enyọn̄; enye edi Abasi emi obotde isọn̄, onyụn̄ anamde enye; enye owụk enye, ibotke enye ke ikpîkpu, obot enye man ẹdụn̄ ke esịt.” (Isaiah 45:18) Ntre Abasi okobot isọn̄ ọnọ mme owo ndidụn̄, ndien oro osụk ededi uduak esie.
7 Jehovah ikobotke isọn̄ n̄kukụre man ẹdụn̄ ke esịt edi n̄ko ekedi uduak esie nte enye akabade edi paradise emi mfọnmma, mme okop inemesịt owo ẹdarade. Oro edi ntak emi Bible etịn̄de ete ke “obufa isọn̄” eyedu, kpa obufa n̄kaowo, emi ‘edinen ido edidụn̄de.’ (2 Peter 3:13) Ndien ke Ediyarade 21:4, Ikọ Abasi etịn̄ ọnọ nnyịn ete ke obufa ererimbot esie, “enye eyekwọhọde kpukpru mmọn̄eyet ke enyịn [ubonowo] efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba.” Utọ mme ntak ẹmi ẹkenam Jesus ekeme nditịn̄ mban̄a obufa ererimbot oro edide ke isọn̄ nte “Paradise.”—Luke 23:43.
8. Ntak emi nnyịn ikemede ndinịm ke akpanikọ nte ke Jehovah eyesu uduak esie?
8 Sia Jehovah edide Andibot ekondo emi enyenede odudu akan onyụn̄ enyenede ọniọn̄ akan, owo ndomokiet ikemeke ndibiọn̄ọ uduak esie. “Jehovah mme udịm ọmọn̄wọn̄ọ, ete, Iditreke ndiwọrọ kpa nte n̄kekerede; onyụn̄ osu kpa nte n̄kaduakde.” (Isaiah 14:24) Ntem, ke ini Abasi ọdọhọde ete ke iyenam isọn̄ emi edi paradise emi mme mfọnmma owo ẹdụn̄de, oro edi se ididade itie. Jesus ọkọdọhọ ete: “Ọfọfọn ọnọ mmọ eke ẹnyenede ifụre ifụre ido: koro mmọ ẹyeda isọn̄ ẹnyene.” (Matthew 5:5; men Psalm 37:29 domo.) Nnyịn imekeme ndinịm ke akpanikọ nte ke un̄wọn̄ọ oro eyesu. Ke akpanikọ, nnyịn imekeme ndiyak uwem nnyịn ofụri ofụri nnọ ke enye.
Mmọ Ẹma Ẹbuọt Idem ke Jehovah
9. Nso ke Abraham akanam ndiwụt mbuọtidem esie ke Jehovah?
9 Ediwak owo ẹmi ẹkebakde Abasi ke ofụri mbụk ẹma ẹyak uwem mmọ ẹnọ uduak Abasi kaban̄a isọn̄ koro mmọ ẹma ẹnịm ke akpanikọ nte ke enye eyenam uduak oro osu. Okposụkedi ekemede ndidi mmọ ẹkenyene esisịt ifiọk, mmọ ẹma ẹbuọt idem ke Abasi ẹnyụn̄ ẹbọp uwem mmọ ẹkanade edinam uduak esie. Ke uwụtn̄kpọ, Abraham ama odu, emi okodude uwem ke n̄kpọ nte isua 2,000 mbemiso Jesus ekedide isọn̄—anyanini mbemiso ẹketọn̄ọde ndiwet Bible. Enye ama ọbuọt idem ke Jehovah ndisu mme un̄wọn̄ọ Esie. Anaedi Abraham ama ekpep aban̄a Andibot oto anam akpanikọ eteete esie Shem, emi ọkọbọde ukpep oto Noah. Ntre ke ini Abasi ọkọdọhọde Abraham ọkpọn̄ enyene uforo Ur mme Chaldee aka enyene ndịk isọn̄ Canaan oro enye mîkọfiọkke, ete ekpụk oro ama ọfiọk ke imọ imekeme ndibuọt idem ke Jehovah, ndien ke ntre enye ama aka. (Mme Hebrew 11:8) Nte ini akade, Jehovah ama ọdọhọ enye ete: “Nyenam fi akabade edi akamba idụt.”—Genesis 12:2.
10, 11. Ntak emi Abraham okonyịmede ndiwa ikpọn̄îkpọn̄ eyen esie, Isaac?
10 Nso ikotịbe ke ini Isaac ama akamana ọnọ Abraham? Jehovah ama owụt Abraham nte ke ubon esie edikabade edi akamba idụt ebe ke Isaac. (Genesis 21:12) Ntem, anaedi ama etie nte ntuaha odu ke ini Jehovah ọkọdọhọde Abraham, nte idomo mbuọtidem, ete awa eyen esie Isaac. (Genesis 22:2) Edi, ye ọyọhọ mbuọtidem ke Jehovah, Abraham ama ọtọn̄ọ ndinam n̄kpọ mban̄a oro, enen̄ede emenede ikwa esie ndiwot Isaac. Ke akpatre ifet oro, Abasi ama ọdọn̄ angel akpan Abraham.—Genesis 22:9-14.
11 Ntak emi Abraham okosụkde ibuot ntre? Mme Hebrew 11:17-19 owụt ete: “Oto mbuọtidem Abraham awa Isaac ke uwa, ke ini Abasi odomode enye ese; n̄kọm enye, emi ọkọbọde mme un̄wọn̄ọ ke idatesịt, ọmọn̄ ediwa ikpọn̄îkpọn̄ eyen esie; kpa Abraham, emi ẹketịn̄de ẹnọ enye ẹte, Edikot ubon fo ke Isaac: sia okonịm ete, Abasi ekeme ndisio enye ke otu mme akpan̄kpa nnam enye eset; ndien ke ido n̄ke, enye okonyụn̄ ọtọn̄ọ ntak ọbọ enye ke n̄kpa ada.” N̄wed Mbon Rome 4:20, 21 ke ukem usụn̄ oro ọdọhọ ete: “Edi mbuọtidem ibọhọke [Abraham]: enye owụk enyịn ese un̄wọn̄ọ Abasi, inyụn̄ iyịkke ke unana mbuọtidem, . . . otịm obụre ọfiọk ete, Abasi ekeme n̄ko ndinam se Enye ọkọn̄wọn̄ọde.”
12. Didie ke ẹkenọ Abraham utịp mbuọtidem esie?
12 Ẹma ẹnọ Abraham utịp mbuọtidem esie idịghe n̄kukụre ke ndikanyan̄a Isaac ye ke ndikenyene “akwa idụt” emi okotode enye ọwọrọ edi n̄ko ke usụn̄ en̄wen. Abasi ama ọdọhọ Abraham ete: “Kpukpru mme idụt ke ererimbot ẹyenyụn̄ ẹkụt mfọn eke otode ke ubon fo, koro afo ama okokop uyo mi.” (Genesis 22:18) Didie? Edidem Obio Ubọn̄ Abasi eke heaven edito ke udịm ubon Abraham. Obio Ubọn̄ oro eyenuak idiọk ererimbot emi odude ke idak Satan ofụri ofụri. (Daniel 2:44; Rome 16:20; Ediyarade 19:11-21) Ndien, ke ererimbot oro ẹnamde asana ke idak ukara Obio Ubọn̄, ẹyetat Paradise ẹsịm ofụri ererimbot, ndien ke “kpukpru mme idụt” mme owo ẹmi ẹnamde uduak Abasi ẹyedara mfọnmma nsọn̄idem ye uwem ke nsinsi. (1 John 2:15-17) Ndien okposụkedi Abraham ekenyenede ukeuke ifiọk kpọt aban̄a Obio Ubọn̄ oro, enye ama ọbuọt idem ke Abasi onyụn̄ owụk enyịn ese ini emi ediwụkde enye.—Mme Hebrew 11:10.
13, 14. Ntak emi Job ọkọbuọtde idem ye Abasi?
13 Ke ediwak isua ikie ke ukperedem, Job ama odu, emi okodude uwem ke ufan̄ ọyọhọ isua ikie 17 ye 16 M.E.N. ke se ẹdiọn̄ọde idahaemi nte Arabia. Enye n̄ko ama odu uwem mbemiso ẹketọn̄ọde ndiwet Bible. Job “ọfọn ama, onyụn̄ enen, onyụn̄ abak Abasi, onyụn̄ afara ke idiọk.” (Job 1:1) Ke ini Satan ọkọtọde Job ata idiọk, akama ubiak udọn̄ọ, anam akpanikọ owo oro “iketịn̄ke baba idiọk ikọ kiet” ke ofụri ini ndutụhọ esie oro. (Job 2:10, The New English Bible) Job ama ọbuọt idem ke Abasi. Ndien ke adan̄aemi enye mîkọfiọkke ọyọhọ ọyọhọ ntak emi enye ọkọbọde utọ akwa ndutụhọ oro, enye ama ayak uwem esie ọnọ Abasi ye mme un̄wọn̄ọ Esie.
14 Job ama ọfiọk ete idem ke edieke imọ ikpade, ke usen kiet Abasi ekeme ndinam imọ ifiak ididu uwem ebe ke ediset ke n̄kpa. Enye ama owụt idotenyịn emi ke ini enye ọkọdọhọde Jehovah Abasi ete: “Afo akpakam odịp mi ke obio ekpo [udi], . . . onyụn̄ odori mi ini, ndien eti mi! Ke owo akpade, nte enye ediset? . . . Afo okpokot, ndien ami n̄kpeyere fi.” (Job 14:13-15) Okposụkedi okodude ke ọkpọsọn̄ ubiak, Job ama owụt mbuọtidem esie ke itie edikara Jehovah, ọdọhọde ete: “Ndisioho mfọnmma ke idem mi mfep tutu ndikpa.”—Job 27:5.
15. Didie ke David okowụt mbuọtidem esie ke uduak Jehovah?
15 Ke n̄kpọ nte isua ikie itiokiet ke Job ama akakpa ye n̄kpọ nte tọsịn isua kiet mbemiso Jesus ekedide isọn̄, David ama owụt mbuọtidem esie ke obufa ererimbot. Enye ọkọdọhọ ke mme psalm ete: “Mmọ eke ẹbetde Jehovah ẹyeda isọn̄ ẹnyene. Koro osụk esisịt idiọk owo ididụhe . . . Edi mbon nsụkidem ẹyeda isọn̄ ẹnyene; ediwak emem eyenyụn̄ enem mmọ esịt. Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.” Ke ntak ọkpọsọn̄ idotenyịn esie, David ama akpak ete: “Buọt idem ye Jehovah . . . Yak Jehovah onyụn̄ adat fi esịt; ndien enye eyenọ fi se esịt fo oyomde.”—Psalm 37:3, 4, 9-11, 29.
16. Nso idotenyịn ke ‘otu ntiense’ ẹkenyene?
16 Ke ofụri ediwak isua ikie ẹmi ẹbede, mme anam akpanikọ iren ye iban ẹmenyene ukem idotenyịn emi ẹban̄a nsinsi uwem ke isọn̄. Ke akpanikọ, mmọ ẹdi ‘otu ntiense’ ẹmi ke ataata usụn̄ ẹyakde uwem mmọ ẹnọ mme un̄wọn̄ọ Jehovah. Ẹma ẹtụhọde ẹnyụn̄ ẹwot ediwak ke otu Mme Ntiense Jehovah eke usen edem ẹmi ke ntak mbuọtidem mmọ, “man mmọ ẹkpenyene ediset ke n̄kpa eke ọfọnde akan.” Didie ke edi ntre? Ke obufa ererimbot, Abasi eyenọ mmọ ediset ke n̄kpa oro ọfọnde akan ye idotenyịn nsinsi uwem nte utịp.—John 5:28, 29; Mme Hebrew 11:35; 12:1.
Mme Christian Ntiense Ẹbuọt Idem ke Abasi
17. Mbuọtidem eke mme Christian akpa isua ikie ke Jehovah ọkọsọn̄ adan̄a didie?
17 Ke akpa isua ikie E.N., Jehovah ama ayarade ata ọyọhọ ọyọhọ ntọt aban̄ade Obio Ubọn̄ oro ye ukara esie ke isọn̄ ọnọ obufa esop Christian oro ọkọtọn̄ọde. Ke uwụtn̄kpọ, spirit esie ama ọnọ apostle John odudu ndiwet nte ke ibat oro ẹdibuanade ye Jesus Christ ke Obio Ubọn̄ eke heaven ẹdidi 144,000. Mmọemi ẹdidi mme anam akpanikọ asan̄autom Abasi ẹmi ẹma “ẹkefak mmọ ẹsio ke otu owo.” (Ediyarade 7:4; 14:1-4) Mmọ ẹyekara isọn̄ “nte ndidem” ye Christ ke heaven. (Ediyarade 20:4-6, NW) Mme Christian eke akpa isua ikie ẹma ẹnen̄ede ẹbuọt idem ke Jehovah ndisu un̄wọn̄ọ esie kaban̄a Obio Ubọn̄ eke heaven ye ikpehe ukara esie eke isọn̄ tutu mmọ ẹnyịme ndikpa kaban̄a mbuọtidem mmọ. Ediwak mmọ ẹma ẹnam kpa oro.
18. Didie ke Mme Ntiense Jehovah mfịn ẹkpebe nsan̄a mmọ eke eset?
18 Mfịn, se ikperede ndisịm Mme Ntiense Jehovah miliọn ition ẹnyene ukem mbuọtidem oro ke Abasi kpa nte mme nsan̄a mmọ ẹmi ẹkedude uwem ke ediwak isua ikie mbemiso mmọ, ẹkenyenede. Mme Ntiense eke eyomfịn ẹmi n̄ko ẹyak uwem mmọ ofụri ofụri ẹnọ mme un̄wọn̄ọ Abasi. Mmọ ẹyak uwem mmọ ẹnọ enye ẹnyụn̄ ẹnyene ofụri Bible ndisọn̄ọ mbuọtidem mmọ. (2 Timothy 3:14-17) Mme Ntiense Jehovah eke eyomfịn ẹmi ẹkpebe mme anditiene Jesus eke akpa isua ikie ẹmi ẹketan̄ade ete ke mmimọ “inyene ndikop uyo Abasi n̄kan uyo owo.” (Utom 5:29) Ke isua ikie emi ediwak ke otu mme Christian Ntiense ẹmi ẹsobo ibak ibak ukọbọ. Ẹma ẹkam ẹwot ndusụk mmọ ke ntak mbuọtidem mmọ. Mmọ eken ẹma ẹkpan̄a ẹto udọn̄ọ, mbabuat n̄kpọntịbe, m̀mê usọn̄. Nte ededi, ukem nte mme anam akpanikọ Ntiense eke eset, mmọ ẹbuọt idem ke Abasi koro ẹfiọkde ẹte ke enye eyenam mmimọ inyene uwem ke obufa ererimbot esie ebe ke ediset ke n̄kpa.—John 5:28, 29; Utom 24:15; Ediyarade 20:12, 13.
19, 20. Nso ke nnyịn ifiọk iban̄a prọfesi Bible aban̄ade eyo nnyịn?
19 Mme Ntiense Jehovah ẹfiọk ẹte ke ndida mmọ nto kpukpru idụt ndisịn ke otu nditọete ofụri ererimbot edi se ẹkebemde iso ẹtịn̄ anyanini ko ke prọfesi Bible. (Isaiah 2:2-4; Ediyarade 7:4, 9-17) Ndien Jehovah ọdọn̄ mmọ ndinam utom ukwọrọikọ ke ofụri ererimbot man ẹtan̄ mbon esịt akpanikọ efen efen ẹdibok ẹnọ mfọn ye ukpeme esie. (Mme N̄ke 18:10; Matthew 24:14; Rome 10:13) Kpukpru mmọemi ẹnyene ọyọhọ mbuọtidem ke Jehovah, ẹfiọkde ẹte ke mîbịghike enye eyeda utịbe utịbe obufa ererimbot esie edi.—Men 1 Corinth 15:58; Mme Hebrew 6:10 domo.
20 Mme prọfesi Bible ẹwụt nte ke ererimbot Satan odu ke akpatre ini esie ke se ikperede isua 80 idahaemi, ọtọn̄ọde ke akpan isua oro 1914. Ererimbot emi emekpere utịt esie. (Rome 16:20; 2 Corinth 4:4; 2 Timothy 3:1-5) Mme Ntiense Jehovah ke ntem ẹsọn̄ esịt koro mmọ ẹfiọk ẹte ke ibịghike Obio Ubọn̄ Abasi eyekara kpukpru mbubehe ke isọn̄. Ebede ke ndida idiọk ererimbot emi odude kemi n̄kosịm utịt nnyụn̄ nda edinen obufa ererimbot esie ndi, Abasi eyesio idiọk idaha oro odude ke isọn̄ ke ata ediwak isua ikie efep ofụri ofụri.—Mme N̄ke 2:21, 22.
21. Ntak emi nnyịn ikemede ndidat esịt kpa ye mme mfịna eke idahaemi?
21 Ekem, ke nsinsi nsinsi, Abasi eyewụt ntotụn̄ọ edikere mban̄a oro enye ekerede aban̄a nnyịn ebe ke ndin̄wan̄a mme edidiọn̄ ẹmi owo mîdikemeke ndimen ndomo ye unan ekededi emi nnyịn ikadade ke ini edem ọnọ nnyịn. Ata ediwak nti n̄kpọ ẹyetịbe ẹnọ nnyịn ke obufa ererimbot oro edinamde nnyịn ifre iban̄a n̄kani mfịna nnyịn. Ọnọ ndọn̄esịt didie ntem ndifiọk nte ke adan̄aoro Jehovah ‘eyetat ubọk esie, onyụn̄ ọnọ kpukpru mme andidu uwem se mmọ ẹmade ẹyụhọ.’—Psalm 145:16; Isaiah 65:17, 18.
22. Ntak emi nnyịn ikpenyenede ndikọn̄ mbuọtidem nnyịn ke Jehovah?
22 Ke obufa ererimbot, anam-akpanikọ ubonowo eyekụt edisu eke N̄wed Mbon Rome 8:21: “Ẹyenyan̄a ekondo ke idemesie nde ẹsio ke itie ufụn mbiara, ẹsịn ke itie eyenisọn̄ emi enyenede ubọn̄ eke nditọ Abasi.” Mmọ ẹyekụt nte ẹsude akam oro Jesus ekekpepde mme anditiene enye ndibọn̄: “Yak ubọn̄ Fo edi; yak inam uduak Fo; nte ẹnamde ke heaven, yak inam ke isọn̄ kpasụk ntre.” (Matthew 6:10) Ntre nyene ọyọhọ mbuọtidem ke Jehovah koro un̄wọn̄ọ esie oro mîkemeke ndikpu edi: “Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.”—Psalm 37:29.
Didie ke Afo Ọkpọbọrọ?
◻ Nso idi uduak Jehovah kaban̄a mme owo ye isọn̄ emi?
◻ Ntak emi Abasi ayakde mme idiọk idaha ẹdu ke isọn̄?
◻ Didie ke mme anam-akpanikọ ke eset ẹkewụt mbuọtidem ke Jehovah?
◻ Ntak emi mme asan̄autom Abasi mfịn ẹbuọtde idem ke Jehovah?
[Ndise ke page 16]
Abasi okobot mme owo ndidu uwem ke nsinsi ke inemesịt ke paradise isọn̄
[Ndise ke page 18]
Abraham ama ọkọn̄ mbuọtidem esie ke ukeme Jehovah ndinam mme akpan̄kpa ẹset