Didie ke Owo Ekeme Ndidu ke Mbiet Abasi?
“ABASI obot owo esịn ke mbiet esiemmọ, ke mbiet Abasi ke obot enye; eren ye n̄wan ke obot mmọ.” Ntre ke n̄wetnnịm n̄kpọ eke odudu spirit ọdọhọ, edi nso ke emi ọwọrọ? Didie ke ẹkebot akpa eren ye n̄wan ke mbiet Abasi?—Genesis 1:27.
Nte mmọ ẹkebiet Abasi ke ikpọkidem? Baba, oro ikemeke nditịbe. Owo edi owo, eke obụk, ẹnamde man odu uwem ke isọn̄. Abasi edi spirit, odụn̄de ke ubọn̄ eke heaven oro owo mîkemeke ndikekere mban̄a emi owo ndomokiet mîkemeke ndikam nsan̄a n̄kpere. (Exodus 33:18-20; 1 Corinth 15:50) Didie, ndien, ke ẹkenam owo ke mbiet Abasi? Edi ke nte ẹkenọde owo ukeme ndiwụt mme n̄wọrọnda edu Abasi—ima, unenikpe, ọniọn̄, ye odudu—ọkọrọ ye mme edu eken.
Mme Edu Jehovah
Mme edu Jehovah Abasi ẹwụt idem ke kpukpru edibotn̄kpọ esie, edi ẹma ẹwụt mmọ ke ndyọ ndyọ usụn̄ ke mme edinam esie ye akpa owo iba oro, Adam ye Eve. (Rome 1:20) Ẹma ẹkụt ima esie ke enye ndikobot isọn̄ enen̄ede odot ọnọ owo ndidụn̄ ke esịt. Jehovah ama obot mfọnmma an̄wanndọ ọnọ owo man edi nsan̄a esie ye eka nditọ esie. Enye ama onịm mmọ mbiba ke ediye in̄wan̄ onyụn̄ ọnọ mmọ kpukpru n̄kpọ oro ẹyomde barasuene man ẹkaiso ndidu uwem ẹnyụn̄ ẹkop inemesịt. Ke edide utịben̄kpọ akan, Abasi ama ọnọ mmọ ifet ndidu uwem ke nsinsi.—Genesis 2:7-9, 15-24.
Ẹma ẹkụt ọniọn̄ Abasi ke udomo oro enye okodomode akpa owo iba oro. Edieke akanade mmọ ẹkaiso ẹdu nte mme andibuana ke ubon ofụri ererimbot Jehovah onyụn̄ edieke mmọ ẹkeyomde ndidu uwem ke nsinsi nte ete ye eka orụk owo, ama oyom mmọ ẹdi uwụtn̄kpọ ke edinam akpanikọ ye utuakibuot akpanikọ. Ntem, Jehovah ama ọnọ mmọ ifet ndiwụt idaha esịt mmọ ke idak udomo oro odotde—ikanaha mmọ ẹdia eto ifiọk eti ye idiọk. Okowụt ọniọn̄ ke n̄kan̄ Jehovah didie ntem ndiyak mme owo ẹwụt nsụkibuot ye ima oro mmọ ẹnyenede ẹnọ enye mbemiso ọnọde mmọ mme utịbe utịbe ifet oro enye ekenyenede ke ekikere!
Ẹma ẹkụt unenikpe Abasi ke enye ndisọn̄ọ nyom n̄kokon̄ idaha nto mme edibotn̄kpọ esie ye ke enye nditre ndikpọn̄ mme idaha oro. Ẹkekụt emi ke enye ndinọ Adam ye Eve kpukpru ifet ndinam se inende. Ndien ke ini mmọ ẹkekpude ndinam ntre, ẹma ẹkụt unenikpe esie ke enye ndibiere mmọ ẹbọ ufen oro ẹkenịmde ẹnọ nsọn̄ibuot.
Ẹma ẹkụt odudu Jehovah ke enye ndinam ubiereikpe esie. Ikọ Satan, akwa ọsọn̄ibuot, ọkọwọrọ nte ke Jehovah ekedi osu nsu, ndien Satan ama ọn̄wọn̄ọ ndinọ Eve ikpọ n̄kpọ edieke enye ọsọn̄de ibuot ye Abasi. (Genesis 3:1-7) Edi Satan ikekemeke ndisu un̄wọn̄ọ esie. Enye ikekemeke ndikpan Jehovah ndibịn Adam ye Eve mfep ke in̄wan̄ Eden, enye ikonyụn̄ ikemeke ndikpan ikọ oro Abasi eketịn̄de ọnọ Adam ndisu: “Koro afo edide ntan, eyenyụn̄ afiak ke ntan.” (Genesis 3:19) Nte ededi, Jehovah ikanamke n̄kpọ iban̄a ubiereikpe n̄kpa oro inikiet inikiet, ndien ke emi enye ama akaiso owụt ima esie. Enye ama ọnọ Adam ye Eve ini ndinyene nditọ man ke akpatre ẹkpeyọhọ akpa uduak esie kaban̄a ubonowo ebe ke mmọ.—Genesis 1:28.
Ke akpatre, unenikpe, ima, odudu, ye ọniọn̄ Jehovah Abasi ẹma ẹwụt idem ke un̄wọn̄ọ esie ndinọ mfri emi edisobode mme utom Satan onyụn̄ abiat mme mfụhọ mfụhọ utịp akpa nsọn̄ibuot oro ẹkesọn̄de ye itie edikara Abasi. (Genesis 3:15) Nso utịbe utịbe Andibot ke nnyịn inyene ntem!
Mme Ukeme Ndikpebe Abasi
Okposụkedi mîdịghe mfọnmma aba, mme owo ẹkeme ndisụk n̄wụt mme edu Abasi. Ntem, Paul ama esịn udọn̄ ọnọ mme Christian eyo esie ete: “Ẹdi mme andikpebe Abasi, nte ndima nditọ.” (Ephesus 5:1) Nte ededi, ke ofụri mbụk, ata ediwak owo ẹmewụt akwa unana ukpono ẹnọ mme edu Abasi. Etisịm eyo Noah, mme owo ẹma ẹnen̄erede ẹbiara tutu Jehovah ebiere ndisobo kpukpru ubonowo mfep ke mîbọhọke Noah ye ubon esie. Noah ama “enen onyụn̄ ọfọn ama ke eyo esie,” ndien enye ama owụt ima oro enye akamade Abasi ebe ke ndinam mme ewụhọ Abasi. “Noah anam kpukpru se Abasi eketemede enye, ntem ke enye anam.” (Genesis 6:9, 22) Noah ama owụt ima oro enye akamade ekemmọ owo ye edisọn̄ọ nyịre oro enye ọkọsọn̄ọde eyịre ke unenikpe ebe ke enye ndidi “ọkwọrọ edinen ido.” (2 Peter 2:5) Enye ama owụt ọniọn̄ onyụn̄ ada odudu esie anam n̄kpọ nte enende ebe ke nditiene ndausụn̄ Abasi ndibọp akwa ubom, ndidọn̄ udia ke esịt, nditan̄ unam mbok, ndinyụn̄ ndụk ubom ke ini Jehovah ọkọnọde uyo. Enye n̄ko ama owụt ima oro enye akamade edinen ido ke nditre ndiyak ndiọi mbọhọidụn̄ esie ẹbiat enye.
Bible etịn̄ aban̄a ediwak owo efen ẹmi ukem ntre ẹkewụtde mme edu Abasi. Ebeiso ekedi Jesus Christ, emi okodude ke mbiet Abasi ke mfọnmma usụn̄ ndien ke ntem ekekemede ndidọhọ ete: “Owo eke okokụtde Mi okokụt Ete.” (John 14:9) Ke otu mme edu oro Jesus okowụtde, n̄wọrọnda ekedi ima esie. Ima oro enye akamade Ete esie ye ubonowo okonụk enye ndikpọn̄ ebietidụn̄ esie ke heaven nnyụn̄ ndidu uwem nte owo ke isọn̄. Emi ama onụk enye ndinọ Ete esie ubọn̄ ebe ke edinen ido esie nnyụn̄ n̄kwọrọ eti mbụk edinyan̄a nnọ ubonowo. (Matthew 4:23; John 13:31) Ekem, ima ama onụk Jesus ndiwa mfọnmma uwem esie kaban̄a edinyan̄a ubonowo ndien, ke edide akpan n̄kpọ akan, kaban̄a edinam enyịn̄ Abasi asana. (John 13:1) Ke ndidomo ndikpebe Abasi, nte odu mfọnn̄kan uwụtn̄kpọ ekededi nditiene akan Jesus Christ?—1 Peter 2:21.
Didie ke Nnyịn Ikeme Nditịm Mbiet Abasi Mfịn?
Didie ke nnyịn, mfịn, ikeme ndiwụt mme edu Abasi ndien ke ntem inam n̄kpọ ke mbiet Abasi? Ọfọn, akpa kan̄a kere ban̄a edu ima. Jesus ọkọdọhọ ete: “Ma Jehovah Abasi fo ke ofụri esịt fo, ye ke ofụri ukpọn̄ fo, ye ke ofụri ekikere fo.” Didie ke nnyịn iwụt ima oro imade Abasi? Apostle John ọbọrọ ete: “Ndima Abasi edi emi, ete, nnyịn inịm mbet Esie; ndien mbet Esie ibiakke owo idem.”—Matthew 22:37; 1 John 5:3.
Nte ededi, man inịm mbet Jehovah, ana nnyịn ifiọk mmọ. Oro abuana edikot, edikpep, ye editie n̄kere Ikọ Abasi, kpa Bible, ye mme n̄wed Bible. Ukem nte andiwet psalm, nnyịn ikpenyene ndikeme ndidọhọ nte: “Mmama ido fo didie! enye ke ntie n̄kere ofụri usen.” (Psalm 119:97) Nte nnyịn ifiọkde Ikọ Abasi enen̄ede otụn̄ọ akan, nnyịn ikabade iyọhọ ye usụn̄ ukere n̄kpọ Abasi. Nnyịn idi idima edinen ido inyụn̄ isua ukwan̄ido. (Psalm 45:7) Oro edi ebiet emi Adam ekeduede. Enye ama ọfiọk ibet Jehovah, edi enye ikamaha enye ikem ndisọn̄ọ nyịre ke enye. Ke ini ikotde Ikọ Abasi, nnyịn ikpenyene ndibụp idem nnyịn kpukpru ini, ‘Didie ke emi ebehe mi? Nso ke n̄keme ndinam man nnam edu mi otịm odu ke n̄kemuyo ye mme edu Abasi?’
Jesus ọkọdọhọ n̄ko ete: “Ma mbọhọidụn̄ fo nte idem fo.” (Matthew 22:39) Kpukpru owo oro okopde nsọn̄idem ama idemesie onyụn̄ oyom mfọnn̄kan n̄kpọ ọnọ idemesie. Oro ikwan̄ake. Edi nte nnyịn imowụt ukem ima oro inọ mbọhọidụn̄ nnyịn? Nte nnyịn imetiene item Bible oro: “Kûsịn ndida eti n̄kpọ nnọ mmọ eke ẹkpenyenede enye, ke ini ubọk fo ekemede ndinam”?—Mme N̄ke 3:27; Galatia 6:10.
Nso kaban̄a edu ọniọn̄? Nnyịn ndiyom ndiwụt edu emi anam nnyịn ikpep Bible koro oro edi ebiet emi ẹkemede ndikụt ọniọn̄ Abasi. Psalm 119:98-100 okot ete: “Ibet fo ẹnam mi mfiọk n̄kpọ n̄kan mme asua mi: koro enye edide okịm ke nsinsi. Ndi ọniọn̄ n̄kan kpukpru mmọemi ẹtemede mi; koro uyo fo edide se ntiede n̄kere. Ndi asian n̄kan mbiowo, koro nnịmde item fo.” Ke Mme N̄ke 3:18, ẹtịn̄ ẹban̄a ọniọn̄ nte “eto uwem.” Edieke nnyịn inyenede ọniọn̄ inyụn̄ idade enye isịn ke edinam, nnyịn iyebọ unyịme Abasi ye utịp nsinsi uwem.—Ecclesiastes 7:12.
Nso kaban̄a unenikpe? Ke idiọk ererimbot emi, unenikpe edi akpan edu ọnọ mbon oro ẹyomde ndinem Abasi esịt. Jesus ama ama edinen ido (unenikpe) onyụn̄ asua ukwan̄ido. (Mme Hebrew 1:9) Mme Christian mfịn ẹnam ukem ntre. Unenikpe onụk mmọ ndima ndinen edu. Mmọ ẹfep mme ukwan̄ usụn̄ ererimbot emi ẹnyụn̄ ẹnam edinam uduak Abasi edi ata akpan n̄kpọ ke uwem mmọ.—1 John 2:15-17.
Adan̄a nte odudu abuanade, kpukpru nnyịn imenyene ndusụk udomo odudu. Nnyịn ke ndammana usụn̄ imenyene odudu ke n̄kan̄ eke obụk ye ifiọk, ndien nte nnyịn ikọride nte mme Christian, nnyịn imenyene odudu ke usụn̄ifiọk eke spirit. Jehovah ada edisana spirit esie anam odudu nnyịn awak tutu osịm udomo oro nnyịn, idem okposụkedi oro etiede nte nnyịn imemem, ikemede ndinam uduak Jehovah. Paul ọkọdọhọ ete: “Mmenyene ukeme ndinam kpukpru n̄kpọ ke odudu Andisọn̄ọ mi idem.” (Philippi 4:13) Ukem odudu oro odu ọnọ nnyịn edieke nnyịn ibọn̄de akam iyom spirit Jehovah.
Ndikwọrọ Eti Mbụk
Ẹtịm ẹkụt ediwụt oro nnyịn iwụtde akpan edu Abasi inan̄ ẹmi ke nnyịn ndinam ewụhọ oro: “Mbufo ẹka ẹkenam kpukpru mme idụt ẹdi mbet Mi, ẹnịm mmọ baptism ẹsịn ke enyịn̄ Ete ye Eyen ye Edisana Spirit: ẹnyụn̄ ẹkpep mmọ ẹnam kpukpru n̄kpọ eke n̄ketemede mbufo: ndien sese, Ami ndodu ye mbufo kpukpru ini, tutu osịm utịt ererimbot.” (Matthew 28:19, 20) Utọ utom unọ ukpep oro ada uwem ọsọk mbon oro ẹnamde n̄kpọ ẹban̄a. Nso edinanam ima n̄wụt ke eti usụn̄ ke emi edi ntem ye mbon oro, ke akamba udomo, ẹdide ata isenowo ye nnyịn!
N̄ko-n̄ko, utọ ukpepn̄kpọ oro edi usụn̄ ọniọn̄. Enye esision̄o mfri oro ebịghide edi. Ewe utom efen ke ẹkeme ndidọhọ ete: “Ke edinam ntem afo eyenyan̄a idemfo ye mmọemi ẹkopde uyo fo”? (1 Timothy 4:16) Idụhe mbon oro ẹsobode ntakurua ke utom edinam mbet. Mbon oro ẹkopde ye mbon oro ẹnọde ukpep ẹbọ mme nsinsi edidiọn̄.
Kaban̄a unenikpe, mme Christian ẹkpep nditọ ukpepn̄kpọ Bible mmọ nti ye ndinen edumbet. Nnyịn in̄wam mmọ ndinam n̄kpọ Jehovah, “Abasi [unen]ikpe.” (Malachi 2:17) Ẹbat mbon oro ẹyakde uwem mmọ mfịn ẹnọ ndinam n̄kpọ Jehovah ẹnyụn̄ ẹkade iso ke edinam akpanikọ ke edinen, nti owo, adade okosụn̄ọ ke mmọ ndibọhọ Armageddon.—Rome 3:24; James 2:24-26.
Nso ediwụt odudu ke edikwọrọ ikọ ye edikpep owo eti mbụk ke ofụri ererimbot edi ntem! (Matthew 24:14) Oyom ime man ẹkaiso ẹkwọrọ ikọ ke mme efakutom ẹmi n̄wakn̄kan ibat owo mîmaha ndikpan̄ utọn̄. Edi Jehovah, ebede ke spirit esie, ọmọnọ odudu oro ẹyomde man ẹme ime tutu osịm akpatre.—Isaiah 40:30, 31; Matthew 24:13; Luke 11:13.
Edi akpanikọ, nte mme anana mfọnmma nditọ Adam, nnyịn ikemeke ndiwụt nti edu emi ke mfọnmma usụn̄. Edi, ti, ẹkenam owo ke mbiet Abasi, ndien edieke nnyịn idomode nditotịm mbiet Abasi, do nnyịn ke ubak ubak usụn̄ ke idu uwem ekekem ye ntak emi nnyịn idude uwem. (Ecclesiastes 12:13) Edieke nnyịn isịn̄ede idem nnyịn ndinam se nnyịn ikemede inyụn̄ iben̄ede iyom edifen ke ini iduede, do nnyịn imekeme ndidot enyịn ndibọhọ mbe ndụk edinen obufa ererimbot Abasi, emi nnyịn ke akpatre ikemede ndisịm mfọnmma. Adan̄aoro, nnyịn iyedu ke paradise isọn̄ oro mme mfọnmma owo ẹdụn̄de, kpukpru owo ẹwụtde mme edu Jehovah Abasi ọyọhọ ọyọhọ. Nso n̄kpọ idatesịt! Ke akpatre, ke ata ọyọhọ usụn̄ifiọk ikọ oro, mme owo ẹyedu ke mbiet Abasi.
[Ndise ke page 25]
Jesus ama owụt nnyịn nte ẹkemede ndikọri mme edu Jehovah
[Ndise ke page 26]
Ke akpatre, mme owo ke ata ọyọhọ usụn̄ifiọk ẹyedu ke mbiet Abasi