Mme Uyen—Ukpepn̄kpọ Anie Ke Mbufo Ẹtiene?
“Owo ẹyefiak edem ẹkpọn̄ mbuọtidem, ẹnyụn̄ ẹkpan̄ utọn̄ ẹnọ . . . ukpepn̄kpọ mme demon.”—1 TIMOTHY 4:1.
1. (a) Nso edimek ke mme uyen ẹnyene? (b) Didie ke Jehovah ọnọ ukpep?
MBỤME oro ẹbụpde mme uyen mi ẹdi, Ukpepn̄kpọ anie ke mbufo ẹtiene? Emi ọnọ ekikere ete ke mbufo n̄kparawa owo ẹnyene ndinam edimek. Edimek oro edi ke ufọt editiene ukpepn̄kpọ Abasi ye editiene ukpepn̄kpọ mme demon. Jehovah ọnọ ukpep ebe ke Ikọ esie, kpa Bible, onyụn̄ ebe ke utom mbon oro enye adade nte mme andida ke ibuot esie ke isọn̄. (Isaiah 54:13; Utom 8:26-39; Matthew 24:45-47) Edi nte idem akpa mbufo nte ke mme demon ẹnọ ukpep n̄ko?
2. Ntak emi edide akpan n̄kpọ ndidu ke ukpeme mbiọn̄ọ ukpepn̄kpọ mme demon akpan akpan ke ini emi?
2 Apostle Paul ekewet ete: “Ke ukperedem ini owo ẹyefiak edem ẹkpọn̄ mbuọtidem, ẹnyụn̄ ẹkpan̄ utọn̄ ẹnọ mme spirit abian̄a ye ukpepn̄kpọ mme demon.” (1 Timothy 4:1) Sia nnyịn idude uwem ke “ukperedem ini” emi Satan ye mme demon esie ẹnen̄erede ẹsịn ifịk, nte mbufo ẹmekụt ntak emi nnyịn ibụpde mbụme emi, Ukpepn̄kpọ anie ke mbufo ẹtiene? (2 Timothy 3:1-5; Ediyarade 12:7-12) Koro Satan ye mme demon esie ẹnyenede n̄kari etieti, ẹtiede etabi etabi ke mme usụn̄ edinam mmọ, edi akpan n̄kpọ ete mbufo ẹnọ mbụme emi akpan ntịn̄enyịn.—2 Corinth 11:14, 15.
Mme Demon ye Mme Ukpepn̄kpọ Mmọ
3. Mmanie ẹdi mme demon, nso idi uduak mmọ, ndien didie ke mmọ ẹyom ndinam emi?
3 Ini kiet ko mme demon ẹkedi mme angel Jehovah, edi mmọ ẹma ẹsọn̄ ibuot ye Andibot mmọ ndien ke ntem ẹkabade ẹdi mme andinọ Satan ibetedem. (Matthew 12:24) Uduak mmọ ẹdi ndibiat mme owo nnyụn̄ n̄wọn̄ọde mmọ n̄kpọn̄ edinam n̄kpọ Abasi. Man ẹnam emi, mme demon ẹda mme andikpep ẹdide owo ndisịn udọn̄ nnọ ibụk ibụk, oburobụt usụn̄uwem oro Jehovah obiomde ikpe. (Men 2 Peter 2:1, 12-15 domo.) Ndifiak ndụn̄ọde nte mme angel oro ẹkenamde akpanikọ ke akpa ẹkekabarede ẹdi mme demon eyen̄wam nnyịn ndifiọk mme ukpepn̄kpọ mmọ ye usụn̄uwem oro mme ukpepn̄kpọ ẹmi ẹsịnde udọn̄ ẹnọ.
4. (a) Ntak emi mme otụt utọn̄ angel ẹkedide isọn̄ ke eyo Noah? (b) Nso ikotịbe inọ ndiọi angel ye nditọ mmọ ke ini Ukwọ?
4 Ke eyo Noah, nditọiban owo ẹma ẹnen̄ede ẹye ndusụk angel tutu mme edibotn̄kpọ eke spirit ẹmi ẹkpọn̄ itie mmọ ke heaven ẹdi isọn̄. Mmọ ndinyene ebuana idan̄ ye iban ama osụn̄ọ ke nditọ mbuaha uduot oro ẹkekotde Nephilim. Sia mîdịghe ndammana n̄kpọ mme edibotn̄kpọ eke spirit ndidụn̄ ye owo nte n̄wan ye ebe, se mme ọsọn̄ibuot angel ẹmi ẹkenamde ye iban oro ọkọdiọk ukem nte edinam idan̄ ukem uduot oro ikpọ iren ye n̄kparawa ẹkenamde ke Sodom. (Genesis 6:1-4; 19:4-11; Jude 6, 7) Okposụkedi nsan̄andọ mme angel oro ọkọrọ ye nditọ mbuaha uduot mmọ ẹkekpan̄ade ke mmọn̄ ukwọ, ndiọi angel oro ẹma ẹfọrọde ikpọkidem owo oro mmọ ẹkemende ẹsịne ẹfep ẹnyụn̄ ẹfiak ẹnyọn̄ọ heaven ke ebiet oro mmọ ẹkekabarede ẹdi mme demon oro ẹdide nsan̄a Satan kpa Devil.—2 Peter 2:4.
5. Nso orụk edibotn̄kpọ ke mme demon ẹdi, ndien didie ke mmọ ẹdomo ndibiat mme ibet Abasi?
5 Ye idaha eke mbụk emi ke ekikere, nte mbufo ẹmekụt orụk edibotn̄kpọ oro mme demon ẹnen̄erede ẹdi? Mmọ ẹdi mbon oburobụt ido idan̄ oro enyịn mîkwe ẹmi ẹkarade ererimbot emi adamade idat unam idan̄ mi. Okposụkedi ẹkekpande mmọ ndifiak mmen idem eke owo nsịne, mme oburobụt ido idan̄ mbon oro mmọ ẹkemede ndibiat ke isọn̄ ẹnam mmọ ẹkop inemesịt. (Ephesus 6:11, 12) Mme demon ẹdomo ndibiat mme ibet Jehovah kaban̄a edisana idaha ye ido uwem ebe ke ndinam mmọ ẹtie ukpan ukpan ẹkaha. Ndiọi angel ẹmi ẹtoro oburobụt ido idan̄ nte edide ndammana usụn̄uwem oro ọnọde inemesịt.
Ndisịn Udọn̄ Nnọ Ukpepn̄kpọ Mme Demon
6. Ntak mîkpanaha idem akpa nnyịn nte ke mme demon ẹsịn udọn̄ ẹnọ mme ukpepn̄kpọ mmọ ke usọ usọ usụn̄?
6 Nte ke mme demon ẹsịn udọn̄ ẹnọ ukpepn̄kpọ mmọ ke usọ usọ usụn̄ ikpenyeneke ndikpa nnyịn idem, sia emi edide usụn̄ oro adausụn̄ mmọ, Satan kpa Devil, akadade ke ndibian̄a Eve. Ti ete ke enye eketịn̄ ikọ ọnọ enye nte n̄kpọ eke enye okoyomde ndinọ un̄wam. Satan okobụp ete, “Nte Abasi ọkọdọhọ ete, Mbufo ẹkûdia baba eto in̄wan̄ ẹmi kiet?” Ekem enye ke n̄kari ama odomo ndisụhọde ukpepn̄kpọ Abasi itie ebe ke ndisian Eve nte ke enye eyenyene ufọn ke ndidia eto oro ẹkekpande do. Devil ama ọn̄wọn̄ọ ete, “Ke usen eke mbufo ẹdiade ke esịt, ndien enyịn mbufo ẹyetara; mbufo ẹyenyụn̄ ẹtie nte Abasi, ẹfiọk eti ye idiọk.” (Genesis 3:1-5) Ntem ẹma ẹtabi Eve, ih ẹbian̄a, ẹsịn ke edisọn̄ ibuot ye Abasi.—2 Corinth 11:3; 1 Timothy 2:13, 14.
7. Nso idi utịp usọ usọ ukpepn̄kpọ mme demon, ndien nso ntọt ke emi ọnọ?
7 N̄ko, ke ndondo emi, ẹmebian̄a ediwak owo. Mme demon ke ata n̄kari n̄kari usụn̄ ẹmesịn udọn̄ ẹnọ oburobụt ido idan̄ tutu ediwak owo oro ẹkesuade enye inikiet ẹkabade ẹma enye. Ke uwụtn̄kpọ, ke ini ọwọrọetop ọnọitem ewetmbụk n̄kpọntịbe kiet ke United States ọkọbọrọde leta kiet ke n̄kpọ aban̄ade mme owo oro mîdọhọ ndọ ndinyene ebuana idan̄, n̄wan emi ekewet ete: “Akananam n̄kekereke ke n̄kpekpụhọde ekikere mi ke n̄kpọ emi, edi ami idahaemi nnịm ke akpanikọ nte ke n̄wan ye eren oro ẹyomde ndidọ ndọ ẹkpenyene ndida utịturua ifan̄ nnam isan̄ ọtọkiet man ẹdomo ẹse nte mmọ ẹkemde ye kiet eken.” Ekem n̄wan emi ama adian do ete: “N̄kemeke ndinịm ke akpanikọ nte ke ami n̄kewet oro!” Enye ikakam inịmke ke akpanikọ ite ke imọ ima itoro edinam use, edi enye ama anam ntre! Nte an̄wan̄ade, ana nnyịn idu ke ukpeme mbak ukpepn̄kpọ mme demon editụk nte nnyịn isede mme edinam oro Abasi obiomde ikpe.—Rome 1:26, 27; Ephesus 5:5, 10-12.
8. (a) Didie ke ẹda ikọ oro “ererimbot” ẹtịn̄ ikọ ke Bible? (b) Anie akara ererimbot, ndien didie ke mme anditiene Jesus ẹkpese ererimbot?
8 Inaha nnyịn ifre ke Satan edi “ọbọn̄ ererimbot emi.” Ke akpanikọ, apostle John ọkọdọhọ ete ke “ofụri ererimbot onyụn̄ esịne ke ubọk andidiọk.” (John 12:31; 1 John 5:19) Edi akpanikọ, Jesus ndusụk ini ama esida ikọ oro “ererimbot” etịn̄ ikọ aban̄a ofụri ubonowo. (Matthew 26:13; John 3:16; 12:46) Nte ededi, ediwak ini enye akada ikọ oro “ererimbot” etịn̄ ikọ aban̄a ofụri ndutịm n̄kaowo oro ọwọrọde ọkpọn̄ ata esop Christian. Ke uwụtn̄kpọ, Jesus ọkọdọhọ ete ke mme anditiene imọ inaha ẹdi “eke ererimbot” (idiọk n̄kaowo) ye nte ke sia mmọ mîdịghe eke ererimbot, ererimbot eyesua mmọ. (John 15:19; 17:14-16) Bible akaiso odụri owo utọn̄ ete ke nnyịn ikpenyene ndifep ẹdikabade ndi mme ufan ererimbot emi Satan akarade.—James 4:4.
9, 10. (a) Nso mme n̄kpọ ererimbot ẹdemerede ukwan̄ udọn̄ idan̄? (b) Didie ke ekeme ndifiọk m̀mê mmanie ẹdu ke edem ukpepn̄kpọ oro mbre unọ idem inemesịt ererimbot ekpepde?
9 Apostle John akakpak ete: “Ẹkûma ererimbot, ye se idude ke ererimbot.” Enye ama ọdọhọ n̄ko ete: “Ofụri ofụri se idude ke ererimbot, mbumek obụkidem, ye mbumek enyịn, ye ikpîkpu ubọn̄ uwem emi, itoho Ete.” (1 John 2:15, 16) Kere ban̄a emi. Nso idu ke ererimbot mfịn oro edemerede idiọk udọn̄, yak idọhọ kaban̄a obukpo ido idan̄? (1 Thessalonica 4:3-5) Nso kaban̄a ekese ikwọ ererimbot? Etubom bodisi California kiet oro esede aban̄a eduuwem mme abiatibet ọkọdọhọ ete: “Ke akpan, ikwọ esikpep ete ke afo unyeneke ndikpan̄ utọn̄ nnọ ete ye eka fo, ye nte ke afo ekpenyene ndidu uwem ke usụn̄ oro oyomde.” Nte afo ọmọfiọk ebiet emi ukpepn̄kpọ oro utọ ikwọ emi ọnọde, otode?
10 Ti ete ke Satan, ke editịm ntịn̄, ọkọdọhọ Eve ete: ‘N̄kpọ atak mbufo. Ẹdu uwem nte mbufo ẹyomde. Ẹbiere se idide eti ye se idide idiọk ẹnọ idem mbufo. Iyomke mbufo ẹkpan̄ utọn̄ ẹnọ Abasi.’ (Genesis 3:1-5) Nte oro idịghe ukem etop oro ẹkụtde ke ediwak ikwọ ererimbot? Edi mme demon idaha ikwọ kpọt inọ ukpep. Mmọ n̄ko ẹda mme edinam unyamurua television, mme ndise senima, ye mme video ẹnọ ukpep. Didie ke edi ntre? Ọfọn, mme usụn̄ unyene nneme ererimbot ẹsiwụt mbre unọ idem inemesịt oro anamde mme ukpepn̄kpọ ido uwem Abasi etie ukpan ukpan. Mmọ ẹsịn udọn̄ ẹnọ edinam use ebe ke ndidori nsọn̄uyo ke enye nnyụn̄ n̄wụt enye nte n̄kpọ oro ẹmade.
11. Ke nditịn̄ ke n̄kan̄ ido uwem, nso ke television esiwak ndikpep?
11 Magazine U.S.News & World Report ọkọdọhọ ete: “Ke 1991, ndutịm usuanetop [U.S.] ita ẹma ẹwụt se iwakde ikan mme edinam idan̄ 10,000 ke mbubịteyo; ke kpukpru edinam oro owụtde ebuana idan̄ ke ufọt mme nsan̄a ẹmi ẹdọde ndọ, ndutịm usuanetop oro ama owụt mme edinam 14 ẹban̄ade idan̄ oro ẹwọrọde ọkpọn̄ ndọ.” Ke ndiwụt se ikande mme edinam obukpo ido idan̄ 9,000 ke mbubịteyo ke isua kiet, nso ke afo ọkpọdọhọ nte television ekpepde? Barry S. Sapolsky, oro akabuanade ke ndiwet ntọt oro “Idan̄ Television ke Mbubịteyo: 1979 ye 1989,” ọdọhọ ete: “Edieke uyen esede TV nte mme owo ẹbuanade ke mbre ima m̀mê in̄wan̄în̄wan̄ ido idan̄ ke ediwak isua, ediwak tọsịn ndise ẹmi ke ediwak isua ẹyekpep mmọ ẹte ke idan̄ edi inem inem n̄kpọ—ye unana utịp ekededi.” Eyịghe ndomokiet idụhe iban̄a emi: Mbre unọ idem inemesịt eke ererimbot esikpep n̄kpri owo ete ke ibet ndomokiet idụhe, nte ke use edi se ẹnyịmede, ye nte ke idiọk utịp ndomokiet idụhe ke ndidu uwem ke usụn̄ oro Abasi obiomde ikpe.—1 Corinth 6:18; Ephesus 5:3-5.
12. Ntak emi mbre unọ idem inemesịt akamade n̄kpọndịk akpan akpan ọnọ mme uyen Christian?
12 Ẹtịm mme ikwọ, ndise senima, mme video, ye television ererimbot man edemede udọn̄ n̄kparawa owo. Mmọ ẹsuan mbukpo ukpepn̄kpọ eke mme demon! Edi nte emi ekpenyene ndikpa owo idem? Kere ban̄a emi. Edieke nsunsu ido ukpono ye mbre ukaraidem ẹdide ubak ererimbot Satan—ndien mmọ nte an̄wan̄ade ẹdi—nte owụt ifiọk ndinịm ke akpanikọ nte ke mbre unọ idem inemesịt oro ererimbot otorode ọbọhọ odudu mme demon? Oyom mbufo mme uyen akpan akpan ẹdu ke ukpeme mbak “ererimbot oro akande mbufo okụk edibọp mbufo esịn ke aku esie.”—Rome 12:2, The New Testament in Modern English, eke J. B. Phillips.
Nam Ndụn̄ọde Idemowo
13. Nso ndụn̄ọde idemowo ke ẹkpenyene ndinam?
13 Idịghe ikọinua fo ikpọn̄ ke ẹda ẹbiere m̀mê ukpepn̄kpọ anie ke afo ẹtiene edi n̄ko mme edinam fo. (Rome 6:16) Ntre bụp idemfo, ‘Nte se n̄kpepde nto mme usụn̄ usuanetop ererimbot akara ido mi ye usụn̄uwem mi nte mîdotke? Nte ukpepn̄kpọ mme demon ke ẹbe ẹdụk uwem mi? Man afo ekeme ndibọrọ mme utọ mbụme ẹmi, ntak mûmenke ini ye ukeme oro afo abiatde ndikpep Bible, ndidụk mme mbonoesop Christian, ye ke nditịn̄ mban̄a Obio Ubọn̄ Abasi nnọ mbon en̄wen udomo ye ini oro abiatde ke ndise TV, ndikpan̄ utọn̄ nnọ ikwọ, ndibuana ke mbre unọ idem inemesịt oro amade akan, m̀mê ndibuana ke mme mbiet edinam ntre? Sia ini okponde ntre—ke akpanikọ, idem uwem fo—odu ke itiendịk, nam ata ndụn̄ọde idemowo.—2 Corinth 13:5.
14. Nso iditụk nsọn̄idem eke spirit nnyịn, ndien nso akpan n̄kpọ ke nnyịn ikpesịn ke ekikere?
14 Afo omotịm ọfiọk ete ke udia obụkidem oro afo adiade eyetụk nsọn̄idem eke obụk fo. Ukem ntre, se afo adade ọbọk ekikere ye esịt fo otụk nsọn̄idem eke spirit fo. (1 Peter 2:1, 2) Ke adan̄aemi afo ekemede ndibian̄a idemfo kaban̄a se idide ata n̄kpọ udọn̄ fo, afo ukemeke ndibian̄a Ebiereikpe nnyịn, Jesus Christ. (John 5:30) Ntre bụp idemfo, ‘Edieke Jesus okpodude ke isọn̄, nte bụt akpanam mi edieke enye ekpebede odụk ufọk mi onyụn̄ okop ikwọ mi m̀mê okụt se ami nsede?’ Ata akpanikọ edi nte ke Jesus ke ese onyụn̄ ọfiọk mme edinam nnyịn.—Ediyarade 3:15.
Biọn̄ọ Ukpepn̄kpọ Mme Demon
15. Ntak emi akpanade mme Christian ẹn̄wana ọkpọsọn̄ ẹbiọn̄ọ ukpepn̄kpọ mme demon?
15 Mfịghe oro mme demon ẹdoride n̄kpri owo nditiene ukpepn̄kpọ mmọ okpon etieti. Etie nte ndiọi spirit ẹmi ẹnọ uwem inemesịt idahaemi—uwem mbre ye inemesịt. Man enem Abasi esịt, Moses eset ama esịn “inemesịt idiọkn̄kpọ ke ekpri ini” nte ọwọrọiso andibuana ke ufọk Pharaoh. (Mme Hebrew 11:24-27) Idịghe mmemmem n̄kpọ owo ndisịn se mme demon ẹnọde, ntre ana afo an̄wana ọkpọsọn̄ ndinam se inende. Emi enen̄ede edi akpanikọ koro nnyịn idade idiọkn̄kpọ imana ndien esịt nnyịn esiwak ndiyom ndinam se idiọkde. (Genesis 8:21; Rome 5:12) Ke ntak ntụhọ unamidiọk, idem apostle Paul ekenyene ndin̄wana ọkpọsọn̄ ye idemesie inyụn̄ iyakke mme udọn̄ obụkidem esie ẹkara enye.—1 Corinth 9:27; Rome 7:21-23.
16. Didie ke mme uyen ẹkeme ndin̄wana mbiọn̄ọ mme mfịghe edibuana ke oburobụt ido?
16 Okposụkedi ẹkemede ndidomo fi ‘nditiene ediwak owo edem n̄ka idiọk,’ Abasi ekeme ndin̄wam fi man ọbiọn̄ọ mfịghe otode mme ubọkn̄ka fo ndibịne idiọk usụn̄uwem mmọ. (Exodus 23:2; 1 Corinth 10:13) Edi ana afo akpan̄ utọn̄ ọnọ ndausụn̄ Abasi, adade mme ikọ esie odịp ke esịt fo. (Psalm 119:9, 11) Oyom afo ọfiọk ete ke ini n̄kparawa owo ẹdude ikpọn̄, udọn̄ idan̄ ekeme ndikọri onyụn̄ ada okosụn̄ọ ke edibiat ibet Abasi. N̄kaiferi kiet ọkọdọhọ ete, “Ke ini ndude ikpọn̄ ye ufan mi eren, idem mi eyeyom ndinam n̄kpọ kiet ndien mfre mi eyedọhọ mi nnam n̄kpọ efen.” Ntre fiọk ukeme fo nyụn̄ fiọk ete ke esịt fo edi se ibian̄ade-bian̄a. (Jeremiah 17:9) Kûdian̄ade utie ikpọn̄. (Mme N̄ke 18:1) Nịm adan̄a ke mme edinam uwụt ima. Ndien ke edide akpan n̄kpọ akan, nyene mbon oro ẹmade Jehovah ẹnyụn̄ ẹnyenede ntotụn̄ọ ukpono ẹnọ mme ibet esie nte n̄kpet n̄kpet nsan̄a kpọt.—Psalm 119:63; Mme N̄ke 13:20; 1 Corinth 15:33.
17. Nso ikeme ndin̄wam mme uyen Christian ndinyene ukeme ndin̄wana mbiọn̄ọ ukpepn̄kpọ mme demon?
17 Nditịn̄ enyịn n̄kpep mme n̄wed Christian oro ẹtịmde kaban̄a nsọn̄idem eke spirit fo eyen̄wam fi. Ke uwụtn̄kpọ, dụn̄ọde n̄wed oro Uyen Fo—Ndibö se Itịmde Ifön Ikan nto Enye ye ibuotikọ oro “En̄wan Ndinam se Inende” ke n̄wed Afo Emekeme Ndidu Uwem ke Nsinsi ke Paradise ke Isọn̄. Yak item N̄wed Abasi oro ẹnọde osụhọde odụk ekikere ye esịt fo, ndien enye eyesọn̄ọ fi idem. Akpanikọ oro mînaha afo efre edi nte ke ererimbot emi mme demon ẹkarade mi ndinam se inende idịghe mmemmem n̄kpọ. Ntre n̄wana ọkpọsọn̄. (Luke 13:24) Kọri ukeme eke spirit fo. Kûkpebe mbon mmemidem oro ẹkopde ndịk ẹmi ẹtienede ediwak owo edem.
Bọ Ufọn To Ukpepn̄kpọ Abasi
18. Nso idi ndusụk ufọn eke editiene ukpepn̄kpọ Abasi?
18 Ti, n̄ko, ete ke afo udutabake eti n̄kpọ ndomokiet ke nditiene ukpepn̄kpọ Jehovah. Enye enen̄ede ama fi, ndien ntak edi oro enye ‘ekpepde fi usụn̄ udori.’ (Isaiah 48:17) Ntre tiene ukpepn̄kpọ Jehovah, nyụn̄ fep iduọesịt oro otode mbiara ubieresịt, ediduọk ukpono idemowo, uyomo idịbi oro owo mîyomke, mme udọn̄ọ ẹmi ẹmende ẹto idan̄, m̀mê n̄kpọ mfụhọ oro etiede ntre. Jehovah esikop idatesịt ke ini mme asan̄autom esie ẹnamde enye okụt se ọbọrọde ata Satan oro nte ke mme owo idinamke akpanikọ inọ Abasi ke idak idomo. (Job 1:6-12) Edieke afo anamde esịt Jehovah adat ebe ke ndinam akpanikọ nnọ enye, afo eyebọhọ ke ini enye ebierede ikpe nsobo ọnọ ererimbot emi, ke adan̄aemi kpukpru mbon oro ẹbiatde mme ibet esie ẹditakde.—Mme N̄ke 27:11; 1 Corinth 6:9, 10; 1 John 2:17.
19. Nso idi ufọn oro odude ke ndidian idem ye mbon oro ẹwụtde esịtekọm ẹban̄a mme ufọn ukpepn̄kpọ Jehovah?
19 Edieke afo enen̄erede adian idem ye mbon oro ẹwụtde esịtekọm ke se Jehovah anamde ọnọ mmọ, afo emekeme ndikpep n̄kpọ nto ifiọkutom mmọ. Owo kiet oro ke akpa ekenyenede mbumehe uda n̄kpọsọn̄ ibọk emi n̄ko ekesinamde oburobụt ido ama anam an̄wan̄a ete: “Ke ekpedide n̄kakpan̄ke utọn̄ nnọ Jehovah, ami n̄kpekpa. AIDS omowot owo oro n̄koyomde ndidọ. AIDS owot kpukpru n̄kani n̄kpet n̄kpet ufan ererimbot mi mîdịghe mmọ ẹdu ke idaha ndikpa. Mmesiwak ndikụt mmọ ke mme efak, ndien ami mmesikọm Jehovah kpukpru usen mban̄a mme ibet esie oro ẹkpemede ikọt esie ẹdinyụn̄ ẹnamde nnyịn isana edieke nnyịn ikam idade mmọ isịn ke edinam. Akananam ami n̄kopke inemesịt, uyụhọ, nnyụn̄ nnyeneke ifụre ntem ke uwem mi.” Ke akpanikọ, nditiene ukpepn̄kpọ Jehovah enyene ufọn ọnọ nnyịn kpukpru ini!
Ẹnam Nnennen Edimek
20, 21. (a) Nso edimek iba ke mme uyen ẹnyene? (b) Nso nsinsi ufọn edisụn̄ọ oto editiene ukpepn̄kpọ Abasi?
20 Nnyịn ikpak mbufo n̄kparawa owo ite: Ẹnam nnennen edimek ebe ke ndinam n̄kpọ Jehovah. Ekem ẹnyene iwụk ke ndisọn̄ọ nyịre ke ubiere oro. (Joshua 24:15) Ke akpanikọ, mbufo ẹkeme ndimek kiet kpọt ke otu n̄kpọ iba ẹmi. Jesus ọkọdọhọ ete ke ntatara usụn̄ oro onyụn̄ an̄wan̄ade odu—kpa mmemmem usụn̄ oro owo anamde se amade. Usụn̄ oro ada aka n̄kpa ke akpatre, nsobo. Usụn̄ enye eken afafaha. Enye edi usụn̄ oro ọsọn̄de ndisan̄a ke oburobụt ererimbot emi mme demon ẹkarade mi. Edi usụn̄ oro ke akpatre eyeda mbon oro ẹsan̄ade ke enye okosịm utịbe utịbe obufa ererimbot Abasi. (Matthew 7:13, 14) Ewe usụn̄ ke mbufo edisan̄a? Ukpepn̄kpọ anie ke mbufo ẹditiene?
21 Jehovah ayak edimek emi ọnọ mbufo. Enye idomoke ndinyịk mbufo ẹnam n̄kpọ esie. Moses prọfet Abasi ọkọdọhọ ete, “Mmada uwem ye n̄kpa . . . nnịm fi ke iso,” akpakde ete: “Mek uwem.” Ẹnam ubiere emi ebe ke ‘ndima Jehovah Abasi mbufo nnyụn̄ n̄kop uyo esie, nnyụn̄ nyịre ye enye.’ (Deuteronomy 29:2; 30:19, 20) Mbufo ke eti ibuot ẹkpekam ẹmek nditiene ukpepn̄kpọ Abasi ẹnyụn̄ ẹdara uwem oro mînyeneke utịt ke ubọn̄ ubọn̄ obufa ererimbot Abasi.
Didie ke Afo Ọkpọbọrọ?
◻ Mmanie ẹdi mme demon, ndien nso ke mmọ ẹkpep?
◻ Didie ke mme demon ẹsịn udọn̄ ẹnọ ukpepn̄kpọ mmọ mfịn?
◻ Didie ke ekeme ndin̄wana mbiọn̄ọ ukpepn̄kpọ mme demon?
◻ Nso idi mme ufọn oro odude ke editiene ukpepn̄kpọ Jehovah?
[Ndise ke page 16]
Mbemiso Ukwọ, mme otụt utọn̄ angel ye nditọ mmọ ẹma ẹsịn udọn̄ ẹnọ afai ye otịme otịme uwem
[Ndise ke page 18]
Nte bụt akpanam fi edieke Jesus okopde ikwọ oro afo amade?