Mme Ntiense Jehovah ke Ofụri Ererimbot—Thailand

“IDỤT mme ọbọhọ ufụn.” Se enyịn̄ oro Thailand ọwọrọde edi oro. Sụn̄sụn̄ mme andidụn̄ oro ẹwakde ẹbe 57,000,000 ẹmi ẹdide mme anam utom ọkpọsọn̄ ẹnyene nsio nsio ekikere ido ukpono. Okposụkedi ido ukpono Buddha awakde, ẹnyene mme ido ukpono Christendom n̄ko ke idụt ufọt edem usụk ye edem usiahautịn Asia emi. Kpukpru owo ẹmi ẹnyene ndikop eti mbụk Obio Ubọn̄ Abasi.​—⁠Matthew 24:14.a

Mbonitọk Ekọn̄ Ẹkop Eti Mbụk

Ke mme itienna oro ẹsuanade ẹyọhọ n̄kpri obot Thailand ke adan̄a Myanmar, akpanikọ Bible ke enyene orụn̄ ke otu mbon Karen oro ẹdide mbonitọk ekọn̄ oro ẹwakde ẹkan owo 10,000. Mbonubon Karen kiet ẹmi ẹdụn̄de ke ikpehe oro ẹdi Mme Ntiense Jehovah. Mmọ ẹmesuan eti mbụk ke otu mbonitọk ekọn̄ oro. Utom mmọ ọkọtọn̄ọ didie?

Ke ediwak isua ẹmi ẹkebede ekpri akparawa kiet ama esịbe ebuana esie ye Ufọkabasi Anglican onyụn̄ akabade edi kiet ke otu Mme Ntiense Jehovah. Ke ọkwọrọikọ mmọ onụkde, iman esie ẹma ẹbiọn̄ọ enye. Nte ededi, enye ama ọyọ ke ime, ndien ubiọn̄ọ ubon esie ama osụhọde ubọk sụn̄sụn̄. Mme ọkwọrọ ederi Ufọkabasi Anglican oro ẹma ẹkaiso ke nsahi mmọ tutu osịm n̄kpọ nte isua iba ẹmi ẹkebede ke ini ẹkesion̄ode mmọ ke itieutom mmọ ke ntak oburobụt ido. Sia ufọkabasi oro mîkenyeneke ekpemerọn̄ adan̄aoro, n̄kpet n̄kpet ubon ye mme iman Ntiense emi efen ẹma ẹdu ke n̄kpaidem ẹnyụn̄ ẹnana un̄wam. Owo 11 ke otu mmọ ẹma ẹsịn n̄wed ẹkpọn̄ ufọkabasi oro ẹnyụn̄ ẹyom Mme Ntiense ẹkpep Bible ye mmimọ.

Ukpepn̄kpọ oro ama akaiso mfọn mfọn, ye mbonitọk ekọn̄ efen ẹtienede ẹbuana. Akpanikọ ama atara usọp usọp, osụn̄ọde ke mbufa Ntiense 17 ndina baptism ke inyan̄ oro ewetde ebe ke itienna mbonitọk ekọn̄ oro. Ekedi n̄kpọ inemesịt didie ntem ndikụt ekaeka oro ẹdide isua 88 ke emana obụhọde ke mmọn̄ ye mmọ!

Video Edemede Udọn̄

Idotenyịn n̄kọri okpon ke otu mbonitọk ekọn̄ oro. Ke edinam Editi ke 1993, owo 57 ẹkedụk. Ke ini edidi esenyịn circuit ke May isua oro, owo 67 ẹkesop idem ẹnọ kiet ke otu utịn̄ikọ esie. Ndien n̄kpọ nte owo 250 ẹkesop idem ndise video Watchtower Society oro Jehovah’s Witnesses​—⁠The Organization Behind the Name.

N̄wan pastọ Baptist kiet ke itienna mbonitọk ekọn̄ oro ama odụk utịn̄ikọ an̄wa Bible kiet oro Mme Ntiense ẹkenịmde onyụn̄ ewet mme itie Bible oro ẹkenemede. Enye ama asian ebe esie adan̄a nte enye mîkokopke uyụhọ ye mme ukwọrọikọ oro ẹsitịn̄de ẹfiak ẹtịn̄ oro ẹsikopde ke ufọkabasi mmọ. Enye ama afan̄a, ọdọhọde ete ke edieke enye akade mme mbonoesop Mme Ntiense Jehovah, kpukpru mbon ufọkabasi eken ẹyetiene ẹka. Ke ini enye akafiakde odụk mme mbonoesop, ebe esie ama ada ikwa ebịne enye onyụn̄ ọfọp mme n̄wetnnịm n̄kpọ mbonoesop ye n̄wed ukpepn̄kpọ Bible esie. Kpa ye oro, ke ini ẹkewụtde video, enye ama afiak edi. Ke ukperedem n̄wan emi ama asian ebe esie se enye okokụtde. Ke okpụhọrede esịt, enye ama oyom ndikụt video oro onyụn̄ eseme aban̄a mme n̄wetnnịm n̄kpọ ye n̄wed ukpepn̄kpọ Bible esie oro enye ọkọfọpde.

Ntre ke edi nte ke mme owo ke ẹkop eti mbụk ke Thailand. Mmọ ke ntem ke ẹbọhọ ufụn ke n̄kan̄ eke spirit ke “idụt mme ọbọhọ ufụn.”​—⁠John 8:⁠32.

[Mme Ikọ idakisọn̄]

[Ekebe ke page 24]

IDAHA IDỤT ORO Isua Utom 1993

N̄WAKN̄KAN IBAT ẸMI ẸNỌDE IKỌ NTIENSE: 1,434

MBAHADE: Ntiense 1 ke owo 40,299

MME ANDIDỤK EDITI: 3,342

UKEM MBAHADE MME ASUANETOP ẸDIDE MME ASIAKUSỤN̄: 232

UKEM MBAHADE UKPEPN̄KPỌ BIBLE: 1,489

IBAT ẸKENADE BAPTISM: 92

IBAT ESOP: 39

ỌFIS N̄KỌK ITIEUTOM: BANGKOK

[Ndise ke page 25]

Mme anditan̄a Obio Ubọn̄ ẹkwọrọde eti mbụk ifịk ifịk

[Ndise ke page 25]

Akpa ọfis n̄kọk itieutom, 1947

[Ndise ke page 25]

Mbonufọk Bethel ke iso obufa ọfis n̄kọk itieutom ke Bangkok, ẹkeyak ẹnọ ke February 8, 1992