Nte Afo ke An̄wam Eyen Fo Emek Jehovah?

“EKETIE mi ke idem nte ke ndikpep Bible ekedi n̄kpọ oro enen̄erede efek onyụn̄ akakde owo ke idem. Ke ndịbe, ami mma mbiere ke esịt mi nte ke ndidịghe kiet ke otu Mme Ntiense Jehovah ke mma n̄kọri n̄kpon,” ntre ke akparawa kiet ọkọdọhọ. Okposụkedi ẹnyenede idotenyịn nte ke ata ediwak nditọwọn̄ ke mme ubon Christian ke akpatre ẹyemek ndida ke n̄kan̄ Jehovah, n̄kparawa owo nte enye ẹkeme ndisobo ọkpọsọn̄ idaha ke ndimek Jehovah nte Abasi mmọ.

Ndusụk ini mme ete ye eka isifiọkke nte ẹkpenọde nditọ mmọ ndausụn̄ uforo uforo. Mmọ ẹsinam ọkpọsọn̄ edidụn̄ọde ubieresịt ye ekikere, nte ete kiet oro okokopde editịmede esịt ọkọdọhọde ini kiet ete: “Ke nditịn̄ akpanikọ, ama odu ini oro n̄kesisede iso nditọ mi ke ini ẹdede idap, mmọn̄eyet edikpu osụk odude mmọ ke mfụk, ndien n̄kere m̀mê ami n̄kpakanam n̄kpọ ke mmemido n̄kan oro.” Nditọiren esie iba ẹma ẹkọri ẹkpon ẹnyụn̄ ẹmek ndinam n̄kpọ Jehovah.

Edi odu mme uyen oro ẹkpọn̄de Jehovah ẹnyụn̄ ẹkpọn̄de otu Christian ẹka ererimbot Satan. Ntre didie ke mme ete ye eka ẹkpekụt unen ke ndin̄wam nditọ mmọ ẹmek Jehovah? Man ibọrọ mbụme oro, ẹyak nnyịn ibem iso idụn̄ọde ntak ndusụk uyen ẹkpọn̄de Jehovah ke ini mme ete ye eka mmọ ke ata mbrenyịn ẹyomde mmọ ẹkaiso ndikpan̄ utọn̄ nnọ enye.

Ntak Ndusụk Uyen Ẹkpọn̄de Jehovah

Kiet ke otu ọsọ ntak edi nte ke ndusụk uyen akananam inen̄ekede ifiọk Jehovah m̀mê mme usụn̄ esie. Okposụkedi ẹdụkde mme mbonoesop Christian toto ke ini ẹdide eyenọwọn̄, mmọ n̄kukụre ẹnam ntre ye unana udọn̄, ndien edinen̄ede nyom Jehovah idụhe. (Isaiah 55:6; Utom 17:27) Ama esifek eyeneren oro ẹkesiakde ke enyọn̄ emi ke idem ke mme mbonoesop Christian koro se mme etịn̄ikọ ke mbot utịn̄ikọ ẹketịn̄de mîkan̄wan̄ake enye.

Ẹtọ mme n̄kpasịp akpanikọ ke esịt ndusụk nditọwọn̄, edi mmọ ẹyak in̄wan̄în̄wan̄ usụn̄uwem nnam se mmade, uma inyene ererimbot Satan emi atap esịt mmọ ada. Ndusụk ikemeke ndikan ebeubọk ọkpọsọn̄ udọn̄ edidu ye nnyụn̄ n̄kpebe mme ubọkn̄ka mmọ.​—⁠1 Chronicles 28:9; Luke 8:12-⁠14; 1 Corinth 15:33.

Nte ededi, ke ofụri ererimbot, ediwak nditọwọn̄ ke mme ubon Christian ẹmek ndida ke n̄kan̄ Jehovah. Nte ẹkeme ndikpep n̄kpọ nto nti usio-ukot oro mme ete ye eka mmọ ẹkenamde?

Babak Tọn̄ọ

Akpan ukpọhọde ke ndin̄wam nditọ fo ẹmek Jehovah edi ndibabak ntọn̄ọ. Ke ata ediwak idaha, mme ekikere oro mmọ ẹbọde ye mme ukpepn̄kpọ oro mmọ ẹkpepde ke ini esịt osụk edide nsek onyụn̄ ekemede ndibọ ntọt eyebịghi ke ofụri eyouwem. (Mme N̄ke 22:6) Ntre babak tọn̄ọ ndibụk mfọn Jehovah, ima ye uten̄e esie nnọ nditọ fo, odomode ndikọri edinyene ima nnọ Jehovah ke esịt mmọ ye ediwụt esịtekọm ke se Jehovah anamde ọnọ mmọ. Man ẹnam emi, ediwak ete ye eka ẹmeda akpakịp ibuotikọ ẹmi ẹban̄ade mme edibotn̄kpọ Jehovah oro ẹkụtde ke mme n̄wed Watchtower Society ẹnam n̄kpọ uforo uforo.

N̄kopitem ye ukpono ẹnyenede ẹnọ Jehovah ye utuakibuot esie ẹdu ke otu mme edu en̄wen oro anade ẹdọdiọn̄ ẹsiak ke ntọn̄ọ ntọn̄ọ uwem. Esidi n̄kpọ inemesịt ndikụt nditọ oro mîkemke isua ufọkn̄wed kan̄a ẹdomode ndiwet mme akpan n̄kpọ ifan̄ ke mme mbonoesop Christian ẹnyụn̄ ẹkụbọrede mme itien̄wed ke Bible mmọ m̀mê ẹsan̄ade ye mme ete ye eka mmọ ẹka itie uyeremmọn̄ ndiyet iso ke mbịtmbịt mmọn̄ ke ini etiede mmọ idap idap ke idem. Mmọemi ẹdi n̄kpri n̄kpọ, edi mmọ ẹdi akpan n̄kpọ didie ntem ke ndinam otụk nsek esịt oro nte ke ẹkpenyene ndiwụt ukpono ye n̄kopitem nnọ Jehovah!

Ẹkpenyene n̄ko ndibabak ntọn̄ọ ifịk ifịk ukpepn̄kpọ Bible idemowo. Ke ini nditọiren mmọ ẹkedide isua iba ke emana, ebe ye n̄wan ẹma ẹtọn̄ọ ndikot n̄wed Edikpañ Utöñ nö Aqua Andikpepa nnọ mmọ. Ekem, ke ini nditọiren oro ẹketọn̄ọde ufọkn̄wed, mmọ ẹyebabak ẹdemede ẹnyụn̄ ẹkpep n̄kpọ ye eka mmọ kpukpru usenubọk ke n̄wed N̄wed Mi eke Mme Mbụk Bible ye Afo Emekeme Ndidu Uwem ke Nsinsi ke Paradise ke Isọn̄.* Nneme itien̄wed eke usen emi ete onịmde eyediana emi mbemiso udia usenubọk. Ẹma ẹnen̄ede ẹdiọn̄ ukeme ete ye eka emi ke ini nditọiren mmọ ke ndondo emi ẹkemekde ndinam n̄kpọ Jehovah, ẹyadarede uyakidem mmọ ke mmọn̄ baptism ke ẹdide isua 10 ye 11.

Ediye akparawa kiet emi anamde utom ke ọfis n̄kọk itieutom Watch Tower Society ke Japan eti ete ke ini imọ ikedide eyenọwọn̄, eka imọ ama an̄wam imọ ndikọri itie ebuana ye Jehovah ebe ke nditie n̄kpere imọ ke okoneyo, an̄wamde imọ ndibọn̄ akam. Enye idehede ifre ukpep oro ẹkenọde​—⁠inamke n̄kpọ m̀mê m̀mọ̀n̄ ke enye akaka m̀mê nso ke enye akanam, Jehovah ama esikpere kpukpru ini onyụn̄ odu ke mben̄eidem ndin̄wam.

Mme ete ye eka oro ẹkụtde unen ẹkpep ndidiọn̄ọ ndiọi ntụhọ ẹmi ẹtode ndammana unana mfọnmma nditọ mmọ, ndien mme ete ye eka ẹsibak ẹtọn̄ọ ndin̄wam nditọ mmọ ẹnen̄ede ẹmi. (Mme N̄ke 22:15) Ẹnyene ndibabak nnam n̄kpọ mban̄a mme ntụhọ ibụk, nsọn̄ibuot, ntan̄idem, edikụt ndudue n̄kaha nnọ mbon efen. Mîdịghe ntre, mme utọ n̄kpasịp oro ẹyekọri ẹsịm edisọn̄ ibuot ye Abasi ye mme usụn̄ esie ke ukperedem. Ke uwụtn̄kpọ, mme ete ye eka oro ẹnyenede eti udọn̄ edi oro ẹyakde nditọ ẹnam se ẹmade ẹkaha ẹsiwak ndinam nditọ mmọ ẹkọri mme edu ibụk. Esisọn̄ nditọ ẹmi ndikpono ete ye eka mmọ m̀mê Jehovah, ẹkabarede ẹtie nte ‘mme anana esịtekọm’ oro ẹtịn̄de ẹban̄a ke Bible. (Mme N̄ke 29:21, NW) Ke n̄kan̄ eken, nditọ oro ẹsinọde utom ufọk ẹnam ẹmi ẹsinyụn̄ ẹnọde ukpep ndidu ke edidemede mban̄a mme udọn̄ mbon en̄wen ẹsitịm ẹwụt esịtekọm ẹnọ ete ye eka mmọ ye Jehovah.

Akpan n̄kpọ efen edi edibak ntọn̄ọ ndinịm mme utịtmbuba ukara Abasi oro eyen edikemede ndisịm. Edieke owo mîbakke inam emi inyụn̄ inyene iwụk, mbon en̄wen ẹkeme ndidọn̄ nsio nsio utịtmbuba ke ekikere ye ke esịt esie. Ekpenyene ndisịn edikot Bible n̄kụre, ọkpọkpọ edikpep kiet ke otu mme n̄wed Watchtower Society, ndibuana ke Ufọkn̄wed Utom Ukara Abasi, ndikabade ndi anditan̄a eti mbụk, ye ndina baptism ke otu mme utịtmbuba ẹmi.

Takafumi eti ete ke eka imọ ama anam imọ inyene edu edikot mme magazine Enyọn̄-Ukpeme ye Awake! ebe ke ndiwet mme mmemmem mbụme onyụn̄ odori mmọ ke okpokoro itie utemudia man imọ ikpokụt ke ini inyọn̄de ufọkn̄wed idi. Yuri eti ete ke ndikodu ke usen ifan̄ ye mme asiakusụn̄b ẹmi ẹnamde utom ke ebiet oro udọn̄ kaban̄a mme asan̄autom Christian okponde, ndisan̄a ye mmọ ke utom ukwọrọikọ, ndikụt nte mmọ ẹtemde nti udia, ndinyụn̄ n̄kụt idatesịt ye ifịk mmọ ama otụk udọn̄ imọ akamba akamba ndinam n̄kpọ Jehovah ke ukem usụn̄ oro. Ediwak uyen ẹdọhọ ke ete ye eka mmimọ ẹma ẹsida mmimọ ẹka Bethel kpukpru ini, nte ẹkotde ibuot itieutom ye mme n̄kọk itieutom Watch Tower Society, ke ebiet emi mmimọ ikekemede ndikụt n̄kparawa iren ye iban eken ẹnamde n̄kpọ Jehovah ye inemesịt. Ediwak mbon oro ẹkekade ẹkese Bethel nte nditọwọn̄ idahaemi ẹnam utom ke mme Bethel ke ofụri ererimbot.

Nọ Nditọ Fo Ini Fo

Anaedi udomo ye uduot ini oro abiatde ye nditọ fo eyenyene ebuana nnennen nnennen ke m̀mê mmọ ẹmek ndinam n̄kpọ Jehovah m̀mê imekke. Mmọ ẹsisọp ẹkụt udomo ini ye ntịmidem oro afo esịnde ke ukpepn̄kpọ Bible oro afo onịmde ye mmọ. Edieke afo mûkemeke nditi ebiet emi eketrede ke akpatre ukpepn̄kpọ m̀mê akabiatde ukpepn̄kpọ efep ke n̄kpri ntak, etop oro afo ọnọde edi nte ke ukpepn̄kpọ oro inen̄ekede idi akpan n̄kpọ. Nte ededi, ke ini mmọ ẹkụtde ke ete ye eka ẹnam n̄waidem ẹnọ ukpepn̄kpọ oro, ẹtịm idem nte ọfọnde ẹnọ enye ẹnyụn̄ ẹnịm ukpepn̄kpọ oro kpukpru ini inamke n̄kpọ m̀mê nso itịbe, etop oro ẹnọde edi ata isio isio. Okposụkedi mîdịghe ewụhọ, ndusụk eka ẹsisịne ediye ọfọn̄ ẹnọ ukpepn̄kpọ nditọ mmọ, ukem nte ke ini ẹkade mme mbonoesop m̀mê ẹnịmde ukpepn̄kpọ Bible ye mbọhọidụn̄. Ekikere oro ẹnọde edi nte ke utuakibuot Jehovah edi akpan n̄kpọ.

Oyoyom ekese ini ye ukeme man ẹnam unọ nditọ mbufo ukpep a-⁠Bible enyene inem, osịm esịt mmọ. Esitụk n̄kpri nditọ akpan akpan ke ini mmọ ẹkụtde nte ẹnamde-nam mme n̄kpọ oro mmọ ẹkpepde ẹwụt ke iso mmọ. Ke uwụtn̄kpọ, ete kiet ama an̄wam nditọ esie ẹkụt ediset ke n̄kpa ke enyịn ikike ebe ke ndinanam mbụk Bible aban̄ade ediset ke n̄kpa Lazarus n̄wụt. Enye ama odụk ekpri ubet ndien ekem ọwọrọ edi nte Lazarus oro ẹnamde eset.​—⁠John 11:​17-⁠44.

Nte nditọ ẹkperede ndisịm idaha akwa owo, esikam oyom ini efen efen ye usọ ndise mban̄a udịm udịm ntụk, eyịghe, ye mme editịmede esịt oro mmọ ẹsobode. Ini oro ima ima ete ye eka oro ẹnyenede ọniọn̄ ẹsiode ẹnịm ke ini emi edi ata akpan n̄kpọ edieke anade nditọ ẹkọri mbuọtidem ke Jehovah. Ete nditọ inan̄ oro okụtde unen ama obụk ete ke ini nditọ imọ ẹkesisobode nsio nsio mfịna, imọ iyenam ndụn̄ọde inyụn̄ ineme n̄kpọ emi enyenede ebuana ke mme n̄wed Watchtower ye mmọ kpukpru usen tutu ẹkan mme mfịna oro ofụri ofụri.

Asiakusụn̄ emi mîsinyeneke ini emi edide eka nditọ iba ama okụt ete ke eyenan̄wan imọ ama ọtọn̄ọ ndimem idem nnyụn̄ nnana idatesịt ke mme utom ukara Abasi. Ntre eka emi ama ebiere ndisidu ke ufọk ke ini eyen oro ọnyọn̄de ufọkn̄wed edi kpukpru uwemeyo, abuande eyenan̄wan emi ke nneme ke adan̄aemi mmọ mbiba ẹn̄wọn̄de cup tea kiet kiet. Ebede ke ntotụn̄ọ nneme eka ye eyen, eyenan̄wan emi ama ọbọ un̄wam oro enye okoyomde. Idahaemi, ke ama okokụre ufọkn̄wed sekọndri, enye ama adiana ye eka esie ke utom usiakusụn̄.​—⁠Mme N̄ke 20:⁠5.

Eti Nsan̄a ye Uwụtn̄kpọ

Ke adianade ye edinọ ini mmọ, ana mme ete ye eka ẹnọ nditọ mmọ eti nsan̄a. Mme N̄ke 13:20 ọdọhọ ete: “Owo eke asan̄ade ye mme enyene-ibuot eyenyene ibuot: edi nsan̄a mbon ndisịme eyediọn̄ ọdiọk.”

Ediwak ete ye eka oro ẹkụtde unen ẹkụt nte n̄ke oro edide akpanikọ. Ete kiet oro enyenede nditọ inan̄ ọdọhọ ete: “Ke ini n̄kerede mban̄a ini edem, n̄kere ke ekedi akwa otu mme ufan oro nditọ nnyịn ẹkenyenede ke akpanikọ akan̄wam ndinụk mmọ ẹnam n̄kpọ Jehovah. Mma nsịn udọn̄ nnọ mmọ ndinam ufan ke mme esop en̄wen ọkọrọ ye eke nnyịn ndinyụn̄ nsọn̄ọ mmụm itie ufan oro n̄kama.” Ebiowo Christian kiet oro ama akanam utom ke Bethel ke ediwak isua ama eti mme n̄kpọntịbe ini edem ete: “Ke ini n̄kedide eyenọwọn̄, nnyịn ikodụn̄ ke ekpri ufọk, edi ẹkesiwak ndinọ enye nte itieidụn̄ esenyịn circuit. Ke adianade do, mme akpan asiakusụn̄ ke esop nnyịn ẹma esidia udia ye nnyịn kpukpru ini. Mmọ ẹma ẹsiyere mmọn̄ ke ufọk nnyịn ẹnyụn̄ ebuana ye nnyịn. Ndikop mme ifiọkutom mmọ nnyụn̄ n̄kụt idatesịt mmọ ama an̄wam mi ndikọri esịtekọm nnọ utom uyọhọ ini.”

Eti nsan̄a esin̄wam mbon oro ẹsobode n̄kpọsọn̄ idaha. Eka kiet oro eyeneren esie okosobode ọkpọsọn̄ ini ama eneme mfịna emi ye esenyịn oro asan̄ade-san̄a eke Mme Ntiense Jehovah. Enye ama otoro ete eka esisan̄a ye eyeneren emi ke an̄wautom. Esenyịn oro ọkọdọhọ ete: “Edieke afo anamde, idaha esie ke n̄kan̄ eke spirit ye kpukpru n̄kpọ eken eyenyene ukpụhọde.” N̄wan emi ọtọt ete: “Ẹma ẹnyene ndutịm unọ ikọ ntiense mbubịteyo ke esop nnyịn, ndien ediwak nditọwọn̄ ẹdude ke idaha isua uka ufọkn̄wed, ndusụk mme asiakusụn̄ ofụri ini oro ẹbịghide ke utom, ye ke nsụhọde n̄kaha ebiowo kiet ẹma ẹsibuana ke emi. Ke akpa ekedi en̄wan ndinam eyen mi esiwọrọ kpukpru ini, edi oro ikebịghike koro enye ekesinyọn̄de edi kpukpru ini ye inemesịt ye nsịnudọn̄ otode eti nsan̄a. Ke ini enye okodude ke ufọkn̄wed sekọndri, enye ama ana baptism onyụn̄ esinam utom nte asiakusụn̄ unọ un̄wam kpukpru ọfiọn̄, ndien ke ini enye okokụrede n̄wed, enye ama akabade edi asiakusụn̄ ofụri ini.” Eti nsan̄a ọkọrọ ye edinam uduak Jehovah ama ada nti utịp edi.

Ekeme ndidi n̄kparawa owo oro ẹkemede ndinyene eti odudu ke idem eyen fo ididụhe ke n̄kann̄kụk, edi se ediwak uyen oro ẹmekde ndinam n̄kpọ Jehovah ẹsiwakde ndikụt enyene n̄kpọ ndinam ye mme uwụtn̄kpọ ete ye eka mmọ. Ediwak uyen ẹma mme ete ye eka mmọ ẹnyụn̄ ẹyom ndikpebe mmọ. Yuri eti mfọnido eka esie ye nte enye ekekerede aban̄a mbon en̄wen, ọnọde mmọ ikot ke urụk ukopikọ onyụn̄ anamde udia ọnọ mbon udọn̄ọ. Tatsuo, emi okotode ubon emi ẹnyenede nditọiren inan̄, ẹmi kpukpru ẹkọride ẹkponi idahaemi ẹnyụn̄ ẹnamde n̄kpọ Jehovah, ọkọdọhọ ete: “Mama ikesikemeke ndikpep nnyịn n̄kpọ kpukpru ini koro Papa mîkedịghe andinịm ke akpanikọ ndien enye ama esisobo ekese ubiọn̄ọ oto mme iman. Edi ndikụt idaha oro enye akadade ọnọ akpanikọ ye idatesịt oro enye ekenyenede ke ndinam n̄kpọ Jehovah ama otụk mi akamba akamba. Enye n̄ko ama esinyịme nditie nsịm tụhitụhi usenubọk man an̄wam nnyịn ke mme mfịna nnyịn.” Mme ikọ ọniọn̄ ẹtode ete ye eka ẹsinyene odudu ke ini ẹsan̄ade ye mme utom mbuọtidem. Yoichiro eketịn̄ aban̄a ete ye eka esie ete: “N̄kemeke nditi m̀mê akanam mmọ ẹtịn̄ idiọk ikọ ẹban̄a mbon en̄wen ke esop; m̀mê mmọ ndikayak nnyịn nditọwọn̄ itịn̄ ikọ edem iban̄a mme ndudue mbon en̄wen.”​—⁠Luke 6:​40-⁠42.

Idatesịt Odude ke Ndikụt Nditọ Ẹmekde Jehovah

Idụhe mmemmem usụn̄ ndin̄wam nditọ fo ẹmek Jehovah. Ediwak ini editịmede esịt ẹyedu. Edi ete oro okokopde editịmede esịt emi ẹkesiakde ke mbemiso ọkọdọhọ ete: “Nte ete ye eka nnyịn kpukpru ini ke edinam akpanikọ imesidomo nditiene mme ekikere oro esop Jehovah oro ẹkụtde ke enyịn ọnọde. Emi ekedi akamba n̄kpọ un̄wam ke ndikan mme mfịna.” Mme ukeme mmọ ẹma ẹkụt unen.

Ih, ebede ke ndinam ukeme fo nditiene mme ndausụn̄ Bible, ọnọde nditọ fo nti ntak ndima Jehovah, ọsọn̄ọde emi ebe ke uwụtn̄kpọ edinam akpanikọ ye mme ukeme esịt akpanikọ ndin̄wam, afo n̄ko ke akpatre emekeme ndikụt nte ukeme fo okụtde unen. Emeti eyeneren oro iketịn̄de iban̄a ke ntọn̄ọ ntọn̄ọ, oro ini kiet ekebierede ke imọ ididịghe kiet ke otu Mme Ntiense Jehovah? Nte ededi, ke eka esie ama akan̄wam enye ebe n̄kpọsọn̄ isua esie, enye ama ọdọhọ ete: “Mmokop inemesịt sia enye mîkedehede ikpa mba!” Afo emekeme ndinyene ukem utịp oro ye nditọ fo.​—⁠Galatia 6:⁠9.

[Mme Ikọ idakisọn̄]

[Ndise ke page 30]

Nte afo emekeme nditi edibọk eyen ye mme ekikere inemesịt?