Ndibọ Ufọn Nto Edikot Bible ke Usen ke Usen
“Ọfọfọn ọnọ owo eke . . . mbet Jehovah adat[de] enye esịt; enye onyụn̄ osụk ekere mbet esie ke uwemeyo ye ke okoneyo.”—PSALM 1:1, 2.
1. (a) Nso n̄wọrọnda idiọn̄ọ odu ke n̄kan̄ ufọk umịn̄n̄wed ke ibuot itieutom Watch Tower Society eke ofụri ererimbot? (b) Didie ke nnyịn idibọ ufọn edieke inamde item oro?
“KOT IKỌ ABASI KPA EDISANA BIBLE KE USEN KE USEN.” Ẹwet mme ikọ oro ke ikpọ abisi ke n̄kan̄ ufọk kiet ke Brooklyn, New York, emi Watchtower Bible and Tract Society esimịn̄de Bible ye mme n̄wed Bible. Owo iwetke item oro inọ mbon ererimbot kpọt ẹmi ẹkụtde idiọn̄ọ oro. Mme Ntiense Jehovah ẹfiọk ẹte ke oyom mmimọ n̄ko inam emi. Mbon oro ẹkotde Bible kpukpru ini ẹnyụn̄ ẹdade enye ẹsịn ke edinam ke idemmọ ẹbọ ufọn ẹto ukpepn̄kpọ, nsuannọ, nnen̄ede, ye ntụnọ oro enye ọnọde ke edinen ido.—2 Timothy 3:16, 17.
2. Didie ke Brọda Russell ọkọsọn̄ọ etịn̄ nte edikot Bible edide akpan n̄kpọ?
2 Mme Ntiense Jehovah ẹnen̄ede ẹwụt esịtekọm ẹban̄a mme un̄wam ukpep Bible mmọ, esịnede Enyọn̄-Ukpeme, ndien mmọ ẹsida mmọemi ẹnam n̄kpọ kpukpru ini. Edi mmọ ẹfiọk ẹte ke ndomokiet ke otu mmọ idaha itie Bible ke idemesie. Ko ke edem ke 1909, Charles Taze Russell, akpa etieibuot Watch Tower Bible and Tract Society, ama ewet ọnọ mme andikot magazine Enyọn̄-Ukpeme ete: “Ẹkûdede ẹfre ẹte ke Bible edi Udomon̄kpọ nnyịn ye nte ke se ededi un̄wam oro Abasi ọnọde nnyịn mmọ ẹdi ‘un̄wam’ inyụn̄ idịghe n̄kpọ ndida n̄kpụhọ ye Bible.”
3. (a) Nso odudu ke “ikọ Abasi” enyene ke idem mbon oro ẹkamade enye? (b) Adan̄a ediwak ini didie ke mbon Beroea ẹkesikot ẹnyụn̄ ẹkpep N̄wed Abasi?
3 N̄wed Abasi eke odudu spirit otụn̄ọ onyụn̄ enyene odudu oro n̄wed efen mînyeneke. “Ikọ Abasi enyene uwem, onyụn̄ ananam n̄kpọ, onyụn̄ ọsọp akan kpukpru ofụt iso iba, okịm abahade ukpọn̄ ye spirit, ye ikek ye ndia; onyụn̄ enyene ukeme ndidụn̄ọde ekikere ye uduak esịt owo.” (Mme Hebrew 4:12) Mbet oro Luke ama otoro mbon Beroea ufiop ufiop, okotde mmọ ‘mbon oro ẹnyenede ido ẹkan.’ Mmọ ikọbọhọ ikọ oro apostle Paul ye nsan̄a esie Silas ẹkekwọrọde ye ọkpọsọn̄ udọn̄ kpọt edi n̄ko ‘ẹma ẹtịn̄ enyịn ẹdụn̄ọde N̄wed Abasi ke usen ke usen’ man ẹbiere m̀mê se ẹkekpepde mmọ ama enyene isọn̄ ke N̄wed Abasi.—Utom 17:11.
Ndikot Enye ke Usen ke Usen
4. Nso ke N̄wed Abasi owụt aban̄a adan̄a ediwak ini oro nnyịn ikpokotde Bible?
4 Bible itịn̄ke ata nnennen adan̄a ediwak ini oro nnyịn ikpokotde enye. Nte ededi, enye ewet item oro Jehovah ọkọnọde Joshua ete ‘okot n̄wed mbet emi uwemeyo ye okoneyo’ man enye akpanam n̄kpọ ye eti ibuot onyụn̄ okụt unen ke ndinam utom oro Abasi ọkọnọde enye ndinam. (Joshua 1:8) Enye asian nnyịn ete ke owo ekededi oro akakarade nte edidem ke Israel ekenyene ndikot N̄wed Abasi “kpukpru usen uwem esie.” (Deuteronomy 17:19) Enye akaiso ọdọhọ ete: “Ọfọfọn ọnọ owo eke mîsan̄ake ke item mme idiọkowo . . . Edi mbet Jehovah adat enye esịt; enye onyụn̄ osụk ekere mbet esie ke uwemeyo ye ke okoneyo.” (Psalm 1:1, 2) N̄ko, Gospel emi Matthew ewetde asian nnyịn nte ke ini Jesus Christ mîkenyịmeke ukeme oro Satan ekesịnde ke ndidomo Enye, Enye ama okot oto N̄wed Abasi Usem Hebrew eke odudu spirit, ọdọhọde ete: “Ẹma ẹwet ẹte, Idịghe uyo ikpọn̄ ke owo edida idu uwem, edi edida kpukpru ikọ eke ẹwọrọde Abasi ke inua odu.” (Matthew 4:4) Adan̄a ediwak ini didie ke nnyịn iyom udia ikpọkidem? Kpukpru usen! Ndidia udia eke spirit ke usen ke usen akam edi akpan n̄kpọ akan oro koro enye otụk idotenyịn nsinsi uwem nnyịn.—Deuteronomy 8:3; John 17:3.
5. Didie ke edikot Bible ke usen ke usen ekeme ndin̄wam nnyịn ‘isan̄a nte odotde Ọbọn̄’ ke ini idomo mbuọtidem osịmde nnyịn?
5 Oyom kpukpru nnyịn ibọ nsịnudọn̄ ke usen ke usen ito Ikọ Abasi. Kpukpru usen—ke ufọk, ke itieutom, ke ufọkn̄wed, ke mme efak, ke ini ikade ndidep n̄kpọ, ke utom ukwọrọikọ nnyịn—mme n̄kpọ oro ẹdide n̄kpọ-ata ẹnọ mbuọtidem nnyịn ẹsisịm nnyịn. Didie ke nnyịn idinam n̄kpọ iban̄a mmọemi? Ndi iyesọsọp iti mme ewụhọ ye edumbet Bible? Utu ke ndisịn udọn̄ nnọ edu ediberi edem ke idem, Bible ọnọ item ete: “Yak owo eke esede ete imọ imọsọn̄ọ ida ekpeme mbak enye ediduọ.” (1 Corinth 10:12) Edikot Bible ke usen ke usen eyen̄wam nnyịn “[isan̄a] ke ido nte odotde Ọbọn̄, [inem] Enye esịt ke kpukpru usụn̄” utu ke ndiyak ererimbot enyịk nnyịn esịn ke usụn̄ esie.—Colossae 1:9, 10; Rome 12:2.
Ufọn Ndikot Bible Ndien Ndien
6. Ntak odotde ndikot Bible ndien ndien?
6 Edikot Bible edi ata isio n̄kpọ ye edikot n̄wed mbụk. Ẹwet ata ediwak ọwọrọetop n̄wed mbụk man ẹkot enye ini kiet kpọt; ndondo oro owo ọdiọn̄ọde mbụk oro ye nte ẹdade enye ekeberi, ufọn ndifiak n̄kot enye idụhe aba. Ke edide isio ye oro, inamke n̄kpọ m̀mê utịm ikafan̄ ke nnyịn ikot Bible, nnyịn imọbọ ufọn akamba akamba ke ndifiak n̄kot enye. (Mme N̄ke 9:9) Ye owo mbufiọk, N̄wed Abasi enyene obufa n̄kpọ oro enye ọwọrọde kpukpru ini. Mme prọfesi ẹban̄ade ukperedem ini ẹtotịm ẹtụk enye ke idem ẹkan ke ekerede aban̄a se enye okokụtde, okopde, onyụn̄ ọfiọkde ke idemesie ke mme ọfiọn̄ ndondo emi. (Daniel 12:4) Nte enye atatde ifiọk esie ke uwem onyụn̄ ọyọde mme mfịna, andikot Bible emi enyenede mbufiọk otịm ọdiọn̄ọ mme item oro ekemede ndidi ke akpa enye n̄kukụre okokot itọk itọk. (Mme N̄ke 4:18) Edieke enye ọdọn̄ọde idiọk udọn̄ọ, mme un̄wọn̄ọ Bible ẹban̄ade edisio ubiak mfep ye edifiak nnyene nsọn̄idem ẹtotịm ẹnyene se ẹwọrọde ẹnọ enye ẹkan nte akanam edide. Ke ini mme n̄kpet n̄kpet ufan ye mbonubon ẹkpade, un̄wọn̄ọ ediset ke n̄kpa ototịm akabade edi ọsọn̄urua n̄kpọ akan.
7. Nso idin̄wam nnyịn ke ini ibiomde obufa mbiomo ke uwem, ndien ntak-a?
7 Ekeme ndidi afo ke idemfo ama okot Bible onyụn̄ ada mme item esie esịn ke edinam ke ediwak isua. Edi ekeme ndidi afo obiom mbufa mbiomo idahaemi ke uwem. Nte afo ke anam ndutịm ndidọ ndọ? Nte afo oyom ndidi ete m̀mê eka? Nte ẹyak mbiomo ẹsịn fi ke ubọk ke esop nte ebiowo m̀mê asan̄autom unamutom? Nte afo amakabade edi ọkwọrọikọ uyọhọ ini, ye mme udiana ifet ukwọrọikọ ye edinọ ukpep? Didie ke ekpedi n̄kpọ oro ọfọnde ntem ete afo afiak okot ofụri Bible ye mbufa mbiomo oro ke ekikere!—Ephesus 5:24, 25; 6:4; 2 Timothy 4:1, 2.
8. Didie ke mme ukpụhọde idaha ẹkeme ndiwụt ufọn oro odude ke ndikpep ekese mban̄a mme n̄kpọ oro nnyịn ikekerede ke ima ifọfiọk?
8 Ekeme ndidi afo ama anam ọfọn ke ini edem ndiwụt mbun̄wụm spirit. (Galatia 5:22, 23) Edi mme ukpụhọde idaha ẹkeme ndisịm fi onyụn̄ oyom fi ekpep ekese n̄kpọ efen aban̄a mme edu Abasi oro. (Men Mme Hebrew 5:8 domo.) Akani esenyịn oro asan̄ade-san̄a emi okokụtde nte edide akpan n̄kpọ ndikpọn̄ akpan utom uyọhọ ini esie man ekese aban̄a ete ye eka esie ẹmi ẹma ẹkesọn̄ ọkọdọhọ ete: “N̄kesikere ke mmanam otịm ọfọn ke ndiwụt mbun̄wụm spirit. Idahaemi etie mi nte mfiak ntọn̄ọ obufa ofụri ofụri.” Kpasụk ntre, mme ebe ye ibanndọ ẹmi nsan̄andọ mmọ ẹdọn̄ọde idiọk udọn̄ọ ke ikpọkidem m̀mê ke ntụk ẹkeme ndikụt nte ke ndinọ san̄asan̄a ntịn̄enyịn, mfịghe ke ini ke ini esidemede mme edinam oro anamde idem emem mmọ. Edikot Bible kpukpru ini edi ebiet akwa nsịnudọn̄ ye un̄wam.
Ini Emi Ẹkpenamde Edikot Bible
9. (a) Nso ikeme ndin̄wam owo oro enen̄erede anana ini ndikụt ini nnọ edikot Bible ke usen ke usen? (b) Ntak emi edikot Ikọ Abasi edide ata akpan n̄kpọ ọnọ mbiowo?
9 Nte ededi, ye mbon oro mînyeneke ini, ndinyene ini ndinam n̄kpọ efen kpukpru ini esidi n̄kpọ-ata. Nte ededi, nnyịn imekeme ndibọ ufọn nto uwụtn̄kpọ Jehovah. Bible ayarade nte ke enye anam n̄kpọ ke ‘edikem ini.’ (Genesis 21:2; Exodus 9:5; Luke 21:24; Galatia 4:4) Ndiwụt esịtekọm ke nte edikot Ikọ Abasi kpukpru ini edide akpan n̄kpọ ekeme ndin̄wam nnyịn ndisio ini nnịm nnọ enye ke ndutịm nnyịn eke usen ke usen. (Ephesus 5:15-17) Oyom mbiowo akpan akpan ẹsio ini ẹnịm ẹnọ edikot Bible kpukpru ini man otodo item oro mmọ ẹdinọde ekpenen̄ede ọkọn̄ọ ke mme edumbet Bible n̄ko man edu mmọ okpowụt “eti ibuot emi otode ke enyọn̄.”—James 3:17; Titus 1:9.
10. Ini ewe ke mme andikot Bible ke usen ke usen ẹsidiomi ini ndikot?
10 Ediwak owo oro ẹkụtde unen ke ọkpọkpọ ndutịm edikot Bible ẹsinam edikot n̄wed mmọ ke tụhi-tụhi usenubọk mbemiso mmọ ẹtọn̄ọde mme edinam usen. Mbon en̄wen ẹkụt ke mmimọ imekeme ndinam emi kpukpru ini ke ini efen. Mme kaset Bible (ke ebiet ẹdude) ẹsin̄wam mme akaisan̄ ndida ini isan̄ mmọ nnam n̄kpọ nte ọfọnde, ndien ndusụk Mme Ntiense ẹsikpan̄ utọn̄ ẹkop mmọ ke adan̄aemi ẹsede ẹban̄a mme utom ẹnamde kpukpru ini ke ufọk. Ẹwụt mme ndutịm oro ẹfọnde ye ediwak Mme Ntiense ke Europe, Africa, North America, South America, ye Edem Usiahautịn ke page 20 ye 21, ke ibuotikọ oro, “Ini Emi Mmọ Ẹkotde Enye ye Nte Mmọ Ẹbọde Ufọn.”
11. Didie ke ẹkeme ndinam edikot Bible ke usen ke usen idem ọkpọkọm ata esisịt ini odu?
11 Se idide ata akpan n̄kpọ idịghe udomo ini oro esịnde ke edikot Bible fo ke ini kiet ekededi edi nte anamde enye kpukpru ini. Afo emekeme ndikụt nte enyenede ufọn ndikot ke hour kiet m̀mê akande oro ke ebe kiet, anamde udiana ndụn̄ọde onyụn̄ esịnde idem ofụri ofụri ke se okotde. Edi nte ndutịm fo ayak fi anam oro kpukpru ini? Utu ke ndiyak mme usen ẹbe ye unana edikot Bible ndomokiet, nte ikpọfọnke ikan ndikot kpukpru usen ke minit 15 m̀mê idem minit 5? Nam edi ubiere fo ndisikot Bible ke usen ke usen. Ekem kọrọ ntotụn̄ọ ndụn̄ọde ye edikot oro ke ekemede.
Nsio Nsio Usụn̄ Edikot Bible
12. Nso ndutịm ukot Bible ke mbufa mbonufọk Bethel ye nditọ ufọkn̄wed Gilead ẹnyene?
12 Ediwak usụn̄ oro ẹkemede ndikot Bible ẹdu. Edi se ifọnde nditọn̄ọ ke Genesis n̄kot nsịm Ediyarade. Kpukpru mbonufọk Bethel ke ofụri ererimbot ẹmi ẹnamde utom ke ibuot itieutom m̀mê ke kiet ke otu n̄kọk itieutom N̄ka ẹnyene ndikot ofụri Bible ke akpa isua utom Bethel mmọ. (Oro esiwak ndibuana edikot ibuot ita osịm ition, ọkọn̄ọde ke nte mmọ ẹniọn̄de, m̀mê page inan̄ osịm ition, ke usen kiet.) Nditọ ufọkn̄wed ke Watchtower Bible School of Gilead n̄ko ẹnyene ndikot Bible n̄kụre mbemiso mmọ ẹkụrede ukpep. Ẹdori enyịn nte ke emi eyen̄wam mmọ ndinam edikot Bible ke usen ke usen edi ubak uwem mmọ.
13. Nso utịtmbuba ke ẹtoro ẹnọ Mme Ntiense oro ẹnade baptism obufa?
13 Edi se ifọnde Mme Ntiense oro ẹnade baptism obufa ndinịm utịtmbuba edikot ofụri Bible nnọ idemmọ. Ke 1975, ke ini emi enye okosụk otịmde idem ndina baptism, ebiowo ama obụp akparawa kiet ke France ete m̀mê enye enyene san̄asan̄a ndutịm ukot Bible. Toto ke ini oro enye esikot ofụri Bible kpukpru isua, awakde ndinam ukot n̄wed esie ke usenubọk mbemiso akade utom. Kaban̄a utịp, enye ọdọhọ ete: “Mmotịm mmehe ye Jehovah. Mmekeme ndikụt nte kpukpru n̄kpọ ẹmi enye anamde ẹnyenede ebuana ye uduak esie ye nte enye anamde n̄kpọ ke ini ubiọn̄ọ edemerede. Ke ukem ini oro, mmokụt nte ke Jehovah edi edinen onyụn̄ ọfọn ke kpukpru edinam esie.”
14. (a) Man itọn̄ọ ọkpọkpọ ndutịm edikot Bible oro edikade iso, nso ke ẹyom? (b) Nso ikeme ndin̄wam nnyịn nditi se n̄wed Bible kiet kiet etịn̄de aban̄a nte nnyịn ikotde enye?
14 Nte afo omokot ofụri Bible okụre? Edieke mûkotke, eti ini edi emi nditọn̄ọ. Diomi ndutịm oro enyenede iwụk, ndien ekem sọn̄ọ yịre ke oro. Biere ibat page m̀mê ibuot emi edikotde ke usen kiet kiet, mîdịghe kam biere udomo ini oro afo edisịnde ye ini emi edinamde oro. Idịghe kpukpru owo ẹdikot Bible ẹkụre ke isua kiet, edi akpan n̄kpọ edi ndikot Ikọ Abasi kpukpru ini, ẹnamde oro ke usen ke usen ke ẹkemede. Nte afo okotde Bible, afo emekeme ndikụt nte edikama mme ndụn̄ọde efen ẹnyenede ufọn ke ndinam se afo okotde odu fi ke ekikere. Edieke Insight on the Scriptures odude ke usem mbufo, do mbemiso ọtọn̄ọde ndikot akpan n̄wed Bible kiet, dụn̄ọde mbio mbio akpan n̄kpọ esie nte ẹwụtde ke Insight.* Nọ ntịn̄enyịn akpan akpan ke mme ibuotikọ oro ẹwetde ke ndodobi ubọkn̄wed oro odude ke itie oro ẹwetde n̄kpọ ẹban̄a. Mîdịghe kama ukem ntatara nneme oro ẹnọde ke n̄wed “All Scripture Is Inspired of God and Beneficial.”a
15. (a) Mme ekikere ewe oro ẹnọde ke page 16 ye 17 ẹkeme ndin̄wam ndifori edikot Bible fo? (b) Utu ke ndikot akpan ibat page Bible nte ido edinam, nnyịn ikpọnọ akpan ntịn̄enyịn ke ewe akpan n̄kpọ?
15 Edikot Bible kpukpru ini enyene ufọn, edi kûdi ikpîkpu okot n̄wed nte ido edinam. Kûkot akpan ibat page kpukpru usen n̄kukụre man ekeme ndidọhọ ke imesikot Bible ikụre kpukpru isua. Nte ẹwụtde ke ekebe oro “Mme Ekikere Ẹnọde Ndifori Edikot Bible Fo” (page 16 ye 17), ekese usụn̄ ẹdu oro afo ekemede ndikot nnyụn̄ n̄kop inem Bible. Inamke n̄kpọ m̀mê ewe usụn̄ ke afo ada, kụt ete ọmọbọk esịt ye ekikere fo.
Fiọk Se Mme N̄kpọ Ẹmi Afo Okotde Ẹwọrọde
16. Ntak edide akpan n̄kpọ ndisio ini nnịm nnọ editie n̄kere se nnyịn ikotde?
16 Ke ini ekekpepde mme mbet esie n̄kpọ, Jesus ama ọsọn̄ọ ẹtịn̄ nte edide akpan n̄kpọ ndifiọk se enye eketịn̄de. Idịghe ikpîkpu ifiọk ibuot ekedi akpan n̄kpọ, edi mmọ ‘ndifiọk ke esịt mmọ se enye ọwọrọde’ man mmọ ẹkpeda enye ẹsịn ke edinam ke uwem mmọ. (Matthew 13:14, 15, 19, 23) Se ibehede Abasi enen̄ede edi se owo edide ke esịtidem, ndien emi edi se esịt adade aban̄a. (1 Samuel 16:7; Mme N̄ke 4:23) Ntem, ke adianade ye edikụt nte ke nnyịn imọfiọk se mme udọn̄ikọ Bible ẹdọhọde, oyom nnyịn itie ikere mmọ, ikerede iban̄a nte mmọ ẹtụkde uwem nnyịn.—Psalm 48:9; 1 Timothy 4:15.
17. Nso idi ndusụk ikpehe oro nnyịn ikpetiede ikere mme n̄kpọ oro nnyịn ikotde ke N̄wed Abasi?
17 N̄wana diọn̄ọ mme akpan edumbet oro ẹdude ke mme mbụk Bible man afo ekeme ndida mmọ nnam n̄kpọ ke mme idaha oro afo osobode. (Men Matthew 9:13; 19:3-6 domo.) Nte afo okotde aban̄a onyụn̄ etiede ekere mme utịbe utịbe edu Jehovah, da ifet oro ndisọn̄ọ ọkpọkpọ itie ebuana fo ye enye, ndikọri ọkpọsọn̄ ekikere uten̄e Abasi ke esịtidem fo. Ke ini okotde mme ikọ ẹban̄ade uduak Jehovah, kere se afo ekemede ndinam man anam n̄kpọ ke n̄kemuyo ye ẹmi. Ke ini okotde nnennen item, utu ke ndidọhọ ete, ‘Mmọfọfiọk oro,’ bụp ete, ‘Nte ami ke nnam se enye ọdọhọde?’ Ke edide ntre, bụp idemfo ete, ‘Ke mme usụn̄ ewe ke “n̄kpọdọdiọn̄ nnam emi?”’ (1 Thessalonica 4:1) Nte afo ekpepde aban̄a mme n̄kpọ oro Abasi oyomde, tịm fiọk n̄ko ban̄a mme uwụtn̄kpọ Bible ẹmi ẹdide ata mbụk ke uwem ẹmi ẹban̄ade mbon oro ẹkedude uwem ke n̄kemuyo ye mme n̄kpọ oro ẹyomde do ye mbon oro mîkodụhe. Kere ban̄a ntak emi mmọ ẹkebịnede usụn̄uwem enyeoro ye se ikedide utịp. (Rome 15:4; 1 Corinth 10:11) Ke ini afo okotde aban̄a uwem Jesus Christ, ti ete ke Jesus edi owo emi Jehovah akayakde itie edidem ofụri isọn̄ esịn ke ubọk; da ifet oro ndisọn̄ọ udọn̄ esịtidem fo kaban̄a obufa ererimbot Abasi. N̄ko, dụn̄ọde mme usụn̄ ẹmi afo ekemede ndikpebe Eyen Abasi ọyọhọ ọyọhọ.—1 Peter 2:21.
18. Didie ke nnyịn ikeme ndida ukem ukem ke edikot Bible nnyịn ye edikama n̄wed ukpepn̄kpọ oro “asan̄autom emi anamde akpanikọ, onyụn̄ enyenede ọniọn̄” ọnọde?
18 Nte ededi, edikot Bible ikpenyeneke ndida itie edikama eti n̄wed ukpepn̄kpọ emi odude ebe ke “asan̄autom emi anamde akpanikọ, onyụn̄ enyenede ọniọn̄.” Oro n̄ko edi ubak ndutịm Jehovah—kpa enyeoro edide ata ọsọn̄urua. (Matthew 24:45-47) Kụt ete ke edikot Ikọ Abasi kpukpru ini ke idemesie enyene n̄wọrọnda itie ke uwem fo. Ke ekemede, “KOT IKỌ ABASI KPA EDISANA BIBLE KE USEN KE USEN.”
[Mme Ikọ idakisọn̄]
a Watchtower Bible and Tract Society of New York, Inc., emịn̄.
Didie ke Afo Ọkpọbọrọ?
◻ Ntak ọfọnde ndikot Bible kpukpru usen?
◻ Ntak oyomde nnyịn ikot Bible ndien ndien?
◻ Ke ndutịm fo, ini ewe ọfọn ọnọ edikot Bible ke usen ke usen?
◻ Nte afo okotde Bible ndien ndien, nso ikeme ndinam ndutịm fo enyene inem?
◻ Ntak otịmde edi akpan n̄kpọ nditie n̄kere se nnyịn ikotde?
[Ekebe ke page 16, 17]
Mme ekikere ẹnọde ndifori edikot Bible fo
(1) Ediwak owo ẹkot mme n̄wed Bible ke adiana ke adiana ke nte ẹkemịn̄de mmọ, ọtọn̄ọde ke Genesis osịm Ediyarade. Afo emekeme n̄ko ndikot mmọ ke adiana ke adiana nte ẹkewetde mmọ. Nyene ke ekikere nte ke Bible edi eboho emi esịnede n̄wed 66 eke odudu spirit, kpa itie ubonn̄wed Abasi. Kaban̄a edinam ukpụhọde, afo emekeme ndiyom ndikot ndusụk n̄wed oro ẹnọde mbụk, ekem ndusụk oro ke ofụri ofụri ẹdide ntịn̄nnịm ikọ, adianade ye ndusụk oro ẹdide leta item, utu ke n̄kukụre nditiene mme page ke adiana ke adiana. Fiọk se afo okotde, nyụn̄ kụt ete omokot ofụri Bible okụre.
(2) Ke ama okokot ikpehe kiet ke N̄wed Abasi okụre, bụp idemfo se enye ayararede aban̄a Jehovah, uduak esie, mme usụn̄ edinam esie; nte enye okpotụkde uwem fo; nte afo akpadade enye an̄wam owo efen.
(3) Ke akamade chart oro “Main Events of Jesus’ Earthly Life” (Mme Akpan N̄kpọntịbe ke Uwem Jesus eke Isọn̄) oro ẹmịn̄de ke idak ibuotikọ oro “Jesus Christ” ke Insight on the Scriptures (n̄ko ke “All Scripture Is Inspired of God and Beneficial”) nte n̄kpọ ndausụn̄, kot mme mbụk oro ẹbụkde ukem n̄kpọntịbe oro ke ikpehe kiet kiet ke mme Gospel, ke adiana ke adiana. Kọrọ n̄kpọ ke emi ebe ke ndika n̄kese mme ikpehe oro ẹsan̄ade ẹkekem ke n̄wed Akakan Owo Oro Akanam Odude Uwem.
(4) Ke ini okotde mbụk aban̄ade uwem ye utom Paul ke Utom Mme Apostle, kot mme leta eke odudu spirit oro ẹnyenede ebuana n̄ko. Ntem, ke ini ẹtịn̄de ẹban̄a nsio nsio obio m̀mê mme itie ẹmi Paul ọkọkwọrọde ikọ, tuak da nyụn̄ kot mme leta oro enye ke ukperedem ekewetde ọnọ ẹsọk ekemmọ mme Christian ke mme ebiet oro. Edi n̄ko n̄kpọ oro ọnọde un̄wam nditiene isan̄ esie ke n̄wed ndise obio, utọ nte enyeoro odude ke edem New World Translation.
(5) Ke adianade ye afo ndikot Exodus osịm Deuteronomy, kot leta ẹkewetde ẹnọ Mme Hebrew man okụt nte ẹnamde ediwak uwụtn̄kpọ ke prọfesi oro ẹn̄wan̄a. Ke idak “Law” (Ibet) ke Insight on the Scriptures, se chart oro “Some Features of the Law Covenant” (Ndusụk Ikpehe ke Ibet Ediomi).
(6) Ke ini okotde mme n̄wed ntịn̄nnịm ikọ, da ini ndidụn̄ọde mme idaha ke mbụk oro ẹnyenede ebuana ye oro ke Bible. Ke uwụtn̄kpọ, ke ini okotde n̄wed Isaiah, dụn̄ọde se ẹtịn̄de ke ebiet en̄wen ẹban̄a ndidem Uzziah, Jotham, Ahaz, ye Hezekiah, ẹmi ẹsiakde ke Isaiah 1:1. (2 Ndidem, ibuot 15-20; 2 Chronicles, ibuot 26-32) Mîdịghe ke ini okotde Haggai ye Zechariah, da ini ndidụn̄ọde se idude ke n̄wed Ezra.
(7) Mek n̄wed Bible kiet, kot ikpehe esie kiet (iso-ọfọn ibuot kiet), ekem nam ndụn̄ọde, akamade Watch Tower Publications Index mîdịghe Watchtower Library emi ẹsịnde ke kọmputa edieke odude ke usem mbufo. Da se okotde oro sịn ke edinam ke uwem fo. Kama enye ke mme utịn̄ikọ ye ke an̄wautom. Ekem kot ikpehe efen.
(8) Edieke edide odu n̄wed Watch Tower oro atatde n̄wed Bible oro m̀mê ikpehe esie, ka bịne enye ndien ndien ke adan̄aemi okotde ikpehe Bible oro. (Ke uwụtn̄kpọ: ke Ikwọ Solomon, Enyọn̄-Ukpeme [Ikọmbakara], December 1, 1957, page 720-734; ke Ezekiel, “The Nations Shall Know That I Am Jehovah”—How?; ke Daniel, “Your Will Be Done on Earth” m̀mê Our Incoming World Government—God’s Kingdom; ke Haggai ye Zechariah, Paradise Restored to Mankind—By Theocracy!; ke Ediyarade, Ediyarade—Ubọn̄ Ubọn̄ Ata-Utịt Esie Emekpere!)
(9) Nte afo okotde, se ndusụk ebiet oro ẹtịn̄de n̄kpọ ẹtụk. Tịmfiọk mme udọn̄ikọ 320 ẹtode N̄wed Abasi Usem Hebrew oro ẹkotde nnennen ẹsịn ke N̄wed Abasi Christian Usem Greek ye mme udọn̄ikọ eken ke mme itie ikie ẹmi ẹtịn̄de-tịn̄ ẹtụk, ọkọrọ ye usụn̄ nte ẹbuande enye oro ẹnọde. Mme ebiet en̄wen ẹtịn̄de n̄kpọ ẹtụk ẹnyan ubọk ẹwụt mme edisu prọfesi oro ẹwetde ke Bible, mme ntọt ẹban̄ade mbụk uwem ye mme ebiet, ye mme ukem ekikere oro ẹkemede ndinam mme n̄kpọ oro ẹkemede ndidi ama ọsọn̄ fi idem ndifiọk an̄wan̄a.
(10) Ke akamade nsiondi New World Translation oro enyenede ndụn̄ọde, ke odude ke usem mbufo, se mme ikọ idakisọn̄ ye mme ibuotikọ oro ẹwetde ẹdian oro ẹnyenede ebuana ye se afo okotde. Mmọemi ẹwụt isọn̄ oro ẹnyenede kaban̄a mme edikabade oro ẹdade do ye mme usụn̄ en̄wen ẹmi ẹkemede ndikabade mme akpan utịn̄ikọ. Afo emekeme n̄ko ndimen nte ẹkabarede ndusụk ufan̄ikọ ke mme edikabade Bible efen ndomo.
(11) Ke ama okokot ibuot kiet kiet okụre, wet ata ibio ibio akpan ekikere ke ibuotikọ oro. Da enye nte isọn̄ kaban̄a ndụn̄ọde ye editie n̄kere oro edinamde ke ukperedem.
(12) Nte afo okotde Bible, sịn idiọn̄ọ ke mme itien̄wed oro ekemekde oro afo enen̄erede oyom nditi, mîdịghe sion̄o mmọ wet dọn̄ ke n̄kpri babru nyụn̄ dọn̄ mmọ ke ebiet emi edikụtde mmọ kpukpru usen. Mụm mmọ dọn̄ ke ibuot; tie kere mmọ; da mmọ nam n̄kpọ. Kûdomo ndimụm ata ediwak mmọ ndọn̄ ke ibuot ini kiet, eyedi kiet m̀mê iba kpọt kpukpru urua; ekem mek se iwakde ikan oro ini efen emi afo okotde Bible.
[Mme ndise ke page 15]
Nte afo ke okot Bible mîdịghe ke akpan̄ utọn̄ okop kaset esie kpukpru usen?