Mme Andikụre Ukpep Gilead—“Mme Ata Isụn̄utom!”
“NSO idi isụn̄utom?” Akpan ibuotikọ n̄wedmbụk n̄kpọntịbe kiet okobụp mbụme oro ke se ikperede ndisịm isua 40 ẹmi ẹkebede. Andiwet ọkọdọhọ ke mme ata isụn̄utom ẹkedi n̄kpọutom ukpụhọde n̄kaowo ye ndutịm uforo. Nte ededi, ke Sunday, March 5, 1995, ke Ufọk Mbono Jersey City eke Mme Ntiense Jehovah, ẹma ẹnọ isio isio orụk ibọrọ ye nsọn̄uyo. Ke edinam ewe? Edinam ukụre ukpep ọyọhọ otu 98 eke Watchtower Bible School of Gilead—ufọkn̄wed emi ọnọde mme isụn̄utom ẹka ofụri ererimbot!
Ke ikwọ ye akam ediberede okụrede, Albert D. Schroeder eke Otu Ukara ama ọnọ kpukpru owo 6,430 ẹmi ẹkedude ke otu ufiop ufiop ekọm. Ke ntọn̄ọikọ esie, Brọda Schroeder ama anam an̄wan̄a ntak emi mme andikụre ukpep Gilead ẹdide isio ye mbon efen oro ẹkotde idemmọ mme isụn̄utom. Enye ọkọdọhọ ete: “Bible edi akpan n̄wed ukpepn̄kpọ Gilead.” Owo inọhọ mme andikụre ukpep ke Gilead ukpep ndidi mme anamutom n̄kaowo, edi mme andikpep Ikọ Abasi. Mmọ ke ntem ẹdot ke n̄wọrọnda usụn̄ ndise mban̄a mme udọn̄ n̄kpọ spirit mme owo ke an̄wautom isenidụt.
Mme etịn̄ikọ ẹmi ẹketienede ẹma ẹtịn̄ n̄kpọ ẹtụk ediwak ikpehe efen ẹmi mme andikụre ukpep Gilead ẹnọde uyarade edidi mme “ata” isụn̄utom. Charles Molohan ama etịn̄ ikọ ọnọ mmọ ke ibuotikọ oro “Ẹkaiso Ẹn̄wụm Nti Mfri Nte Mme Isụn̄utom.” Ke osiode oto mme ikọ apostle Paul ke Colossae 1:9, 10, Brọda Molohan ama eti mme andikụre ukpep oro ete ke ọfiọn̄ ition mmọ oro ẹkebede ke Gilead ẹma ẹn̄wam mmọ ndikọri “ke nnennen ifiọk Abasi.” Emi eyen̄wam mmọ ndision̄o mbun̄wụm ke usụn̄ iba: ke ndiwụt mbun̄wụm spirit Abasi ye ke ndibuana mme akpanikọ Bible ye mbon efen.
Daniel Sydlik eke Otu Ukara ama adiana ye ibuotikọ emi akanamde owo ekere n̄kpọ “Ẹkûnam N̄kpọ Oro Edisịnde Uwem Mbufo ke Itiendịk.” Enye ama obụp mbụme oro Jesus okobụpde ete: “Nso ke owo edinọ ke ibuot uwem esie?” (Matthew 16:26) Brọda Sydlik ọkọdọhọ ete: “Mme owo ẹma ẹnyam ukpọn̄ mmọ ẹnọ usụn̄uwem oro eferede akan, ememde akan.” Nte ededi, mbon oro ẹnyenede oduuwem mbuọtidem ikemeke ndikan̄ mbuọtidem ke ẹsobode mme idomo ye udomo. Mme ikọ Jesus ẹwụt ke ana owo onyịme “ndinọ,” oro edi, ndiyak n̄kpọ atak, man anyan̄a ukpọn̄, m̀mê uwem esie. Ẹma ẹteme mbufa isụn̄utom oro ẹte ẹnọ Jehovah kpukpru se mmọ ẹnyenede, kpa mfọnn̄kan ukeme mmọ, ke utom esie!
Ekem, William Van de Wall eke Kọmiti Itieutom Utịmutom ama etịn̄ ikọ ke ibuotikọ oro “Apostle Paul—Uwụtn̄kpọ Oro Odotde Ẹkpebe.” Brọda Van de Wall ama anam an̄wan̄a ete: “Paul akada iso ke utom isụn̄utom ke akpa isua ikie.” Nte odotde, ndien, ẹma ẹsio akpan ikpehe inan̄ ẹwụt emi apostle Paul okonịmde eti uwụtn̄kpọ ọnọ mme isụn̄utom mfịn: (1) ata udọn̄ ye ima oro Paul ekenyenede ọnọ mme owo, (2) ukeme esie ke utom ukwọrọikọ, (3) nsụhọdeidem esie nditre ndimenede idemesie ke enyọn̄, (4) mbuọtidem esie oro owo mîkemeke ndiyịk ke Jehovah.
“Yak Jehovah Odụn̄ọde Mbufo ke Obufa Utom Mbufo” ekedi ibuotikọ emi Lyman A. Swingle eke Otu Ukara ekenemede. Ke adade itien̄wed usen oro, Psalm 139:16, Brọda Swingle ama etịn̄ ete ke, nte mbufa isụn̄utom, mmọ ẹyesobo mme mfịna ke itieutom mmọ ye nte ke Jehovah ọfiọk mme usọbọ. Enye ama eteme ete: “Ẹka ẹbịne enye, ẹnyene nneme ye enye ke ini mbufo ẹnyenede mfịna. Ẹdụn̄ọde se uduak esie edide.”
Ekem John E. Barr eke Otu Ukara ama etịn̄ ikọ ke ibuotikọ oro “Mbuọtidem Mbufo ke Ọkọri Etieti.” (2 Thessalonica 1:3) Ke Luke 17:1, nnyịn ikot ite ke Jesus ọkọdọhọ ete: “Ana nte n̄kpọ iduọ ẹdu.” Ndusụk owo ẹma ẹtuak ukot ẹduọn̄ọ ke ntak edu ekemmọ mme isụn̄utom. Edi Brọda Barr ama esịn udọn̄ ọnọ mme isụn̄utom oro ndinyene mbuọtidem oro oyomde man ẹnyene edu edifen nnọ owo. Ke akpanikọ, ekedi ke afan̄ emi ke mme mbet Jesus ẹkeben̄e ẹte: “Nam mbuọtidem nnyịn okpon akan.” (Luke 17:2-5) Nsio nsio edinen̄ede ke esop ẹkeme ndidomo mbuọtidem mme isụn̄utom n̄ko. “Nte nnyịn imenyene mbuọtidem ndinyịme mmọemi,” Brọda Barr ama obụp, “mîdịghe nte mmọ ẹyekabade ẹdi mme n̄kpọ ubiọn̄ọ ẹmi ẹbietde obot?”
Ekem owo iba ẹdide mme andikpep Gilead ẹma ẹnọ ndusụk item. Jack Redford ama akpak mme andikụre ukpep oro ẹte ẹnyene in̄wan̄în̄wan̄ edu. Enye ama etịn̄ aban̄a isụn̄utom oro ọkọkpọn̄de utom esie ke ntak ndusụk ikọ mbubru ẹketode ekemmọ mme isụn̄utom. N̄wed Abasi, nte ededi, odụri nnyịn utọn̄ ọbiọn̄ọ ediyat esịt nte mîdotke. (Ecclesiastes 7:9) Enye ama eteme ete: “Ẹnyene nnennen edu. Ẹfen mme ndudue ye mme unana mfọnmma mbon oro ẹkande mbufo ẹkụk.”
Ekem, U. V. Glass, esịn-owo-enyịn̄ ke Gilead, ama obụp ete: “Nte mbufo ẹmeben̄e idem ndiyọ ‘ini ye unọmọ’”? (Ecclesiastes 9:11) Brọda Glass ama osio owụt ete: “Usụn̄uwem nnyịn ẹsikpụhọde kpukpru ini, ndien ndusụk ẹkeme ndikama editịmede esịt.” Ndusụk isụn̄utom ke unana idotenyịn ẹma ẹsobo unana nsọn̄idem, udọn̄ọ, ye mme mfịna ubon, ẹnyịkde ndusụk mmọ ndikpọn̄ utom mmọ. Brọda Glass ama ọdọhọ ete: “Inamke n̄kpọ se unọmọ oro ekemede ndidi, nnyịn imọfiọk ke Jehovah ọfiọk aban̄a enye onyụn̄ ekere aban̄a. Edieke nnyịn iberide edem ke enye, nnyịn imọfiọk ke nnyịn iyekan!”
Utịn̄ikọ oro ọkọdọhọde “Ẹsio Ẹnịm San̄asan̄a Ẹnọ Utom Isụn̄utom” ama ada mme udịm udịm utịn̄ikọ usenubọk oro okosịm utịt. Theodore Jaracz eke Otu Ukara ama etịn̄ n̄kpọ aban̄a mbụme oro ẹkedemerede ke ntọn̄ọ, oro edi, “Nso idi isụn̄utom?” Ke ibọrọ, enye ama eneme Utom Mme Apostle ibuot 13, ye 14 aban̄ade utom isụn̄utom Paul ye Barnabas. Nte an̄wan̄ade, utom oro ikowụkke ntịn̄enyịn ke edikọk mme mfịna n̄kaowo, edi ke ‘edida eti etop nsọk mme owo.’ (Utom 13:32) Brọda Jaracz ama obụp ete: “Nte mbufo inyịmeke ke Paul ye Barnabas ẹma ẹwụt nte ata isụn̄utom ekpenyenede nditie?” Ekem ẹma ẹkot Robert Tracy akani isụn̄utom otode Mexico ndibuana ndusụk nti ifiọkutom esiemmọ nte ọkwọrọikọ.
Ndutịm usenubọk oro ama osịm utịt nte Brọda Schroeder ekedemede n̄weditoro ọnọ mme andikụre ukpep 48 oro. Otuowo ẹma ẹkop nduaidem ndikop enyịn̄ idụt 21 ẹmi ẹkenọde mme isụn̄utom oro ẹka: Barbados, Benin, Bolivia, Central African Republic, Costa Rica, Côte d’Ivoire, Ecuador, Equatorial Guinea, Estonia, Guinea-Bissau, Honduras, Latvia, Leeward Islands, Mauritius, Mozambique, Nicaragua, Paraguay, Peru, Senegal, Taiwan, ye Venezuela.
Ke ẹma ẹkedia udia uwemeyo, otuowo oro ama afiak osop idem onyụn̄ adara inem inem ukpepn̄kpọ Enyọn̄-Ukpeme, emi Robert P. Johnson eke Itieutom Utịmutom okonịmde. Mme andibuana ke ọyọhọ otu 98 ẹkebọrọ mbụme. Inem inem udịm udịm ndụn̄ọde oro mbonutom Gilead ẹkenịmde ẹketiene emi. Otuowo ama enen̄ede okop nsịnudọn̄ nte mme andikụre ukpep ẹkebuanade ifiọkutom mmọ ke an̄wautom ẹnyụn̄ ẹtịn̄de mme ntụk mmọ ẹban̄a utom isenidụt mmọ.
Ke isua itiokiet ye ubak, Gilead okodu ke ufọk Watchtower Society ke Wallkill, New York. Nte ededi, ke April 1995, ẹma ẹsio ufọkn̄wed emi ẹka obufa Itie Unọ Ukpep Enyọn̄-Ukpeme ke Patterson, New York. Eketie mbonufọk Bethel ke Wallkill didie ke idem kaban̄a ukpụhọde emi? Ke edinam ukụre ukpep emi ẹma ẹnam ndụn̄ọde ye ibat ibat ẹtode Wallkill. Se mmọ ẹketịn̄de ẹmi ẹketụkde owo ke idem ẹma ẹnam an̄wan̄a ke nditọ ufọkn̄wed Gilead ẹmenyene nsinsi itie ke idem mmimọ. Nte an̄wan̄ade, iren ye iban unyịmesịt ẹmi ẹdi mme ata isụn̄utom—mbon nsụhọdeidem, mbon n̄waidem, ẹmi ẹnyenede ntotụn̄ọ udọn̄ ẹban̄a edin̄wam mbon efen.
Nte edinam ukụre ukpep oro okosịmde utịt, kpukpru mme andidụk ẹma ẹnyene mbuọtidem nte ke Ufọkn̄wed Gilead eyekaiso okụt unen ke ndinam se enye anamde ke se ibede isua 50—ndision̄o mme ata isụn̄utom ndi!
[Ekebe ke page 18]
Ibat Otu Nditọ Ufọkn̄wed:
Ibat idụt ẹtode: 8
Ibat idụt ẹnọde ẹka: 21
Ibat nditọ ufọkn̄wed: 48
Isua emana ke ẹbaharede ukem ukem: 32.72
Isua ẹdude ke akpanikọ ke ẹbaharede ukem ukem: 15.48
Isua ẹdude ke utom uyọhọ ini ke ẹbaharede ukem ukem: 10.91
[Ndise ke page 18]
Mme Andikụre Ufọkn̄wed Ọyọhọ Otu 98 eke Watchtower Bible School of Gilead
Ke udịm enyịn̄ etienede mi, ẹtọn̄ọ ke udịm iso ẹnọ nọmba ẹka edem, enyịn̄ ẹnyụn̄ ẹtọn̄ọ ke ufien ẹka nnasia ke udịm kiet kiet.
(1) Eszlinger, A.; Mann, T.; Rivera, G.; Baruero, M.; Vaz, M.; Durga, K.; Silweryx, H.; Alvarado, D. (2) Toth, B.; Segarra, S.; Hart, R.; Rooryck, I.; Escobar, P.; Ejstrup, J.; Sligh, L.; Rivera, E. (3) Archard, D.; Snaith, S.; Marciel, P.; Koljonen, D.; Waddell, S.; Blackburn, L.; Escobar, M.; Archard, K. (4) Hart, M.; Toth, S.; Koljonen, J.; Bergman, H.; Mann, D.; Blackburn, J.; Park, D.; Vaz, F. (5) Segarra, S.; Sligh, L.; Leslie, L.; Bergman, B.; Baruero, W.; Alvarado, J.; Leslie, D.; Park, D. (6) Silweryx, K.; Eszlinger, R.; Waddell, J.; Snaith, K.; Durga, A.; Rooryck, F.; Ejstrup, C.; Marciel, D.