Ini Ẹmekpụhọde

ANAEDI ekedi n̄kpọ idatesịt didie ntem ndidu uwem ke Israel eset ke idak ubọn̄ ubọn̄ ukara anam-akpanikọ Edidem Solomon! Enye ekedi ini emem, uforo, ye inemesịt. Ke ini emi Solomon ọkọsọn̄ọde ada ke utuakibuot akpanikọ, Jehovah ama ọdiọn̄ idụt oro uwak uwak. Abasi ikọnọhọ Edidem Solomon uwak inyene kpọt edi n̄ko “esịtifiọk ye ọniọn̄” man Solomon akara ke edinen ido ye ima. (1 Ndidem 3:12) Bible ọdọhọ ete: “Kpukpru ndidem ererimbot ẹnyụn̄ ẹyom iso Solomon, ẹte ikop ifiọk esie, eke Abasi ekesịnde enye ke esịt.”—2 Chronicles 9:23.

Jehovah ama ọnọ mme owo oro ifụre, emem, ye akpakịp nti n̄kpọ. Ikọ Abasi ọdọhọ ete: “Judah ye Israel ẹkewak, nte ntan emi odude ke mbeninyan̄ ke uwak, ke ẹdia n̄kpọ, ẹnyụn̄ ẹn̄wọn̄, ẹnyụn̄ ẹdat esịt.” Ke ataata usụn̄ ye ke ndamban̄a usụn̄, mme owo oro ẹma “ẹdụn̄ ke ifụre, kpukpru owo ke idak vine mmọ ye eto fig mmọ . . . ke ofụri eyo Solomon.”—1 Ndidem 4:20, 25.

Ini ẹmekpụhọde. Uwem mfịn enen̄ede okpụhọde ọkpọn̄ mme ini inemesịt oro ẹkebede ke ata anyanini do. Ke mîbietke eyo Solomon, akpan mfịna mfịn edi unana. Idem ke mme idụt uforo, unana odu. Ke uwụtn̄kpọ, ke United States ye N̄ka Europe, se ikperede ndisịm mbahade owo 15 eke ikie ẹdi ubuene, ntre ke Ndutịm N̄kọri Edidiana Mme Idụt ọdọhọ.

Kaban̄a idaha ofụri ererimbot, The State of the World’s Children 1994, ntọt otode UNICEF (United Nations Children’s Fund), ọdọhọ ke mbahade kiet ke itie ition ke ibatowo ẹdude ke ererimbot ẹdi ọkpọîkpọi ubuene, adiande ete ke nte uwem etiede ye ata ediwak mbon oro ẹdide ubuene ke ererimbot “ototịm ọsọn̄ ẹnyụn̄ ẹnana idotenyịn.”

Ke ndusụk idụt, ekọmurua n̄kpọ nditotịm ndọk anam n̄kpọ ototịm ọsọn̄ ye mme ubuene. N̄wan kiet ke idụt Africa kiet ọkọdọhọ ete: “Eyekụt n̄kpọ ke urua, ndien ọdọhọ ete, ‘Ọfọn, yak n̄ka ufọk n̄kemen okụk ndidep.’ Ke afiakde aka ke hour kiet ebede, n̄kukụre se ẹdọhọde fi edi nte ke ukemeke ndidep enye koro ndisụk ndodori urua edi oro. Nso ke owo edinam? Edi ata akwa edikpu.”

N̄wan efen do ọkọdọhọ ete: ‘Man idu uwem, nnyịn imefre iban̄a mme n̄kpọ eken oro iyomde. Ofụri se idikerede idahaemi edi nte idinyenede udia.’

Nte ekemde ye Edidiana Mme Idụt, idotenyịn idụhe inọ ini iso. Ke uwụtn̄kpọ, UNICEF ọdọhọ ete ke edieke idaha oro odude ke ibatowo idahaemi akade iso, ibat ubuene ke ofụri ererimbot eyedọk utịm ikanan̄ “ke eyouwem kiet kpọt.”

Edi, kpa ye mme idaha ndutịm uforo ye n̄kaowo otịmde-tịm ọdiọk, mme asan̄autom Abasi ẹnyene ntak ndinyene idotenyịn. Okposụkedi mmọ ẹdude uwem ke otu mbon oro ẹsede ini iso nte editịmde-tịm ọdiọk akan, mme asan̄autom Abasi ẹsak iso ẹse ini iso ye idatesịt ye mbuọtidem. Udiana ibuotikọ eyeneme mme ntak edide ntre.

[Ebiet Ẹdade Ndise Ẹto ke page 3]

De Grunne/Sipa Press