‘Ẹyịbi Mi Ẹduọk, Edi Ibiatke Mi Uwem’

NTE ULF HELGESSON OBỤKDE

Ke July 1983, mme dọkta ẹmi ẹkenụhọde ẹse mi ẹma ẹdọhọ ẹte: “Enye edemede!” Ẹkesio mi mbufụt emi ọkọniọn̄de ke sentimita 12 ke urụk ekọt ke awak n̄kukọhọ usiakidem oro akadade hour 15. Mma nduọ akpauben̄ ofụri ofụri.

USEN ifan̄ ke ukperedem, ẹma ẹsio mi ẹka ufọkibọk emi okoyomde usụn̄ ke n̄kpọ nte kilomita 60 ọkpọn̄ Hälsingborg isọn̄ emana mi ke edem usụk Sweden. Do mma ntiene mbuana ke ndutịm edifiak nnam owo okop nsọn̄idem. Abiaibọk usọbọ ikpọkidem ama ọdọhọ ete ke enye eyekpon nsịn̄ede etieti, kpa ye oro ama ọdọn̄ mi nditọn̄ọ. Mma nnen̄ede nyom ndifiak nsan̄a isan̄. Ebe ke ndisịn ifịk ntiene ndutịm usịn̄edeidem eke hour ition ke usen, mma nnam usọp usọp n̄kọri.

Ọfiọn̄ kiet ke ukperedem ke ini esenyịn oro asan̄ade-san̄a akanamde utom ke esop nnyịn, enye ye mbiowo Christian eken ẹma ẹnam isan̄ anyanusụn̄ man ẹdinịm mbono mbiowo esop ke ubet ufọkibọk mi. Ami n̄kokop idatesịt didie ntem ke uyarade ima nditọete emi! Mme nurse ẹkedude ke ubet ufọkibọk oro ẹma ẹnọ ofụri otu oro tea ye sandwich ke mbono oro ama okokụre.

Ke akpa mme dọkta ẹma ẹkop n̄kpaidem ẹban̄a n̄kọri oro n̄kenyenede. Ke ọfiọn̄ ita ẹma ẹkebe mma n̄keme nditie nnennen ke n̄kpọitie mbon n̄kpọnnam mi nnyụn̄ n̄keme idem ndidada ke ekpri ibio ini. Mma n̄kop inemesịt nnyụn̄ ntịm mbiere ndifiak nsan̄a isan̄. Ubon mi ye ekemmọ mme Christian ẹma ẹnọ mi ekese nsịnudọn̄ ke ini oro mmọ ẹkedide. Mma n̄kam n̄keme ndisika ufọk ke ini ke ini.

Ata Ukpụhọde

Nte ededi, ke oro ama ekebe, n̄kanamke n̄kọri ekededi aba. Ikebịghike abiaibọk usọbọ ikpọkidem oro ama ọnọ mi ubiak ubiak etop ete: “Idem idisọn̄ke fi ikan emi aba!” Idahaemi uduak ekedi ndisịn udọn̄ nnọ mi ndisan̄a ke idemmi ke n̄kpọitie mbon n̄kpọnnam. Mma n̄kere se idiwọrọde inọ mi. N̄wan mi edinam didie n̄kpọ? Enye ke idemesie ama akaka akpan usiakidem onyụn̄ oyom un̄wam mi. Nte ediyom ẹse mi enyịn taktak ke ufọkibọk?

Mma n̄kop mfụhọ etieti. Ukeme, uko, ye odudu mi ẹma ẹkụre. Mme usen ẹma ẹbe, ndien nsụk nsan̄ake isan̄. Ikụreke ke ndikọduọ akpauben̄ ke ikpọkidem edi n̄ko ibikpai ama omụm mi ke n̄kan̄ eke ntụk ye eke spirit. Ẹma ‘ẹyịbi mi ẹduọk.’ N̄kesise idemmi kpukpru ini nte owo emi okopde nsọn̄idem ke n̄kan̄ eke spirit. Mma nnyene mbuọtidem emi otịmde owụhọ ke Obio Ubọn̄ Abasi. (Daniel 2:44; Matthew 6:10) Mma nnịm un̄wọn̄ọ Bible ke akpanikọ nte ke kpukpru udọn̄ọ ye mmeme ẹyekụre ke edinen obufa ererimbot Abasi ndien nte ke ẹyenam ofụri ubonowo ẹfiak ẹnyene mfọnmma uwem do. (Isaiah 25:8; 33:24; 2 Peter 3:13) Idahaemi mma nduọ akpauben̄ idịghe sụk ke ikpọkidem edi n̄ko ke spirit. Eketie nte ‘ẹbiat mi uwem.’—2 Corinth 4:9.

Mbemiso n̄kade iso n̄kan oro, yak ntịn̄ esisịt nnọ mbufo mban̄a idaha mi ke uwem.

Ubon Emi Okopde Inemesịt

Ami n̄kamana ke 1934, ndien mma nsikop nsọn̄idem kpukpru ini. Ke ntọn̄ọ ntọn̄ọ iduọk isua 1950, mma nsobo ye Ingrid, ndien ima idọ ndọ ke 1958 inyụn̄ idụn̄ ke obio Östersund, ke ufọt ufọt Sweden. Ini ukpụhọde ama edi ke uwem nnyịn ke 1963 ke ini nnyịn ikọtọn̄ọde ndikpep Bible ye Mme Ntiense Jehovah. Ke ini oro nnyịn ikenyene n̄kpri nditọ ita—Ewa, Björn, ye Lena. Ikebịghike ofụri ubon nnyịn ama ekpep n̄kpọ onyụn̄ anam n̄kọri mfọn mfọn ke ifiọk akpanikọ Bible.

Esisịt ini ke ima ikọtọn̄ọ ukpepn̄kpọ, nnyịn ima iwọrọ ika Hälsingborg. Do, ami ye n̄wan mi ima iyak idem nnyịn inọ Jehovah inyụn̄ ina baptism ke 1964. Inemesịt nnyịn ama okpon ke ini Ewa, adiaha nnyịn, akanade baptism ke 1968. Isua itiaba ke ukperedem, ke 1975, Björn ye Lena n̄ko ẹma ẹna baptism, ndien ẹma ẹmek mi ebiowo ke esop Christian ke isua oro eketienede.

Utom idịbi udia mi ama an̄wam mi nditịm nse mban̄a mme udọn̄ n̄kpọ obụkidem ubon mi. Ndien inemesịt nnyịn ama okpon ke ini Björn ye Lena ẹketọn̄ọde utom ukwọrọikọ uyọhọ ini. Ikebịghike ẹma ẹnọ Björn ikot ndinam utom ke ọfis n̄kọk itieutom eke Mme Ntiense Jehovah ke Arboga. Uwem ama ọfọn ye nnyịn, yak idọhọ ntre. Ekem, ke ntọn̄ọ ntọn̄ọ 1980, mma ntọn̄ọ ndikop ubiak mbufụt oro ẹkesiakde ẹsio ke akpatre ke akpan usiakidem oro ẹkenamde ke 1983.

Ndikan Mmemidem eke Spirit

Ke ini ẹkesiande mi nte ke ndifiakke nsan̄a isan̄ aba, eketie nte idotenyịn ama akpa ke uwem mi. Didie ke n̄kafiak n̄kop nsọn̄idem eke spirit? Ama emem utom akan nte n̄kekerede. Ami n̄kukụre n̄kemen Bible mi nnyụn̄ ntọn̄ọ ndikot. Nte n̄kokotde, ntre ke n̄kokop nsọn̄idem eke spirit n̄kan. Ke akande kpukpru mma ndima Ukwọrọikọ Jesus oro ke Obot. Mma n̄kot enye mfiak n̄kot nnyụn̄ ntie n̄kere enye.

Mma mfiak n̄kop inemesịt ke uwem. Ebede ke edikot ye editie n̄kere, mma ntọn̄ọ ndikụt mme ifet utu ke mme n̄kpọ ubiọn̄ọ. Mma mfiak nnyene udọn̄ edibuana mme akpanikọ Bible ye mmọ en̄wen, ndien mma nyụhọ udọn̄ emi ebe ke ndinọ mbonutom ufọkibọk ye mmọ en̄wen ẹmi n̄kosobode ikọ ntiense. Ubon mi ama ọnọ mi ọyọhọ ibetedem onyụn̄ ọbọ ukpep ke nte ekemede ndise mi enyịn. Ke akpatre mma n̄keme ndikpọn̄ ufọkibọk oro.

Mma ndisịm ufọk ke akpatre. Nso usen inemesịt ke emi ekedi ntem ọnọ kpukpru nnyịn! Ubon mi ama anam ndutịm emi ekesịnede edise mi enyịn. Björn, eyen mi eren, ama ebiere ndikpọn̄ utom ke ọfis n̄kọk itieutom eke Mme Ntiense Jehovah, onyụn̄ ọnyọn̄ edi ufọk man edin̄wam ke ndise mi enyịn. Ama akama ndọn̄esịt etieti ndibọ ekese ima ye edikere mban̄a ntre nto ubon mi.

Ndiyọ Ukpụhọde En̄wen

Nte ededi, idem mi ama ọdiọk akan nte ini akakade, ndien ekedi ọkpọsọn̄ n̄kpọ ọnọ mi ndisan̄a. Ke akpatre, kpa ye mme ukeme oro ubon mi ekesịnde, mmọ ikekemeke aba ndise mi enyịn ke ufọk. Ntre mma n̄kere ke ọkpọfọn ndika ufọk ukpeme. Emi akafiak ọwọrọ mme ukpụhọde ye obufa edinam ofụri ini. Edi n̄kayakke emi edi ukpụhọde ke n̄kan̄ eke spirit.

Akananam ntreke edikot Bible ye edinam ndụn̄ọde. Mma nsikaiso n̄kere mban̄a se n̄kemede ndinam, idịghe se mmen̄kemeke ndinam. Mma nsitie n̄kere mme edidiọn̄ eke spirit ẹmi kpukpru Mme Ntiense Jehovah ẹnyenede. Mma nsịk n̄kpere Jehovah ke akam nnyụn̄ nda kpukpru ifet ndikwọrọ ikọ nnọ mmọ en̄wen.

Idahaemi nsibiat okoneyo mi ye ndusụk ini mi ke usen ke ufọk ukpeme. Mbiat uwemeyo ye mbubịteyo ke ufọk mîdịghe ke mme mbonoesop Christian nnyịn. Itieutom ufọn obio esinam ndutịm n̄kpọisan̄ kpukpru ini ndimen mi n̄ka mme mbonoesop nnyụn̄ nnyọn̄ ye edimen mi n̄ka ufọk nnyụn̄ nnyọn̄. Ubon mi, nditọete ke esop, ye mme anamutom ke ufọk ukpeme emi ẹse mi enyịn ke utịbe utịbe usụn̄.

Ndinam Se N̄kemede

Ami ndaha idemmi nte owo udọn̄ọ, ubon mi inyụn̄ inamke n̄kpọ ye ami ke utọ usụn̄ oro, nditọete Christian mi inyụn̄ inamke. Ẹse mi enyịn ima ima, an̄wamde mi ndikaiso nnam utom uforo uforo nte ebiowo. Mmesinịm Ukpepn̄kpọ N̄wedesop kpukpru urua, ọkọrọ ye Ukpepn̄kpọ Enyọn̄-Ukpeme eke urua ke urua ke Ufọkmbono Obio Ubọn̄. Edi ọkpọsọn̄ n̄kpọ ọnọ mi ndikụbọde mme ikọn̄n̄wed Bible, ntre ẹsinọ owo an̄wam mi ndinam oro ke mme mbonoesop. Nsitie ke n̄kpọitie mbon n̄kpọnnam mi nnịm mme mbonoesop nnyụn̄ nnọ mme utịn̄ikọ.

Ntem nsụk n̄kekeme ndinam ediwak n̄kpọ ẹmi n̄kesimade ndinam mbemiso, esịnede utom ubọkerọn̄. (1 Peter 5:2) Nsinam emi ke ini nditọete iren ye iban ẹdide ẹbịne mi ndiyom un̄wam m̀mê item. Mmesida urụk ukopikọ n̄ko, nnamde usio-ukot ebe ke ndikot mbon en̄wen ke urụk ukopikọ. Nsịnudọn̄ emi esisụn̄ọde esidi eke edem mbiba. (Rome 1:11, 12) Ufan kiet ama ọdọhọ ke ndondo emi ete: “Ke nnennen ini oro n̄kopde mfụhọ, afo okot ndinam mi n̄kop idatesịt.” Edi ami n̄ko mmokop nsịnudọn̄, mfiọkde nte ke Jehovah ke ọdiọn̄ mme ukeme mi.

Ami mmesinyene eti ebuana ye nditọwọn̄ ke esop mbemiso ye ke mme mbonoesop ẹsuanade. Sia ami ntiede ke n̄kpọitie mbon n̄kpọnnam mi, ibuot nnyịn ẹsida ukem ke ini inyenede nneme ye kiet eken. Mmesidara esịt akpanikọ mmọ ye editie in̄wan̄în̄wan̄. Ekpri eyen kiet ama ọdọhọ mi inikiet ete: “Afo edi owo udọn̄ọ emi eyede ke san̄asan̄a usụn̄!”

Ami ke ndara edinam n̄kpọ nnọ Jehovah ebe ke ndinọ ntịn̄enyịn ke se n̄kemede ndinam utu ke ndifịna mban̄a se mmen̄kemeke ndinam. Ami mmekpep ekese nto se itịbede inọ mi. Mmọfiọk nte ke nnyịn ibọ ukpep ye nsịnudọn̄ ebe ke mme idomo ẹmi nnyịn isobode.—1 Peter 5:10.

Mmokụt ke ediwak mbon ẹmi ẹkopde nsọn̄idem ẹkpu ndidiọn̄ọ nte ke nnyịn kpukpru ini inyene ndida utuakibuot Ete nnyịn eke heaven ke akpan n̄kpọ. Edieke nnyịn mîdaha, ndutịm ukpepn̄kpọ, mme mbonoesop, ye utom ukwọrọikọ nnyịn ẹkeme ndikabade ndi ikpîkpu edinam ofụri ini. Ami nda ndutịm ẹmi nte ẹdide akpan n̄kpọ ẹnọ edibọhọ utịt ererimbot emi ndụk Paradise isọn̄ emi Abasi ọn̄wọn̄ọde.—Psalm 37:9-11, 29; 1 John 2:17.

Ana nnyịn inyene idotenyịn uwem ke obufa ererimbot Abasi emi edide kpukpru ini ke esịt nnyịn. (1 Thessalonica 5:8) Mmekpep n̄ko nditre ndikpa mba ke ndin̄wana mbiọn̄ọ ntụhọ ekededi ndikabade n̄kop mmemidem. Mmekpep ndise Jehovah nte Ete mi ye esop esie nte Eka mi. Mmedifiọk nte ke edieke nnyịn isịnde ukeme, Jehovah ekeme ndida owo nnyịn ekededi nnam n̄kpọ man edi asan̄autom esie emi enyenede uforo.

Idem okposụkedi ami ke ndusụk ini n̄kekerede ke ‘ẹma eyịbi mi ẹduọk,’ yak ndọhọ ntre, edi ‘ikabiatke mi uwem.’ Akananam Jehovah ye esop esie ikpọn̄ke mi, ubon mi ye nditọete Christian mi inyụn̄ ikpọn̄ke mi. Ke ntak nsọn̄ọde nyịre ke Bible nnyụn̄ ntọn̄ọde ndikot enye, ami mmafiak nnyene odudu eke spirit. Ami mmọkọm Jehovah Abasi, emi ọnọde “akwa ubom odudu” ke ini nnyịn iberide edem ye enye.—2 Corinth 4:7.

Ye ọyọhọ mbuọtidem ye ibetedem ke Jehovah, ami ke nsak iso nse ini iso ye ọkpọsọn̄ udọn̄. Ami mmonịm ke akpanikọ nte ke ibịghike Jehovah Abasi eyesu un̄wọn̄ọ esie aban̄ade paradise oro ẹfiakde ẹwụk mi ke isọn̄ ọkọrọ ye kpukpru utịbe utịbe edidiọn̄ ẹmi enye edidade edi.—Ediyarade 21:3, 4.