Ntọt M’ọkwọrọ Obio Ubọn̄

“Ikọ Abasi Ọdọdiọn̄ Asuana”

ESOP Christian ama ọkọri inikiet inikiet ọtọn̄ọde ke n̄kpọ nte mme andibuana 120 osịm se ibede 3,000 ke ẹma ẹkesiak enye. (Utom 1:15; 2:41) Bible anam an̄wan̄a ete ke “Ikọ Abasi ọdọdiọn̄ asuana; ibat mbet onyụn̄ ọtọt ke Jerusalem etieti.” (Utom 6:7) Ke isua ifan̄ ẹma ẹkebe, esop oro ẹkesiakde obufa obufa ama akabade edi esop ofụri ererimbot enyenede mme Christian ẹdude ke Africa, Asia, ye Europe.

Kpasụk ntre mfịn esop Christian ke enyene usọp usọp n̄kọri. Ke uwụtn̄kpọ, ke Mexico, ibat mme anditan̄a Obio Ubọn̄ ọmọkọri ọtọn̄ọde ke 130,000 osịm 443,640 ke n̄kpasịp isua ition! Ke 1995, owo 1 ke otu owo 59 ke Mexico ẹkedụk Editi n̄kpa Christ emi Mme Ntiense Jehovah ẹkenịmde. Edi, owo inamke idọk eke spirit ikụre ke idụt oro, nte ifiọkutom etienede mi owụtde.—Matthew 9:37, 38.

Ke obio kiet ke Chiapas stet, owo ndomokiet ikonyịmeke ukpepn̄kpọ Bible ye Mme Ntiense Jehovah, idem ke mmọ ẹma ẹkekwọrọ eti mbụk ke n̄kpọ nte isua 20 ke ikpehe oro. Nte an̄wan̄ade, ediwak mbio obio oro ẹkekop ndịk ẹban̄a owo emi ẹkediọn̄ọde nte owo afai. Mmọ ẹma ẹkop ndịk ẹban̄a se enye edinamde edieke enye edide edifiọk ke mmọ ẹkpep Bible ye Mme Ntiense.

Ntiense iba ẹmi ẹnyenede uko ẹmi ẹkewọrọde ẹdidụn̄ ke ikpehe oro ẹma ẹbiere ndise mban̄a mfịna oro ke ndika nnennen mbịne eren oro ẹtịn̄de ẹban̄a mi. Ke ini mmọ ẹkesịmde ufọk esie, n̄wan esie ọkọwọrọ edi ke enyịnusụn̄ onyụn̄ ọnọ ọyọhọ n̄kpan̄utọn̄ ke etop mmọ. Enye ekenyene udọn̄ akpan akpan ke se Bible etịn̄de aban̄a edidu uwem ke paradise ke isọn̄. Edi enye ama onyịme ke ebe imọ eyefịna imọ etieti edieke imọ ikpepde Bible. Mme Ntiense oro ẹma ẹnam an̄wan̄a ẹte ke ibọhọke enye odụn̄ọde se Bible etịn̄de ye ntịn̄enyịn, tutu amama enye idifiọkke nte ẹnamde n̄kpọ ẹnọ Abasi inyụn̄ idara uwem ke isọn̄ ke nsinsi. Enye ama onyịme ukpepn̄kpọ Bible.

Kpa nte okodoride enyịn, ebe esie ikenemke esịt ye ubiere esie. Enye ama akpan enye ete okûda moto imọ aka mme mbonoesop Christian, okposụkedi ekesiyakde enye ada aka mme n̄kpọ en̄wen. Kpa ye ubiọn̄ọ esie, enye ama esisasan̄a kpukpru ini aka Ufọkmbono Obio Ubọn̄ eke Mme Ntiense Jehovah oro ekekperede akan, emi okoyomde usụn̄ ke kilomita duop. Ikebịghike mbon en̄wen ke obio ẹma ẹkụt uko ye ubiere esie. Mme owo ẹma ẹtọn̄ọ ndinọ n̄kpan̄utọn̄ ke ini Mme Ntiense ẹkade ufọk mmọ. Ndusụk owo ẹma ẹkam ẹtọn̄ọ nditiene n̄wan emi n̄ka mme mbonoesop. Ke esisịt ini ebede, Mme Ntiense ẹkenịm n̄kpọ nte ukpepn̄kpọ Bible 20 ke obio oro!

Ufan n̄wan emi ama ebiere n̄ko ndikpep Bible kpa ye ubiọn̄ọ ebe esie. Ke edide n̄kpọ n̄kpaidem, ebe akpa n̄wan oro ama esịn udọn̄ ọnọ enye ete anam ntre. Ke eren emi ama ekenyene nneme ye ebe esie, ubiọn̄ọ oro ama etre. Ntre ke ekedi nte ke isua 20 ẹma ẹkebe n̄kpasịp akpanikọ Bible ama otịbe ke akpatre, ye se iwakde ibe owo 15 ẹkpepde Bible ẹnyụn̄ ẹdụkde mme mbonoesop Christian, esịnede iban iba ẹmi, oro idahaemi ẹsuande eti mbụk.