‘Nte Mmedi N̄kpọ Ke Iso Abasi?’

“NTE Mmedi N̄kpọ? Nte Abasi Ekere Aban̄a?” Ntre ke ẹkewet ke ibuotikọ kiet ke Christianity Today. Philip Yancey, andikewet ibuotikọ oro, ọdọhọ ete: “Ekese ubọkọkọ mi nte ewetn̄wed odu akanade mfịna ubiak. Mmesibụp ukem mbụme ẹmi ndien ndien, nte n̄kpọ eke ntụn̄de akani unan oro mîkpaha ima. Mmesikop n̄kpọ nto mme andikot n̄wed mi, ndien mme mbụk mmọ ẹmi ẹsisan̄ade ye ọkpọsọn̄ ubiak ẹsọn̄ọ mme eyịghe mi.”

Ekeme ndidi afo n̄ko emenyene eyịghe aban̄a udọn̄ oro Abasi enyenede ke uwem fo. Oh, ekeme ndidi afo ememehe ye John 3:16, emi ọdọhọde ete ke “Abasi akamama ererimbot ntem, tutu Enye osio ikpọn̄-ikpọn̄ Eyen emi Enye obonde ọnọ.” Mîdịghe ekeme ndidi afo ama okot Matthew 20:28, emi ọdọhọde ete ke Jesus ekedi man “ọnọ uwem Esie ndifak ediwak owo.” N̄ko-n̄ko afo emekeme ndibụp ete, ‘Nte Abasi ọdiọn̄ọ mi? Nte enye ekere aban̄a mi nte san̄asan̄a owo?’ Eti ntak odu ndinịm ke akpanikọ nte ke enye ekere, nte nnyịn idikụtde.