Abasi, Ukara, Ye Afo

“Ufọkabasi ye Ukara Ẹtuaha ke Ekikere Aban̄ade Usiondọ ke Ireland.”

AKPAN ibuotikọ emi ke The New York Times owụt nte mme owo ẹkemede ndisak iso nse edinam edimek ke se Ukara oyomde ye se ufọkabasi mmọ ekpepde.

Ibuotikọ oro ọkọdọhọ ete: “Ke se isụhọrede ikan ọfiọn̄ kiet mbemiso ofụri owo ẹsịnde n̄wed ndibiere m̀mê ẹkpebiat ibet esie oro odoride ukpan ke usiondọ, Ireland emi mbon Roman Catholic ẹwakde ẹkan ke okụt akwa ntuaha oro mîsiwakke nditịbe ke ufọt mme adausụn̄ ke Ukara esie ye eke mbon ufọkabasi esie.” Ukara ama aduak ndidorode ukpan oro ẹkedoride ke usiondọ mfep, ke adan̄aemi Ufọkabasi Catholic ọsọn̄ọde asua usiondọ ye edifiak ndọ ndọ. Mbon Catholic ke Ireland ẹkenyene ndinam edimek ke ufọt Ufọkabasi ye Ukara. Nte n̄kpọ eketiede, Ukara akada esisịt ibat akan.

Ke ata ndyọ ndyọ usụn̄, ke ediwak isua mme owo ke Edere Edere Ireland ẹmesak iso ẹse ndot ndot en̄wan kaban̄a itie edikara eke idụt. Ẹmewot ediwak owo. Mbon Roman Catholic ye Protestant ẹma ẹnyene nsio nsio ekikere ẹban̄a Ukara emi mmọ ẹkpesụkde ibuot ẹnọ: ukara Britain oro akade iso akara ke Edere Edere Ireland m̀mê akwa ukara eke ofụri Ireland.

Ukem ntre, ke se ikedide Yugoslavia, mbon oro ẹkekarade ẹma ẹyom mme andibuana ke nsio nsio ido ukpono, ẹsịnede Catholic ye Orthodox, ẹn̄wana ke ekọn̄ unyan̄a adan̄a. Ye ukeuke eyenisọn̄, ewe ekedi akpa mbiomo esie? Nte mmọ ẹkenyene nditiene mbon oro ẹkedọhọde ke ida ke ibuot Ukara, mîdịghe ndi mmọ ẹkenyene ndikop uyo Abasi, emi ọdọhọde ete: “Kûwot owo . . . Ma mbọhọidụn̄ fo nte amade idem fo”?—Rome 13:9.

Afo emekeme ndikere ke utọ idaha emi idifịnake fi tutu amama. Edi enye ekeme. Ke akpanikọ, enye ekeme ndibehe fi idem idahaemi. Ke n̄wed esie oro The State in the New Testament, ekpep ukpepn̄kpọ ido ukpono oro Oscar Cullmann etịn̄ aban̄a “mme ubiere ẹmi ẹdide n̄kpọ n̄kpa ye uwem oro anade m̀mê ẹkemede ndiyom mme Christian eyomfịn ẹnam ke mme ini mbrenyịn ke ini mme ukara ufịk ẹdịghede mmọ.” Nte ededi, enye n̄ko etịn̄ aban̄a “ataata mbiomo kpukpru Christian oro onyụn̄ edide akpan n̄kpọ—n̄ko usụn̄uwem Christian ke inua-okot ‘nti’ idaha ‘eke usen ke usen’—ndisobo nnyụn̄ nse mban̄a ọkpọsọn̄ mfịna oro osịmde enye n̄kukụre koro enye edide Christian.”

Ntre nte itie ebuana ke ufọt ido ukpono ye Ukara ekpenyene ndibehe mme Christian mfịn? Ke akpanikọ ekpenyene ndibehe. Ọtọn̄ọde ke ata ntọn̄ọ, mme Christian ẹdomo ndikọri ekikere oro adade ukem ukem mban̄a ukara owo. Ukara Rome ama ekpe ikpe ọnọ, obiom ikpe, onyụn̄ owot adausụn̄ mmọ, Jesus Christ. Mme mbet esie ẹkenyene ndinam mme mbiomo Christian mmọ ẹda ukem ukem ye utom oro mmọ ẹkenamde ẹnọ Obio Ukara Rome. Ke ntre, ndidụn̄ọde itie ebuana mmọ ye ukara eyenọ mme Christian ndausụn̄ mfịn.

Ebiet Ẹdade Ndise Ẹto ke page 3]

Tom Haley/Sipa Press