Mmọ Ẹma Ẹnam Uduak Jehovah
Philip Onịm Akwa Owo Ukara Ethiopia Baptism
KE ADAN̄AEMI awatde ke chariot esie, owo Ethiopia kiet ama ada ini esie anam n̄kpọ ọniọn̄ ọniọn̄. Enye ke okokot n̄wed uyo ọwọrọ—kpa edinam oro ekedide ọsọ ke otu mme akaisan̄ ke akpa isua ikie. Owo emi ekedi akwa owo ukara “emi odude ke idak Candace ọbọn̄an̄wan mbon Ethiopia.”a Enye ‘ekedi andikama ofụri inyene esie’—ke nditịm ntịn̄, enye ekedi isụn̄utom oro akamade okụk. Akwa owo ukara emi okokot Ikọ Abasi man enyene ifiọk.—Utom 8:27, 28.
Philip ọkwọrọikọ ama odu ekpere do. Angel ama ada enye usụn̄ aka itie oro, ndien idahaemi ọdọhọ enye ete: “San̄a kpere kadiana chariot oro.” (Utom 8:26, 29) Nnyịn imekeme ndikere nte Philip obụpde idemesie ete, ‘Owo emi edi anie? Nso ke enye okot? Ntak ẹdọhọde ami n̄kosobo ye enye?’
Nte Philip ekefehede etiene chariot oro, enye ama okop owo Ethiopia oro okotde mme ikọ ẹmi: “Ẹda enye nte erọn̄ ẹka ndiwot; ndien kpa nte eyen-erọn̄ mîsioroke uyo ke iso andifat enye idet, kpa ntre enye inyụn̄ itatke inua esie. Ke akwa usụhọde esie ẹbiat ikpe esie ẹfep. Anie edibụk emana esie? Koro ẹsịbede uwem esie ẹfep ke isọn̄.”—Utom 8:32, 33.
Philip ama ọsọsọp ọfiọk ubak udịmikọ oro. Enye okoto uwetn̄kpọ Isaiah. (Isaiah 53:7, 8) Idem ama akpa owo Ethiopia oro aban̄a se enye okokotde. Philip ama ọtọn̄ọ nneme ke ndibụp: “Nte ọmọfiọk se ikọ oro okotde ọwọrọde?” Owo Ethiopia oro ama ọbọrọ ete: “N̄keme didie ke owo mîtemeke mi?” Ekem enye ama ekpe Philip ubọk ete ọdọk editie ye imọ ke chariot.—Utom 8:30, 31.
“Nso Ibiọn̄ọ Mi Ndina Baptism?”
Owo Ethiopia oro ama obụp Philip ete: “Mbọk, prophet etịn̄ emi aban̄a anie? M̀mê etịn̄ aban̄a idem esie, m̀mê etịn̄ aban̄a owo efen?” (Utom 8:34) Owo Ethiopia oro ndiketre ndifiọk emi ikedịghe n̄kpọ n̄kpaidem, koro ndifiọk se “eyenerọn̄,” m̀mê “asan̄autom,” eke prọfesi Isaiah ẹwọrọde ekedi ndịben̄kpọ ke anyanini. (Isaiah 53:11, NW) Anaedi emi akan̄wan̄a didie ntem ke ini Philip ọkọkwọrọde “eti mbụk aban̄ade Jesus” ọnọ owo Ethiopia oro! Ke esisịt ini ama ekebe owo Ethiopia oro ama ọdọhọ ete: “Sese mmọn̄ mi; nso ibiọn̄ọ mi ndina baptism?” Ntre Philip ama onịm enye baptism do kpa ke ebe oro.—Utom 8:35-38.
Nte emi ekedi mbabuat edinam? Baba-o! Owo Ethiopia oro ekedi andikpono Abasi ke ido mme Jew.b Ntre enye ama ededi andikpono Jehovah oro ekenyenede ifiọk N̄wed Abasi, esịnede mme prọfesi ẹban̄ade Messiah. Nte ededi, enye ikenyeneke ọyọhọ ifiọk. Idahaemi enye ama ọkọbọ akpan ntọt emi aban̄a utom Jesus Christ, ama an̄wan̄a owo Ethiopia emi se Abasi okoyomde oto enye onyụn̄ eben̄e idem ndinam n̄kpọ n̄kekem. Ama odot ẹnịm enye baptism.—Matthew 28:18-20; 1 Peter 3:21.
Ke oro ebede, “Spirit Jehovah ada Philip adaha.” Enye ama ebe aka efakutom efen. Owo Ethiopia oro ama “ọnyọn̄ esie ke idatesịt.”—Utom 8:39, 40.
Ukpepn̄kpọ Odude Ọnọ Nnyịn
Nte mme asan̄autom Jehovah eke eyomfịn, nnyịn imenyene mbiomo ndin̄wam mme owo oro ẹnyenede esịt akpanikọ ẹkpep akpanikọ eke Ikọ Abasi. Ediwak owo ẹma ẹkụt unen ke ndinọ mmọ en̄wen eti mbụk ke adan̄aemi ẹkade isan̄ m̀mê ke mme idaha efen oro owo mîtịmke-tịm idem. Nte utịp utom ukwọrọikọ Obio Ubọn̄, isua kiet kiet ediwak tọsịn owo ke mme itie ikie ẹsiyarade uyakidem mmọ nnọ Jehovah Abasi ebe ke ndina baptism.
Nte ededi, owo ikpenyeneke ndibobụmede n̄konịm mbufa owo baptism. Akpa kan̄a ana mmọ ẹnyene nnennen ifiọk ẹban̄a Jehovah Abasi ye Eyen esie, Jesus Christ. (John 17:3) Ndien ana mmọ ẹkabade esịt, ẹkpọn̄ idiọk eduuwem ẹnyụn̄ ẹnam ukpụhọde man otodo eduuwem ekekem ye mme idaha Abasi. (Utom 3:19) Emi esida ini, akpan akpan edieke edide idiọk ekikere ye eduuwem ẹma ẹnen̄ede ẹdọn̄ n̄kam. Ke adan̄aemi anade mbufa owo ẹbat se iditakde ke ndidi Christian mbet, ikpọ edidiọn̄ ẹsisụn̄ọ ẹto edibe ndụk itie ebuana oro ẹyakde idem ẹnọ Jehovah Abasi. (Men Luke 9:23; 14:25-33 domo.) Mbon oro ẹdide Mme Ntiense Jehovah ẹsida mme utọ mbufa owo oro ye nduaidem ẹwụt esop oro Abasi adade ndinam uduak esie. (Matthew 24:45-47) Ukem nte owo Ethiopia, mmọemi ẹyedat esịt ke ndikpep mban̄a nnyụn̄ nnam uwem mmọ ekekem ye se Abasi oyomde oto mmọ.
[Mme Ikọ idakisọn̄]
a “Candace” idịghe enyịn̄ edi edi udorienyịn̄ (ukem nte “Pharaoh” ye “Caesar”) emi enyenede mme andida itie ọbọn̄an̄wan mbon Ethiopia.
b Mme andikpono Abasi ke ido mme Jew ẹkedi mbon oro mîkedịghe nditọ Israel oro ẹkemekde ndinam n̄kpọ ekekem ye Ibet Moses.—Leviticus 24:22.
[Ekebe ke page 8]
Ntak Ẹkotde Eunuch?
Ke ofụri mbụk Utom ibuot 8, ẹkot owo Ethiopia oro “eunuch.” Nte ededi, sia Ibet Moses mîkoyomke erenowo emi ẹsiode osio odụk ke esop, eren emi nte an̄wan̄ade ikedịghe eunuch ke ataata usụn̄ifiọk. (Deuteronomy 23:1) Ikọ Greek oro adade ọnọ “eunuch” ekeme ndida mban̄a owo oro odude ke akamba itie. Ntem, owo Ethiopia oro ekedi akwa owo ukara ke idak ọbọn̄an̄wan Ethiopia.