Ndida Ibet Christ Ndu Uwem
“Ẹbiom mbiomo kiet eken; ntem ke mbufo ẹdinịm ibet Christ.”—GALATIA 6:2.
1. Ntak emi ẹkemede ndidọhọ ke ibet Christ edi ọkpọsọn̄ odudu oro onụkde owo ndinam eti n̄kpọ mfịn?
KE Rwanda, mbon Hutu ye Tutsi ẹdide Mme Ntiense Jehovah ẹma ẹsịn uwem mmọ ke itiendịk man ẹkpeme kiet eken ẹbọhọ uwot orụk oro okosobode idụt oro ke ndondo emi. Mme Ntiense Jehovah ke Kobe, Japan, oro ẹkeduọkde mbonubon ke akama-nsobo unyekisọn̄ ẹma ẹkop mfụhọ ẹban̄a ntakurua mmọ. Kpa ye oro, mmọ ẹma ẹdaha usọp usọp ẹkenyan̄a mbon unọmọ eken. Ih, mme inem inem uwụtn̄kpọ ẹtode ofụri ererimbot ẹwụt ẹte ke ibet Christ ke enyenyene ufọn mfịn. Enye edi ọkpọsọn̄ odudu oro onụkde owo ndinam eti n̄kpọ.
2. Didie ke Christendom okpu ndifiọk akpan n̄kpọ eke ibet Christ, ndien didie ke nnyịn inam n̄kpọ ndinịm ibet oro?
2 Ke ukem ini oro, prọfesi Bible aban̄ade “ukperedem ini” eke ndiọkeyo emi ke osu. Ediwak owo ẹnyene “enyọn̄-enyọn̄ ido uten̄e Abasi” edi ‘isan̄ake n̄kpọ ye odudu esie.’ (2 Timothy 3:1, 5) Akpan akpan ke Christendom, ido ukpono awak ndidi enyọn̄ enyọn̄ ido edinam, idịghe se itode esịt. Ndi oro edi sia ọsọn̄de akaha ndida ibet Christ ndu uwem? Baba. Jesus ikpọnọhọ nnyịn ibet oro owo mîkemeke ndinịm. N̄kukụre edi nte ke Christendom okpu ndifiọk se ibet oro ọwọrọde. Enye omokpu ndinam mme ikọ eke odudu spirit emi: “Ẹbiom mbiomo kiet eken; ntem ke mbufo ẹdinịm ibet Christ.” (Galatia 6:2) Nnyịn ‘inịm ibet Christ’ ebe ke ndibiom mbiomo kiet eken, idịghe ke ndikpebe mme Pharisee nnyụn̄ ndian mbiomo nte mîdotke ke mbiomo nditọete nnyịn.
3. (a) Nso idi ndusụk ewụhọ oro ẹsịnede ke ibet Christ? (b) Ntak emi akpakwan̄ade ndibiere nte ke esop Christian ikpenyeneke ibet ke ebede mme nnennen ewụhọ Christ?
3 Ibet Christ esịne kpukpru ewụhọ Christ Jesus—edide edi ukwọrọikọ ye ukpepn̄kpọ, edinam enyịn nnyịn asana onyụn̄ edi mmemmem, ndinam n̄kpọ man idu ke emem ye mbọhọidụn̄ nnyịn, m̀mê ndisio se idehede mfep ke esop. (Matthew 5:27-30; 18:15-17; 28:19, 20; Ediyarade 2:14-16) Ke akpanikọ, mme Christian ẹnyene mbiomo ndinịm kpukpru ewụhọ ẹdude ke Bible oro ẹnọde mme anditiene Christ. Edi mme n̄kpọ efen ẹdu. Esop Jehovah, ọkọrọ ye mme esop kiet kiet, enyene ndinịm mme ibet ye mme ido unam n̄kpọ oro ẹyomde man otodo omụm eti ndutịm akama. (1 Corinth 14:33, 40) Kamse, mme Christian ikpekemeke ndisop idem ọtọkiet edieke mmọ mîkpenyeneke ibet kaban̄a ini, ebiet, ye nte ẹkpenịmde mme utọ mbonoesop oro! (Mme Hebrew 10:24, 25) Nditiene mme ndausụn̄ oro ẹwụtde eti ibuot ẹmi mbon oro ẹnọde odudu ke esịt esop ẹnọde edi n̄ko ubak edinịm ibet Christ.—Mme Hebrew 13:17.
4. Nso idi odudu oro onụkde owo ndinam utuakibuot akpanikọ?
4 Kpa ye oro, mme ata Christian iyakke utuakibuot mmọ akabade edi ndutịm ibet oro mînyeneke se ọwọrọde. Mmọ inamke n̄kpọ Jehovah n̄kukụre sia ndusụk owo m̀mê esop ẹdọhọde mmọ ẹnam. Utu ke oro, odudu oro onụkde mmọ ke utuakibuot mmọ edi ima. Paul ekewet ete: “Ima Christ enyenyịk nnyịn.” (2 Corinth 5:14, ikọ idakisọn̄ NW) Jesus okowụk mme anditiene enye ete ẹma kiet eken. (John 15:12, 13) Ima n̄waidem edi isọn̄ ọnọ ibet Christ, ndien enye enyenyịk mîdịghe ononụk mme ata Christian ke kpukpru ebiet, ke ubon ye ke esop. Ẹyak nnyịn ise nte enye anamde emi.
Ke Ubon
5. (a) Didie ke mme ete ye eka ẹkeme ndinịm ibet Christ ke ubon? (b) Nso ke nditọ ẹyom ẹto mme ete ye eka mmọ, ndien nso n̄kpọ ubiọn̄ọ ke ana ndusụk mme ete ye eka ẹkan man ẹnọ emi?
5 Apostle Paul ekewet ete: “Mme ebe, ẹma iban mbufo, kpa nte Christ akamade ufọk Abasi, okonyụn̄ ayakde Idem ọnọ ke ibuot esie.” (Ephesus 5:25) Ke ini ebe ekpebede Christ onyụn̄ anamde n̄kpọ ye n̄wan esie ke ima ye ifiọk, enye onịm akpan ikpehe kiet ke ibet Christ. Akan oro, Jesus ama owụt nditọwọn̄ ima ke in̄wan̄în̄wan̄ usụn̄, emende mmọ akama ke ubọk esie, odoride mmọ ubọk, onyụn̄ ọdiọn̄de mmọ. (Mark 10:16) Mme ete ye eka oro ẹnịmde ibet Christ ẹwụt ima n̄ko ẹnọ nditọ mmọ. Edi akpanikọ, odu mme ete ye eka oro edide ọkpọsọn̄ n̄kpọ ọnọ mmọ ndikpebe uwụtn̄kpọ Jesus ke afan̄ emi. Ndusụk mmọ ikemeke ndiwụt emi an̄wan̄wa etiene obot mmọ. Mme ete ye eka, ẹkûyak mme utọ ekikere oro ẹbiọn̄ọ mbufo ndiwụt nditọ mbufo ima oro mbufo ẹnyenede ẹnọ mmọ! Afo ndifiọk ke afo amama nditọ fo ikemke. Ana mmọ n̄ko ẹfiọk oro. Ndien mmọ idifiọkke ibọhọke mbufo ẹyom mme usụn̄ ndiwụt ima mbufo.—Men Mark 1:11 domo.
6. (a) Nte nditọ ẹyom mme ibet ete ye eka, ndien ntak emi afo ọbọrọde ntre? (b) Nso akpan ntak ke nditọ ẹnyene ndifiọk mban̄a mme ibet ẹnịmde ke ufọk? (c) Mme n̄kpọndịk ewe ke ẹfep ke ini ibet Christ akarade ke ubon?
6 Ke ukem ini oro, nditọwọn̄ ẹyom ndausụn̄, emi ọwọrọde ete ke oyom mme ete ye eka ẹnam mme ibet ndien ndusụk ini ẹnyịk ẹnịm mme ibet ẹmi ebe ke ndinọ ntụnọ. (Mme Hebrew 12:7, 9, 11) Kpa ye oro, ana ẹn̄wam nditọ sụn̄sụn̄ ndikụt akpan ntak oro anamde ẹnọ mme ibet ẹmi: ete ye eka mmọ ẹma mmọ. Ndien ana mmọ ẹfiọk ẹte ke ima edi eti ntak oro mmọ ẹnyenede ndisụk ibuot nnọ mme ete ye eka. (Ephesus 6:1; Colossae 3:20; 1 John 5:3) Utịtmbuba ete m̀mê eka oro enyenede mbufiọk edi ndikpep n̄kpri owo ndida “odudu ukere n̄kpọ” mmọ nnam n̄kpọ man nte ini akade mmọ ẹkpenam nti ubiere ke idemmọ. (Rome 12:1, NW; men 1 Corinth 13:11 domo.) Ke n̄kan̄ eken, ibet ikpenyeneke ndiwak n̄kaha m̀mê ntụnọ ndisọn̄ ubọk n̄kaha. Paul ọdọhọ ete: “Mme ete, ẹkûfiomo nditọ mbufo, mbak esịt ediduọ mmọ.” (Colossae 3:21; Ephesus 6:4) Ke ini ibet Christ akarade ubon, ufan̄ ididụhe ndinọ ntụnọ ke ebeubọk iyatesịt m̀mê ye ubiak ubiak ikọ isụn̄i. Ke utọ ufọk oro, nditọ ẹyedu ke ifụre ẹnyụn̄ ẹnam n̄kọri, idikopke mfịghe m̀mê ndidi se ẹsede ke usụhọde.—Men Psalm 36:7 domo.
7. Ke mme usụn̄ ewe ke mme ufọk Bethel ẹnọ uwụtn̄kpọ ke ini edide edisịm edinịm mme ibet ke ubon?
7 Ndusụk owo oro ẹkade ẹkese mme ufọk Bethel ke ofụri ererimbot ẹtịn̄ ẹte ke mmọ ẹdi nti uwụtn̄kpọ eke edida ukem ukem ke n̄kpọ aban̄ade edinịm ibet ke ubon. Okposụkedi ẹyọhọde ye ikpọ owo, mme utọ itie ẹmi ẹtie ata ukem ukem nte mme ubon.a Ndutịm Bethel ẹwak n̄kukọhọ ẹnyụn̄ ẹyom ediwak ibet—ẹnen̄erede ẹwak ẹkan se uke uke ubon oyomde. Kpa ye oro, mbiowo ẹmi ẹdade usụn̄ ke mme ufọkidụn̄ Bethel, mme ọfis, ye ke ufọk umịn̄n̄wed ẹdomo ndida ibet Christ nsịn ke edinam. Mmọ ẹda ẹte ke edi utom mmimọ idịghe nditịm utom kpọt edi n̄ko ndinam n̄kọri eke spirit ye “idatesịt Jehovah” ọkọri ke otu ekemmọ mbonutom mmọ. (Nehemiah 8:10) Ke ntre, mmọ ẹdomo ndinam mme n̄kpọ ke usụn̄ oro edide in̄wan̄în̄wan̄ onyụn̄ ọnọde nsịnudọn̄ ẹnyụn̄ ẹdomo ndinam n̄kpọ nte owụtde eti ibuot. (Ephesus 4:31, 32) Eyịghe idụhe ẹdiọn̄ọde mme ubon Bethel kaban̄a edu idatesịt mmọ!
Ke Esop
8. (a) Nso ikpenyene ndidi utịtmbuba nnyịn kpukpru ini ke esop? (b) Ke mme idaha ewe ke ndusụk owo ẹdọhọ ẹte ẹnịm mme ibet m̀mê ẹdomo ndinịm mme ibet?
8 Ke esịt esop edi n̄ko utịtmbuba nnyịn ndinam kiet eken ọkọri ke edu ima. (1 Thessalonica 5:11) Ntre kpukpru Christian ẹkpenyene nditịn̄ enyịn man ẹkûdian n̄kpọ ke mbiomo mbon en̄wen ebe ke ndinyịk mme ekikere idemmọ ndori mbon en̄wen ke mme n̄kpọ ẹmi owo enyenede ndimek ke idemesie. Ndusụk ini, ndusụk owo ẹsiwet Watch Tower Society ẹdọhọde ẹnịm ibet ke mme n̄kpọ ẹban̄ade nte mmọ ẹkpesede ndusụk senima, mme n̄wed, ye idem mme n̄kpọ mbre. Edi, owo inọhọ N̄ka odudu ndidụn̄ọde mme utọ n̄kpọ oro nnyụn̄ mbiom mmọ ikpe. Ke ediwak idaha, mmọemi ẹdi mme n̄kpọ oro owo kiet kiet m̀mê ibuot ubon ekpenyenede ndibiere, ọkọn̄ọde ke ima emi enye enyenede ọnọ mme edumbet Bible. Mmọ en̄wen ẹsidomo ndiwọn̄ọde mme ekikere ye mme ndausụn̄ oro N̄ka ọnọde nsịn ke ibet. Ke uwụtn̄kpọ, ke nsiondi Enyọn̄-Ukpeme eke March 15, 1996, inem inem ibuotikọ kiet ama odu oro ọkọnọde mbiowo nsịnudọn̄ ndinam utom ubọkerọn̄ kpukpru ini nnọ mme andibuana ke esop. Nte uduak ekedi ndinịm mme ibet? Baba. Okposụkedi mbon ẹmi ẹkemede nditiene mme ekikere ẹmi ẹkemede ndikụt ediwak ufọn, ndusụk mbiowo idụhe ke idaha ndinam ntre. Ukem ntre, ibuotikọ oro “Mme Mbụme Ẹtode Mme Andikot” ke nsiondi Enyọn̄-Ukpeme eke April 1, 1995, ama ọnọ ntọt aban̄a ediwọn̄ọde ntịn̄enyịn n̄kpọn̄ uku oro edina baptism enyenede ebe ke ndinam n̄kpọ mbe ubọk, utọ nte edinịm idat idat usọrọ m̀mê edinam usọrọ. Ndusụk owo ẹda eti item emi ẹnam n̄kpọ ke ebeubọk usụn̄, idem ẹnamde ibet nte ke ndinọ kad nsịnudọn̄ ke edinam emi akwan̄a!
9. Ntak edide akpan n̄kpọ nnyịn ndifep ndikụt ndudue nnọ ye editie ikpe ikpe n̄kaha ye kiet eken?
9 Kere, n̄ko, ete ke edieke anade ‘ata edifọn ibet emi anamde owo ọwọrọ ufụn’ odu ke otu nnyịn, ana nnyịn inyịme nte ke ubieresịt kpukpru Christian idịghe ukem ukem. (James 1:25) Nte nnyịn ikpayat esịt edieke mme owo ẹnyenede mme edimek idemmọ oro mîbiatke mme edumbet N̄wed Abasi? Baba. Nnyịn ndinam ntre ekpedi nditọ ubahade. (1 Corinth 1:10) Paul, ke ini odụride nnyịn utọn̄ aban̄a edikpe ikpe nnọ ekemmọ Christian, ọkọdọhọ ete: “Enye oro ọsọn̄ọde ada, enye ada ọnọ ete esiemọ; enye onyụn̄ ọduọde, ọduọ ọnọ ete esiemọ. Edi enye eyenyụn̄ ọsọn̄ọ ada, koro Ọbọn̄ ekemede ndinam enye ọsọn̄ọ ada.” (Rome 14:4) Nnyịn idu ke idaha ndiyat Abasi esịt edieke nnyịn itịn̄de ikọ idian kiet eken ke mme n̄kpọ oro ẹkpenyenede ndiyak nnọ ubieresịt owo kiet kiet.—James 4:10-12.
10. Mmanie ke ẹnọ utom edise enyịn ke esop, ndien didie ke nnyịn ikpọnọ mmọ ibetedem?
10 Ẹyak nnyịn iti, n̄ko, nte ke ẹnịm mbiowo ndikpeme otuerọn̄ Abasi. (Utom 20:28) Mmọ ẹdu do ndin̄wam. Nnyịn ikpenyene ndidu ke ifụre ndika mbịne mmọ n̄kọbọ item, koro mmọ ẹdide nditọ ukpepn̄kpọ Bible ndien ẹmehe ye se ẹnemede ke mme n̄wed Watch Tower Society. Ke ini mbiowo ẹkụtde eduuwem oro ekemede ndida n̄kosịm edibiat mme edumbet N̄wed Abasi, mmọ ye unana ndịk ẹsinọ item oro ẹyomde. (Galatia 6:1) Mme andibuana ke esop ẹtiene ibet Christ ebe ke ndidiana kiet ye ndima ekpemerọn̄ ẹmi, ẹmi ẹnọde ndausụn̄ ke otu mmọ.—Mme Hebrew 13:7.
Mbiowo Ẹda Ibet Christ Ẹsịn ke Edinam
11. Didie ke mbiowo ẹnịm ibet Christ ke esịt esop?
11 Udọn̄ mbiowo edi ndinịm ibet Christ ke esịt esop. Mmọ ẹda usụn̄ ke ndikwọrọ eti mbụk, ẹda Bible ẹnọ ukpep man otodo ẹsịm esịt ndien, nte ima ima, mme ekpemerọn̄ oro ẹtiede sụn̄sụn̄, ẹtịn̄ ikọ ẹnọ “mbon iduọ-esịt.” (1 Thessalonica 5:14) Mmọ ẹfep mme edu oro mîdịghe eke Christian ẹmi ẹdude ke ediwak ido ukpono Christendom. Edi akpanikọ, ererimbot emi ke abiara usọp usọp, ndien ukem nte Paul, mbiowo ẹkeme ndinyene editịmede esịt mban̄a otuerọn̄; edi mmọ ẹmụm edida ukem ukem ẹkama nte mmọ ẹnamde n̄kpọ ẹban̄a mme utọ editịmede esịt oro.—2 Corinth 11:28.
12. Ke ini Christian akade ebịne ebiowo ndiyom un̄wam, didie ke ebiowo akpanam n̄kpọ?
12 Ke uwụtn̄kpọ, Christian ekeme ndiyom ndisobo ye ebiowo kaban̄a ndusụk akpan n̄kpọ oro N̄wed Abasi mîtịn̄ke n̄kpọ iban̄a nnennen m̀mê oro oyomde ẹda ukem ukem kaban̄a nsio nsio edumbet Christian. Iso-ọfọn ẹma ẹmenede enye itie ke utom oro okụk okponde edi asan̄ade ye mbiomo oro okponde akan. Mîdịghe ete oro mînịmke ke akpanikọ ekeme ndiyom eyen esie oro edide Christian anam mme n̄kpọ oro ẹkemede nditụk utom ukwọrọikọ esie. Ke mme utọ idaha oro ebiowo eyetre ndinọ ekikere idemesie. Utu ke oro, enye eyekụbọde Bible onyụn̄ an̄wam owo oro ndikọk ibuot ke mme edumbet oro ẹnyenede ebuana. Enye ekeme ndikama Watch Tower Publications Index, edieke odude, ndiyom se “asan̄autom emi anamde akpanikọ, onyụn̄ enyenede ọniọn̄” etịn̄de aban̄a n̄kpọ oro ke mme page Enyọn̄-Ukpeme ye mme n̄wed eken. (Matthew 24:45) Nso edieke ke oro ebede Christian oro anamde ubiere oro etiede ebiowo oro nte iwụtke ọniọn̄? Edieke ubiere oro mîbiatke mme edumbet m̀mê mme ibet Bible nnennen nnennen, Christian oro eyekụt ete ke ebiowo oro ọfiọk unen oro owo oro enyenede ndinam utọ ubiere oro, ọfiọkde ete ke “owo kiet kiet enyene ndibiom mbiomo idem esie.” Nte ededi, Christian ekpenyene nditi nte ke “se ededi owo ọtọde, oro ke enye edinyụn̄ ọdọk.”—Galatia 6:5, 7.
13. Utu ke ndinọ mme nnennen ibọrọ ke mme mbụme m̀mê ndinọ ekikere idemmọ, ntak emi mbiowo ẹn̄wamde mbon en̄wen ndikọk ibuot ke mme n̄kpọ?
13 Ntak emi ebiowo oro enyenede mbufiọk anamde n̄kpọ ke usụn̄ emi? Kaban̄a ntak iba ke nsụhọde n̄kaha. Akpa, Paul ọkọdọhọ esop kiet ete ke imọ idịghe ‘andikara mmọ ke n̄kpọ mbuọtidem.’ (2 Corinth 1:24) Ebiowo, ke ndin̄wam eyenete ndikọk ibuot ke N̄wed Abasi nnyụn̄ nnam ubiere idemesie oro ọkọn̄ọde ke ifiọk, ekpebe edu Paul. Enye ọfiọk ete ke odudu imọ enyene adan̄a, kpa nte Jesus ọkọfiọkde ete ke odudu imọ enyene adan̄a. (Luke 12:13, 14; Jude 9) Ke ukem ini oro, mbiowo ẹsidu ke mben̄eidem ndinọ item N̄wed Abasi oro enyenede ufọn, idem edide ọkpọsọn̄ ke ebiet oyomde. Ọyọhọ iba, enye ọnọ ekemmọ Christian esie ukpep. Apostle Paul ọkọdọhọ ete: “Ọkpọsọn̄ udia enyene mmọ ẹmi ẹma ẹkokon̄ ẹwọrọ idaha, kpa mmọ ẹmi otode ke nnam-mmehe mmọ ẹma ẹkọ ifiọk ndidiọn̄ọ se ifọnde ye se idiọkde.” (Mme Hebrew 5:14) Ntem, man ikọri isịm ọyọhọ idaha, nnyịn inyene ndida ifiọk oro ikọde nnam n̄kpọ, idịghe ndiberi edem kpukpru ini ke owo efen ndinọ nnyịn ibọrọ. Ebede ke ndiwụt ekemmọ Christian nte ọkpọkọkde ibuot ke N̄wed Abasi, ebiowo ke usụn̄ emi aman̄wam enye ndinam n̄kọri.
14. Didie ke mbon oro ẹkọride ẹsịm ọyọhọ idaha ẹkeme ndiwụt nte ke mmimọ iberi edem ke Jehovah?
14 Nnyịn imekeme ndinyene mbuọtidem nte ke Jehovah Abasi ebede ke edisana spirit esie eyekara esịt mme ata andituak ibuot. Ntem, mme Christian oro ẹkọride ẹsịm ọyọhọ idaha ẹsidemede esịt nditọete mmọ, ẹkpede mmọ ubọk, nte apostle Paul akanamde. (2 Corinth 8:8; 10:1; Philemon 8, 9) Paul ama ọfiọk ete ke mme idiọkowo akpan akpan, idịghe ndinen owo, ẹdi mbon ẹmi ẹyomde mme ibet ke nde ke nde man anam mmọ ẹnam n̄kpọ ke eti usụn̄. (1 Timothy 1:9) Enye ikenyeneke eyịghe m̀mê unana ibetedem, edi ama enyene mbuọtidem ke idem nditọete esie. Enye ekewet ọnọ esop kiet ete: “Nnyịn imonyụn̄ inyene ọyọhọ mbuọtidem ke Ọbọn̄ iban̄a mbufo.” (2 Thessalonica 3:4) Mbuọtidem, ibetedem, ye uko Paul ama enen̄ede anam n̄kpọ ndidemede mme Christian oro. Mbiowo ye mme esenyịn oro ẹsan̄ade-san̄a mfịn ẹnyene ukem uduak oro. Mme anam-akpanikọ irenowo ẹmi ẹnam ẹkop inem didie ntem, nte mmọ ẹkpemede otuerọn̄ Abasi ke ima!—Isaiah 32:1, 2; 1 Peter 5:1-3.
Ndida Ibet Christ Ndu Uwem
15. Nso idi ndusụk mbụme oro nnyịn ikemede ndibụp idem nnyịn man ise m̀mê nnyịn ke inịm ibet Christ ke itie ebuana nnyịn ye nditọete nnyịn?
15 Oyom nnyịn owo kiet kiet idụn̄ọde idem nnyịn kpukpru ini man ise m̀mê nnyịn ke ida ibet Christ idu uwem inyụn̄ isịn udọn̄ inọ edinịm enye. (2 Corinth 13:5) Ke akpanikọ, kpukpru nnyịn imekeme ndibọ ufọn ke ndibụp: ‘Ndi ami ndi owo oro ọbọpde-bọp m̀mê andikụt ndudue? Ndi ami ndi owo oro adade ukem ukem m̀mê anamde n̄kpọ ebe ubọk? Ndi ami mmesiwụt edikere mban̄a nnọ mbon en̄wen m̀mê nsisọn̄ọ nyịre ke mme unen mi?’ Christian idomoke ndibiere se eyenete akpanamde m̀mê se mîkpanamke ke mme n̄kpọ oro Bible mîtịn̄ke n̄kpọ nnennen iban̄a.—Rome 12:1; 1 Corinth 4:6.
16. Didie ke nnyịn ikeme ndin̄wam mbon oro ẹnyenede etikwo etikwo ekikere ẹban̄a idemmọ, ke ntre inịmde akpan ikpehe ke ibet Christ?
16 Ke ukperedem ini emi, edi akpan n̄kpọ nnyịn ndiyom usụn̄ ndisịn udọn̄ nnọ kiet eken. (Mme Hebrew 10:24, 25; men Matthew 7:1-5 domo.) Ke ini nnyịn isede nditọete nnyịn iren ye iban, nte nti edu mmọ iwọrọke ekese inọ nnyịn ikan mme mmeme mmọ? Ye Jehovah, owo kiet kiet edi ọsọn̄urua. Ke mfụhọ, itiehe kpukpru owo ntre ke idem, idem kaban̄a idemmọ. Etie nte ediwak owo ẹsikụt sụk mme ndudue ye mme unana mfọnmma idemmọ. Man ẹsịn udọn̄ ẹnọ utọ mbon oro—ye mbon en̄wen—nte nnyịn imekeme ndidomo ndinyene nneme ye owo kiet m̀mê iba ke mbonoesop kiet kiet, inamde mmọ ẹfiọk ntak emi nnyịn idade mmọ ndidụk ke ọsọn̄urua n̄kpọ ye akpan udeme oro mmọ ẹtịpde ẹsịn ke esop? Nso n̄kpọ inemesịt ke edi ntem ndifịghede mmọ mbiomo ke usụn̄ emi ndien ke ntre inịmde ibet Christ!—Galatia 6:2.
Ibet Christ ke Enyenyene Ufọn!
17. Ke ewe nsio nsio usụn̄ ke afo okụt nte ibet Christ enyenede ufọn ke esop mbufo?
17 Ibet Christ ke enyenyene ufọn ke esịt esop Christian. Nnyịn imokụt enye ke usen ke usen—ke ini ekemmọ Mme Ntiense ẹbuanade ifịk ifịk ke ndinọ eti mbụk, ke ini mmọ ẹdọn̄de kiet eken esịt ẹnyụn̄ ẹsịnde udọn̄ ẹnọ kiet eken, ke ini mmọ ẹn̄wanade ndinam n̄kpọ Jehovah kpa ye mme ata n̄kpọsọn̄ mfịna, ke ini mme ete ye eka ẹdomode ndibọk nditọ mmọ ẹma Jehovah ye esịt idara, ke ini mme esenyịn ẹkpepde Ikọ Abasi ye ima ye ufiop, ẹdemerede otuerọn̄ ndinyene ọkpọsọn̄ ifịk ndinam n̄kpọ Jehovah ke nsinsi. (Matthew 28:19, 20; 1 Thessalonica 5:11, 14) Ke ini nnyịn owo kiet kiet idade ibet Christ inam n̄kpọ ke uwem nnyịn, esịt Jehovah esinem didie ntem! (Mme N̄ke 23:15) Enye oyom kpukpru mbon oro ẹmade mfọnmma ibet esie ẹdu uwem ke nsinsi. Ke Paradise emi edide, nnyịn iyekụt ini emi ubonowo edide mfọnmma, ini emi mme abiatibet mîdidụhe, ye ini emi idikarade kpukpru ekikere ke esịt nnyịn. Nso akwa utịp ke edi ntem ndida ibet Christ ndu uwem!
[Ikọ idakisọn̄]
a Mme utọ ufọk oro itiehe nte ufọkidụn̄ n̄ka mọn̄k eke Christendom. “Mme etubom,” m̀mê “mme ete,” idụhe ke usụn̄ifiọk oro. (Matthew 23:9) Ẹnọ nditọete oro ẹbiomde mbiomo ukpono, edi kpa mme ukem edumbet oro ẹkarade kpukpru mbiowo ẹkara utom mmọ.
Afo Ekere Didie?
◻ Ntak emi Christendom okpude ndifiọk akpan n̄kpọ eke ibet Christ?
◻ Didie ke nnyịn ikeme ndida ibet Christ nsịn ke edinam ke ubon?
◻ Man ida ibet Christ inam n̄kpọ ke esop, nso ke ana nnyịn ifep, ndien nso ke ana inam?
◻ Didie ke mbiowo ẹkeme ndinịm ibet Christ ke ini mmọ ẹnamde n̄kpọ ye esop?
[Ndise ke page 23]
Eyen fo enen̄ede oyom ima
[Ndise ke page 24]
Ndima ekpemerọn̄ nnyịn ẹnọ nduọkodudu didie ntem!