Mmọ Ẹma Ẹnam Uduak Jehovah

Peter Ọkwọrọ Ikọ ke Pentecost

EKEDI usenubọk ini editọn̄ọ nsehe eto oro eyo mîyatke ọkpọsọn̄ ke isua 33 E.N. N̄kann̄kụk oro ama ọyọhọ ye nduaidem! Udịm udịm otu mme Jew ye mme okpono Abasi ke ido mme Jew ẹma ẹyọhọ mme efak Jerusalem. Mmọ ẹketo mme utọ itie nte Elam, Mesopotamia, Cappadocia, Egypt, ye Rome. Ekedi n̄kpọ nduaidem didie ntem ndikụt mmọ ke usịnen̄kpọ isọn̄ emana mmọ ndinyụn̄ n̄kop nsio nsio usem mmọ! Ndusụk owo ẹma ẹsan̄a ke se ikperede ndisịm tọsịn kilomita iba man ẹdidụk akpan usọrọ emi. Nso ikedi oro? Pentecost—idara idara usọrọ mme Jew emi owụtde utịt idọk barley.—Leviticus 23:15-21.

Nsụn̄ikan̄ ama ọwọrọ ke mme uwa eke itieuwa temple, mme Levite ẹma ẹnyụn̄ ẹkwọ Itoro (Psalms 113 osịm 118). Mbemiso n̄kanika usụkkiet usenubọk, n̄kpọ n̄kpaidem ama otịbe. “Uyom ata ọkpọsọn̄ oyobio eke ofụmede” ama oto ke enyọn̄ edi. Enye ama ọyọhọ ofụri ufọk emi n̄kpọ nte mme mbet Jesus Christ 120 ẹkesopde idem. Mbụk N̄wed Abasi ọdọhọ ete: “Mmọ ẹnyụn̄ ẹkụt mme edeme eke ẹsakde ikan̄, nte ẹdemede idem ẹdoro mmọ ke ibuot, edeme kiet ke owo kiet, edeme kiet ke owo kiet. Ndien Edisana Spirit ọyọhọ kpukpru mmọ ke idem, mmọ ẹnyụn̄ ẹtọn̄ọ ndisem nsio-nsio usem, nte Spirit ọnọde mmọ ukeme nditịn̄.”—Utom 2:1-4.

Owo Kiet Kiet Okop Usem Esiemmọ

Ikebịghike, ediwak mbet ẹma ẹbụn̄ọ ẹwọn̄ọ ke ufọk oro. Ke n̄kpaidem, mmọ ẹma ẹkeme nditịn̄ ikọ ke nsio nsio usem otuowo oro! Kam kere nte ekedide n̄kpọ n̄kpaidem ke ini esenowo otode Persia ye eyen Egypt ẹkekopde nte mbon Galilee ẹsemde usem mmọ. Nte an̄wan̄ade, uten̄e ama omụm otuowo. Mmọ ẹma ẹbụp ẹte: “N̄kpọ emi edi nso?” Ndusụk owo ẹma ẹtọn̄ọ ndisak mme mbet, ẹdọhọde ẹte: “Ẹyụhọ obufa wine.”—Utom 2:12, 13.

Ekem apostle Peter ama adaha ada onyụn̄ etịn̄ ikọ ọnọ otuowo. Enye ama anam an̄wan̄a nte ke utịbe utịbe enọ edisem usem emi ekedi ndisu un̄wọn̄ọ Abasi oro ẹketịn̄de ẹbe ke prọfet Joel: “Nyen̄wan̄a Spirit Mi ndori kpukpru obụkidem.” (Utom 2:14-21; Joel 2:28-32) Ih, ibịghike Abasi akan̄wan̄a edisana spirit esie ọduọk mme mbet Jesus. Emi ekedi in̄wan̄în̄wan̄ uyarade nte ke Jesus ama eset ke n̄kpa ndien ke okodu idahaoro ke heaven ke ubọk nnasia Abasi. “Mmọdo,” Peter ama ọdọhọ ete, “yak ofụri ufọk Israel ẹtịm ẹfiọk ẹte, Abasi ama anam enye edi Ọbọn̄ ye Christ, kpa Jesus emi mbufo ẹkewotde.”—Utom 2:22-36.

Didie ke mme andikpan̄ utọn̄ ẹkenam n̄kpọ? “Esịt amia mmọ,” nte mbụk oro ọdọhọde, “mmọ ẹnyụn̄ ẹdọhọ Peter ye mme apostle eken ẹte, Nditọ-ete, inam didie?” Peter ama ọbọrọ ete: “Mbufo ẹkabade esịt, ẹnyụn̄ ẹna baptism.” N̄kpọ nte owo 3,000 ẹma ẹnam kpasụk ntre! Ke oro ebede, “mmọ oro ẹnyụn̄ ẹdọdiọn̄ ẹsịn ifịk ke edikpep ye nsan̄a mme apostle.”—Utom 2:37-42.

Ke ndinọ ndausụn̄ ke akamba usọrọ emi, Peter ama ada akpa ke otu “mme ukpọhọde Obio Ubọn̄ Heaven” oro Jesus ọkọn̄wọn̄ọde ndinọ enye anam n̄kpọ. (Matthew 16:19) Mme ukpọhọde ẹmi ẹma ẹberede mme akpan ifetutom ẹnọ nsio nsio owo. Akpa ukpọhọde emi ama anam mme Jew ẹkeme ndikabade ndi mme Christian oro ẹyetde aran ke spirit. Ekem, udiana ye ọyọhọ ukpọhọde ita ẹma ẹnam ukem ifet emi odu ọnọ mbon Samaria ye mme Gentile ke adiana ke adiana.—Utom 8:14-17; 10:44-48.

Ukpepn̄kpọ Odude ọnọ Nnyịn

Okposụkedi otu mme Jew ye mme okpono Abasi ke ido mme Jew ẹkenyenede mbiomo obio kaban̄a n̄kpa Eyen Abasi, Peter eketịn̄ ikọ ọnọ mmọ ye ukpono, okotde mmọ “nditọ-ete.” (Utom 2:29) Uduak esie ekedi ndinam mmọ ẹkabade esịt, idịghe ndibiom mmọ ikpe. Ke ntre, utịn̄ikọ esie ekedi in̄wan̄în̄wan̄. Enye ama etịn̄ se ikedide akpanikọ onyụn̄ ada se ẹkotde ẹto N̄wed Abasi ọsọn̄ọ ikọ esie.

Mbon oro ẹkwọrọde eti mbụk mfịn ẹyenam ọfọn nditiene uwụtn̄kpọ Peter. Mmọ ẹkpenyene ndidomo ndinyene unyịme edem mbiba ye mme andikpan̄ utọn̄ nnọ mmọ ndien ekem ẹda mbufiọk ẹbuen ikọ ye mmọ ẹto N̄wed Abasi. Ke ini ẹnemede akpanikọ Bible ke in̄wan̄în̄wan̄ usụn̄, mbon esịt akpanikọ ẹyenyịme.—Utom 13:48.

Ifịk ye uko oro Peter ekenyenede ke usen Pentecost ekedi ata isio ye edikan̄ oro enye akakan̄de Jesus n̄kpọ nte urua itiaba ke mbemiso. Ke idaha enyeoro ndịk owo ama owot Peter. (Matthew 26:69-75) Edi Jesus ama anam n̄kpeubọk ke ibuot Peter. (Luke 22:31, 32) Nte eyịghe mîdụhe, Jesus ndiwụt Peter idem ke ama ekeset ke n̄kpa ama ọsọn̄ọ apostle oro idem. (1 Corinth 15:5) Nte utịp, Peter ikọduọkke mbuọtidem. Ke esisịt ini ebede, enye ama ọkwọrọ ikọ uko uko. Ntre, ndien, idịghe ke Pentecost kpọt ke enye ọkọkwọrọ ikọ edi n̄ko ke ofụri eyouwem esie.

Nso edieke nnyịn ikanamde idiọkn̄kpọ ke ndusụk usụn̄, kpa nte Peter akanamde? Ẹyak nnyịn itua n̄kpọfiọk, ibọn̄ akam iyom edifen nnọ, inyụn̄ inam n̄kpọ ndibọ un̄wam eke spirit. (James 5:14-16) Do nnyịn imekeme ndika iso ye mbuọtidem nte ke Jehovah, Ete nnyịn eke heaven emi enyenede mbọm, enyịme edisana utom nnyịn.—Exodus 34:6.