Ntọt M’ọkwọrọ Obio Ubọn̄
Ẹka Iso Ndikwọrọ Akpanikọ Bible ke Ireland
KE MME isua ndondo emi ediye idụt Ireland amakabade edi itie akwa ndutịme. Ke ukem ini oro, mbon Ireland ẹmenam n̄kpọ nte ọfọnde ẹban̄a etop idotenyịn Bible oro Mme Ntiense Jehovah ẹdade ẹsọk mmọ. Mme ifiọkutom ẹmi ẹtode Ireland mi ẹsọn̄ọ emi.
■ Ke Dublin owo kiet ke otu Mme Ntiense Jehovah ye ekpri eyenan̄wan esie ke ẹkebuana ke utom ukwọrọikọ to ke enyịnusụn̄ sịm enyịnusụn̄. Mmọ ẹma ẹsobo ye n̄wan kiet emi ekerede Cathy oro akanamde utom ye uwak nditọ esie. Ntiense oro ama obụp m̀mê eyen imọ, emi okosụk ekpepde nte ẹkwọrọde ikọ, ekeme ndibuana ata ibio ibio etop ye enye. Cathy ama onyịme, ndien ekpri eyenan̄wan oro ama ọkwọrọ ikọ oro ama okotịm idem mfọn mfọn ke usụn̄ oro an̄wan̄ade. Idem ama akpa Cathy aban̄a in̄wan̄în̄wan̄ esịt akpanikọ ye edu ukpono ekpri eyen emi, ndien enye ama onyịme ndibọ tract Bible.
Ekem Cathy ama etie ekere eti ntịmidem ye edu ekpri esenowo esie oro. Enye ama ọdọhọ ete: “Mma n̄kop inemesịt nte ke ekpri eyenan̄wan oro ama ekeme ndibuana utọ inem inem etop oro ye unana edidụri ntịn̄enyịn nnọ idemesie. Mma mbiere nte ke ini efen emi Mme Ntiense Jehovah ẹdiwahade, nyekpan̄ utọn̄ nnọ mmọ.”
Kan̄a kemi Cathy ama ọwọrọ okodụn̄ ke ekpri obio kiet ke n̄kan̄ ufọt edem usụk ye edem usoputịn Ireland emi odude ekpere adan̄a ikpehe Cork ye Kerry. Ke ndusụk ini ama ekebe Mme Ntiense Jehovah ẹma ẹwaha enyịnusụn̄ esie, ndien enye ama okot mmọ ẹdụk ufọk. Enye ama onyịme ukpepn̄kpọ Bible ofụri ini ndien idahaemi ke odụk mme mbonoesop ye ediwak nditọ esie. Cathy owụt esịtekọm aban̄a ata udọn̄ oro ekpri eyenan̄wan oro ekenyenede ndibuana eti mbụk ye enye.
■ Ke ikpehe Tullamore, Mme Ntiense ẹma ẹsinyene nneme Bible ye n̄wan kiet emi ekerede Jean ke ufan̄ isua itiaba. Ndusụk ini enye ama esiwụt udọn̄ onyụn̄ ọbọ mme n̄wed, edi ke mme ini efen udọn̄ esie ama esisụhọde. Usen kiet, ke ini Ntiense kiet ekerede Frances ye nsan̄a esie ẹkewahade ọtọ Jean, mmọ ẹma ẹkụt enye odude ke iyatesịt. Ntiense oro ọtọt ete: “Se ededi oro iketịn̄de, enye ama ototịm ayat esịt. Ke akpatre, enye ama ọdọhọ nnyịn isop imọ ke enyịn onyụn̄ ọtọ usụn̄ eberi.”
Frances ama eyịk m̀mê edifiak n̄waha editie kpasụk ntre. Frances ama ekere ete: ‘Ndusụk ufọn ididụhe aba ndika mbịne enye edieke enye mînen̄ekede iwụt udọn̄ ke etop oro.’ Nte ededi, enye ama eneme n̄kpọ emi ye ebe esie, Thomas, ndien enye ama otịm enyene idotenyịn. Ini efen oro mmọ ẹkenamde utom ke ikpehe oro, ẹma ẹfiak ẹwaha edem Jean. Enye ama anam n̄kpọ ke ido ufan onyụn̄ ọbọ mme magazine Enyọn̄-Ukpeme ye Awake! Mme ediwaha efen ẹketie inem inem kpasụk ntre, ndien Thomas ye Frances ẹma ẹtọn̄ọ ukpepn̄kpọ Bible ofụri ini ye enye.
Nso ikedi ntak ukpụhọde oro? Jean anam an̄wan̄a ete ke ini oro imọ mîkọfọnke ido ye Mme Ntiense do, imọ ikaman eyen ndondo oro ndien edikosụk n̄wọrọ ke ufọkibọk ndi ekedi oro. Ke ntak edinọ nsekeyen esie eba ye edinọ eyen enyeoro enye amande eyen adian udia, enye ekenyene hour kiet ye ubak kpọt ndide idap ke okoneyo. Jean ọdọhọ ete: “Akpatre n̄kpọ ami ndikpakanam ekpekedi ami ndineme mban̄a ido ukpono.”
Ke ufan̄ ọfiọn̄ iba Jean ama odụk kpukpru mme mbonoesop, ndien ke ufan̄ ọfiọn̄ inan̄ enye ama etiene abuana ke utom ukwọrọikọ. Ọfiọn̄ duop ke enye ama ọkọtọn̄ọ ukpepn̄kpọ Bible esie, enye ama ana baptism. Idahaemi ọkpọkpọ ifiọk n̄kpọntịbe Jean an̄wam enye ke utom ukwọrọikọ. Enye obụk ete: “Edieke nsobode ye owo oro enen̄erede ọsọn̄ ido, nyedomo ndiwụt mbufiọk. Mmesinịm n̄wetnnịm n̄kpọ kpukpru ini. Ekeme ndidi idaha eyekpụhọde etisịm ini mfiakde n̄ka; idem ekeme ndinem owo oro n̄kan onyụn̄ ekeme ndinọ n̄kpan̄uton̄.”