Mmọ Ẹma Ẹnam Uduak Jehovah

Jesus Osio Mbet 70 Ọdọn̄

EKEDI ke ini idọk eke 32 E.N. Ọfiọn̄ itiokiet kpọt okosụhọ mbemiso n̄kpa Jesus. Ntem, man ọsọp ubọk ke utom ukwọrọikọ onyụn̄ aka iso ke edinọ mme mbet esie ukpep, enye ama emek mbet 70 onyụn̄ “ọdọn̄ mmọ ẹsan̄a iba iba ẹbem Enye iso, ẹka ẹkedụk ke kpukpru obio ye ebiet, eke Enye ke Idem Esie oyomde ndika.”—Luke 10:1.a

Jesus okosio mbet esie ọdọn̄ “ẹbem Enye iso” man mme owo ẹkpekeme ndibem iso mbiere usọp usọp m̀mê mmọ ẹkeda ẹnọ mîdịghe ẹkebọbiọn̄ọ Messiah ke ini Jesus ke idemesie ekedide edisịm ke ukperedem. Edi ntak emi enye ọkọdọn̄de mmọ “ẹsan̄a iba iba”? Nte an̄wan̄ade, man mmọ ẹdi nsịnudọn̄ ẹnọ kiet eken ke ini ẹsobode ubiọn̄ọ.

Ke ọsọn̄ọde etịn̄ nte utom ukwọrọikọ mmọ edide usọp usọp, Jesus ama ọdọhọ mme anditiene enye ete: “Ke akpanikọ idọk okpon, edi mme anamutom iwakke; ẹben̄e ndien Enyene idọk, ete, Enye osio mme anamutom ọdọn̄ ẹdi ke idọk Esie.” (Luke 10:2) Uwụtn̄kpọ idọk ama odot, koro ubiat ini ekededi ke ini idọk ekeme ndisụn̄ọ ke edibiat mme ọsọn̄urua n̄kpasịp. Kpasụk ntre, edieke mme mbet ẹkpekesịnde utom ukwọrọikọ mmọ, ẹkpeketaba mme ọsọn̄urua uwem!—Ezekiel 33:6.

Mme Asan̄autom Oro N̄kpọ Mîtịmekede

Jesus ama aka iso eteme mme mbet esie ete: “Ẹkûkama ekpatokụk, m̀mê ekpat udia, m̀mê ikpaukot: ẹkûnyụn̄ ẹkọm owo ke usụn̄.” (Luke 10:4) Ekedi ido akaisan̄ ndikama idịghe sụk ekpat ye udia edi n̄ko udiana ikpaukot, koro idak ekeme ndidian̄ade ndien n̄kpaha ekeme ndikịbe. Edi ikanaha mme mbet Jesus ẹfịna idem ẹban̄a mme utọ n̄kpọ oro. Utu ke oro, akana mmọ ẹnịm ke akpanikọ nte ke Jehovah eyese aban̄a mmọ ebe ke ekemmọ nditọ Israel, emi ntatubọk ekedide ido ke otu mmọ.

Edi ntak emi Jesus ọkọdọhọde mmọ ẹkûkọm owo ke usụn̄? Nte akana mmọ ẹnana ima, idem ẹdiọkde ido? N̄wan̄ansa-o! Ikọ Greek oro a·spaʹzo·mai, ọwọrọde ndifat ke ekọm, ekeme ndiwọrọ se ikande ufiop ufiop “mmọkọm-o.” Enye n̄ko ekeme ndisịne ido editịm inua, edifat, ye anyan nneme emi editienede ke ini mme ọdiọn̄ọ iba ẹsobode. Owo kiet emi edide etịn̄ikọ mban̄a n̄kpọ ọdọhọ ete: “Mme ekọm ke otu Mbon Edem Usiahautịn ikesịneke, nte edide ke otu nnyịn, ekpri edinụk ibuot, m̀mê edinyan ubọk n̄kọm, edi ẹkeda ediwak mfari, ye edinụhọ, ye idem ediduọ ofụri idem ke isọn̄. Kpukpru emi ama oyom ekese ini.” (Men 2 Ndidem 4:29 domo.) Jesus ke ntem akan̄wam mbet esie ẹfep ikpîkpu ediwọn̄ọde ntịn̄enyịn, idem okposụkedi ekedide ido.

Ke akpatre, Jesus ama ọdọhọ mme anditiene enye ete ke ini mmọ ẹdụkde ke ufọk ndien ẹdara mmọ, yak mmọ “ẹtie kpa ke ufọk oro, ẹdia ẹnyụn̄ ẹn̄wọn̄ se ẹnịmde [mmọ] ke iso.” Edi edieke mmọ ẹkedụkde ke obio owo mînyụn̄ idarake mmọ, yak mmọ “ẹwọrọ ke efak esie, ẹnyụn̄ ẹdọhọ ẹte, Kpa ntan obio mbufo, eke adianade nnyịn ke ikpat, ke nnyịn iken̄ ifep idian mbufo.” (Luke 10:7, 10, 11) Ndisọhi m̀mê ndiken̄ ntan ke ikpat okpowụt nte ke mme mbet ẹkekpọn̄ ufọk m̀mê obio oro mîkadarake mmọ do ke emem ẹnọ mme utịp ẹmi ẹditode Abasi. Edi mbon oro ke mfọnido ẹkedarade mme mbet Jesus ẹma ẹsịn idemmọ ke udịm ndibọ edidiọn̄. Jesus ọkọdọhọ mme apostle esie ke idaha en̄wen ete: “Owo eke enyịmede mbufo enyịme Mi, ndien owo eke enyịmede Mi enyịme Andidọn̄ Mi. Ndien owo ekededi eke edidade cup mbịtmbịt mmọn̄ ọnọ kiet ke otu n̄kpri owo ẹmi ọn̄wọn̄ ke enyịn̄ mbet Mi, ke akpanikọ ke ndọhọ mbufo, enye iditreke-tre ndibọ utịp esie.”—Matthew 10:40, 42.

Ukpepn̄kpọ Ẹdude ẹnọ Nnyịn

Se iwakde ibe Mme Ntiense Jehovah 5,000,000 ke ofụri ererimbot ke ẹnam utom edikwọrọ eti mbụk Obio Ubọn̄ Abasi ndinyụn̄ nnam mme mbet. (Matthew 24:14; 28:19, 20) Mmọ ẹdiọn̄ọ nte ke etop mmimọ edi usọp usọp. Ke ntre, mmọ ẹda ini mmọ ẹnam n̄kpọ ke mfọnn̄kan usụn̄, ẹfepde se ikemede ndiwọn̄ọde owo ntịn̄enyịn ẹmi ẹkpebiọn̄ọde mmọ ndinọ ọyọhọ ntịn̄enyịn ke akpan utom mmọ.

Mme Ntiense Jehovah ẹdomo nditie ufan ufan ye kpukpru owo ẹmi mmọ ẹsobode. Kpa ye oro, mmọ ibuanake ke ikpîkpu nneme, m̀mê mmọ ndisịn idem ke mme eneni ẹban̄ade mme mbubehe n̄kaowo m̀mê mme ukeme ererimbot oro ẹkpude ndinen̄ede ukwan̄ikpe. (John 17:16) Utu ke oro, mmọ ẹkọn̄ nneme mmọ ke n̄kukụre usọbọ mfịna owo oro ebịghide—Obio Ubọn̄ Abasi.

Ediwak ini, ẹsikụt Mme Ntiense Jehovah ẹsan̄ade iba iba. Nte ikpekemeke ndinam ekese edieke mmọ kiet kiet ẹsan̄ade ikpọn̄? Ekeme ndidi. Edi, mme Christian mfịn ẹkụt ufọn edisan̄a ye ekemmọ andinịm ke akpanikọ. Enye ọnọ ndusụk udomo ukpeme ke ini ẹnọde ikọ ntiense ke mme n̄kann̄kụk oro n̄kpọndịk odude. Ndisan̄a ye owo en̄wen anam mbufa owo ẹkeme ndibọ ufọn nto usọ mme asuanetop eti mbụk ẹmi ẹnyenede mbufiọk. Ke akpanikọ, mmọ mbiba ẹkeme nditịp n̄kpọ nsịn ke nsịnudọn̄ edem mbiba.—Mme N̄ke 27:17.

Ye unana eyịghe, utom ukwọrọikọ edi utom emi enen̄erede edi usọp usọp akan emi ẹnamde ke “ukperedem ini” ẹmi. (2 Timothy 3:1) Mme Ntiense Jehovah ẹnem esịt ndinyene ibetedem nditọete ofụri ererimbot emi mmọ ẹnamde utom ‘ye esịt kiet ẹban̄a mbuọtidem emi odude ke gospel.’—Philippi 1:27.

[Mme Ikọ idakisọn̄]