Ka Iso Ndinam N̄kọri eke Spirit!
Usen Oro Nnyịn Ikanade Baptism Edi Usen Oro Nnyịn Ikpamade Inyụn̄ Itide Kpukpru Ini. Kamse, Edi Usen Oro Ke Nnyịn Iketịn̄ An̄wan̄wa Ke Ima Iyak Idem Inọ Ndinam N̄kpọ Abasi.
ESIDA ediwak owo ata akamba ukeme ndisịm ọtọ emi—nditre ndiọi edu ẹmi ẹkenyenede ke anyan ini, ndision̄o idem n̄kpọn̄ ndiọi nsan̄a, ndikpụhọde mme usụn̄ ukere n̄kpọ ye edu ẹmi ẹma ẹkenen̄erede ẹdọn̄ n̄kam.
Kpa ye oro, ke adan̄aemi baptism edide n̄kpọntịbe emi edide inem inem ye akpan n̄kpọ ke uwem Christian, enye edi sụk ntọn̄ọ. Apostle Paul ama asian mme Christian oro ẹma ẹkena baptism ke Judea ete: “Ẹyak nnyịn ikpọn̄ ndien nditịn̄ mban̄a akpa editọn̄ọ ukpepn̄kpọ Christ, isịn idem ibịne ifiọk eke ọfọnde ama.” (Mme Hebrew 6:1) Ih, oyom kpukpru Christian ‘ẹkabade ẹdi kiet ke mbuọtidem ye ke ifiọk Eyen Abasi, ẹkọri ẹkponi ẹwọrọ owo, ẹsịm ofụri idaha uyọhọ Christ.’ (Ephesus 4:13) N̄kukụre ke ndikọri nsịm ọyọhọ idaha ke nnyịn ikeme ndinen̄ede ‘nsọn̄ọ nda ke mbuọtidem.’—Colossae 2:7.
Ke isua ifan̄ ẹmi ẹkebede, ediwak tọsịn mme andituak ibuot ke mme itie ikie oro ẹma ẹkeyak idem ẹnọ ẹmedụk ẹdi esop Christian. Eyedi afo edi kiet ke otu mmọ. Ukem nte nditọete fo eke akpa isua ikie, afo uyomke ndika iso ndi nsek ke n̄kan̄ eke spirit. Afo oyom ndinam n̄kọri, ndika iso! Edi didie? Nso inyụn̄ idi ndusụk usụn̄ emi afo ekemede ndinam utọ n̄kọri oro?
Ndinam N̄kọri ebe ke Ọkpọkpọ Ukpepn̄kpọ
Paul akasian mme Christian ke Philippi ete: “Mmeben̄e ntem nte, ima mbufo akpakam ọdọdiọn̄ awak ke ifiọk ye kpukpru ikike.” (Philippi 1:9) Ndikọri ke “ifiọk” edi akpan n̄kpọ ọnọ n̄kọri eke spirit fo. ‘Ndifiọk Jehovah Abasi ye Jesus Christ’ edi edinam oro akade-ka iso, idịghe n̄kpọ emi etrede ke ẹma ẹkena baptism.—John 17:3.
Christian eyenete an̄wan kiet emi nnyịn idikotde Alexandra, ama edifiọk emi ke isua duop ẹma ẹkebe nte enye akana baptism ke edide isua 16 ke emana. Ẹkebọk enye ke akpanikọ ndien ama esidụk mme mbono esop Christian kpukpru ini onyụn̄ abuana ke utom ukwọrọikọ. Enye ewet ete: “Ke ọfiọn̄ ifan̄ ẹmi ẹbede, mma ndifiọk nte ke n̄kpọ ama enen̄ede akwan̄a. Mma mbiere ndifiak ndụn̄ọde idemmi ke esịt akpanikọ, se ami n̄kerede mban̄a akpanikọ, ye ntak emi nsụk ndude ke akpanikọ.” Nso ke enye okokụt? Enye aka iso ete: “Mma n̄kụt ke mme ntak oro ẹnamde mi ndu ke akpanikọ ẹkefafịna mi. Mma nti nte ke nte n̄kọkọride n̄kpon, ẹma ẹsidori nsọn̄uyo ke mme mbono esop ye utom ukwọrọikọ. Eketie nte ke edu edinyene ọkpọkpọ ukpepn̄kpọ ye edibọn̄ akam ẹyefiak ẹkeda itie mmọ ke ndusụk usụn̄. Edi nte n̄kodụn̄ọrede idaha mi, mma n̄kụt ke emi iketịbeke.”
Apostle Paul eketeme ete: “Se ededi udomo n̄kọri oro nnyịn inamde, ẹyak ika iso itịm isan̄a ke ukem edinam ofụri ini emi.” (Philippi 3:16, NW) Edinam ofụri ini ekeme ndinam owo asan̄a aka iso iso. Nte eyịghe mîdụhe, mbemiso afo akanade baptism, andikpep oro etịmde odot ama esinịm ukpepn̄kpọ Bible ofụri ini eke urua ke urua ye afo. Nte esịtekọm fo ọkọkọride, afo ama esịn edibem iso ntịm idem nnọ ukpepn̄kpọ urua kiet kiet, okotde mme itien̄wed oro ẹsiakde ẹsịn ke Bible, ye ntre ntre eken, ke edinam ofụri ini emi. Ke emi afo ama akana baptism mi, nte afo amaka iso ‘asan̄a ke ukem edinam ofụri ini emi’?
Mîdịghe ntre, eyedi oyoyom afiak odụn̄ọde mme ebeiso n̄kpọ fo, ‘etịmde ọfiọk se ifọnde ikan.’ (Philippi 1:10) Ke uwem nnyịn emi ọyọhọde ye utom mi, oyom mfara ke idem man isio ini inịm inọ ọkpọkpọ edikot ye edikpep Bible. Edi mme ufọn ẹdude ẹdot ye utọ ukeme oro. Fiak kere ban̄a ifiọk n̄kpọntịbe Alexandra. “Ana ndọhọ ke ndu ke akpanikọ ke isua 20 ẹmi ẹbede m̀mê n̄kpọ ntre ebe ke ndinyụn̄ n̄ka mme mbono esop ye edibuana ke utom ukwọrọikọ,” ntem ke enye enyịme. Nte ededi, enye aka iso ete, “Mmedisịm ubiere nte ke okposụkedi mme n̄kpọ ẹmi ẹdide akpan n̄kpọ, mmọ kpọt ikemeke ndimụm mi n̄kama ke ini n̄kpọ ẹtọn̄ọde ndisọn̄. Kpukpru ẹmi ẹwụt idem koro edu ọkpọkpọ ukpepn̄kpọ mi akpa ofụri ofụri, ndien mme akam mi ẹnana iwụk ẹnyụn̄ ẹtie enyọn̄ enyọn̄. Mmokụt idahaemi nte ke ana nnen̄ede ekikere mi nnyụn̄ ntọn̄ọ ndutịm ukpepn̄kpọ oro enyenede iwụk man n̄keme ndinen̄ede mfiọk Jehovah nnyụn̄ mma enye nnyụn̄ n̄wụt esịtekọm ke se Eyen esie ọnọde nnyịn.”
Edieke afo oyomde un̄wam ke nditọn̄ọ ọkpọkpọ ukpepn̄kpọ ofụri ini emi enyenede ufọn, mbiowo ye mme Christian eken ẹmi ẹkọride ẹsịm ọyọhọ idaha ke esop mbufo ẹyekop inemesịt ndin̄wam fi. Ke adianade do, mme ibuotikọ ẹdude ke mme nsiondi Enyọn̄-Ukpeme eke May 1, 1995; August 15, 1993; ye November 15, 1986, ẹnyene ediwak ekikere oro ẹnọde un̄wam.
Oyom Ẹsịk Ẹkpere Abasi
Ikpehe en̄wen emi afo okpodomode ndinam n̄kọri edi ke itie ebuana fo ye Abasi. Ke ndusụk idaha ọkpọsọn̄ udọn̄ ekeme ndikam ndu ke afan̄ emi. Kere ban̄a Anthony, emi akanade baptism ke isua uyen. “Ami n̄kedi akpa eyen oro akanade baptism ke ubon nnyịn,” ntem ke enye obụk. “Ke mma n̄kana baptism, eka mi ama afat mi akama ufiop ufiop. Akananam n̄kwe enye enen̄erede enem esịt ntre. Idatesịt ama okpon etieti, ndien mma nnen̄ede nsọn̄ idem.” Nte ededi, n̄kpọ ama okpụhọde. “Ke ata anyan ini, uyen ndomokiet ikanaha baptism ke esop nnyịn,” ntem ke Anthony aka iso. “Ntre mma nnen̄ede n̄kụt idem mi n̄kaha. Ami mma nsitan̄ idem n̄ko mban̄a mme ibọrọ ye mme utịn̄ikọ mi ke mme mbono esop. Ndinyene itoro ye unyịme mme owo ama akabade edi ata akpan n̄kpọ ọnọ mi akan ndida itoro nsọk Jehovah. Ami n̄kenen̄ekede nnyene n̄kpet n̄kpet itie ebuana ye enye.”
Ukem nte Anthony, eyedi ndusụk owo ẹnen̄ede ẹnam uyakidem ke ntak udọn̄ ndinem mbon en̄wen esịt utu ke udọn̄ ndinem Jehovah esịt. Kpa ye oro, Abasi odori enyịn utọ mme owo oro ndinam n̄kpọ ekekem ye un̄wọn̄ọ mmọ ndinam n̄kpọ nnọ enye. (Men Ecclesiastes 5:4 domo.) Nte ededi, esinen̄ede edi ọkpọsọn̄ n̄kpọ ndinam ntre ke owo mînyeneke ọkpọkpọ itie ebuana ye Abasi. Anthony eti ete: “Ọkpọsọn̄ idatesịt oro n̄kenyenede ke ini emi n̄kanade baptism ikebịghike. Ikọyọhọke isua kiet nte n̄kana baptism ke n̄kọduọde ndụk akwa idiọkn̄kpọ ndien mbiowo esop ẹkenyene ndinọ mi nsuannọ. N̄kaiso idiọk edu uwem ama ada ekesịm ami ndidi se ẹsiode ẹfep ke esop. Isua itiokiet ke mma n̄kayak idem nnọ Jehovah, ẹma ẹmụm mi ẹnyụn̄ ẹsịn ke ufọk-n̄kpọkọbi ke ntak uwotowo.”
Ndikọri N̄kpet N̄kpet Itie Ebuana ye Jehovah
Se ededi oro idaha fo edide, kpukpru mme Christian ẹkeme ndiyere ikot Bible emi: “Ẹsan̄a ẹkpere Abasi, ndien enye ayasan̄a ekpere mbufo.” (James 4:8) Eyịghe idụhe nte ke afo ama esịk ekpere Abasi ke ndusụk udomo ke ini ekekpepde Bible ke akpa ini. Afo ama ekpep nte ke Abasi idịghe abasi emi ẹkponode ke Christendom emi mîdịghe ata owo, edi ke edi owo emi enyenede enyịn̄, kpa Jehovah. Afo ama ekpep n̄ko nte ke enye enyene nti edu, nte ke enye edi “Abasi mbọm, ye mfọn, ye anyan ime, awak ima.”—Exodus 34:6.
Nte ededi, man odu uwem ekekem ye uyakidem fo nnọ ndinam n̄kpọ Abasi, ana afo akam etịm esịk ekpere enye! Didie? Andiwet psalm ọkọbọn̄ akam ete: “Wụt mi usụn̄ fo, O Jehovah; teme mi ido fo.” (Psalm 25:4) Ọkpọkpọ edikpep Bible ye mme n̄wed N̄ka ekeme ndin̄wam fi etịm emehe ye Jehovah. Ndibọn̄ akam ofụri esịt kpukpru ini edi akpan n̄kpọ n̄ko. “Ẹn̄wan̄a esịt mbufo ke iso esie,” ntre ke andiwet psalm eketeme. (Psalm 62:8) Nte afo okụtde nte ẹbọrọde mme akam fo, afo oyokụt ọkpọkpọ udọn̄ emi Abasi enyenede ke idemfo. Emi ayan̄wam fi okụt nte etịmde esịk ekpere enye.
Mme idomo ye mme mfịna ẹnọ ifet efen ndisan̄a n̄kpere Abasi. Afo emekeme ndisobo mme n̄kpọ-ata ye mme udomo mbuọtidem, utọ nte udọn̄ọ, mme mfịghe ke ufọkn̄wed ye ke itieutom, m̀mê nsọn̄ọn̄kpọ ndutịm uforo. Ekeme ndikam ndi nte ke edinam ukara Abasi ofụri ini eke edibuana ke utom ukwọrọikọ, edidụk mme mbono esop, m̀mê edinyene ukpepn̄kpọ Bible ye nditọ fo edi ọkpọsọn̄ n̄kpọ. Kûyọ mme utọ mfịna oro ikpọn̄! Ben̄e un̄wam Abasi, yom ndausụn̄ esie. (N̄ke 3:5, 6) Ben̄e enye ọnọ fi edisana spirit esie! (Luke 11:13) Nte afo okụtde ima ima un̄wam Abasi, ntre ke afo edikam etịm esịk ekpere enye. Nte David andiwet psalm ekesịnde enye, “ẹtabi, ẹnyụn̄ ẹse nte Jehovah ọfọnde: ọfọfọn ọnọ owo eke eberede idem ye enye.”—Psalm 34:8.
Nso kaban̄a Anthony? Enye eti ete: “Mma ntọn̄ọ ndikere mban̄a ini oro ata ediwak utịtmbuba mi eke spirit ẹkedude ẹkanade edinam uduak Jehovah. Emi ekedi n̄kpọ ubiak. Edi kpa ye kpukpru ubiak ye edikpu oro, mma nti ima Jehovah. Ndusụk ini ama ebe mbemiso n̄kekemede ndibọn̄ akam nnọ Jehovah, edi mma nnam emi, ndien mma n̄n̄wan̄a esịt mi nnọ enye, mben̄ede edidahado esie. Ami mma ntọn̄ọ ndikot Bible n̄ko ndien idem ama akpa mi aban̄a adan̄a n̄kpọ oro n̄kefrede ye adan̄a esisịt n̄kpọ oro n̄kọfiọkde mban̄a Jehovah.” Okposụkedi Anthony mîkụreke kan̄a isua n̄kpọkọbi esie ke ntak ubiatibet esie, enye ọbọ un̄wam oto Mme Ntiense n̄kann̄kụk ndien odu ke usụn̄ edifiak n̄kop nsọn̄idem ke n̄kan̄ eke spirit. Ke inemesịt, Anthony ọdọhọ ete: “Ke ntak Jehovah ye esop esie, mmekeme ndisio akani owo mfep, nnyụn̄ n̄n̄wana ndisịne obufa owo kpukpru usen. Itie ebuana mi ye Jehovah edi ata akpan n̄kpọ ọnọ mi idahaemi.”
N̄kọri eke Spirit ke Utom Ukwọrọikọ Fo
Jesus Christ ama owụk mme anditiene enye ete ẹdi mme ọkwọrọ “gospel Ubọn̄ Abasi.” (Matthew 24:14) Nte obufa asuanetop eti mbụk, ekeme ndidi afo utịmke unyene mbufiọk ke utom ukwọrọikọ. Didie, ndien, ke afo ekeme ndinam n̄kọri man otodo ‘anam utom fo ama’?—2 Timothy 4:5.
Usụn̄ kiet edi ndinyene in̄wan̄în̄wan̄ edu. Kpep ndise utom ukwọrọikọ nte “ọsọn̄-urua n̄kpọ,” ifetutom. (2 Corinth 4:7) Enye edi ifet ndiwụt ima, edinam akpanikọ, ye nsọn̄ọnda nnọ Jehovah. Enye anam nnyịn iwụt edikere mban̄a oro inyenede inọ mbọhọidụn̄ nnyịn n̄ko. Ndinọ idem nnyịn ye unana ibụk ke afan̄ emi ekeme ndidi eti ntak ndinem esịt.—Utom 20:35.
Jesus ke idemesie ama enyene in̄wan̄în̄wan̄ ekikere aban̄a utom ukwọrọikọ. Ndibuana akpanikọ Bible ye mbon en̄wen eketie nte “udia” ọnọ enye. (John 4:34) Ke ntre, ẹkeme nditịn̄ uduak esie ndin̄wam mbon en̄wen ibio ibio ke ikọ esie emi, “Mmenyịme.” (Matthew 8:3) Jesus ama okop mbọm aban̄a mme owo, akpan akpan mbon ẹmi ererimbot Satan anamde ‘ẹdu ke nnanenyịn ẹnyụn̄ ẹsuana.’ (Matthew 9:35, 36) Ndi afo n̄ko ‘emenyịme’ ndin̄wam mbon oro ẹdude ke ekịm eke spirit ẹmi ẹnyụn̄ ẹyomde un̄wana otode Ikọ Abasi? Do oyonụk fi ndinam n̄kpọ mban̄a ewụhọ Jesus emi: “Mbufo ẹka ẹkenam kpukpru mme idụt ẹdi mbet Mi.” (Matthew 28:19) Ke akpanikọ, oyonụk fi ndinyene ọyọhọ ebuana ke utom emi ke adan̄a nte nsọn̄idem ye mme idaha fo ẹyakde.
Ukpọhọde en̄wen ndinam n̄kọri edi ndinyene ebuana ofụri ini ke utom ukwọrọikọ—kpukpru urua edieke ekemede. Ndinam oro ekeme ndin̄wam ndisụhọde nyekidem ye ndịk oro ekemede ndibiọn̄ọ owo oro esikwọrọde ikọ ntomo ntomo. Ndibuana kpukpru ini ke utom an̄wautom ekeme ndinọ fi ufọn ke mme usụn̄ en̄wen n̄ko. Enye ekeme ndifori esịtekọm oro enyenede aban̄a akpanikọ, ọkọri ima oro enyenede ọnọ Jehovah ye mbọhọidụn̄, onyụn̄ an̄wam fi ndiwụk ekikere ke idotenyịn Obio Ubọn̄.
Nte ededi, nso edieke idaha fo eke ndondo emi enen̄erede ọbiọn̄ọ fi ndinyene ebuana ke utom ukwọrọikọ? Edieke anade in̄wan̄în̄wan̄ nte ke ukemeke ndinam mme ukpụhọde, do bọ ndọn̄esịt ke ndifiọk nte ke Abasi enen̄ede enem esịt ke se ededi oro afo ekemede ndinam, adan̄a nte afo anamde utom esie ke ofụri esịt. (Matthew 13:23) Eyedi afo emekeme ndinam n̄kọri ke mme usụn̄ en̄wen, utọ nte ndifori mme usọ ukwọrọikọ fo. Ke esop, Ufọkn̄wed Utom Ukara Abasi ye Esoputom ẹnọ ata nti ukpep ke afan̄ emi. Nte ido edide, nte nnyịn inyenede ukeme ikan ke utom ukwọrọikọ, ntre ke nnyịn idikop inem inyụn̄ ikụt mme utịp.
Ana in̄wan̄în̄wan̄, ndien, nte ke inaha n̄kọri eke spirit etre ke usen oro owo anade baptism. Apostle Paul ekewet aban̄a idotenyịn esie ndinyene uwem oro mîkemeke ndikpa ke heaven ete: “Nditọ-ete, mbatke nte mmomụm n̄kpọ oro kan̄a n̄kama; edi n̄kpọ kiet emi ke nnanam; mfefre se idude mi ke edem, nnyụn̄ nnyanade mbịne se inade mi ke iso; mmesịn ifịk n̄ka iso mbịne utịt mbuba, man n̄kpọbọ utịp akwa ikot eke Abasi okokotde mi ke Christ Jesus. Ẹyak kpukpru nnyịn, eke ima ikọkọri iwọrọ idi owo, inyene orụk esịt emi, ndien edieke mbufo ẹnyenede ekikere eke ẹkpụhọrede ke se ntetịn̄, Abasi ayayarade emi ọnọ mbufo.”—Philippi 3:13-15.
Ih, kpukpru Christian, edide idotenyịn mmọ edi eke uwem oro mîkemeke ndikpa ke heaven m̀mê uwem nsinsi ke Paradise isọn̄, ana ‘ẹnyanarede,’—ẹkonorede, yak idọhọ ntre, ndinyene utịt mbuba uwem! Baptism fo ekedi eti ntọn̄ọ, edi enye ekedi sụk ntọn̄ọ. Ka iso domo ndinam n̄kọri eke spirit. Ebede ke mme mbono esop ye ọkpọkpọ ukpepn̄kpọ, ‘tie nte akwa owo ke ekikere.’ (1 Corinth 14:20) Nnyene ukeme ‘nditịm mfiọk se idide ubom ye uniọn̄ ye ukon̄ ye utụn̄ọ’ akpanikọ. (Ephesus 3:18) N̄kọri oro anamde idin̄wamke fi ndinyene idatesịt ye inemesịt idahaemi kpọt edi ayan̄wam fi n̄ko ndinyene ebiet ifụre ke obufa ererimbot Abasi, emi afo edikemede ndinam n̄kọri ke nsinsi, ke idak ukara Obio Ubọn̄ esie eke heaven!
[Ndise ke page 29]
Oyom ntụnọ man ẹyom ini ẹnọ ọkpọkpọ ukpepn̄kpọ
[Ndise ke page 31]
Ndinyene in̄wan̄în̄wan̄ edu ekeme ndin̄wam nnyịn inyene idatesịt ke utom ukwọrọikọ