Emi Edi Usen Edinyan̄a!
“Sese, ini mfọn-ido mi; sese, usen edinyan̄a mi.”—2 CORINTH 6:2.
1. Nso ke oyom man ẹnyene eti idaha ye Abasi ye Christ?
JEHOVAH emenịm usen eke enye edikpede ikpe ọnọ ubonowo. (Utom 17:31) Edieke anade enye edi usen edinyan̄a ọnọ nnyịn, oyom nnyịn inyene eti idaha ye enye ye Ebiereikpe oro enye emekde, Jesus Christ. (John 5:22) Utọ idaha oro oyom ẹnyene edu uwem oro odude ke n̄kemuyo ye Ikọ Abasi ye mbuọtidem oro onụkde nnyịn ndin̄wam mbon en̄wen man ẹdi mme ata mbet Jesus.
2. Ntak emi ererimbot ubonowo adianarede ọkpọn̄ Abasi?
2 Ke ntak ndammana idiọkn̄kpọ, ererimbot ubonowo adianarede ọkpọn̄ Abasi. (Rome 5:12; Ephesus 4:17, 18) Ke ntre, mbon oro nnyịn ikwọrọde ikọ inọ ẹkeme ndinyene edinyan̄a n̄kukụre edieke mmọ ẹfiakde ẹnam emem ye enye. Apostle Paul ama anam emi an̄wan̄a ke ini enye ekewetde n̄wed ọnọ ẹsọk mme Christian ke Corinth. Ẹyak nnyịn idụn̄ọde 2 Corinth 5:10–6:10 man ise se Paul eketịn̄de aban̄a ubiereikpe, edifiak nnam emem ye Abasi, ye edinyan̄a.
“Imekpe ye Owo”
3. Didie ke Paul akaka iso ‘ekpe ye mme owo,’ ndien ntak emi nnyịn ikpanamde emi mfịn?
3 Paul akada ubiereikpe abuan ye ukwọrọikọ ke ini enye ekewetde ete: “Kpukpru nnyịn inyene ndiwọrọ nyarade ke iso itie-ikpe Christ; man owo kiet kiet ọbọ utịp eke ekemde ye se enye akanamde ke ikpọkidem, ye n̄kpọ oro edide eti, ye onyụn̄ edide idiọk. Sia nnyịn ifiọkde ndịk Ọbọn̄ ndien, imekpe ye owo.” (2 Corinth 5:10, 11) Apostle oro ama ‘ekpe ye owo’ ebe ke ndikwọrọ eti mbụk. Nso kaban̄a nnyịn? Sia nnyịn isakde iso ise utịt idiọk editịm n̄kpọ emi, nnyịn ikpenyene ndisịn ofụri ukeme nnyịn ndikpe ye mbon en̄wen ndinam mme usio-ukot oro ẹyomde man ẹnyene utebeikpe Jesus ye unyịme Enye Emi edinyan̄a otode, kpa Jehovah Abasi.
4, 5. (a) Ntak emi nnyịn mîkpobụreke mbụre iban̄a se nnyịn inamde ke utom Jehovah? (b) Didie ke edi nte ke Paul okobụre mbụre “ọnọ Abasi”?
4 Nte ededi, edieke Abasi ọdiọn̄de utom ukwọrọikọ nnyịn, nnyịn ikpenyeneke ndibụre mbụre. Ke Corinth ndusụk owo ẹma ẹtan̄ idem ẹban̄a idemmọ m̀mê mbon en̄wen, ke ntem ẹtọde ubahade ke esop. (1 Corinth 1:10-13; 3:3, 4) Ke etịn̄de aban̄a idaha emi, Paul ekewet ete: “Nnyịn itọn̄ọke ntak itoro idem inọ mbufo, edi itịn̄, man inọ mbufo ntak ndida mbụre mbụre mban̄a nnyịn, man mbufo ẹnyene se ẹdade ẹbọrọ mmọ ẹmi ẹbụrede ke nnam-n̄wụt, mîdịghe ke esịt. Koro edieke ibuot ọbọhọde nnyịn, ọwọrọ nnyịn ntre ọnọ Abasi; onyụn̄ edieke nnyịn inyenede eti ibuot, edi man ọfọn ye mbufo.” (2 Corinth 5:12, 13) Mbon ọkpọsọn̄ ntan̄idem ikenyeneke udọn̄ ke edidianakiet ye mfọnọn̄kpọ eke spirit esop. Mmọ ẹkeyom ndibụre mbụre mban̄a nte mmọ ẹtiede ke enyọn̄ idem utu ke ndin̄wam mme ekemmọ andinịm ke akpanikọ ndikọri eti esịt ke iso Abasi. Ntem, Paul ama asua ọnọ esop oro ndien ekem ọdọhọ ete: “Yak owo emi obụrede mbụre obụre ke Ọbọn̄.”—2 Corinth 10:17.
5 Ndi Paul ke idem esie ikobụreke mbụre? Eyedi ndusụk owo ẹma ẹkere ntre ke ntak se enye eketịn̄de aban̄a enye ndidi apostle. Edi enye ekenyene ndibụre mbụre ‘nnọ Abasi.’ Enye okobụre mbụre aban̄a uyarade esie nte apostle, mbak mbon Corinth ẹdikpọn̄ Jehovah. Paul akanam emi man anam mmọ ẹfiak ẹtiene Abasi koro mme nsunsu apostle ke ẹkewọn̄ọde mmọ ẹsịn ke ukwan̄ usụn̄. (2 Corinth 11:16-21; 12:11, 12, 19-21; 13:10) Kpa ye oro, Paul ikodomoke ndinem kpukpru owo esịt kpukpru ini mban̄a se enye anamde.—Mme N̄ke 21:4.
Nte Ima Christ Onụk Fi?
6. Didie ke ima Christ okpotụk nnyịn?
6 Nte apostle akpanikọ, Paul ama ekpep mbon en̄wen aban̄a uwa ufak Jesus. Enye ama enyene odudu ke uwem Paul, koro enye ekewet ete: “Ima Christ efefịk nnyịn; koro ida ntem ite, Owo kiet ama akakpa aban̄a kpukpru owo, kpukpru owo ẹkpan̄a ndien; Enye okonyụn̄ akpa aban̄a kpukpru owo, man mme odu-uwem ẹkûdu uwem aba ẹnọ idem mmọ, edi ẹdu uwem ẹnọ Enye emi akakpade aban̄a mmọ, onyụn̄ esetde.” (2 Corinth 5:14, 15) Nso ima ke Jesus okowụt ntem ke ndinọ uwem esie kaban̄a nnyịn! Ke akpanikọ oro ekpenyene ndinyene ọkpọsọn̄ odudu ke uwem nnyịn. Esịtekọm inyenede inọ Jesus ke ndikọnọ uwem esie kaban̄a nnyịn ekpenyene ndinụk nnyịn ndinam utom ifịk ifịk ke nditan̄a eti mbụk edinyan̄a oro Jehovah ọnọde ebe ke edima Eyen esie. (John 3:16; men Psalm 96:2 domo.) Nte “ima Christ” ke onụk fi ndibuana ifịk ifịk ke utom edikwọrọ Obio Ubọn̄ ye edinam mme mbet?—Matthew 28:19, 20.
7. Nso ke ọwọrọ ‘nditre ndifiọk owo ke ido obụkidem’?
7 Ebede ke ndida uwem mmọ nnam n̄kpọ ke usụn̄ oro owụtde esịtekọm kaban̄a se Christ akanamde ke ufọn mmọ, mbon oro ẹyetde aran ‘idụhe uwem aba inọ idem mmọ, edi ẹdu ẹnọ enye.’ Paul ọdọhọ ete: “Ntre ọtọn̄ọde ke emi nnyịn ifiọkke owo ke ido obụkidem; ekpedi nte ikọfiọkde Christ ke ido obụkidem, ifiọkke Enye aba ke usụn̄ oro.” (2 Corinth 5:16) Inaha mme Christian ẹse owo ke ido obụkidem, ndusụk ẹmade mme Jew ẹkan mme Gentile m̀mê mme enyene n̄kpọ ẹkan mme ubuene. Mbon oro ẹyetde aran “ifiọkke owo ke ido obụkidem,” koro se idide akpan n̄kpọ edi itie ebuana mmọ eke spirit ye mme ekemmọ andinịm ke akpanikọ. Mbon oro ‘ẹkefiọkde Christ ke ido obụkidem’ ikedịghe sụk mme owo oro ẹkekụtde Jesus ke ini enye okodude ke isọn̄. Idem ekpededi ndusụk owo oro ẹdoride enyịn ke Messiah ẹkese Christ inikiet nte ekemde ye obụkidem esie, mmọ ikenyeneke ndinam ntre aba. Enye ama ọnọ ikpọkidem esie nte ufak ndien ẹma ẹnam enye eset nte spirit oro ọnọde uwem. Mbon eken oro ẹdinamde ẹset ẹdụk uwem eke heaven ẹyekpọn̄ ikpọkidem mmọ ye unana edikụt Jesus Christ ke obụkidem tutu amama.—1 Corinth 15:45, 50; 2 Corinth 5:1-5.
8. Didie ke mme owo kiet kiet ẹdi ‘ẹdidu ke Christ’?
8 Ke osụk etịn̄de ikọ ọnọ mbon oro ẹyetde aran, Paul adian ete: “Edieke owo odude ke Christ, ẹma ẹbot enye obufa; n̄kani n̄kpọ ẹma ẹbe ẹfep: sese, ẹmekabade ẹdi mbufa.” (2 Corinth 5:17) Ndidu “ke Christ” ọwọrọ ndidara edidianakiet ye enye. (John 17:21) Itie ebuana emi ama edidu ọnọ owo ke ini Jehovah odụride enye ọnọ Eyen esie onyụn̄ obon owo oro ke edisana spirit. Nte eyen Abasi oro ẹbonde ke spirit, “ẹma ẹbot enye obufa” ye idotenyịn edibuana ye Christ ke Obio Ubọn̄ eke heaven. (John 3:3-8; 6:44; Galatia 4:6, 7) Ẹnọ mme utọ Christian oro ẹyetde aran do akwa ifetutom.
“Ẹkabade Ẹtie ke Emem ye Abasi”
9. Nso ke Abasi anam man ẹkeme ndinam emem ye enye?
9 Jehovah ọfọn mfọn ye ‘se ẹbotde obufa’ mi didie ntem! Paul ọdọhọ ete: “Kpukpru n̄kpọ ẹto Abasi, emi akanamde nnyịn itie ke emem ye Enye ke Christ, okonyụn̄ ọnọ nnyịn utom, ete nnyịn inam owo ẹtie ke emem ye Enye; ete, ke Christ Abasi ke ananam ererimbot etie ke emem ye Enye, ke mîbatke ndudue owo inọ mmọ; okonyụn̄ emen ikọ edikabade ntie ke emem ye Enye esịn nnyịn ke ubọk ete ikwọrọ.” (2 Corinth 5:18, 19) Ubonowo ama adianarede ọkpọn̄ Abasi toto nte Adam akanam idiọkn̄kpọ. Edi Jehovah ke ima ama ebem iso eberede usụn̄ edifiak nnam emem ebe ke uwa Jesus.—Rome 5:6-12.
10. Jehovah akayak utom edifiak nnam emem esịn mmanie ke ubọk, ndien nso ke mmọ ẹnam ndika iso nnam enye?
10 Jehovah ayak utom edifiak nnam emem esịn mbon oro ẹyetde aran ke ubọk, ntre Paul ama ekeme ndidọhọ: “Ntre ke nnyịn idi mme isụn̄utom ẹmi idide ke enyịn̄ Christ, nte n̄kpọ eke Abasi adade nnyịn ekpe ye mbufo: imekpe mbufo ubọk ke ibuot Christ, ẹkabade ẹtie ke emem ye Abasi.” (2 Corinth 5:20) Ke eset, ẹkesisio mme isụn̄utom ẹdọn̄ akpan akpan ke mme ini utọk ndika n̄kese m̀mê ẹkeme nditre ndin̄wana ekọn̄. (Luke 14:31, 32) Sia anamidiọk ererimbot ubonowo adianarede ọkpọn̄ Abasi, enye omosion̄o mme isụn̄utom oro enye eyetde aran ọdọn̄ man ẹkesian mme owo se enye oyomde kaban̄a edinam emem. Nte mme andida ke ibuot Christ, mbon oro ẹyetde aran ẹkpe ubọk ẹte: “Ẹkabade ẹtie ke emem ye Abasi.” Emi edi mbọm mbọm n̄kpeubọk oro ẹnamde ẹte ẹyom emem ye Abasi ẹnyụn̄ ẹnyịme edinyan̄a oro enye anamde ẹkeme ndinyene ebe ke Christ.
11. Ebede ke mbuọtidem ke ufak, mmanie ke akpatre ẹnyene edinen idaha ke iso Abasi?
11 Kpukpru owo oro ẹbuọtde idem ke ufak emi ẹkeme ndikabade ntie ke emem ye Abasi. (John 3:36) Paul ọdọhọ ete: “Abasi akanam Enye [Jesus] emi mîkọfiọkke idiọkn̄kpọ akabade edi idiọk-n̄kpọ ke ntak nnyịn; man nnyịn ikabade idi edinen ido Abasi ke Enye.” (2 Corinth 5:21) Jesus, mfọnmma owo oro, ekedi uwa idiọkido ọnọ kpukpru nditọ Adam ẹmi ẹnyan̄ade ẹsion̄o ke ndammana idiọkn̄kpọ. Mmọ ẹkabade ẹdi “edinen ido Abasi” ebe ke Jesus. Nsan̄a mme ada udeme nnyene ye Christ ẹdide owo 144,000 ẹkebem iso ẹnyene edinen ido, m̀mê edinen idaha emi ke iso Abasi. Ke ini Tọsịn Isua Ukara esie, nditọ Nsinsi Ete, kpa Jesus Christ, ẹmi ẹdude ke isọn̄ ẹyenyene edinen idaha nte mme mfọnmma owo. Enye eyemenede mmọ esịm edinen idaha ke mfọnmma man mmọ ẹnam akpanikọ ẹnọ Abasi ẹnyụn̄ ẹbọ enọ nsinsi uwem.—Isaiah 9:6; Ediyarade 14:1; 20:4-6, 11-15.
“Ini Mfọn-Ido”
12. Nso akpan utom ke mme isụn̄utom ye mme udiana isụn̄utom Jehovah ẹnam?
12 Kaban̄a edinyan̄a, ana nnyịn inam n̄kpọ ke n̄kemuyo ye mme ikọ Paul: “Nte mme abuana-utom ye Abasi, nnyịn ikpe mbufo ubọk ite, ẹkûyak mfọn Abasi, emi mbufo [ẹkebọde], ọwọrọ ikpîkpu; (koro Enye ọdọhọ ntem ete, Mma nyere fi ke ini mfọn-ido, mma nnyụn̄ nnyan̄a fi ke usen edinyan̄a. Sese, ini mfọn-ido mi; sese usen edinyan̄a mi).” (2 Corinth 6:1, 2) Mme isụn̄utom Jehovah oro ẹyetde aran ye mme udiana isụn̄utom esie, kpa “mme erọn̄ en̄wen,” iyakke mfọn Abasi emi mmọ ẹkebọde ọwọrọ ikpîkpu. (John 10:16) Ebede ke edinen edu ye ifịk ifịk utom ukwọrọikọ mmọ ke “ini mfọn-ido” emi, mmọ ẹyom mfọn Abasi ndien ke ẹtọt mme andidụn̄ isọn̄ ẹte ke emi edi “usen edinyan̄a.”
13. Nso idi akpan n̄kpọ ke Isaiah 49:8, ndien didie ke enye okosu ke akpa ini?
13 Paul okot oto Isaiah 49:8, emi okotde ete: “Ntem ke Jehovah ọdọhọ, ete, Mma nyere fi ke ini mfọnido, mma nnyụn̄ nnyan̄a fi ke usen edinyan̄a; ndien ami nyonyụn̄ n̄kpeme fi, nnyụn̄ nnịm fi ke ediomi mbio-obio, man afo enen̄ede ererimbot enịm, onyụn̄ edeme udeme eke ẹbiarade.” Akpa ini emi prọfesi emi okosude ekedi ke ini mbon Israel ẹkewọn̄ọde ke ntan̄mfep Babylon ndien ekem ẹfiak ẹnyọn̄ ẹka obio emana mmọ oro akanade ndon.—Isaiah 49:3, 9.
14. Didie ke Isaiah 49:8 okosu kaban̄a Jesus?
14 Ke n̄kaiso edisu prọfesi Isaiah, Jehovah ama ọdọn̄ “owo” esie Jesus nte “un̄wana mme idụt, man [Abasi] ekpedi edinyan̄a . . . tutu esịm ke utịt ererimbot.” (Isaiah 49:6, 8; men Isaiah 42:1-4, 6, 7; Matthew 12:18-21 domo.) Nte an̄wan̄ade, “ini mfọnido” enyene n̄kpọ ndinam ye Jesus ke adan̄aemi enye okodude ke isọn̄. Enye ama ọbọn̄ akam, ndien Abasi ama ‘eyere’ enye. Oro ekedi “usen edinyan̄a” ọnọ Jesus koro enye ama omụm mfọnmma nsọn̄ọnda akama ndien ke ntre “akabade edi ntak nsinsi edinyan̄a ọnọ kpukpru owo ẹmi ẹkopde uyo Esie.”—Mme Hebrew 5:7, 9; John 12:27, 28.
15. Ọtọn̄ọde ke ini ewe ke nditọ Israel eke spirit ẹkedomo ndiwụt ke imodot ndibọ mfọnido Abasi oro owo mîdotke, ndien ye nso uduak?
15 Paul ada Isaiah 49:8 etịn̄ aban̄a mme Christian oro ẹyetde aran, ekpede ye mmọ ete ‘ẹkûyak mfọn Abasi, emi mmọ ẹkebọde, ọwọrọ ikpîkpu’ ebe ke nditre ndiyom mfọn esie ke “ini mfọn-ido” ye ke “usen edinyan̄a” oro enye ọnọde. Paul adian ete: “Sese, ini mfọn-ido mi; sese, usen edinyan̄a mi.” (2 Corinth 6:2) Toto ke Pentecost 33 E.N., nditọ Israel eke spirit ẹmedomo ndiwụt ke imodot ndibọ mfọnido Abasi oro owo mîdotke man “ini mfọn-ido” ekpedi “usen edinyan̄a” ọnọ mmọ.
‘Ndiwụt Nte Idi Ata Mme Asan̄autom Abasi’
16. Ke idak ewe n̄kpọsọn̄ idaha ke Paul okowụt ke idi asan̄autom Abasi?
16 Ndusụk mbon oro ẹkebuanade ye esop Corinth ikowụtke ke imodot ndibọ mfọn Abasi. Mmọ ẹma ẹdọk Paul edidọk ke ukeme oro mmọ ẹkesịnde ndibiat itie apostle esie, okposụkedi oro enye ekefepde ‘ndinịm n̄kpọ ubiọn̄ọ baba kiet.’ Enye ama enen̄ede owụt idemesie nte asan̄autom Abasi “ke akwa edime ime, ke ukụt, ke mfịghe, ke mbaba, ke ikpa, ke n̄kpọkọbi, ke itie ndutịme, ke ọkpọsọn̄ utom, ke ataba idap, ke edikpa biọn̄.” (2 Corinth 6:3-5) Ekem, Paul ama owụt ete ke edieke mme andibiọn̄ọ imọ ẹkedide mme asan̄autom, ke imọ ‘imasan̄a utom ikan mmọ’ ke ntak edibọ ufen n̄kan ke n̄kpọkọbi, ke ikpa, ke n̄kpọndịk, ye editie biọn̄.—2 Corinth 11:23-27.
17. (a) Ebede ke ndinyene mme edu ewe ke nnyịn ikeme ndiwụt ke idi mme asan̄autom Abasi? (b) Nso idi “n̄kpọ-ekọn̄ edinen ido”?
17 Ukem nte Paul ye mme nsan̄a esie, nnyịn imekeme ndiwụt nte ke idi mme asan̄autom Abasi. Didie? “Ke edisana ido,” ye ke ndinam n̄kpọ ke n̄kemuyo ye nnennen ifiọk Bible. Nnyịn imekeme ndiwụt idem nnyịn “ke anyan ime,” iyọde ukwan̄ edinam m̀mê mme n̄kpọ iyatesịt ke ime, onyụn̄ ebe “ke mfọn-ido” nte nnyịn inamde n̄kpọ ndin̄wam mbon efen. Akan oro, nnyịn imekeme ndiwụt nte ke idi mme asan̄autom Abasi ebe ke ndinyịme ndausụn̄ eke spirit esie, iwụtde “ata ima,” itịn̄de akpanikọ, inyụn̄ iberide edem ke enye man inyene odudu ndinam utom ukwọrọikọ. Nte enemde, Paul n̄ko ama owụt idaha asan̄autom esie “ke edisan̄a ye n̄kpọ-ekọn̄ edinen ido ke ubọk nnasia ye ufien.” Ke ekọn̄ eset, ẹkesiwak ndikama ofụt ke ubọk nnasia ke adan̄aemi ẹkamade otuekọn̄ ke ufien. Ke ndin̄wana ekọn̄ eke spirit ye mme nsunsu andikpep, Paul ikakamake mme n̄kpọekọn̄ eke ikpọkidem idiọkn̄kpọ—abian̄a ye n̄kari. (2 Corinth 6:6, 7; 11:12-14; Mme N̄ke 3:32) Enye akakama ndinen “n̄kpọ-ekọn̄,” m̀mê usụn̄, ndida nnam utuakibuot akpanikọ aka iso. Nnyịn ikpenyene ndinam ntre.
18. Edieke nnyịn idide mme asan̄autom Abasi, didie ke nnyịn idikama idem nnyịn?
18 Edieke nnyịn idide mme asan̄autom Abasi, nnyịn iyakama idem nnyịn nte Paul ye mme nsan̄autom esie ẹkekamade. Nnyịn iyanam n̄kpọ nte mme Christian edide ẹkpono nnyịn m̀mê owo ikponoke. Ndiọi etop ẹnọde ẹban̄a nnyịn iditreke utom ukwọrọikọ nnyịn, nnyịn idinyụn̄ ikohokede idem edieke ẹnọde eti etop ẹban̄a nnyịn. Nnyịn iyetịn̄ akpanikọ ndien ẹkeme ndidiọn̄ọ nnyịn ke ntak mme utom Abasi oro inamde. Ke ini isobode n̄kpọndịk oro akamade n̄kpa ke idak en̄wan asua, nnyịn iyeberi edem ke Jehovah. Ndien nnyịn iyọbọ ntụnọ ye esịtekọm.—2 Corinth 6:8, 9.
19. Didie ke ẹkeme ‘ndinam ediwak owo ẹkabade mbon inyene’ ke n̄kan̄ eke spirit?
19 Ke nditre nneme esie aban̄ade utom edinam emem, Paul ama etịn̄ aban̄a idemesie ye mme nsan̄a esie nte ‘owo mfụhọ, edi idu ke idatesịt kpukpru ini; ẹte idi idem-idem owo, edi ke inanam ediwak owo ẹkabade mbon inyene; nte mînyeneke baba n̄kpọ kiet, edi imenyene kpukpru n̄kpọ.’ (2 Corinth 6:10) Ke adan̄aemi mme asan̄autom oro ẹkenyenede ntak ndifụhọ mban̄a ukụt mmọ, mmọ ẹma ẹnyene idatesịt. Mmọ ikenyeneke inyene obụkidem, edi mmọ ‘ẹma ẹnam ediwak owo ẹkabade mbon inyene’ ke n̄kan̄ eke spirit. Ke akpanikọ, mmọ ‘ẹma ẹnyene kpukpru n̄kpọ’ koro mbuọtidem mmọ ama anam mmọ ẹforo ke n̄kan̄ eke spirit—idem idotenyịn edikabade ndi nditọ Abasi eke heaven. Ndien mmọ ẹma ẹnyene eti uwem ye uwem inemesịt nte mme Christian asan̄autom. (Utom 20:35) Ukem nte mmọ, nnyịn imekeme ‘ndinam ediwak owo ẹkabade mbon inyene’ ebe ke ndibuana ke utom edifiak nnam emem idem idahaemi—ke usen edinyan̄a emi!
Nyene Mbuọtidem ke Edinyan̄a Jehovah
20. (a) Nso ikedi udọn̄ ofụri esịt Paul, ndien ntak owo mîkenyeneke ndibiat ini? (b) Nso inịm usen edinyan̄a oro nnyịn idude uwem ke emi idiọn̄ọ?
20 Ke ini Paul ekewetde udiana leta esie ọnọ ẹsọk mbon Corinth ke n̄kpọ nte 55 E.N., n̄kpọ nte isua 15 kpọt ẹkesụhọ ẹnọ editịm n̄kpọ mme Jew. Apostle oro ama enen̄ede oyom mme Jew ye mme Gentile ẹnam emem ye Abasi ebe ke Christ. Oro ekedi usen edinyan̄a, ndien ini ikodụhe ndibiat. Nte ededi, nnyịn imodu ke mbiet utịt editịm n̄kpọ oro toto ke 1914. Utom ukwọrọikọ Obio Ubọn̄ eke ofụri ererimbot oro akade iso idahaemi enịm ini emi idiọn̄ọ nte usen edinyan̄a.
21. (a) Ewe ibuotikọ isua ke ẹmek ẹnọ 1999? (b) Nso ke nnyịn ikpenyene ndinam ke usen edinyan̄a emi?
21 Oyom mme owo ke kpukpru idụt ẹkop ẹban̄a ndutịm Abasi kaban̄a edinyan̄a ebe ke Jesus Christ. Iyomke inam ubịghi. Paul ekewet ete: “Sese, usen edinyan̄a mi.” Mme ikọ eke 2 Corinth 6:2 oro ẹdidi ibuotikọ isua 1999 eke Mme Ntiense Jehovah. Odot didie ntem, koro nnyịn ke isak iso ise n̄kpọ oro ọdiọkde akan nsobo Jerusalem ye temple esie! Utịt ofụri editịm n̄kpọ emi, abuanade kpukpru owo ke ererimbot, odu ke ata n̄kpet n̄kpet ini iso. Idahaemi—idịghe n̄kpọn̄—edi ini ndinam n̄kpọ. Edieke nnyịn inịmde ke akpanikọ ite ke edinyan̄a enyene Jehovah, edieke nnyịn imade enye, ndien edieke nnyịn ibatde nsinsi uwem ke ọsọn̄urua n̄kpọ, nnyịn idiyakke mfọn Abasi ọwọrọ ikpîkpu. Ye udọn̄ ofụri esịt ndikpono Jehovah, nnyịn iyowụt ebe ke ikọ ye edinam nte ke nnyịn itịn̄ akpanikọ ke ini nnyịn idọhọde ite: “Sese, usen edinyan̄a mi.”
Didie ke Afo Ọkpọbọrọ?
◻ Ntak emi edinam emem ye Abasi edide ata akpan n̄kpọ?
◻ Mmanie ẹdi mme isụn̄utom ye mme udiana isụn̄utom ẹmi ẹsịnde idem ke utom edinam emem?
◻ Didie ke nnyịn ikeme ndiwụt ke idi mme asan̄autom Abasi?
◻ Nso ke ibuotikọ isua 1999 eke Mme Ntiense Jehovah ọwọrọ ọnọ fi?
[Mme ndise ke page 17]
Ukem nte Paul, nte afo ke ọkwọrọ ikọ ifịk ifịk onyụn̄ an̄wam mbon efen ndinam emem ye Abasi?
United States
France
Côte d’Ivoire
[Ndise ke page 18]
Ke usen edinyan̄a emi, ndi afo emesịne ke otu akwa udịm owo ẹmi ẹnamde emem ye Jehovah Abasi?