“Ẹnam Esịt Mbufo Ọsọn̄”
“Ana nte mbufo ẹnyene ime man ẹbọ se Abasi ọkọn̄wọn̄ọde, ke ẹma ẹkenam se Enye amade.”—MME HEBREW 10:36.
1, 2. (a) Nso iketịbe inọ ediwak Christian ke akpa isua ikie? (b) Ntak edide mmemmem n̄kpọ mbuọtidem ndimem?
KE OTU kpukpru mme andiwet Bible, idụhe owo emi akawakde nditịn̄ mban̄a mbuọtidem n̄kan apostle Paul. Ndien ediwak ini, enye ama etịn̄ aban̄a mbon oro mbuọtidem mmọ ama ekemem m̀mê ama akakpa. Ke uwụtn̄kpọ, Hymenaeus ye Alexander ẹma “ẹwụre ke uwem mbuọtidem.” (1 Timothy 1:19, 20) Demas ama ọkpọn̄ Paul sia “enye [akamade] eyo emi odude ke emi.” (2 Timothy 4:10) Ndusụk owo, ebede ke mme edinam oro mîdịghe eke mme Christian ye edida n̄kpọ didie didie, ẹma “ẹsịn̄e nsa ye mbuọtidem.” Nsunsu ifiọk ama abian̄a ndusụk owo mmọ ẹnyụn̄ “ẹdiyo ẹkpọn̄ mbuọtidem.”—1 Timothy 5:8; 6:20, 21.
2 Ntak emi mme Christian oro ẹyetde aran do ẹkekpude ke mbuọtidem ke mme usụn̄ ẹmi? Ọfọn, “mbuọtidem ọwọrọ ete, nnyịn itịm ibụre ifiọk ite iyọbọ se nnyịn idoride enyịn ke esịt, inyụn̄ itịm inịm ite se idịbede owo ke enyịn ododu.” (Mme Hebrew 11:1) Nnyịn inyene mbuọtidem ke se nnyịn mîkemeke ndikụt. Nnyịn iyomke enye ke mme n̄kpọ oro ẹkụtde. Enen̄ede edi mmemmem ndinam utom kaban̄a inyene oro ẹkụtde ke enyịn akan kaban̄a inyene eke spirit oro enyịn mîkwe. (Matthew 19:21, 22) Ediwak n̄kpọ oro ẹkụtde ke enyịn—utọ nte “mbumek obụkidem, ye mbumek enyịn”—ẹnen̄ede ẹdemede udọn̄ anana-mfọnmma ikpọkidem nnyịn ẹnyụn̄ ẹkeme ndinam mbuọtidem nnyịn emem.—1 John 2:16.
3. Nso orụk mbuọtidem ke Christian ekpenyene ndikọri?
3 Edi, Paul ọdọhọ ete, “owo eke asan̄ade ekpere Abasi enyene ndinịm ete Enye ododu, onyụn̄ edi Andinọ mmọ ẹmi ẹyomde Enye utịp.” Moses ama enyene utọ mbuọtidem oro. Enye ‘ama owụk enyịn ese utịp eke ẹdinọde enye’ ama onyụn̄ ‘ọsọn̄ọ ada nte n̄kpọ eke okụtde Enye emi enyịn owo mîkwe.’ (Mme Hebrew 11:6, 24, 26, 27) Oyom Christian ọkọri orụk mbuọtidem emi. Nte ẹkewụtde ke ibuotikọ oro ekebemde iso, Abraham ekedi eti uwụtn̄kpọ ke afan̄ emi.
Uwụtn̄kpọ Mbuọtidem Abraham
4. Didie ke mbuọtidem Abraham okotụk usụn̄ uwem esie?
4 Abraham okodu ke Ur ke ini ọkọbọde un̄wọn̄ọ Abasi nte ke enye oyobon mfri oro edidide edidiọn̄ ọnọ kpukpru idụt. (Genesis 12:1-3; Utom 7:2, 3) Ọkọn̄ọde ke un̄wọn̄ọ oro, Abraham ama okop uyo Jehovah, ebemde iso ọwọrọ idụn̄ aka Haran ndien ekem aka Canaan. Do, Jehovah ama ọn̄wọn̄ọ ndinọ ubon esie isọn̄ oro. (Genesis 12:7; Nehemiah 9:7, 8) Nte ededi, ediwak n̄kpọ ẹmi Jehovah ọkọn̄wọn̄ọde ẹkenyene ndisu ke Abraham ama akakpa. Ke uwụtn̄kpọ, akananam Abraham ke idemesie ikadaha ikpehe ekededi ke Canaan inyene—ke mîbọhọke abaitiat Machpelah, emi enye ekedepde nte itie ubụkowo. (Genesis 23:1-20) Kpa ye oro, enye ama enyene mbuọtidem ke ikọ Jehovah. Ke akande kpukpru, enye ama enyene mbuọtidem ke “Obio [ini iso] eke enyenede nsọn̄ọnda, eke Andibọp ye Andinam Enye [edide] Abasi.” (Mme Hebrew 11:10) Orụk mbuọtidem oro okomụm enye akama ke ofụri eyouwem esie.
5, 6. Ke nso usụn̄ ke ẹkedomo mbuọtidem Abraham kaban̄a un̄wọn̄ọ Jehovah?
5 Ẹkụt emi akpan akpan ke se iban̄ade un̄wọn̄ọ oro nte ke mfri Abraham ayakabade edi akamba idụt. Man emi ekeme nditịbe, ama oyom Abraham enyene eyeneren, ndien enye ama ebet ke anyan ini man ẹnọ enye kiet. Nnyịn ifiọkke m̀mê enye ekedi isua ifan̄ ke akpa ini oro enye okokopde un̄wọn̄ọ Abasi, edi ke ini enye akanamde anyan isan̄ oro aka Haran, Jehovah ikọnọhọ enye eyen ndomokiet kan̄a. (Genesis 11:30) Enye ama odu ke Haran ebịghi tutu ekeme ‘ndikọ inyene ye mme owo,’ ndien ke ini enye ọkọwọrọde idụn̄ aka Canaan, enye ekedi isua 75 ke emana, Sarah onyụn̄ edi isua 65. Edi, ikosụk inyeneke eyen. (Genesis 12:4, 5) Ke ini Sarah ekesịmde ufọt ufọt iduọk isua 70 esie, enye ama ebiere ete ke imọ imọsọn̄ ikaha ke emi ndiman eyen nnọ Abraham. Ntem, ke etienede ido ini oro, enye ama ada Hagar ofụn an̄wan esie ọnọ Abraham, ndien enye obon eyeneren oto enye. Edi enye ikedịghe eyen un̄wọn̄ọ oro. Ke akpatre, ẹma ẹbịn Hagar ye eyen esie, Ishmael, ẹfep. Edi, ke ini Abraham akanamde n̄kpeubọk ke ibuot mmọ, Jehovah ama ọn̄wọn̄ọ ke iyọdiọn̄ Ishmael.—Genesis 16:1-4, 10; 17:15, 16, 18-20; 21:8-21.
6 Ke edikem ini Abasi—ata anyan ini ke mmọ ke akpa ini ẹma ẹkekop un̄wọn̄ọ oro—Abraham emi ekedide isua 100 ye Sarah emi ekedide isua 90 ẹma ẹnyene nsek eyeneren, Isaac. Anaedi ekedi utịbe n̄kpọ didie ntem! Ye usọn̄ an̄wan ye ebe emi, ekekpere nditie nte ediset ke n̄kpa ke ini ikpọkidem mmọ ẹmi ‘ẹma ẹkekpa’ ẹkedade obufa uwem ẹdi. (Rome 4:19-21) Edibet oro ama ebịghi, edi ke ini un̄wọn̄ọ oro okosude ke akpatre, edibet oro ama odot.
7. Didie ke ẹbuan mbuọtidem ye ime?
7 Uwụtn̄kpọ Abraham eti nnyịn ete ke mbuọtidem ikpenyeneke ndidi sụk ke ibio ini. Paul akabuan mbuọtidem ye ime ke ini enye ekewetde ete: “Ana nte mbufo ẹnyene ime man ẹbọ se Abasi ọkọn̄wọn̄ọde, ke ẹma ẹkenam se Enye amade. . . . Nnyịn idịghe mbon mfiak-edem n̄ka nsobo; edi idi mmọ ẹmi ẹbuọtde idem isịm edinyan̄a ukpọn̄.” (Mme Hebrew 10:36-39) Ediwak owo ẹmebet edisu un̄wọn̄ọ oro ke anyan ini. Ndusụk owo ẹmebet ke ofụri eyouwem. Ọkpọsọn̄ mbuọtidem mmọ omomụm mmọ akama. Ndien, ukem nte Abraham, mmọ ẹyebọ utịp ke edikem ini Jehovah.—Habakkuk 2:3.
Ndikpan̄ Utọn̄ nnọ Abasi
8. Didie ke nnyịn ikpan̄ utọn̄ inọ Abasi mfịn, ndien ntak oro edisọn̄ọde mbuọtidem nnyịn?
8 Ke nsụhọde n̄kaha n̄kpọ inan̄ ẹkenam mbuọtidem Abraham ọsọn̄, ndien mme n̄kpọ oro ẹkeme ndin̄wam nnyịn. Akpa, enye ama owụt ‘edinịm esie nte ke Abasi ododu’ ebe ke ndikpan̄ utọn̄ ke ini Jehovah eketịn̄de ikọ. Ntem, enye ama okpụhọde ọkpọn̄ mme Jew eyo Jeremiah, ẹmi ẹkenịmde Jehovah ke akpanikọ edi mîkenyeneke mbuọtidem ke mme ikọ esie. (Jeremiah 44:15-19) Mfịn, Jehovah etịn̄ ikọ ọnọ nnyịn ebe ke mme page Bible, kpa Ikọ esie eke odudu spirit, emi Peter ọkọdọhọde ke ebiet “utuenikan̄ eke ayamade ke n̄kịmn̄kịm ebiet . . . ke esịt mbufo.” (2 Peter 1:19) Ke ini nnyịn ikotde Bible ye n̄kpan̄utọn̄, ‘ẹbọk nnyịn ke ikọ mbuọtidem.’ (1 Timothy 4:6; Rome 10:17) Ke adianade do, ke ukperedem ini emi, “asan̄autom emi anamde akpanikọ, onyụn̄ enyenede ọniọn̄” ke ọnọ “udia [eke spirit] ke edikem ini,” ndausụn̄ ke ndida mme edumbet Bible nsịn ke edinam ye ke ndifiọk prọfesi Bible. (Matthew 24:45-47) Ndikpan̄ utọn̄ nnọ Jehovah ke usụn̄ emi edi ata akpan n̄kpọ ke ndinyene ọkpọsọn̄ mbuọtidem.
9. Nso ididi utịp edieke nnyịn inen̄ede inịm idotenyịn Christian ke akpanikọ?
9 Mbuọtidem Abraham ama enyene n̄kpet n̄kpet ebuana ye idotenyịn esie. “Abraham osụk odori enyịn enịm ke akpanikọ ke ini idotenyịn mîdụhe, man enye ekpedi ete ediwak mme idụt.” (Rome 4:18) Emi edi udiana n̄kpọ oro ekemede ndin̄wam nnyịn. Nnyịn ikpedehede ifre ite ke Jehovah edi “Andinọ mmọ ẹmi ẹyomde Enye utịp.” Apostle Paul ọkọdọhọ ete: “Nnyịn ikpa utom ye en̄wan, koro nnyịn ikodoride enyịn ke odu-uwem Abasi.” (1 Timothy 4:10) Edieke nnyịn inen̄ede inịm idotenyịn Christian ke akpanikọ, ofụri usụn̄ uwem nnyịn oyowụt mbuọtidem nnyịn, nte eke Abraham okowụtde.
Ndinyene Nneme ye Abasi
10. Nso orụk akam edisọn̄ọ mbuọtidem nnyịn?
10 Abraham ama enyene nneme ye Abasi, ndien emi ekedi ọyọhọ n̄kpọ ita oro akanamde mbuọtidem esie ọsọn̄. Mfịn, nnyịn n̄ko imekeme ndinyene nneme ye Jehovah, idade enọ akam inam n̄kpọ ebe ke Jesus Christ. (John 14:6; Ephesus 6:18) Ekedi ke ama okotop n̄ke owụtde nte oyomde ẹbọn̄ akam kpukpru ini ke Jesus okobụp mbụme oro: “Ke adan̄aemi Eyen Owo edidide, nte Enye oyokụt mbuọtidem ke isọn̄?” (Luke 18:8) Akam oro ọbọpde mbuọtidem idịghe n̄kpọ oro owo mîkereke-kere m̀mê ndidi ke mbuari. Enye enen̄ede enyene se ọwọrọde. Ke uwụtn̄kpọ, akam ofụri esịt edi akpan n̄kpọ ke ini nnyịn inyenede mme akpan ubiere ndinam m̀mê ke ini nnyịn idude ke akwa mfịghe.—Luke 6:12, 13; 22:41-44.
11. (a) Didie ke ẹkesọn̄ọ Abraham idem ke ini enye akan̄wan̄ade esịt esie ọnọ Abasi? (b) Nso ke nnyịn ikeme ndikpep nto ifiọk n̄kpọntịbe Abraham?
11 Ke ini Abraham ọkọtọn̄ọde ndisọn̄ ndien Jehovah mîsụk inọhọ enye kan̄a mfri oro ẹken̄wọn̄ọde, enye ama enyene nneme ye Abasi aban̄a editịmede esịt esie. Jehovah ama ọnọ enye nsọn̄ọ. Nso ikedi utịp? Abraham “ọbuọt idem ye Jehovah; ndien enye abat oro ọnọ enye ke edinen ido.” Ekem, Jehovah ọnọ idiọn̄ọ ndisọn̄ọ mme ikọ un̄wọn̄ọ esie. (Genesis 15:1-18) Edieke nnyịn in̄wan̄ade esịt nnyịn inọ Jehovah ke akam, inyịmede mme un̄wọn̄ọ Jehovah ke Ikọ esie, kpa Bible, inyụn̄ ikopde uyo esie ke ọyọhọ mbuọtidem, do Jehovah ayanam mbuọtidem nnyịn ọsọn̄ n̄ko.—Matthew 21:22; Jude 20, 21.
12, 13. (a) Didie ke ẹkediọn̄ Abraham ke ini enye eketienede ndausụn̄ Jehovah? (b) Mme orụk ifiọkutom ewe ẹdisọn̄ọ mbuọtidem nnyịn?
12 Ọyọhọ n̄kpọ inan̄ oro akanamde mbuọtidem Abraham ọsọn̄ ekedi ibetedem oro Jehovah ọkọnọde enye ke ini enye eketienede ndausụn̄ Abasi. Ke ini Abraham akakade ndifak Lot ke ubọk ndidem oro ẹkedade ekọn̄ ẹdi, Jehovah ama ọnọ enye edikan. (Genesis 14:16, 20) Ke adan̄aemi Abraham okodụn̄de nte odudụn̄ ke idụt oro mfri esie edidade inyene, Jehovah ama ọdiọn̄ enye ke n̄kan̄ eke obụk. (Men Genesis 14:21-23 domo.) Jehovah ama ada usụn̄ ke mme ukeme akama-ukpọhọde Abraham ndiyom n̄wan oro odotde nnọ Isaac. (Genesis 24:10-27) Ih, Jehovah ama “ọdiọn̄ Abraham ke kpukpru n̄kpọ.” (Genesis 24:1) Nte utịp, mbuọtidem esie ama ọsọn̄ etieti ndien itie ebuana esie ye Jehovah Abasi ekpere etieti tutu Jehovah okot enye “ufan mi.”—Isaiah 41:8; James 2:23.
13 Nte nnyịn mfịn imekeme ndinyene utọ ọkpọsọn̄ mbuọtidem oro? Ih. Edieke nnyịn, ukem nte Abraham, idomode Jehovah ise ebe ke ndinam mme ewụhọ esie, enye ọyọdiọn̄ nnyịn n̄ko, ndien oro ọyọsọn̄ọ mbuọtidem nnyịn. Ke uwụtn̄kpọ, editop enyịn nse Ibatutom Isua Utom 1998 owụt ete ke ẹma ẹdiọn̄ ediwak owo ke utịbe utịbe usụn̄ ke ini mmọ ẹkenamde ewụhọ ndikwọrọ eti mbụk.—Mark 13:10.
N̄wetnnịm N̄kpọ Mbuọtidem Mfịn
14. Didie ke Jehovah ọkọdiọn̄ ubịnikọt oro ẹkekamade Mbụk Obio Ubọn̄ Nọ. 35 ẹnam?
14 Ko ke October 1997, ubịnikọt ofụri ererimbot ke Mbụk Obio Ubọn̄ Nọ. 35 ama enen̄ede okụt unen, ke ntak ifịk ye ifiopesịt ediwak miliọn Ntiense. Se iketịbede ke Ghana edi uwụtn̄kpọ kaban̄a emi. Ẹma ẹsuan se ikekperede ndisịm idem miliọn 2.5 ke usem inan̄, ndien nte utịp se ikperede owo 2,000 ẹma ẹsịn eben̄e ẹyom ukpepn̄kpọ Bible. Ke Cyprus Ntiense iba ẹmi ẹkesuande Mbụk Obio Ubọn̄ ẹma ẹkụt oku etienede mmọ. Ke esisịt ini ama ekebe, mmọ ẹma ẹnọ enye idem Mbụk Obio Ubọn̄ kiet. Enye ama ọbọbọ idem kiet onyụn̄ ọdọhọ ete: “Etop esie ama otụk mi etieti tutu n̄koyom nditoro mbon oro ẹkewetde enye.” Ke Denmark, ẹkesuan idem Mbụk Obio Ubọn̄ miliọn 1.5 adade nti utịp edi. N̄wan emi anamde utom ke itieutom esede aban̄a itie ebuana mbio obio do ọkọdọhọ ete: “Tract emi akama etop ọnọ kpukpru owo. Enye ọsọp an̄wan̄a owo, ndien enye onụk owo, anam owo enyene udọn̄ ndifiọk n̄kpọ efen efen. Enye enen̄ede enen!”
15. Mme ifiọkutom ewe ẹwụt nte ke Jehovah ama ọdiọn̄ ukeme ẹkesịnde ndisịm mme owo ke kpukpru ebiet?
15 Ke 1998 ẹma ẹsịn ukeme ndikwọrọ ikọ nnọ mme owo ke kpukpru ebiet idịghe ke ufọk mmọ kpọt. Ke Côte d’Ivoire ebe ye n̄wan ẹdide isụn̄utom ẹma ẹka nsụn̄ikan̄ 322 ke itiembehe nsụn̄ikan̄. Mmọ ẹma ẹnịm n̄wed 247, magazine 2,284, ndiye uduot n̄kpri n̄wed 500, ye ediwak tract ke mme itie ikie, ọkọrọ ye mme vidio man mme awat nsụn̄ikan̄ ẹkpese ke ini ẹdude ke inyan̄. Ke Canada Ntiense kiet ama aka itie udiọn̄ ubomisọn̄. Andinyene itie oro ama enyene udọn̄, ndien eyenete oro ama etie do ke hour inan̄ ye ubak, okposụkedi ofụri ini oro akadade ọnọ mbonurua ikọ ntiense ekedide n̄kpọ nte hour kiet. Ke akpatre, ẹma ẹdiomi ukpepn̄kpọ ke n̄kanika duop okoneyo. Nte ededi, owo ikesitọn̄ọke ibọhọke tutu ke ufọt okoneyo ndien ama esika iso tutu esịm n̄kanika iba n̄kpọusen. Eyedi ndutịm oro ekedi n̄kpọ-ata, edi ẹma ẹnyene nti utịp. Eren oro ama ebiere ndisiberi itieutom esie ke Sunday man esidụk mme mbono esop. Ikebịghike enye ye ubon esie ẹma ẹtọn̄ọ ndinam nti n̄kọri.
16. Mme ifiọkutom ewe ẹwụt nte ke ediye uduot ekpri n̄wed Oyom ye n̄wed Ifiọk ẹdi mme okopodudu n̄kpọutom ke utom ukwọrọikọ ye edinọ ukpep?
16 Ediye uduot ekpri n̄wed Nso ke Abasi Oyom Oto Nnyịn? ye n̄wed Ifiọk Oro Adade Osịm Nsinsi Uwem ẹka iso ndidi mme okopodudu n̄kpọutom ke utom ukwọrọikọ ye edinọ ukpep. Ke Italy owo n̄ka nun emi ekebetde bọs ama ọbọ idem Mbụk Obio Ubọn̄ kiet. Ke ndan̄nsiere, ẹma ẹfiak ẹka ẹbịne enye, enye onyụn̄ ọbọ ediye uduot ekpri n̄wed Oyom. Usen kiet kiet ke oro ebede, ẹma ẹsinịm ukpepn̄kpọ Bible ye enye ke n̄kpọ nte minit 10 esịm 15 ke itiembehe bọs. Ke ọfiọn̄ kiet ye ubak ama ekebe, enye ama ebiere ndikpọn̄ ufọkidụn̄ n̄ka nun nnyọn̄ obio esie ke Guatemala man akaka iso ke ukpepn̄kpọ esie. Ke Malawi Lobina emi ekedide ifịk ifịk aka ufọkabasi ikokopke inemesịt ke ini nditọiban esie ẹketọn̄ọde ndikpep Bible ye Mme Ntiense Jehovah. Edi, n̄kaiferi ẹmi ẹma ẹsibuana akpanikọ Bible ye eka mmọ ke ini mmọ ẹkekemede. Ke June 1997, Lobina ama okụt n̄wed Ifiọk ndien ikọ oro “Ifiọk Oro Adade” ama edemede enye udọn̄. Ke July enye ama enyịme ukpepn̄kpọ Bible. Ke August enye ama odụk mbono district onyụn̄ enen̄ede akpan̄ utọn̄ ke ofụri ndutịm. Ke utịt ọfiọn̄ oro, enye ama ọkpọn̄ ufọkabasi esie ndien ama odot nte asuanetop oro mînaha baptism. Enye ama ana baptism ke November 1997.
17, 18. Didie ke mme vidio N̄ka ẹnyene ufọn ke ndin̄wam mme owo “ndikụt” mme n̄kpọ eke spirit?
17 Mme vidio N̄ka ẹmen̄wam ediwak owo “ndikụt” mme n̄kpọ eke spirit. Ke Mauritius, eren kiet ama ọkpọn̄ ufọkabasi esie ke ntak unana edidianakiet emi okodude do. Isụn̄utom kiet ama owụt enye edidianakiet emi odude ke otu Mme Ntiense Jehovah, adade vidio oro United by Divine Teaching. Ke emi otụkde enye, eren oro ama ọdọhọ ete: “Mbufo Mme Ntiense Jehovah ẹmedodu ke Paradise!” Enye ama enyịme ukpepn̄kpọ Bible. Eyenete an̄wan kiet ke Japan ama owụt ebe esie oro mînịmke ke akpanikọ vidio oro Jehovah’s Witnesses—The Organization Behind the Name, ndien oro ama onụk enye ndikpep Bible kpukpru ini. Ke ama ekese United by Divine Teaching, enye ama oyom ndidi kiet ke otu Mme Ntiense Jehovah. Udịm vidio edide ikpehe ita do, emi ẹkotde The Bible—A Book of Fact and Prophecy ama an̄wam enye ndida mme edumbet Bible nsịn ke edinam ke uwem esie. Ke akpatre, Jehovah’s Witnesses Stand Firm Against Nazi Assault ama owụt enye nte ke Jehovah esisọn̄ọ ikọt Esie idem ndibiọn̄ọ mme en̄wan Satan. Eren oro ama ana baptism ke October 1997.
18 Mmọ ẹmi ẹdi sụk ibat ibat ke otu ata ediwak ifiọkutom oro ẹkenyenede ke isua utom emi ekebede. Mmọ ẹwụt ẹte ke Mme Ntiense Jehovah ẹnyene okopodudu mbuọtidem ye nte ke Jehovah ke anam mbuọtidem oro ọsọn̄ ebe ke ndidiọn̄ utom mmọ.—James 2:17.
Kọri Mbuọtidem Mfịn
19. (a) Didie ke nnyịn idu ke idaha ọfọnde akan eke Abraham? (b) Owo ifan̄ ẹkesop idem isua oko nditi n̄kpa uwa Jesus? (c) Mme idụt ewe ẹkenyene n̄wọrọnda ibat mme andidụk Editi isua oko? (Se chart ke page 12 esịm 15.)
19 Ke ediwak usụn̄ nnyịn idu mfịn ke idaha oro ọfọnde akan eke Abraham. Nnyịn imọfiọk ite ke Jehovah ama osu kpukpru un̄wọn̄ọ oro enye ọkọn̄wọn̄ọde ọnọ Abraham. Nditọ Abraham ẹma ẹda Canaan ẹnyene, mmọ ẹma ẹnyụn̄ ẹkabade ẹdi akwa idụt. (1 Ndidem 4:20; Mme Hebrew 11:12) Akan oro, n̄kpọ nte isua 1,971 ke Abraham ama ọkọkpọn̄ Haran, John Andinịm owo baptism ama enịm Jesus, andito ubon Abraham, baptism ke mmọn̄ ndien ekem Jehovah ke idemesie enịm enye baptism ke edisana spirit man akabade edi Messiah, Mfri Abraham ke ọyọhọ usụn̄ifiọk eke spirit. (Matthew 3:16, 17; Galatia 3:16, NW) Ke Nisan 14, 33 E.N., Jesus ama ọnọ uwem esie nte ufak kaban̄a mbon oro ẹdiwụtde mbuọtidem ke enye. (Matthew 20:28; John 3:16) Ediwak miliọn owo idahaemi ẹma ẹkeme ndikụt mfọn ebe ke enye. Isua oko, owo 13,896,312 ẹkesop idem ke Nisan 14 nditi utịbe utịbe edinam ima emi. Nso ediwụt unen Jehovah, kpa Akwa Andinịm un̄wọn̄ọ ke emi edi ntem!
20, 21. Didie ke mme owo ẹtode kpukpru idụt ẹkekụt mfọn ebe ke Mfri Abraham ke akpa isua ikie, ndien didie ke mmọ ẹkụt mfọn mfịn?
20 Ke akpa isua ikie, ediwak owo ẹtode kpukpru idụt—ọtọn̄ọde ye Israel eke obụk—ẹma ẹwụt mbuọtidem ke Mfri Abraham ẹnyụn̄ ẹkabade ẹdi nditọ Abasi oro ẹyetde aran, mme andibuana ke obufa “Israel Abasi” eke spirit. (Galatia 3:26-29; 6:16; Utom 3:25, 26) Mmọ ẹma ẹnyene nsọn̄ọ kaban̄a uwem eke spirit eke mîkemeke ndikpa ke heaven nte mme ekemmọ andikara ke Obio Ubọn̄ Abasi. Owo 144,000 kpọt ke ẹdidiọn̄ ke usụn̄ emi, ndien ibat ibat mmọ kpọt ẹsụhọ. (Ediyarade 5:9, 10; 7:4) Isua oko, owo 8,756 ẹkesọn̄ọ edinịm ke akpanikọ mmọ nte ke mmimọ isịne ke otu emi ebe ke ndidia mme n̄kpọ idiọn̄ọ ke ini usọrọ Editi.
21 Ekpere ndidi kpukpru Mme Ntiense Jehovah mfịn ẹdi “akwa otuowo” oro ẹketịn̄de prọfesi ẹban̄a ke Ediyarade 7:9-17. Sia mmọ ẹkụtde mfọn ebe ke Jesus, mmọ ẹnyene idotenyịn nsinsi uwem ke paradise isọn̄. (Ediyarade 21:3-5) Owo 5,888,650 oro ẹkebuanade ke utom ukwọrọikọ ke 1998 ẹdi uyarade nte ke otuowo emi enen̄ede edi “akwa.” Ekenen̄ede edi n̄kpọ nduaidem ndikụt Russia ye Ukraine ẹtọtde se ibede asuanetop 100,000 ke akpa ini. Ibatutom otode United States ekedi n̄ko n̄wọrọnda—asuanetop 1,040,283 ke August! Mmọ ẹmi ẹkedi ita kpọt ke otu idụt 19 oro ẹketọtde se ibede asuanetop 100,000 isua oko.
Idotenyịn Oro Ẹdisude ke Mîbịghike
22, 23. (a) Ntak emi nnyịn ikpanamde esịt nnyịn ọsọn̄ mfịn? (b) Didie ke nnyịn ikeme ndibiet Abraham, idịghe mbon oro mîkenyeneke mbuọtidem oro Paul eketịn̄de aban̄a?
22 Ẹma ẹti mbon oro ẹkedụkde Editi ẹban̄a adan̄a nte nnyịn itịmde ikpere edisu mme un̄wọn̄ọ Jehovah. Ke 1914, ẹma ẹdori Jesus ke ebekpo nte Edidem Obio Ubọn̄ Abasi eke heaven, ọtọn̄ọde edidu esie ke odudu Obio Ubọn̄. (Matthew 24:3; Ediyarade 11:15) Ih, Mfri Abraham ke akara idahaemi ke heaven! James ọkọdọhọ mme Christian eyo esie ete: “Ẹme anyan ime . . . ; [ẹnam esịt mbufo ọsọn̄, koro edidu, NW] Ọbọn̄ ke ekpere.” (James 5:8) Ọfọn, edidu oro edi ata idem n̄kpọ idahaemi! Nso ntak efen efen ndinam esịt nnyịn ọsọn̄ ke emi edi ntem!
23 Mbuọtidem nnyịn ke mme un̄wọn̄ọ Abasi akpakam edi obufa kpukpru ini ebe ke ukpepn̄kpọ Bible ofụri ini ye akam ofụri esịt. Akpakam nnyịn ika iso ndinyene edidiọn̄ Jehovah nte nnyịn inamde Ikọ esie. Adan̄aoro ke nnyịn idibiet Abraham, idịghe mbon oro mbuọtidem mmọ ekememde onyụn̄ akpade, oro Paul eketịn̄de aban̄a. N̄kpọ ndomokiet ididianakede nnyịn ikpọn̄ edisana mbuọtidem nnyịn. (Jude 20) Akam nnyịn edi nte emi edi ntre ye kpukpru mme asan̄autom Jehovah ke isua utom 1999 onyụn̄ aka iso tutu esịm nsinsi ini iso.
Nte Afo Ọmọfiọk?
◻ Didie ke nnyịn ikeme ndikpan̄ utọn̄ nnọ Abasi mfịn?
◻ Mme ufọn ewe ẹto mme akam ofụri esịt oro ibọn̄de inọ Abasi?
◻ Edieke nnyịn itienede ndausụn̄ Jehovah ke n̄kopitem, didie ke ẹdinam mbuọtidem nnyịn ọsọn̄?
◻ Mme ikpehe ewe ke ibatutom isua (page 12 esịm 15) ke afo ekenen̄ede ama?
[Chart ke page 12-15]
IBATUTOM ISUA UTOM 1998 EKE MME NTIENSE JEHOVAH KE OFỤRI ERERIMBOT
(Se magazine)
[Ndise ke page 16]
Edieke nnyịn ikpan̄de utọn̄ inọ Ikọ Jehovah, mbuọtidem nnyịn ke mme un̄wọn̄ọ esie edidi obufa
[Ndise ke page 18]
Ẹnam mbuọtidem nnyịn ọsọn̄ ke ini nnyịn ibuanade ke utom ukwọrọikọ