Ufak Christ—Usụn̄ Oro Abasi Adade Ọnọ Edinyan̄a
“Abasi akamama ererimbot ntem, tutu Enye osio ikpọn̄-ikpọn̄ Eyen emi Enye obonde ọnọ, man owo ekededi eke ọbuọtde idem ye Enye okûtak, edi enyene nsinsi uwem.”—JOHN 3:16.
1, 2. Tịn̄ idiọk idaha oro edemerede kaban̄a ubonowo.
DA NTE ke afo emenyene udọn̄ọ oro mîditreke ndiwot fi ibọhọke ẹsiak fi idem. Ekpetie fi didie ke idem edieke ekọmurua usiakidem oro ekpenen̄erede okpon akan se afo ekemede ndikpe? Nso edieke idem inyene ubon fo ye eke mme ufan ke ẹtan̄de ẹdian ọtọkiet mîkemke se adade ekpe? Ndisobo utọ ọkpọsọn̄ mfịna emi esịnde uwem ke itiendịk do ekpedi ndikụt edikpu!
2 Emi owụt idaha oro edemerede ke ekpụk ubonowo. Ẹkebot akpa ete ye eka nnyịn, Adam ye Eve, ẹdi mfọnmma. (Deuteronomy 32:4) Mmọ ẹma ẹnyene ifet ndidu uwem ke nsinsi ye edisu uduak Abasi oro: “Mbufo ẹtọt, ẹnyụn̄ ẹwak, ẹnyụn̄ ẹyọhọ ke isọn̄, ẹnyụn̄ ẹkan enye.” (Genesis 1:28) Nte ededi, Adam ye Eve ẹma ẹsọn̄ ibuot ye Andibot mmọ. (Genesis 3:1-6) Ntụtutọn̄ mmọ ikadaha idiọkn̄kpọ isọk Adam ye Eve ikpọn̄ edi ama ada n̄ko ọsọk nditọ mmọ oro mîkamanake kan̄a. Anam-akpanikọ eren oro Job ke ukperedem ama etịn̄ ete: “Edisana n̄kpọ akpakam oto ke n̄kpọ ndek; baba kiet itoho.”—Job 14:4.
3. N̄kpa akasan̄a didie atara esịm kpukpru owo?
3 Ntem idiọkn̄kpọ etie nte udọn̄ọ emi omụmde nnyịn owo kiet kiet, koro Bible ọdọhọ ete ke “kpukpru owo ẹma ẹnam idiọk-n̄kpọ.” (Sịghisịghi ubọkn̄wed edi eke nnyịn.) Idaha emi akama mme utịp oro ẹsịnde uwem ke itiendịk. Ke akpanikọ, “n̄kpọ-eyen-utom idiọk-n̄kpọ edi n̄kpa.” (Rome 3:23; 6:23) Owo nnyịn ndomokiet ikemeke ndibọhọ enye. Kpukpru owo ẹnanam idiọkn̄kpọ, ntem, kpukpru owo ẹkpan̄a. Nte mme andito ubon Adam, nnyịn ikamana idụk idiọk idaha emi. (Psalm 51:5) Paul ekewet ete: “Nte idiọk-n̄kpọ okotode owo kiet odụk ke ererimbot, n̄kpa onyụn̄ otode ke idiọk-n̄kpọ oro odụk, n̄kpa onyụn̄ ebe esịm kpukpru owo, koro kpukpru owo ẹma ẹnam idiọk-n̄kpọ.” (Rome 5:12) Edi emi iwọrọke ite ke nnyịn inyeneke idotenyịn edinyan̄a.
Ndisio Idiọkn̄kpọ ye N̄kpa Mfep
4. Ntak emi mme owo mîkemeke ndisio idiọkn̄kpọ ye n̄kpa mfep ke idemmọ?
4 Nso ke ẹdiyom man ẹsio idiọkn̄kpọ ye utịp esie edide n̄kpa ẹfep? Nte an̄wan̄ade, oyom se ikande n̄kpọ oro owo ekededi ekemede ndinọ. Andiwet psalm ekeseme ete: “Ekọmurua uwem owo okpon etieti. Se enye ekemede ndikpe tutu amama idikemke ndikpan enye ndika udi, man enye odu uwem ke nsinsi.” (Psalm 49:8, 9, Today’s English Version) Edi akpanikọ, nnyịn imekeme ndinam uwem nnyịn ọniọn̄ ke isua ifan̄ ebe ke ndidia udia emi ọnọde nsọn̄idem onyụn̄ ebe ke ibọkusọbọ, kpa ye oro owo nnyịn ndomokiet ikemeke ndikọk idaha ndammana idiọkn̄kpọ nnyịn. Owo nnyịn ndomokiet ikemeke ndikpụhọde mme ndo ẹmi ẹtode usọn̄ nnyụn̄ nnam idem nnyịn afiak okodu ke mfọnmma idaha oro Abasi okoyomde enye odu. Paul ke akpanikọ ikanamke inua ke ini enye ekewetde ete ke oto ke idiọkn̄kpọ Adam ke “ẹkenam [edibotn̄kpọ edide owo] osụk idem ọnọ ikpîkpu n̄kpọ”—m̀mê nte The Jerusalem Bible etịn̄de, “ẹkenam enye okûkeme ndisịm uduak esie.” (Rome 8:20) Nte ededi, ke inemesịt, Andibot ikpọn̄ke nnyịn. Enye amanam ndutịm ndisio idiọkn̄kpọ ye n̄kpa mfep ke nsinsi. Didie?
5. Didie ke Ibet oro ẹkenọde Israel okowụt ntotụn̄ọ edikere mban̄a ọnọ unenikpe?
5 Jehovah “amama eti ido ye edinen ikpe.” (Psalm 33:5) Ibet oro enye ọkọnọde Israel ama owụt ntotụn̄ọ edikere mban̄a ọnọ edida ukem ukem ye unenikpe oro mîsan̄ake ye asari. Ke uwụtn̄kpọ, ke ibet emi, nnyịn ikot ite ke ‘ẹnyene ndinọ uwem ke uwem.’ Ke mme ikọ efen, edieke eyen Israel okowotde owo, ẹkenyene ndiwot enye ke usiene owo oro enye okowotde. (Exodus 21:23; Numbers 35:21) Ke ntem ẹma ẹnam unenikpe Abasi.—Men Exodus 21:30 domo.
6. (a) Ke nso usụn̄ifiọk ke ẹkpekeme ndikot Adam owotowo? (b) Nso orụk uwem ke Adam ọkọduọk, ndien nso orụk uwa ke ẹdiyom man ẹnam unenikpe?
6 Ke ini Adam akanamde idiọkn̄kpọ, enye ama akabade edi owotowo. Ke nso usụn̄ifiọk? Koro enye ama ayak idaha idiọkn̄kpọ esie—ndien ke ntem n̄kpa—ọnọ kpukpru mme andito ubon esie. Ntak nsọn̄ibuot Adam anam idahaemi, idem nnyịn ke ẹbiara, ẹkade-ka iso ẹsan̄a ẹka udi. (Psalm 90:10) Idiọkn̄kpọ Adam akam abuana se ikponde ikan oro. Ti, se Adam ọkọduọkde, eke idemesie ye eke nditọ esie, ikedịghe ikpîkpu uwem ke n̄kpọ nte isua 70 m̀mê 80. Enye ọkọduọk mfọnmma uwem—ke akpan, nsinsi uwem. Ntre edieke ẹnyenede ‘ndinọ uwem ke uwem,’ nso utọ uwem ke ẹkpenọ man ẹnam unenikpe ke idaha enye emi? Nte owụtde ifiọk, enyene ndidi mfọnmma uwem eke owo—uwem oro, ukem nte eke Adam, enyenede ukeme ndision̄o mfọnmma nditọ eke owo ndi. Edieke ẹwade nte uwa, mfọnmma uwem eke owo idinamke unenikpe kpọt edi n̄ko ayanam ẹkeme ndisio idiọkn̄kpọ ye utịp esie, n̄kpa, mfep ofụri ofụri.
Ndikpe Ekọmurua Idiọkn̄kpọ
7. Tịn̄ se ikọ oro “ufak” ọwọrọde.
7 Ke Bible ẹkot ekọmurua oro ẹyomde man ẹnyan̄a nnyịn esio ke idiọkn̄kpọ ‘ufak.’ (Psalm 49:7) Ke Ikọ Efịk ikọ oro ekeme ndiwụt ekọmurua oro andimụm owo ke ukat oyomde man asana owo emi enye omụmde ayak. Nte ededi, ufak oro Jehovah ọnọde ibuanake edimụm owo ekededi ke ukat. Ekikere edikpe ekọmurua edi ukem. Ke akpanikọ, orụk ikọedinam Hebrew oro ẹkabarede “ufak,” ke ata ata usụn̄ ọwọrọ “ndifụk.” Man osio isop idiọkn̄kpọ, ana ufak oro ekem nnennen ye se ẹyomde enye ofụk—mfọnmma uwem owo eke Adam.
8. (a) Tịn̄ edumbet edifiak ndep. (b) Didie ke edumbet edifiak ndep enyene ebuana ye nnyịn nte mme anamidiọk?
8 Emi ekem ye edumbet oro ẹkụtde ke Ibet Moses—edumbet edifiak ndep. Edieke eyen Israel ọkọduọde odụk unana onyụn̄ anyamde idemesie esịn ke itie ufụn ọnọ owo oro mîkedịghe eyen Israel, iman esie ama ekeme ndifiak ndep (m̀mê, ndifak) enye ebe ke ndikpe ekọmurua oro ẹkekerede ke edi ukem ye ekọmurua ufụn. (Leviticus 25:47-49) Bible ọdọhọ ke nte mme anana mfọnmma owo ke nnyịn idi “ifịn idiọk-n̄kpọ.” (Rome 6:6; 7:14, 25) Nso ke edikpa ndifiak ndep nnyịn? Nte nnyịn ima ikokụt, ediduọk mfọnmma uwem eke owo ediyom ẹnọ mfọnmma uwem eke owo—owo isioho-sio inyụn̄ isịnke-sịn.
9. Didie ke Jehovah anam ndutịm ndifụk idiọkn̄kpọ?
9 Edi akpanikọ, nnyịn mme owo imana nte mme anana mfọnmma. Owo nnyịn ndomokiet idịghe ukem nte Adam; owo nnyịn ndomokiet ikemeke ndikpe ekọmurua ufak oro unenikpe oyomde. Nte ẹketịn̄de ke ntọn̄ọ ntọn̄ọ, etie nte n̄kpọ eke nnyịn inyenede udọn̄ọ oro esịnde uwem ke itiendịk ndien mîkemeke ndikpe okụk usiakidem man ẹkọk enye. Ke utọ idaha oro, nte nnyịn ikpadatke esịt edieke owo ekpesịbede odụk ekpe okụk oro? Emi edi nnennen se Jehovah anamde! Enye amanam ndutịm ndifak nnyịn nsio ke idiọkn̄kpọ ke nsinsi. Ih, enye enyịme ndinọ nnyịn n̄kpọ oro edide nnyịn tutu amama nnyịn ikpekemeke ndinyene ke idem nnyịn. Didie? Paul ekewet ete: “Enọ Abasi edi nsinsi uwem ke Christ Jesus Ọbọn̄ nnyịn.” (Rome 6:23) John eketịn̄ aban̄a Jesus nte “Eyen-erọn̄ Abasi emi emende mme idiọk-n̄kpọ ererimbot efep.” (John 1:29) Ẹyak nnyịn ise nte Jehovah akadade edima Eyen esie ekpe ekọmurua ufak.
“N̄kem N̄kem Ufak”
10. Didie ke mme ntịn̄nnịm ikọ ẹban̄ade “mfri” ẹkedi ẹdiwụhọ ke Joseph ye Mary?
10 Ke etienede nsọn̄ibuot oro ke Eden, Jehovah ama ọtọt uduak esie ndinọ “mfri,” m̀mê eyen, emi edifakde ubonowo osio ke idiọkn̄kpọ. (Genesis 3:15, NW) Ebede ke udịm udịm ediyarade esie, Jehovah ama owụt udịm ubon emi edisiode mfri emi edi. Nte ini akakade, mme ediyarade ẹmi ẹkewụhọ ke Joseph ye Mary, n̄wan ye eren ẹmi ẹkedụkde ediomi ndọ ẹmi ẹkedụn̄de ke Palestine. Ke ndap, ẹma ẹsian Joseph ẹte ke Mary okoyomo idịbi oto edisana spirit. Angel oro ama ọdọhọ ete: “Enye ayaman eyen-eren; afo oyonyụn̄ osio enye enyịn̄ Jesus, koro edi Enye ayanyan̄a ikọt Esie osio ke mme idiọk-n̄kpọ mmọ.”—Matthew 1:20, 21.
11. (a) Didie ke Jehovah okodiomi man Eyen esie amana nte mfọnmma owo? (b) Ntak emi Jesus ekekemede ndinọ “n̄kem n̄kem ufak”?
11 Emi ikedịghe ikpîkpu uyomo idịbi ke baba usụn̄ kiet, koro Jesus ama ododu ke heaven mbemiso edide owo. (Mme N̄ke 22-31; Colossae 1:15) Utịbe utịbe odudu Jehovah okosio uwem esie ekesịn ke idịbi Mary, anamde edima Eyen Abasi emi ekeme ndimana nte owo. (John 1:1-3, 14; Philippi 2:6, 7) Jehovah ama ekpeme mme n̄kpọ man otodo idiọkn̄kpọ Adam edisabade Jesus. Ke edide isio, Jesus akamana nte mfọnmma. Ke ntem, enye ama enyene se Adam ọkọduọkde—mfọnmma uwem eke owo. Ke akpatre, owo emi ekekemede ndikpe ekọmurua idiọkn̄kpọ ama odu! Ndien nnennen se Jesus akanamde ke Nisan 14, 33 E.N. ekedi oro. Ke enịmmbụk usen oro, Jesus ama ayak mme andibiọn̄ọ enye ẹwot enye, ke ntre ọnọde “n̄kem n̄kem ufak.”—1 Timothy 2:6, NW.
Ekọmurua Mfọnmma Uwem eke Owo
12. (a) Tịn̄ akpan ukpuhọde ke ufọt n̄kpa Jesus ye eke Adam. (b) Didie ke Jesus akabade edi “Nsinsi Ete” ọnọ mme okopitem owo?
12 Ukpụhọde odu ke n̄kpa Jesus ye eke Adam—ukpụhọde oro owụtde ekọmurua ufak. N̄kpa Adam ama odot, koro enye okokokoi ọsọn̄ ibuot ye Andibot enye. (Genesis 2:16, 17) Ke edide isio, n̄kpa Jesus ikodotke ke baba usụn̄ kiet, koro “Enye ikanamke idiọk-n̄kpọ.” (1 Peter 2:22) Ntre ke ini Jesus akakpade, enye ama enyene n̄kpọ oro ọkọsọn̄de urua oro anamidiọk Adam mîkenyeneke ke ini akakpade—unen edinyene mfọnmma uwem eke owo. Ntem, n̄kpa Jesus ama enyene ekọmurua uwa. Ke ama ọkọdọk ke heaven nte owo eke spirit, enye ama ọnọ Jehovah ekọmurua uwa esie. (Mme Hebrew 9:24) Ke ndinam ntre, Jesus ama edep anamidiọk ubonowo onyụn̄ akabade edi obufa Ete mmọ, adade itie Adam. (1 Corinth 15:45) Ye eti ntak, ẹkot Jesus “Nsinsi Ete.” (Isaiah 9:6) Kere ban̄a se oro ọwọrọde! Adam, anamidiọk ete, ama anam idiọkn̄kpọ atara esịm kpukpru mme andito ubon esie. Jesus, mfọnmma Ete, ada ufọn uwa esie ọnọ mme okopitem owo nsinsi uwem.
13. (a) Nam an̄wan̄a nte Jesus akabiatde isọn oro Adam akakamade efep. (b) Ntak emi uwa Jesus mîfụkke idiọkn̄kpọ akpa ete ye eka nnyịn?
13 Nte ededi, didie ke n̄kpa owo kiet kpọt ekpekeme ndifụk idiọkn̄kpọ ediwak owo? (Matthew 20:28) Ke ibuotikọ kiet ke ndusụk isua ẹmi ẹkebede, nnyịn ima inam ufak an̄wan̄a ke usụn̄ emi: “Kere ban̄a akwa usiakifia ye ata ediwak mbonutom. Etubom usiakifia oro mînamke akpanikọ atahade mbubehe oro; ẹberi usụn̄ usiakifia oro. Ata ediwak owo idahaemi inyeneke utom inyụn̄ ikemeke ndikpe isọn mmọ. Nsan̄andọ, nditọ mmọ, ih, ọkọrọ ye mbon oro mmọ ẹkamade isọn kpukpru ẹbọ ufen ke ntak mbiara edinam owo kiet oro! Ekem ọfọnido owo inyene kiet edi edikpe isọn usiakifia oro onyụn̄ ọtọn̄ọ ntak eberede usiakifia oro. Edikpe isọn kiet oro, ke ntre, amada ọyọhọ ifụre ọsọk ediwak mbonutom oro, ubon mmọ, ye mbon oro mmọ ẹkamade isọn. Edi nte akpa etubom utom oro etiene abuana ke obufa uforo oro? Baba, enye odu ke ufọk-n̄kpọkọbi ndien ke ntre ọduọk utom esie tak-tak! Ukem ntre, edikpe isọn kiet oro Adam akakamade amada ufọn ọsọk ediwak million nditọ esie—edi idaha isọk Adam.”
14, 15. Ntak emi ẹkemede ndikot Adam ye Eve mme andikokoi nnam idiọkn̄kpọ, ndien didie ke idaha nnyịn okpụhọde ye eke mmọ?
14 Emi enen. Ti, Adam ye Eve ẹkekokoi ẹnam idiọkn̄kpọ. Mmọ ẹkemek ndisọn̄ ibuot ye Abasi. Ke edide isio, nnyịn idada idiọkn̄kpọ imana. Idụhe se nnyịn ikpanamde. Inamke n̄kpọ m̀mê idomo adan̄a didie, nnyịn ikemeke ndifep ndinam idiọkn̄kpọ ofụri ofụri. (1 John 1:8) Ndusụk ini ekeme nditie nnyịn ke idem nte eketiede Paul, emi ekewetde ete: “Idiọk-n̄kpọ osụk ododu ye ami emi nyomde ndinam nti n̄kpọ. Koro ndara ibet Abasi ke ọwọn̄esịt mi: edi n̄kụt ibet efen ke mbak idem mi, nte an̄wanade ye ibet eke esịt mi amade, onyụn̄ adade mi nte ibuot-ekọn̄ esịn ke idak ibet idiọk-n̄kpọ emi odude ke mbak idem mi. Mbọm mi, owo nditaha!”—Rome 7:21-24.
15 Edi, ke ntak ufak, nnyịn imenyene idotenyịn! Jesus edi mfri emi ebede ke enye, nte Abasi ọkọn̄wọn̄ọde, “kpukpru mme idụt ke ererimbot . . . ẹkụt mfọn.” (Genesis 22:18; Rome 8:20) Uwa Jesus eberede usụn̄ mme utịbe utịbe ifet ọnọ mbon oro ẹnyenede mbuọtidem ke enye. Ẹyak nnyịn ikere iban̄a ndusụk ke otu ẹmi.
Ndibọ Ufọn Nto Ufak Christ
16. Kpa ye idaha idiọkn̄kpọ nnyịn, mme ufọn ewe ke nnyịn ikeme ndinyene idahaemi ke ntak ufak Jesus?
16 James andiwet Bible enyịme ete ke “nnyịn idedue ke ediwak n̄kpọ.” (James 3:2) Nte ededi, ke ntak ufak Christ, ẹkeme ndifen mme ndudue nnyịn. John ewet ete: “Edieke owo anamde idiọk-n̄kpọ, nnyịn imenyene Ekpe-emem ke ufọt nnyịn ye Ete, kpa Jesus Christ, emi edide edinen; Enye onyụn̄ edi usio-isop mme idiọk-n̄kpọ nnyịn.” (1 John 2:1, 2) Nte ededi, nnyịn ikpadaha idiọkn̄kpọ didie didie. (Jude 4; men 1 Corinth 9:27 domo.) Nte ededi, edieke nnyịn inamde ndudue, nnyịn imekeme ndin̄wan̄a esịt nnyịn nnọ Jehovah, inyenede mbuọtidem nte ke enye “ama ndidahado.” (Psalm 86:5; 130:3, 4; Isaiah 1:18; 55:7; Utom 3:19) Ntem ufak anam nnyịn inam n̄kpọ Abasi ye edisana ubieresịt onyụn̄ anam nnyịn ikeme ndisan̄a n̄kpere enye ke akam ebe ke enyịn̄ Jesus Christ.—John 14:13, 14; Mme Hebrew 9:14.
17. Ke ntak ufak, mme edidiọn̄ ewe ẹkeme ndidu ke ini iso?
17 Ufak Christ eberede usụn̄ ọnọ uduak Abasi ndisu—nte mme okopitem owo ẹdu uwem ke nsinsi ke Paradise ke isọn̄. (Psalm 37:29) Paul ekewet ete: “Mme un̄wọn̄ọ Abasi ẹnyụn̄ ẹwak nte ẹwawak, ke Enye [Jesus] ke ‘Edi ntre.’” (2 Corinth 1:20) Edi akpanikọ, n̄kpa ‘amada ubọn̄.’ (Rome 5:17) Ufak ọnọ isọn̄ Abasi ndisọhi “akpatre usua” emi mfep. (1 Corinth 15:26; Ediyarade 21:4) Ufak Jesus akam ekeme ndinọ mbon oro ẹma ẹkekpan̄a ufọn. Jesus ọkọdọhọ ete: “Ini ke edi eke kpukpru mme andidu ke udi ẹdikopde Enye [Jesus] uyo ẹwọn̄ọ ẹdi.”—John 5:28, 29; 1 Corinth 15:20-22.
18. Nso akama-mmọn̄eyet utịp ke idiọkn̄kpọ enyene ke idem mme owo, ndien didie ke ẹdikpụhọde emi ke obufa ererimbot Abasi?
18 Kere adan̄a nte edinemde ndidu uwem nte ẹkeyomde ẹdu—ndibọhọ mme editịmede esịt ẹmi ẹfịkde nnyịn mfịn! Idiọkn̄kpọ ibahakede nnyịn ikpọn̄ Abasi kpọt edi n̄ko anam nnyịn itre ndidu nte ekemde ye ekikere, esịt, ye ikpọkidem nnyịn. Nte ededi, Bible ọn̄wọn̄ọ ete ke obufa ererimbot Abasi, “andidụn̄ ididọhọke ite, Ndọdọn̄ọ.” Ih, udọn̄ọ eke ntụk ye eke ikpọkidem idinọmọke aba ubonowo. Ntak-a? Isaiah ọbọrọ ete: “Ẹfen mme idiọk ido mmọ eke ẹdụn̄de ke esịt.”—Isaiah 33:24.
Ufak—Ediwụt Ima
19. Didie ke nnyịn owo kiet kiet ikpanam n̄kpọ iban̄a ufak Christ?
19 Ima okonụk Jehovah ndisio edima Eyen esie ndọn̄. (Rome 5:8; 1 John 4:9) Ndien ima okonụk Jesus ‘nditabi n̄kpa ke ibuot kpukpru owo.’ (Mme Hebrew 2:9; John 15:13) Ye eti ntak, Paul ekewet ete: “Ima Christ efefịk nnyịn . . . Enye . . . akpa aban̄a kpukpru owo, man mme odu-uwem ẹkûdu uwem aba ẹnọ idem mmọ, edi ẹdu uwem ẹnọ Enye emi akakpade aban̄a mmọ, onyụn̄ esetde.” (2 Corinth 5:14, 15) Edieke nnyịn iwụtde esịtekọm iban̄a se Jesus akanamde ọnọ nnyịn, nnyịn iyanam n̄kpọ iban̄a. Kamse, ufak anam ẹkeme ndifak nnyịn nsio ke n̄kpa! Ke akpanikọ nnyịn idiyomke mme edinam nnyịn ẹwụt nte ke nnyịn ibat uwa Jesus ke n̄kpọ ndek.—Mme Hebrew 10:29.
20. Nso idi ndusụk usụn̄ emi nnyịn inịmde “uyo” Jesus?
20 Didie ke nnyịn ikeme ndiwụt ntotụn̄ọ esịtekọm mban̄a ufak oro? Esisịt ini mbemiso ẹkemụmde enye, Jesus ọkọdọhọ ete: “Edieke owo amade Mi, eyenịm uyo Mi.” (John 14:23) “Uyo” Jesus esịne ewụhọ esie nte nnyịn inyene ifịk ifịk ebuana ke ndinam utom emi: “Ẹka ẹkenam kpukpru mme idụt ẹdi mbet Mi, ẹnịm mmọ baptism.” (Matthew 28:19) Ndikop uyo nnọ Jesus n̄ko oyom ete nnyịn iwụt ima inọ nditọete nnyịn eke spirit.—John 13:34, 35.
21. Ntak emi nnyịn ikpodụkde usọrọ Editi ke April 1?
21 Kiet ke otu mfọnn̄kan usụn̄ oro nnyịn ikemede ndiwụt esịtekọm mban̄a ufak edi ke ndidụk Editi n̄kpa Christ, emi ẹdinịmde isua emi ke April 1.a Emi n̄ko esịne ke “uyo” Jesus, koro ke ini enye ọkọtọn̄ọde usọrọ emi, Jesus okowụk mme anditiene enye ete: “Ẹnam emi nditi Mi.” (Luke 22:19) Ebede ke nnyịn ndidụk ata akpan edinam emi onyụn̄ ebede ke nnyịn ndinen̄ede ntịn̄ enyịn ke kpukpru se Christ okowụkde, nnyịn idiwụt edinịm ke akpanikọ nnyịn oro enyenede iwụk nte ke ufak Jesus Christ edi usụn̄ oro Abasi ọnọde edinyan̄a. Ke akpanikọ, “edinyan̄a inyụn̄ itoho ke baba owo kiet efen.”—Utom 4:12.
[Ikọ idakisọn̄]
a Isua emi, April 1 asan̄a ekekem ye Nisan 14, 33 E.N., kpa usenọfiọn̄ oro Jesus akakpade. Bụp Mme Ntiense Jehovah ke n̄kann̄kụk ban̄a ini ye ebiet usọrọ Editi emi.
Nte Afo Emekeme Nditi?
◻ Ntak emi mme owo mîkemeke ndisio isop idaha idiọkn̄kpọ mmọ?
◻ Ke nso usụn̄ ke Jesus edi “n̄kem n̄kem ufak”?
◻ Didie ke Jesus akada unen esie ndinyene mfọnmma uwem eke owo anam n̄kpọ ke ufọn nnyịn?
◻ Mme edidiọn̄ ewe ke ubonowo enyene ke ntak ufak Christ?
[Mme ndise ke page 15]
Mfọnmma owo kpọt—ukem nte Adam—ekekeme ndinam unenikpe odu
[Ndise ke page 16]
Sia Jesus ekenyenede unen ndinyene mfọnmma uwem eke owo, n̄kpa esie ama enyene ekọmurua uwa