Ikọt Jehovah Emi Ẹfiakde Ẹtan̄ Ẹbok Ẹtoro Enye ke Ofụri Isọn̄
“Nyanam mme idụt ẹkabade ẹsem edisana usem, man kpukpru mmọ ẹkot enyịn̄ Jehovah.”—ZEPHANIAH 3:9, NW.
1. Ntak emi mme etop nsobo ẹkesude Judah ye mme idụt eken ke idem?
NSO okopodudu etop ubiereikpe ke Jehovah ọkọnọ Zephaniah odudu spirit nditan̄a ntem! Mme etop nsobo oro ẹma ẹsu Judah ke idem ye ibuot obio esie, Jerusalem, koro mme adausụn̄ ye mme owo ke ofụri ofụri ikanamke uduak Jehovah. Mme n̄kpet n̄kpet obio n̄ko, utọ nte Philistia, Moab, ye Ammon, ẹma ẹkụt iyatesịt Abasi. Ntak-a? Ke ntak ibak ibak ubiọn̄ọ oro mmọ ẹkebiọn̄ọde ikọt Jehovah ke ata ediwak isua ikie. Ke ukem ntak oro, ẹma ẹsobo ukara ererimbot eke Assyria, owo idifiakke iwụk enye tutu amama.
2. Etie nte mmanie ke ẹketịn̄ ẹban̄a ke Zephaniah 3:8?
2 Nte ededi, ndusụk nti owo ẹma ẹdu ke Judah eset. Mmọ ẹma ẹdori enyịn ndikụt ubiereikpe nsobo Abasi ke idem ndiọi owo, ndien etie nte mmọ ke ẹkeda mme ikọ emi ẹtịn̄ ẹban̄a: “Mbufo ẹbet mi ndien, tutu esịm ke usen eke ndidahade ke enyọn̄ nda mbụme. Koro mmaduak ndisop mme idụt, nnyụn̄ mbon mme obio ndidem, man n̄n̄wan̄a mmọ ifụtesịt mi ke idem, ofụri ikan̄ iyatesịt mi: koro ofụri ererimbot ayata ikan̄ ufụp mi.”—Zephaniah 3:8.
Mmanie ke Ẹkenọ “Edisana Usem”?
3. Nso etop idotenyịn ke ẹkenọ Zephaniah odudu spirit nditan̄a?
3 Ih, Zephaniah ama atan̄a mme etop nsobo Jehovah. Edi ẹma ẹnọ prọfet oro odudu spirit n̄ko nditan̄a utịbe utịbe etop idotenyịn—enye oro edidide ata n̄kpọ ndọn̄esịt ọnọ mbon oro ẹkekade iso ndinam akpanikọ nnọ Jehovah. Nte ẹwetde ke Zephaniah 3:9, Jehovah Abasi ama atan̄a ete: “Koro ke ini oro [nyanam mme idụt ẹkabade ẹsem edisana usem, NW]: man kpukpru mmọ ẹkot enyịn̄ Jehovah, man ẹnam n̄kpọ ẹnọ enye ke esịt kiet.”
4, 5. (a) Nso iditịbe inọ mme idiọkowo? (b) Mmanie ẹdibọ ufọn ito emi, ndien ntak-a?
4 Mme owo ẹyedu oro owo mîdinọhọ edisana usem. Ntịn̄nnịm ikọ oro etịn̄ aban̄a mmọ, ete: “Nyosio mbon iseri emi ẹbụrede mbụre ke otu mbufo mfep.” (Zephaniah 3:11) Ntre ẹyesio mbon iseri emi ẹsịnde ibet Abasi ke ndek, emi ẹnyụn̄ ẹnamde ukwan̄ido, ẹfep. Ndien mmanie ẹdibọ ufọn ito emi? Zephaniah 3:12, 13 ọdọhọ ete: “[Ami Jehovah] nyonyụn̄ nsụhọ mbio unana ye nditọ ubuene ke ufọt mbufo, ndien mmọ ẹyebuọt idem ke enyịn̄ Jehovah. Ubak Israel emi osụhọde idinamke ukwan̄-n̄kpọ, idinyụn̄ isụhu nsu: owo idinyụn̄ ikwe edeme abian̄a ke inua mmọ: koro mmọ ẹyedia n̄kpọ ẹnyụn̄ ẹsụhọde ẹna, ndien baba owo kiet eke anamde mmọ ndịk ididụhe.”
5 Mme anam-akpanikọ nsụhọ ke Judah eset ẹkenyene ndibọ ufọn. Ntak-a? Koro mmọ ẹma ẹnam n̄kpọ ke n̄kemuyo ye mme ikọ emi: “Mbufo kpukpru sụn̄sụn̄ mbio isọn̄ emi ẹnamde ikpe esie, ẹyom Jehovah; mbufo ẹyom edinen ido, ẹyom sụn̄-sụn̄ ido: m̀mê mbufo ẹyedịbe ke usen iyatesịt Jehovah.”—Zephaniah 2:3.
6. Nso iketịbe ke akpa edisu ntịn̄nnịm ikọ Zephaniah?
6 Ke akpa edisu ntịn̄nnịm ikọ Zephaniah, Abasi ama ọnọ anana-mbuọtidem Judah ufen ebe ke ndiyak Ukara Ererimbot eke Babylon akan enye ubọk onyụn̄ ada ikọt esie aka ntan̄mfep ke 607 M.E.N. Owo ikatan̄ke ndusụk owo, esịnede prọfet Jeremiah ika ntan̄mfep, ndien mbon eken ẹma ẹka iso ẹnam akpanikọ ẹnọ Jehovah ke ntan̄mfep. Ke 539 M.E.N., mbon Media ye Persia ke idak ndausụn̄ Edidem Cyrus ẹma ẹkan Babylon. N̄kpọ nte isua iba ke ukperedem, Cyrus ama ọnọ ewụhọ oro akayakde nsụhọ Jew ẹfiak ẹnyọn̄ọ obio emana mmọ. Nte ini akakade, ẹma ẹfiak ẹbọp temple Jerusalem, ndien itie oku ama afiak odu ke idaha editeme mme owo Ibet. (Malachi 2:7) Ntre Jehovah ama ofori nsụhọ oro ẹkefiakde ẹtan̄ ẹbok—adan̄a nte mmọ ẹkekade iso ẹnam akpanikọ.
7, 8. Mmanie ke ntịn̄nnịm ikọ eke Zephaniah 3:14-17 akaban̄a, ndien ntak emi afo ọbọrọde ntre?
7 Kaban̄a mbon oro ẹdidarade edifiak ntan̄ mbok oro, Zephaniah ama ebem iso etịn̄ ete: “O adiaha Zion, kwọ; mbufo Israel ẹsio n̄kpo idara; O adiaha Jerusalem, dara nyụn̄ bre ke ofụri esịt. Jehovah ọmọbọ fi ufen efep, amakabade usua fo efep: edidem Israel, Jehovah, odu ke otu mbufo: afo udukwe aba idiọk. Ke usen oro ẹyedọhọ Jerusalem, ẹte, Kûfehe ndịk: O Zion, kûyak ubọk emem fi. Jehovah Abasi fo odu ke ufọt fo, ọmọsọn̄; enye ayanyan̄a, ayadat esịt aban̄a fi ke idara; enye oyodop uyo ke ima esie, eyebre aban̄a fi ke ikwọ.”—Zephaniah 3:14-17.
8 Ntịn̄nnịm ikọ oro akaban̄a mme nsụhọ oro ẹkesion̄ode ke ntan̄mfep Babylon ẹnyụn̄ ẹdade ẹfiak ẹnyọn̄ isọn̄ mme ete mmọ. Ẹnam emi an̄wan̄a ke Zephaniah 3:18-20, emi nnyịn ikotde ite: “[Ami Jehovah] nyosop mmọ eke ẹtuade ẹban̄a usọrọ, (mmọ ẹto ye afo,) emi ẹbiomde esuene ẹban̄a enye. Sese, ke ini oro ami nyanam kpukpru mmọ eke ẹtụkde fi; nyonyụn̄ nnyan̄a enye emi edide mbụn̄ọ, nnyụn̄ ntan̄ owo emi mmọ ẹkebịnde enye ẹfep ndi; nnyụn̄ nnịm mmọ ke itoro ye ke etop ke kpukpru mme idụt esuene mmọ. Ke ini oro nyada mbufo ndụk, kpa ke ini emi nditan̄de mbufo mbon; koro nyenịm fi ke etop ye ke itoro ke otu kpukpru mme idụt ke ererimbot, ke ini emi ndidade mbufo emi ẹdide mbuotekọn̄ mfiak ndi, ke enyịn mbufo; Jehovah ọdọhọ.”
9. Didie ke Jehovah akanam enyịn̄ ọnọ idemesie ke ebuana ye Judah?
9 Kere ban̄a nte idem akakpade mme idụt n̄kann̄kụk oro ẹkedide mme asua ikọt Abasi! Okopodudu Babylon ama ada mme andidụn̄ Judah aka ntan̄mfep, eyedi ye unana idotenyịn edidi se ẹsanade ẹyak tutu amama. Akande oro, isọn̄ mmọ ama ana ndon. Nte ededi, ebede ke odudu Abasi, ẹma ẹyak mmọ ẹnyọn̄ọ obio emana mmọ ke isua 70 ẹma ẹkebe, ke adan̄aemi mme idụt asua ẹkesan̄ade ẹkpere nsobo. Nso enyịn̄ ke Jehovah akanam ntem ọnọ idemesie ebe ke ndifiak nda mme anam-akpanikọ nsụhọ nnyọn̄ ndi! Enye ama ‘enịm mmọ ke etop ye ke itoro ke otu kpukpru mme idụt.’ Edifiak ntan̄ mbok oro akada itoro didie ntem ọsọk Jehovah ye mbon oro ẹkekerede enyịn̄ esie!
Ẹmenede Utuakibuot Jehovah ke Enyọn̄
10, 11. Ini ewe ke akpan edisu ntịn̄nnịm ikọ Zephaniah aban̄ade edifiak n̄wụk ekenyene ndida itie, ndien nnyịn isan̄a didie ifiọk emi?
10 Edifiak ntan̄ mbok ama afiak ada itie ke akpa isua ikie eke Eyo Nnyịn, ke ini Jesus Christ akatan̄de nsụhọ Israel obok kaban̄a utuakibuot akpanikọ. Oro ekedi ntabinse kaban̄a se ididide, koro akpan edisu eke editan̄ mbok oro akana edi ke ini iso. Ntịn̄nnịm ikọ Micah ama ebem iso etịn̄ ete: “Ndien ama ekem ke akpatre ini oro, obot ufọk Jehovah oyowụhọ ke ibuot ikpọ obot, ẹyenyụn̄ ẹmenede enye ẹkan n̄kpri obot: ndien mme idụt ẹyebụn̄ọ ẹka do.”—Micah 4:1.
11 Ini ewe ke emi editịbe? Nte ntịn̄nnịm ikọ oro ọkọdọhọde, “ke akpatre ini oro”—ih, ke “ukperedem ini” emi. (2 Timothy 3:1) Emi edida itie mbemiso utịt idiọk editịm n̄kpọ emi ke adan̄aemi mme idụt ẹsụk ẹtuakde ibuot ẹnọ mme nsunsu abasi. Micah 4:5 ọdọhọ ete: “Kpukpru mme idụt ẹyesan̄a ke enyịn̄ abasi mmọ.” Ndien nso kaban̄a mme ata andituak ibuot? Ntịn̄nnịm ikọ Micah oro ọbọrọ ete: “Nnyịn iyonyụn̄ isan̄a ke enyịn̄ Jehovah Abasi nnyịn ke nsinsi-nsinsi.”
12. Didie ke ẹmenede utuakibuot akpanikọ ke enyọn̄ ke “ukperedem ini” emi?
12 Ke ntre, ke ukperedem ini emi, “obot ufọk Jehovah [omowụhọ] ke ibuot ikpọ obot.” Ẹmefiak ẹsọn̄ọ ẹwụk n̄kokon̄ utuakibuot akpanikọ Jehovah, ẹnyụn̄ ẹmenede enye ke enyọn̄ ke usụn̄ oro okon̄de akan kpukpru orụk ido ukpono eken. Nte ntịn̄nnịm ikọ Micah ekebemde iso etịn̄, “mme idụt ẹyebụn̄ọ ẹka do.” Ndien mbon oro ẹnamde ido ukpono akpanikọ ‘ẹyesan̄a ke enyịn̄ Jehovah Abasi mmọ ke nsinsi-nsinsi.’
13, 14. Ini ewe ke ererimbot emi okodụk “akpatre ini oro,” ndien nso itịbe toto ke ini oro ke ebuana ye utuakibuot akpanikọ?
13 Mme n̄kpọntịbe oro ẹsude ntịn̄nnịm ikọ Bible ẹwụt ẹte ke ererimbot emi okodụk “akpatre ini oro,”—ukperedem ini esie—ke isua 1914. (Mark 13:4-10) Mbụk owụt ete ke Jehovah ama ọtọn̄ọ nditan̄ mme anam-akpanikọ mbon oro ẹyetde aran, oro ẹnyenede idotenyịn eke heaven, mbok kaban̄a utuakibuot akpanikọ. Se itienede emi edi editan̄ “akwa otu owo . . . eke ẹtode ke kpukpru obio ye esien ye idụt ye usem”—mbon oro ẹnyenede idotenyịn edidụn̄ ke nsinsi ke isọn̄—mbok.—Ediyarade 7:9.
14 Tọn̄ọde ke Ekọn̄ Ererimbot I tutu esịm mfịn emi, utuakibuot Jehovah emi mbon oro ẹkerede enyịn̄ esie ẹtuakde amaka iso ye odudu ke idak ndausụn̄ esie. Ọtọn̄ọde ye tọsịn ifan̄ ke Ekọn̄ Ererimbot I ama okokụre, mme andituak ibuot nnọ Jehovah ẹmekọri ẹsịm n̄kpọ nte owo miliọn itiokiet idahaemi, ẹsopde idem ke n̄kpọ nte esop 91,000 ke idụt 235. Kpukpru isua, mme anditan̄a Obio Ubọn̄ emi ke ẹsịn se iwakde ibe biliọn hour kiet ke nditoro Abasi an̄wa an̄wa. An̄wan̄a nte ke Mme Ntiense Jehovah emi ẹdi mbon oro ẹsude ntịn̄nnịm ikọ Jesus emi: “Ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.”—Matthew 24:14.
15. Didie ke Zephaniah 2:3 osu idahaemi?
15 Zephaniah 3:17 etịn̄ ete: “Jehovah Abasi fo odu ke ufọt fo, ọmọsọn̄; enye ayanyan̄a.” Uforo eke spirit oro mme asan̄autom Jehovah ẹforode ke ukperedem ini emi edi nnennen utịp oro mmọ ẹbọde ke ndinyene enye ‘ke ufọt mmọ’ nte Abasi oro enyenede ofụri odudu. Emi edi ntre mfịn nte ekedide ke ini ẹkefiakde ẹtan̄ Judah eset ẹbok ke 537 M.E.N. Ntem nnyịn imekeme ndikụt nte Zephaniah 2:3 enyenede akpan edisu esie ke eyo nnyịn ke ini enye ọdọhọde ete: ‘Mbufo kpukpru sụn̄-sụn̄ mbio isọn̄, ẹyom Jehovah.’ Ke isua 537 M.E.N., “kpukpru” ama esịne nsụhọ mme Jew oro ẹkenyọn̄ọde ntan̄mfep ke Babylon ẹdi. Idahaemi enye ada ọnọ mme sụn̄sụn̄ owo oro ẹtode kpukpru idụt ke ofụri isọn̄, oro ẹnamde n̄kpọ nte ọfọnde ẹban̄a utom ukwọrọikọ Obio Ubọn̄ ofụri ekondo, ẹnyụn̄ ẹbụn̄ọde ẹdọk “obot ufọk Jehovah.”
Utuakibuot Akpanikọ Oforo
16. Nso ikeme ndidi edinam mme asua nnyịn kaban̄a uforo mme asan̄autom Jehovah ke eyomfịn?
16 Ke 537 M.E.N. ama ekebe, idem ama akpa ediwak owo ke mme idụt n̄kann̄kụk oro aban̄a edifiak ntan̄ ikọt Abasi mbọk ke isọn̄ emana mmọ kaban̄a utuakibuot akpanikọ. Edi editan̄ mbok oro ekedi ke ekpri udomo. Nte afo emekeme ndikere se ndusụk owo—idem mme asua ikọt Abasi—ẹtịn̄de idahaemi ke emi mmọ ẹkụtde ndyọ ndyọ n̄kọri, uforo, ye n̄kaiso utom mme asan̄autom Jehovah eyomfịn? Ekeme ndidi ndusụk asua emi ẹkere nte mme Pharisee ẹkekerede ke ini mmọ ẹkekụtde nte mme owo ẹbụn̄ọde ẹtiene Jesus. Mmọ ẹma ẹfiori ẹte: “Sese, ererimbot ama adaha etiene Enye.”—John 12:19.
17. Nso ke ewetn̄wed kiet eketịn̄ aban̄a Mme Ntiense Jehovah, ndien nso n̄kọri ke mmọ ẹnyene?
17 Ke n̄wed esie oro These Also Believe, Prọfesọ Charles S. Braden ọkọdọhọ ete: ‘Ke ata ata usụn̄, Mme Ntiense Jehovah ẹmeda ikọ ntiense mmọ ẹyọhọ ofụri isọn̄. Ẹkeme nditịn̄ ke akpanikọ nte ke idụhe otu ido ukpono ndomokiet ke ererimbot oro owụtde ọkpọsọn̄ ifịk onyụn̄ ọsọn̄ọde ẹyịre ke ndidomo ndisuan eti mbụk Obio Ubọn̄ akan Mme Ntiense Jehovah. Enen̄ede etie nte n̄ka emi ayaka iso okop odudu.’ Enye ekenen didie ntem! Ke ini enye ekewetde mme ikọ oro isua 50 emi ẹkebede, n̄kpọ nte Ntiense 300,000 kpọt ẹkekwọrọ ikọ ke ofụri ererimbot. Nso ke enye ekpetịn̄ mfịn, ke ini ibat oro awakde esịm utịm ike-20—n̄kpọ nte miliọn owo itiokiet—ẹkwọrọde eti mbụk?
18. Nso idi edisana usem, ndien mmanie ke Abasi ọnọ enye?
18 Ebede ke prọfet esie, Abasi ama ọn̄wọn̄ọ ete: “Ke ini oro [nyanam mme idụt ẹkabade ẹsem edisana usem, NW]: man kpukpru mmọ ẹkot enyịn̄ Jehovah: man ẹnam n̄kpọ ẹnọ enye ke esịt kiet.” (Zephaniah 3:9) Ke ukperedem ini emi, Mme Ntiense Jehovah ẹkot enyịn̄ Jehovah, ẹnam n̄kpọ esie ke edidianakiet ke mbọbọ ima oro owo mîkemeke ndisịbe—ih, “ke esịt kiet.” Mmọ ẹdi mbon emi Jehovah ọnọde edisana usem. Edisana usem emi abuana nnennen ifiọk akpanikọ Abasi ye mme uduak esie. Jehovah ikpọn̄ ọnọ ifiọk emi ebe ke edisana spirit esie. (1 Corinth 2:10) Mmanie ke enye ọnọ spirit esie? “Mmọ emi ẹkopde uyo esie nte andikara” kpọt ke enye ọnọ. (Utom 5:32, NW) Mme Ntiense Jehovah kpọt ẹnyịme ndikop uyo Abasi nte Andikara ke kpukpru n̄kpọ. Oro edi ntak emi mmọ ẹdide mme andibọ spirit Abasi ẹnyụn̄ ẹsemde edisana usem akpanikọ aban̄ade Jehovah ye mme utịbe utịbe uduak esie. Mmọ ẹda edisana usem emi ẹtoro Jehovah ke ofụri isọn̄ ke udomo oro ọkọride-kọri.
19. Ndisem edisana usem abuana nso?
19 Ndisem edisana usem ibuanake sụk edisọn̄ọ mmụm akpanikọ n̄kama ye edida enye n̄kpep mbon en̄wen, edi abuana n̄ko owo ndinam edu uwem esie odu ke n̄kemuyo ye mme mbet ye mme edumbet Abasi. Mme Christian oro ẹyetde aran ẹda usụn̄ ke ndiyom Jehovah ye ke ndisem edisana usem. Kere se ẹnamde! Okposụkedi ibat mbon oro ẹyetde aran osụhọrede akan 8,700, se ikperede ndisịm miliọn owo itiokiet efen ke ẹkpebe mbuọtidem mmọ ke ndiyom Jehovah ye ke ndisem edisana usem. Emi edi ibat akwa otuowo oro ọkọride-kọri emi ẹtode kpukpru idụt, emi ẹwụtde mbuọtidem ke uwa ufak Jesus, ẹnamde edisana utom ke okụre eke isọn̄ temple Abasi eke spirit, ẹdinyụn̄ ẹbọhọde “akwa ukụt” oro edisọpde isịm idiọk ererimbot emi.—Ediyarade 7:9, 14, 15.
20. Nso ina ibet mme anam-akpanikọ mbon oro ẹyetde aran ye mbon oro ẹnamde akwa otuowo?
20 Ẹyeda akwa otuowo ẹdụk edinen obufa ererimbot Abasi. (2 Peter 3:13) Jesus Christ, ye owo 144,000 oro ẹyetde aran, oro ẹnamde ẹset ẹka uwem eke heaven ndikara ye enye nte ndidem ye mme oku, ẹdinam obufa otu mme andikara isọn̄. (Rome 8:16, 17; Ediyarade 7:4; 20:6) Mme andibọhọ akwa ukụt ẹyenam utom edinam isọn̄ edi paradise ẹyenyụn̄ ẹka iso ndisem edisana usem oro Abasi ọnọde. Edumbet emi enyene n̄kpọ ndinam ye mmọ: “Jehovah oyonyụn̄ eteme kpukpru nditọ mbufo; ndien emem nditọ fo okpon. Eti ido ayanam fi ọsọn̄ọ ada.”—Isaiah 54:13, 14.
N̄kponn̄kan Utom Unọ Ukpep ke Mbụk
21, 22. (a) Nte Utom 24:15 owụtde, ediyom ẹkpep mmanie edisana usem? (b) Nso anana-mbiet utom unọ ukpep ke ẹdinam ke isọn̄ ke idak ukara Obio Ubọn̄?
21 Akwa otu oro ẹdinọde mmọ ifet ndikpep edisana usem ke obufa ererimbot edi mbon oro ẹtịn̄de ẹban̄a ke Utom 24:15, emi ọdọhọde ete: “Nti owo ye mme idiọk owo ẹyeset ke n̄kpa.” Ke eset, ediwak biliọn owo ẹma ẹdu uwem ẹnyụn̄ ẹkpan̄a ye unana edinyene nnennen ifiọk Jehovah. Enye ayanam mmọ ẹfiak ẹdidu uwem, ke nde ke nde. Ndien oyoyom ẹkpep mme utọ owo oro ẹnamde ẹset mi edisana usem.
22 Nso ifet ke edidi ntem nditiene mbuana ke akwa utom unọ ukpep oro! Enye edidi n̄kponn̄kan utom unọ ukpep ke mbụk ubonowo. Ẹdinam kpukpru emi ke idak eti ukara Christ Jesus ke odudu Obio Ubọn̄. Nte utịp, ubonowo ke akpatre oyokụt nte Isaiah 11:9 osude, emi ọdọhọde ete: “Ifiọk Jehovah ọyọyọhọ ke ererimbot, kpa nte mmọn̄ ofụkde inyan̄.”
23. Ntak emi afo ọkpọdọhọde nte ke nnyịn imenyene akwa ifet nte ikọt Jehovah?
23 Nso ifet ke nnyịn inyene ntem ke ukperedem ini emi nditịm idem nnọ utịbe utịbe ini oro ifiọk Jehovah edinen̄erede ọyọhọ isọn̄! Ndien nso ifet ke inyene idahaemi ntem ndidi ikọt Abasi, mbon oro ẹkụtde edisu ntịn̄nnịm ikọ oro ẹwetde ke Zephaniah 3:20! Do ke nnyịn ikụt nsọn̄ọ oro Jehovah ọnọde mi: “Nyenịm fi ke etop ye ke itoro ke otu kpukpru mme idụt ke ererimbot.”
Didie ke Afo Ọkpọbọrọ?
• Ntịn̄nnịm ikọ Zephaniah aban̄ade edifiak ntan̄ mbok enyene mme edisu ewe?
• Didie ke utuakibuot akpanikọ oforo ke ukperedem ini emi?
• Nso akwa utom unọ ukpep edida itie ke obufa ererimbot?
[Ndise ke page 25]
Ikọt Jehovah ẹma ẹfiak ẹnyọn̄ọ obio emana mmọ ndikafiak n̄wụk edisana utuakibuot. Nte afo ọmọfiọk se emi ọwọrọde mfịn?
[Mme ndise ke page 26]
Ke ndisem “edisana usem,” Mme Ntiense Jehovah ẹnọ mme owo etop Bible oro akamade ndọn̄esịt