Ẹsịn Udọn̄ ẹnọ Mme Andikpep Ikọ Abasi Ndinam Utom Mmọ Mma
EDIWAK tọsịn mme andikpep ke mme itie ikie ẹma ẹsop idem ndibọ item ke mme ọfiọn̄ ndondo emi. Ọtọn̄ọde ke May isua oko, mmọ ẹma ẹsop idem kaban̄a Mbono District “Mme Andikpep Ikọ Abasi” eke Mme Ntiense Jehovah ke ediwak itie ikie ke ofụri ererimbot. Ẹma ẹsịn udọn̄ ẹnọ mme andidụk ndinọ idemmọ ukpep, ndidi mbon oro ẹtịmde ẹdot, ndinyụn̄ nnam utom mmọ nte mme andikpep mma.
Nte afo ama odụk kiet ke otu mbono emi? Ke edide ntre, eyịghe idụhe nte ke afo ama owụt esịtekọm aban̄a eti udia eke spirit oro ẹkenọde ke mme mboho emi kaban̄a utuakibuot ata Abasi, Jehovah. Ntak mûtieneke nnyịn idahaemi udụn̄ọde esịne-item ndutịm mbono oro?
Akpa Usen—Mme N̄wed, Eke Ẹdade Odudu Spirit Abasi Ẹwet, Ẹdi Se Ifọnde Ndida N̄kpep Owo N̄kpọ
Etieibuot okpokoro mbono oro ama ada utịn̄ikọ oro “Ẹbọ Ukpep, Mbufo Mme Andikpep Ikọ Abasi,” ọkọm mme andidụk ufiop ufiop. Sia ọkọbọde ukpep oto Jehovah, “Akwa Anditeme,” Jesus Christ ama akabade edi Akwa Andikpep. (Isaiah 30:20, NW; Matthew 19:16) Edieke anade nnyịn inam n̄kọri nte mme andikpep Ikọ Abasi, ana Jehovah ekpep nnyịn n̄ko.
Ekem ikpehe oro, “Unọ Ukpep Obio Ubọn̄ On̄wụm Eti Mfri” ama etiene. Ebede ke mme ndụn̄ọde oro ẹkenamde ye mme andikpep Ikọ Abasi oro ẹnyenede mbufiọk, ẹma ẹsio idatesịt ye edidiọn̄ oro ẹdude ke edinam mbet, ẹwụt.
Utịn̄ikọ oro edemerede owo udọn̄ oro ibuotikọ ekedide “‘Ata N̄kpọsọn̄ Utom Abasi’ Ẹdemede Nnyịn Udọn̄” ama etiene. Ke akpa isua ikie, “ata n̄kpọsọn̄ utom” emi ẹkenyenede ebuana ye Obio Ubọn̄ Abasi ẹma ẹnụk mme owo ndinam n̄kpọ. (Utom 2:11) Nnyịn n̄ko imekeme ndidemede mme owo udọn̄ ndinam n̄kpọ ebe ke nditan̄a “ata n̄kpọsọn̄ utom” nte mme ukpepn̄kpọ N̄wed Abasi ẹban̄ade ufak, ediset ke n̄kpa, ye obufa ediomi.
Utịn̄ikọ oro eketienede ama esịn udọn̄ ọnọ kpukpru owo ‘Ndidat Esịt ke Edinen Ido Abasi.’ (Psalm 35:27) Nnyịn idikeme ndibịne edinen ido ebe ke ndikpep ndima se inende nnyụn̄ nsua se ikwan̄ade, ke ndikpep Bible, ke ndisịn ifịk mbiọn̄ọ mme odudu oro ẹnọde unan ke n̄kan̄ eke spirit, ye ke ndisụhọde idem. Mme utọ usio-ukot oro ẹyen̄wam ndikpeme nnyịn nsio ke edidụk idiọk nsan̄a, edu uma inyene obụkidem ererimbot, ye ke oburobụt ye afai afai unọ idem inemesịt.
Utịn̄ikọ ibuotikọ mbono, oro ibuotikọ ekedide “Ndiben̄e Idem ke Kpukpru Nde nte Mme Andikpep Ikọ Abasi,” ama eti nnyịn ete ke Jehovah ada Ikọ esie, edisana spirit esie, ye esop esie eke isọn̄ anam nnyịn idot ndidi mme asan̄autom esie. Kaban̄a edida Ikọ Abasi nnam n̄kpọ, etịn̄ikọ oro ama eteme nnyịn ete: “Uduak nnyịn edi ndisio etop Bible ke n̄wed nsịn ke esịt mbon oro ẹkpan̄de utọn̄ ẹnọ nnyịn.”
Ibuotikọ akpa nneme ke mbono oro ekedi “Ndikpep Idem Nnyịn ke Adan̄aemi Ikpepde Mbon Efen.” Akpa ikpehe ama ọsọn̄ọ etịn̄ ete ke nnyịn ikpenyene ndidu uwem ekekem ye ukem n̄kokon̄ idaha Christian oro nnyịn ikpepde mbon efen. Udiana ikpehe ama eteme nnyịn ete ‘itịm isiak ikọ akpanikọ.’ (2 Timothy 2:15) Man ikpep idem nnyịn, ifịk ifịk ọkpọkpọ ukpepn̄kpọ Bible ofụri ini edi akpan n̄kpọ, inamke n̄kpọ m̀mê nnyịn inam n̄kpọ Abasi ebịghi adan̄a didie. Akpatre ikpehe ke nneme oro ama owụt nte ke Devil oyom ndikụt nte nnyịn inyenede mme utọ edu nte ntan̄idem, edu nda-ke-idem, ekikere edida idem ke akpan n̄kpọ, ufụp, isịnenyịn, iyatesịt, utọk, ye edikụt ndudue. Nte ededi, edieke nnyịn ibiọn̄ọde Devil ọkpọsọn̄ ọkpọsọn̄, enye eyefehe ọkpọn̄ nnyịn. Man ibiọn̄ọ enye, oyom nnyịn isan̄a ikpere Abasi.—James 4:7, 8.
Ekemini utịn̄ikọ oro “Nen̄ede Sua Akama-N̄kpa Ndise Idan̄ eke Ererimbot Emi” ama owụt nnyịn nte ikpọbiọn̄ọde oburobụt n̄kpọ oro esịnde idaha eke spirit nnyịn ke itiendịk mi. Prọfet Habakkuk ama etịn̄ aban̄a Jehovah ete: “Afo amasana enyịn akan nte okụtde idiọk, unyụn̄ ukemeke ndise [afanikọn̄, NW].” (Habakkuk 1:13) Nnyịn ikpenyene ‘ndisua se idiọkde.’ (Rome 12:9) Ẹma ẹnọ mme ete ye eka item ẹte ẹkpeme nte nditọ mmọ ẹdade Intanet ẹnam n̄kpọ ye nte mmọ ẹsede ekebe ndise. Etịn̄ikọ ama ọdọhọ ete ke mbon oro ẹnyenede udọn̄ edise ndise idan̄ ẹkpenyene ndiyom un̄wam nto ufan mmọ oro ọkọride esịm ọyọhọ idaha ke n̄kan̄ eke spirit. Ayan̄wam n̄ko nditie n̄kere nnyụn̄ nti mme utọ itien̄wed nte Psalm 97:10; Matthew 5:28; 1 Corinth 9:27; Ephesus 5:3, 12; Colossae 3:5; ye 1 Thessalonica 4:4, 5.
Utịn̄ikọ efen, “Yak Emem Abasi Ekpeme Fi,” ama ọnọ nnyịn ndọn̄esịt ye nsọn̄ọ nte ke ini nnyịn isobode editịmede esịt, nnyịn ikpenyene nditop mbiomo nnyịn nnọ Jehovah. (Psalm 55:22) Edieke nnyịn in̄wan̄ade esịt nnyịn inọ enye ke akam, Jehovah ọyọnọ nnyịn “emem Abasi,” kpa ifụre ekikere oro otode ọsọn̄urua itie ebuana nnyịn ye enye.—Philippi 4:6, 7.
Akpa usen ama esịm utịt ata inem inem ye utịn̄ikọ oro “Jehovah Ada Un̄wana Abana Ikọt Esie,” oro akanamde edisu Isaiah ibuot 60 an̄wan̄a. Ke ufọt ekịm oro ofụkde ererimbot ke emi, “isen owo”—akwa otuowo ẹdide mbon mbieterọn̄ oro ẹwọn̄ọde ẹdi—ẹdiana kiet ye mme Christian oro ẹyetde aran ẹdara un̄wana Jehovah. Ke etịn̄de aban̄a ufan̄ikọ 19 ye 20, etịn̄ikọ ama anam an̄wan̄a ete: “Jehovah ‘idisopke’ nte utịn m̀mê ‘nditaha’ nte ọfiọn̄. Enye ayaka iso ndibana ikọt esie ebe ke ndinam un̄wana asiaha ọnọ mmọ. Nso utịbe utịbe nsọn̄ọ ke oro edi ntem ọnọ nnyịn nte nnyịn idude ke mme ukperedem ini eke ekịm ererimbot emi!” Ke utịt utịn̄ikọ oro, etịn̄ikọ ama ọtọt edisio n̄wed oro Ntịn̄nnịm Ikọ Isaiah—Un̄wana Ofụri Ubonowo, Eboho Iba. Nte afo omokot obufa n̄wed emi okụre?
Ọyọhọ Usen Iba—Ndikeme Ndikpep Mbon En̄wen
Ke etienede nneme itien̄wed eke usen ke ọyọhọ usen iba, nnyịn ima ikpan̄ utọn̄ ye ọkpọsọn̄ udọn̄ inọ ọyọhọ nneme iba ke mbono oro, “Mme Asan̄autom Emi Ẹnamde Mbon Efen Ẹkabade Ẹdi Mme Andinịm ke Akpanikọ.” Mme etịn̄ikọ ke nneme ikpehe ita emi ẹma ẹtịn̄ ẹban̄a kiet kiet ke otu ikpehe ita oro ẹbuanade ke ndin̄wam mme owo ẹkabade ẹdi mme andinịm ke akpanikọ—ndisuan etop Obio Ubọn̄, ndinam udọn̄ oro ẹkekụtde ọkọri, ye ndikpep mbon oro ẹnyenede udọn̄ ndinam se Christ eketemede. Ye un̄wam ndụn̄ọde ye mme edifiak nnam n̄wụt, nnyịn ima ikeme ndikụt nnennen nte nnyịn ikemede ndikpep mbon efen ẹkabade ẹdi mbet.
Udiana ikpehe ekedi ke ibuotikọ oro “Dian Uten̄e Abasi ke Ime Fo.” Etịn̄ikọ ama owụt ete ke se idide akpan n̄kpọ ikan edi nnyịn ‘ndime ime nsịm akpatre.’ (Matthew 24:13) Nnyịn ikpenyene ndida kpukpru ndutịm Abasi—akam, ukpepn̄kpọ idemowo, mme mbono esop, ye an̄wautom—nnam n̄kpọ ndikọri uten̄e Abasi. Oyom nnyịn ibiọn̄ọ mme udọn̄ ye edinam ererimbot ndibiat uten̄e Abasi nnyịn.
Didie ke mbon oro ẹkpade mba ẹnyụn̄ ẹbiomde edidobi mbiomo ẹkeme ndikụt nduọkodudu mfịn? Utịn̄ikọ oro “Ndinyene Nduọkodudu ke Idak Ọkpọnọ Christ” ama ọbọrọ mbụme oro. Jesus ke mfọnido ama ọnọ mme anditiene enye ikot ete ẹdụk ke idak ọkpọnọ imọ ẹnyụn̄ ẹkpebe imọ. (Matthew 11:28-30) Nnyịn ikeme ndidụk ke idak ọkpọnọ Jesus ebe ke nditịm ntiene uwụtn̄kpọ esie eke edidu mmemmem uwem oro adade ukem ukem. Ẹma ẹnam mme akpan n̄kpọ ke utịn̄ikọ emi ẹwọrọ ẹda ebe ke ndinam ndụn̄ọde ye mbon oro ẹnamde uwem mmọ ẹdi mmemmem.
Kiet ke otu akpan n̄kpọ udọn̄ ke ikpọ mboho eke Mme Ntiense Jehovah esidi baptism mme asan̄autom Abasi oro ẹyakde idem ẹnọ obufa obufa. Eyenete oro ọkọnọde utịn̄ikọ oro, “Baptism Ada Esịm Ikpọ Ifet Unọ Ukpep” ama ọnọ mbon oro ẹkeyomde ndina baptism ufiop ufiop ekọm onyụn̄ ọnọ mmọ ikot ndibuana ke ikpọ ifetutom. Mme andikpep Ikọ Abasi oro ẹnade baptism obufa oro ẹsịmde mme n̄kpọ N̄wed Abasi oro ẹyomde ẹkeme ndinyanade mbịne nsio nsio ifetutom ke esop.
“Kpebe Akwa Andikpep” ekedi ibuotikọ akpa utịn̄ikọ uwemeyo oro. Ke ata ediwak isua ke heaven, Jesus ama etịn̄ enyịn ese onyụn̄ ekpebe Ete esie, ntem akabarede edi Akwa Andikpep. Ke adan̄aemi okodude ke isọn̄, enye ama esida mme usụn̄ unọ ukpep oro ẹnyenede uforo, utọ nte mme mbụme oro ẹnamde owo ekere n̄kpọ ye mmemmem, in̄wan̄-in̄wan̄ uwụtn̄kpọ, anam n̄kpọ. Jesus ekesikọn̄ ukpepn̄kpọ esie ke Ikọ Abasi onyụn̄ etịn̄ ikọ ye ifiopesịt, ufiop, ye odudu. Nte ikonụkke nnyịn ndikpebe Akwa Andikpep?
Aduai-owo-idem utịn̄ikọ efen, “Nte Afo Emenyịme Ndinam N̄kpọ nnọ Mbon En̄wen?,” ama esịn udọn̄ ọnọ nnyịn ndikpebe uwụtn̄kpọ Jesus ke ndinam n̄kpọ nnọ mbon en̄wen. (John 13:12-15) Etịn̄ikọ ama esịn udọn̄ nnennen nnennen ọnọ irenowo oro ẹdotde ete ẹtie nte Timothy ke ndida mme ifet oro ẹbererede ndin̄wam mbon en̄wen. (Philippi 2:20, 21) Ẹma ẹsịn udọn̄ ẹnọ mme ete ye eka ẹte ẹkpebe Elkanah ye Hannah ke ndin̄wam nditọ mmọ ndibịne utom uyọhọ ini. Ndien ẹma ẹteme n̄kpri owo ẹte ẹkpebe uwụtn̄kpọ Jesus Christ ye ekpri Timothy ke ndinọ idemmọ unyịme unyịme. (1 Peter 2:21) Ikọ mbon oro ẹkedade mme ifet oro ẹkebererede ndinam n̄kpọ nnọ mbon en̄wen ẹma ẹtụk nnyịn n̄ko.
Ibuotikọ ọyọhọ nneme ita ekedi “Bọ Ufọn Ata Ọyọhọ Ọyọhọ to Ukpepn̄kpọ Ukara Abasi.” Akpa etịn̄ikọ ama ọsọn̄ọ etịn̄ ufọn edinam ini unọ n̄kpan̄utọn̄ nnyịn ọniọn̄. Man isịm utịtmbuba oro, nnyịn imekeme nditọn̄ọ ye mbio mbio ikpehe ukpepn̄kpọ idemowo inyụn̄ idomo ndinam mmọ ẹniọn̄. Enye n̄ko ama esịn udọn̄ ọnọ otuowo ndise mme itie N̄wed Abasi ndinyụn̄ n̄wet mme akpan n̄kpọ ke mme mbono esop. Udiana etịn̄ikọ ama eti nnyịn aban̄a ufọn edisọn̄ọ mmụm “nti ikọ” n̄kama. (2 Timothy 1:13, 14) Man ikpeme idem ke mme oburobụt edinam ndutịm usuanetop, ukpepn̄kpọ mbon akwaifiọk, ikpọ nsụkuyo, ye ukpepn̄kpọ mbon nsọn̄ibuot, ana nnyịn idedep ifet inọ ukpepn̄kpọ idemowo ye edidụk mbono esop. (Ephesus 5:15, 16) Akpatre etịn̄ikọ ke nneme oro ama osio owụt nte ke oyom inanam mme n̄kpọ oro ikpepde man nnyịn ikeme ndibọ ufọn ọyọhọ ọyọhọ nto ukpepn̄kpọ ukara Abasi.—Philippi 4:9.
Nnyịn ikokop inemesịt didie ntem ndikop utịn̄ikọ oro “Mbufa Ndutịm Kaban̄a N̄kọri eke Spirit Nnyịn”! Nnyịn ima ikop idatesịt ndifiọk nte ke ẹyesio obufa n̄wed oro ẹkotde Bọ Ufọn to Ukpepn̄kpọ Ufọkn̄wed Utom Ukara Abasi ke mîbịghike. Nte etịn̄ikọ eketịn̄de se isịnede ke n̄wed oro, ama enen̄ede ọdọn̄ nnyịn ndinyene enye. Kaban̄a ikpehe oro ọdọn̄ọde ediwak akpan item utịn̄ikọ ke n̄wed oro, enye ọkọdọhọ ete: “Obufa n̄wed ukpepn̄kpọ emi idaha usụn̄ unam n̄kpọ ererimbot ise iban̄a ikpehe 53 emi, oro aban̄ade eti ukotn̄wed, utịn̄ikọ, ye edinọ ukpep. Nte ẹsede ẹban̄a ọkọn̄ọ ke mme edumbet N̄wed Abasi.” N̄wed oro oyowụt nte mme prọfet, Jesus, ye mme mbet esie ẹkewụtde nti edu unọ ukpep. Ih, n̄wed ukpepn̄kpọ emi ye mbufa n̄kpọ oro ẹdiande ke Ufọkn̄wed Utom Ukara Abasi ẹyenen̄ede ẹn̄wam nnyịn ndidi nti mme andikpep Ikọ Abasi.
Ọyọhọ Usen Ita—Ẹdi Mme Andikpep Adan̄aemi
Ke ẹma ẹkeneme itien̄wed usen ke akpatre usen, kpukpru owo ẹma ẹnen̄ede ẹnọ n̄kpan̄utọn̄ ke akpatre nneme mbono oro, “Ntịn̄nnịm Ikọ Malachi Etịm Nnyịn Idem ọnọ Usen Jehovah.” Malachi eketịn̄ ntịn̄nnịm ikọ ke n̄kpọ nte isua ikie ke mme Jew ẹma ẹkenyọn̄ọ Babylon ẹdi. Mmọ ẹma ẹfiak ẹduọ ẹdụk nsọn̄ibuot ye idiọkido, ẹsuenede enyịn̄ Jehovah ke ndifụmi ndinen ibet esie ye ke ndida mme unam oro ẹdide nnan, mbụn̄ọ, ye eke ẹdọn̄ọde udọn̄ọ nnam uwa. Akan oro, mmọ ẹma ẹsion̄o iban uyen mmọ ndọ, ndusụk man ẹdọ isen iban.
Akpa ibuot ke ntịn̄nnịm ikọ Malachi ọsọn̄ọ ọnọ nnyịn ete ke Jehovah ama ikọt esie. Enye owụt nte ke oyom inyene ukpono ukpono mbak inọ Abasi inyụn̄ iwụt esịtekọm iban̄a ndisana n̄kpọ. Jehovah odori enyịn nnyịn ndinọ enye mfọnn̄kan n̄kpọ oro nnyịn inyenede, ituakde ibuot inọ enye ke ntak ima unana ibụk oro imade enye. Edisana utom nnyịn ikpenyeneke ndidi enyọn̄ enyọn̄ edinam, ndien nnyịn iyanam ibat inọ Abasi.
Ke adade Malachi ibuot iba edibuan ye eyo nnyịn, udiana etịn̄ikọ ke nneme oro ama obụp ete: “Nte nnyịn ke idem nnyịn imodu ke edidemede mbak owo ‘idikụt ukwan̄-n̄kpọ ndomokiet ke n̄kpọkinua nnyịn’?” (Malachi 2:6) Mbon oro ẹdade usụn̄ ke ndinọ ukpep ẹkpenyene nditịm n̄kụt nte ke se mmimọ itịn̄de enen̄ede ọkọn̄ọ ke Ikọ Abasi. Nnyịn ikpenyene ndisua utọ abian̄a nte edisio ndọ ke usụn̄ oro mînenke.—Malachi 2:14-16.
Ke etịn̄de ikọ ke ibuotikọ oro “Anie Edibọhọ Usen Jehovah?” akpatre etịn̄ikọ ke nneme oro ama an̄wam nditịm nnyịn idem mben̄e usen Jehovah. Etịn̄ikọ oro ama ọdọhọ ete: “Edi n̄kpọ ndọn̄esịt didie ntem ọnọ mme asan̄autom Jehovah ndifiọk nte ke Malachi ibuot 3, ufan̄ikọ 17, enyene akpan edisu esie ke idem mmọ! Enye ọdọhọ ete: ‘Jehovah mme udịm ọdọhọ ete, Mmọ ẹyedi ata inyene mi ke usen emi ami ndoride; ndien nyatua mmọ mbọm, kpa nte owo atuade eyen esie eke anamde n̄kpọ ọnọ enye mbọm.’”
Akpan n̄kpọ udọn̄ efen ke mbono oro ekedi drama oro “Kpono Odudu Ukara Jehovah,” oro ẹkesịnede ọyọhọ ọyọhọ usịnen̄kpọ eset okonyụn̄ aban̄ade nditọ Korah. Kpa ye oro ete mmọ ọkọsọn̄de ibuot ye Moses ye Aaron, mmọ ẹma ẹka iso ẹnam akpanikọ ẹnọ Jehovah ye mme andida ke ibuot esie. Ke adan̄aemi Korah ye mme anditiene enye ẹketakde, nditọ Korah ẹma ẹbọhọ. Utịn̄ikọ oro eketienede, “Sụk Ibuot nọ Odudu Ukara Abasi ke Edinam Akpanikọ,” ama ada se ikesịnede ke Drama oro abuan ye nnyịn owo kiet kiet. Etịn̄ikọ ama odụri owo utọn̄ aban̄a ikpehe itiokiet emi Korah ye mme anditiene enye ẹkekpude: nditre ndinọ odudu ukara Jehovah ibetedem ke edinam akpanikọ; ndiyak ntan̄idem, idiọk udọn̄, ye ufụp ẹkan mmọ ubọk; ndiwụk ntịn̄enyịn ke unana mfọnmma mbon oro Jehovah emekde; ndikọri edu n̄kụni; nditre ndikop uyụhọ ke mme ifetutom mmọ; ye ndiyak itie ufan m̀mê mme mbọbọ ubon ẹdi ebeiso n̄kpọ ẹnọ edinam akpanikọ nnọ Jehovah.
“Mmanie Ẹkpep Kpukpru Mme Idụt Akpanikọ?” ekedi ibuotikọ utịn̄ikọ an̄wa. Akpanikọ oro ẹkenemede ẹban̄a ikedịghe akpanikọ ke ofụri ofụri, edi ekedi akpanikọ aban̄ade uduak Jehovah oro Jesus Christ eketiede ntiense aban̄a. Etịn̄ikọ ama odụn̄ọde akpanikọ oro enyenede ebuana ye mme edinịm ke akpanikọ, akpanikọ oro enyenede ebuana ye edu utuakibuot, ye akpanikọ oro enyenede ebuana ye ọkpọkpọ edu uwem. Ebede ke ndimen mme Christian akpa isua ikie ndomo ye Mme Ntiense Jehovah mfịn, ẹma ẹnam nnyịn inen̄ede inịm ite ke “Abasi odu ke otu [nnyịn] ke akpanikọ.”—1 Corinth 14:25.
Ke ẹma ẹkenọ utịn̄ikọ Enyọn̄-Ukpeme ke ibuotikọ ukpepn̄kpọ urua oro, akpatre utịn̄ikọ oro, “Ndinam Utom Unọ Ukpep Nnyịn Usọp Usọp” ama onụk kpukpru mme andikpep ikọ Abasi oro ẹkedụkde ndinam n̄kpọ. Ndikafiak ndụn̄ọde ndutịm oro ibio ibio ama ọsọn̄ọ ufọn edikama N̄wed Abasi ke unọ ukpep, mme usụn̄ emi nnyịn ikemede ndikabade ndi mme andikpep oro ẹdotde, ye ufọn edinyene mbuọtidem ke akpanikọ oro nnyịn ikpepde mbon en̄wen. Etịn̄ikọ ama ọnọ nnyịn item ete inam ‘owo ẹkụt n̄kọri nnyịn’ inyụn̄ ‘itịm ikpeme idem nnyịn ye se nnyịn ikpepde owo.’—1 Timothy 4:15, 16.
Nso udia eke spirit ke nnyịn ikadia ntem ke Mbono District “Mme Andikpep Ikọ Abasi”! Nnyịn ikpakam ikpebe Akwa Anditeme nnyịn, Jehovah, ye Akwa Andikpep nnyịn, Jesus Christ, ke ndikpep mbon en̄wen ikọ Abasi.
[Ekebe/Mme ndise ke page 28]
Mbufa N̄wed Ndiyụhọ San̄asan̄a Udọn̄
Mme andidụk Mbono District “Mme Andikpep Ikọ Abasi” ẹma ẹkop nduaidem ndibọ n̄wed iba oro ẹkpedide ata n̄kpọ un̄wam ke ndikpep mme owo ke ndusụk ikpehe ererimbot akpanikọ N̄wed Abasi. Tract oro ẹkotde Nte Afo Emenyene Spirit Oro Mîkemeke Ndikpa?, edidi eti n̄kpọutom ndida ntọn̄ọ nneme ye mbon oro ẹdụn̄de ke mme idụt oro usem n̄kann̄kụk mmọ mînyeneke nsio nsio ikọ inọ “ukpọn̄” ye “spirit.” Obufa tract oro owụt in̄wan̄-in̄wan̄ nte ke odudu spirit okpụhọde ye edibotn̄kpọ eke spirit ye nte ke mme owo isikabakede idi mme edibotn̄kpọ eke spirit ke ini mmọ ẹkpade.
Ẹma ẹsio ediye uduot ekpri n̄wed oro A Satisfying Life—How to Attain It ke Ikọmbakara ke utịt ọyọhọ usen iba ke mbono oro. Ẹketịm ediye uduot ekpri n̄wed emi ye uduak ndida ntọn̄ọ ukpepn̄kpọ Bible ye mbon oro mîfiọkke ke Andibot edi ata owo mînyụn̄ ifiọkke ke odu n̄wed oro ẹdade odudu spirit Abasi ẹwet. Nte afo emekeme ndida mbufa n̄wed emi nnam n̄kpọ ke utom ukwọrọikọ fo?
[Mme ndise ke page 26]
Ke Milan, Italy, ye ke ikpọ mbono ke ofụri ererimbot, ediwak owo ke mme itie ikie ẹma ẹna baptism
[Ndise ke page 29]
Drama oro “Kpono Odudu Ukara Jehovah” ama otụk otuowo