“Ẹbọn̄ Akam Ntem”

NDI ọmọfiọk nditịn̄ Akam Ọbọn̄? Enye edi akam uwụtn̄kpọ emi Jesus Christ ekekpepde. Jesus ọkọdọhọ ke ọwọrọetop Ukwọrọikọ esie Oro ke Obot ete: “Ẹbọn̄ akam ntem ndien, ẹte.” (Matthew 6:9) Sia edide Jesus ekekpep akam emi, ẹwak ndikot enye Akam Ọbọn̄; ẹdiọn̄ọ enye n̄ko nte Ete Nnyịn.—Ẹkọt enye ke usem Latin, Paternoster.

Ata ediwak owo ke ofụri ererimbot ẹmụm Akam Ọbọn̄ ẹsịn ke ibuot, ẹsinyụn̄ ẹtịn̄ enye ediwak ini, iso-ọfọn, kpukpru usen. Ke mme isua ndondo emi, ediwak owo ẹsitịn̄ akam emi ke ufọkn̄wed ye ke mme itie edinam. Ntak ẹdade Akam Ọbọn̄ ke ata ọsọn̄urua n̄kpọ ntre?

Cyprian, ekpep ukpepn̄kpọ ido ukpono eke ọyọhọ isua ikie ita, ekewet ete: “Ewe akam ekpetịn̄ aban̄a n̄kpọ eke spirit akan enye oro Christ ekekpepde nnyịn . . . ? Ewe akam oro ẹbọn̄de ẹnọ Ete ekpedi akpanikọ akan enye oro Eyen, emi edide Akpanikọ, ekekpepde nnyịn?”—John 14:6.

Ufọkabasi Roman Catholic ọdọhọ ke katkisịm esie ete ke Akam Ọbọn̄ edi “akpan akam Christian.” The World Book Encyclopedia enyịme ke akam emi enyene akpan itie ke kpukpru ido ukpono Christendom, okotde enye kiet ke otu “akpan ikọ mbuọtidem Christian.”

Nte ededi, edi akpanikọ ke ediwak owo oro ẹsitịn̄de Akam Ọbọn̄ itịmke ifiọk se enye ọwọrọde. N̄wedmbụk n̄kpọntịbe Canada oro Ottawa Citizen ọdọhọ ete: “Edieke afo otode ubon Christian ekededi, ekeme ndidi afo ọmọfiọk ndisọsọp inua ntịn̄ Akam Ọbọn̄ udọn udọn, edi ekeme ndisọn̄ fi nditịn̄ enye sụn̄sụn̄ nnyụn̄ mfiọk se enye ọwọrọde.”

Ndi enen̄ede edi akpan n̄kpọ ndifiọk se akam oro ibọn̄de inọ Abasi ọwọrọde? Ntak emi Jesus ekekpepde nnyịn Akam Ọbọn̄? Nso ke enye ọwọrọ ọnọ fi? Ẹyak nnyịn ibọrọ mme mbụme emi idahaemi.