Ndi Ekikere Ẹsifịna Fi?
LENA ama esinyene etikwo etikwo ekikere aban̄a idemesie ke ediwak isua. Enye ọkọdọhọ ete: “Ẹma ẹsabade mi ediwak isua ke ini n̄kedide eyenọwọn̄, ndien emi ama anam mi n̄kere ke n̄wọrọke n̄kpọ ndomokiet. Uwem ama odorode mi.” Simone eti nte ini uyen esie eketiede onyụn̄ ọdọhọ ete: “Ke ọwọn̄esịt mi, n̄kenịm ke ami n̄wọrọke n̄kpọ ndomokiet.” Ọkpọsọn̄ mfụhọ otode utọ ekikere oro edi ọsọ n̄kpọ mfịn. Itieutom kiet oro esinọde mme uyen item ke urụk ukopikọ ọdọhọ ke ekpere ndidi mbahade kiet ke itie iba ke otu mme uyen oro ẹsikotde itieutom oro “ẹnen̄ede ẹkere ke mmimọ iwọrọke n̄kpọ.”
Nte ndusụk ntaifiọk ẹdọhọde, owo esikere ke imọ iwọrọke n̄kpọ ke ini mbon en̄wen ẹsụhọrede enye itie. Emi ekeme nditịbe ke ini ẹtọkde owo ndien ndien, ẹkụtde ndudue ẹnọ owo kpukpru ini, m̀mê ke ini ẹsabarede owo. Inamke n̄kpọ m̀mê nso idi ntak, utịp ekeme ndimem owo idem onyụn̄ enen̄ede ọdiọk. Ndụn̄ọde ndondo emi owụt ke mbon oro ẹsinyenede ukwan̄ ekikere ẹban̄a idemmọ ẹsinyene eyịghe ẹban̄a idemmọ ye mbon en̄wen, do ye unana edifiọk, mmọ ẹsibiat n̄kpet n̄kpet itie ebuana oro mmọ ẹnyenede ye mme owo ẹnyụn̄ ẹbiat itie ufan mmọ. Ndụn̄ọde oro ọdọhọ ete: “Ke nditịm ntịn̄, emi esinam mmọ ẹkere ke mmimọ iwọrọke n̄kpọ, kpa n̄kpọ oro mmọ ẹfehede ẹkan.”
Bible ọdọhọ ke “uwak ekikere” ẹsiwak ndifịna utọ mbon oro. (Psalm 94:19) Mmọ ẹsikere ke mmimọ ikemeke ndinam n̄kpọ ndomokiet ọfọn. Mmọ ẹsiduọhọ idemmọ ke ini ẹnamde ndudue. Okposụkedi mbon en̄wen ẹkemede nditoro mmọ ke nti utom mmọ, ke ọwọn̄esịt mmọ, mmọ ẹsikere ke oro idịghe akpanikọ. Sia ẹnịmde ke mmimọ ikemeke ndikop inemesịt, ediwak mmọ ẹsiduọ ẹnyịne ke edu nditaha oro mmọ ẹkerede ke mmimọ ikemeke ndikpọn̄. Lena, oro iketịn̄de iban̄a, ikesimaha ndidia udia ke ntak emi enye ekekerede ke imọ iwọrọke n̄kpọ; enye ọdọhọ ete: “N̄kekere ke n̄kemeke ndikpụhọde n̄kpọ ndomokiet.”
Ndi mbon oro utọ “uwak ekikere” oro ẹsifịnade ẹditie ntem ke ofụri eyouwem mmọ? Nte ẹkeme ndin̄wana n̄kan mme utọ ekikere oro? Bible ọnọ mme edumbet ye mme item oro ẹn̄wamde ediwak owo ndikan mfịna emi. Nso idi ndusụk edumbet emi, ndien didie ke mmọ ẹn̄wam mbon oro ekikere ẹkesifịnade ẹkop idatesịt ke uwem? Ibuotikọ oro etienede eyeneme emi.