Nditan̄ Mme N̄kpọ Eke Heaven ye Eke Isọn̄ Ndọn̄ Ọtọkiet
“Se itịmde inem enye, . . . edi, ndifiak ntan̄ kpukpru n̄kpọ ndọn̄ ọtọkiet ke Christ, mme n̄kpọ eke ẹdude ke heaven ye mme n̄kpọ eke ẹdude ke isọn̄.”—EPHESUS 1:9, 10.
1. ‘Etịm enem Jehovah esịt’ ndinam nso ke heaven ye ke isọn̄?
EMEM OFỤRI EKONDO! Oro edi utịbe utịbe uduak Jehovah, kpa “Abasi emem.” (Mme Hebrew 13:20) Enye ama ọnọ apostle Paul odudu spirit ndiwet ke “se itịmde inem [imọ] esịt” edi “ndifiak ntan̄ kpukpru n̄kpọ ndọn̄ ọtọkiet ke Christ, mme n̄kpọ eke ẹdude ke heaven ye mme n̄kpọ eke ẹdude ke isọn̄.” (Ephesus 1:9, 10) Edi nso ke ikọ oro ‘ndifiak ntan̄ ndọn̄ ọtọkiet’ ke ufan̄ikọ emi enen̄erede ọwọrọ? Eyen ukpepn̄kpọ Bible oro, J. B. Lightfoot ọdọhọ ete: “Ikọ oro ọwọrọ edidianakiet ofụri ekondo, emi ikpehe emi adade san̄asan̄a mînyụn̄ idianake kiet mîdidụhe aba, kpa ini emi kpukpru n̄kpọ ẹdisụkde ibuot ke Christ ẹnyụn̄ ẹdiana kiet ke enye. Idiọkn̄kpọ ye n̄kpa, mfụhọ ye edikpu ye ndutụhọ idinyụn̄ idụhe aba.”
“Mme N̄kpọ Eke Ẹdude ke Heaven”
2. Mmanie ẹdi “mme n̄kpọ eke ẹdude ke heaven” oro anade ẹtan̄ ẹdọn̄ ọtọkiet?
2 Apostle Peter ekewet ibio ibio aban̄a utịbe utịbe idotenyịn oro ata mme Christian ẹnyenede ete: “Mbufa enyọn̄ ye obufa isọn̄ ẹdu emi nnyịn itiede ibet nte ekemde ye un̄wọn̄ọ esie, ndien edi mi ke edinen ido edidụn̄.” (2 Peter 3:13) “Mbufa enyọn̄” oro ẹn̄wọn̄ọde mi edi obufa ukara, kpa Obio Ubọn̄ Messiah. Ẹnyene nditan̄ “mme n̄kpọ eke ẹdude ke heaven” oro Paul etịn̄de aban̄a ke leta oro enye ekewetde ọnọ mbon Ephesus “ndọn̄ ọtọkiet ke Christ.” Mmọ ẹdi ibat ibat owo oro ẹmekde ẹte ẹkara ye Christ ke heaven. (1 Peter 1:3, 4) Ẹkedep mme Christian 144,000 oro ẹyetde aran mi “ẹsio ke isọn̄,” “ke otu ubonowo,” ẹte ẹkekara ye Christ ke Obio Ubọn̄ heaven.—Ediyarade 5:9, 10; 14:3, 4; 2 Corinth 1:21; Ephesus 1:11; 3:6.
3. Ntak emi ẹkemede ndidọhọ ke mbon oro ẹyetde aran ‘ẹtie ke heaven’ okposụkedi mmọ ẹsụk ẹdude mi ke isọn̄?
3 Edisana spirit anam mme Christian oro ẹyetde aran ẹmana obufa, ẹkabarede ẹdi nditọ Jehovah eke spirit. (John 1:12, 13; 3:5-7) Mmọ ẹdi nditọete Jesus sia Jehovah adade mmọ enyene nte “nditọ.” (Rome 8:15; Ephesus 1:5) Oro anam ẹdọhọ ke ‘ẹnam mmọ ẹset ẹketie ọtọkiet ye Christ ke heaven,’ idem okposụkedi mmọ ẹsụk ẹdude ke isọn̄. (Ephesus 1:3; 2:6) Mmọ ẹnyene n̄kokon̄ idaha eke spirit emi sia “ẹma ẹfịk [mmọ] idiọn̄ọ ke edisana spirit oro ẹken̄wọn̄ọde, emi edide idiọn̄ọ udeme emi [ẹkebemde] iso” ẹnịm ẹnọ mmọ ke heaven. (Ephesus 1:13, 14; Colossae 1:5) Mmọdo, mmọ ẹdi “mme n̄kpọ eke ẹdude ke heaven,” emi ẹnyenede nditan̄ ofụri ibat mmọ, emi Jehovah ama ekebebiere enịm, ndọn̄ ọtọkiet.
Ẹtọn̄ọ Nditan̄ Kpukpru N̄kpọ Ndọn̄ Ọtọkiet
4. Ini ewe ke ẹketọn̄ọ nditan̄ “mme n̄kpọ eke ẹdude ke heaven” ndọn̄ ọtọkiet, ndien didie ke ẹkenam oro?
4 Man ekekem ye “ndutịm” oro Jehovah anamde, ẹkenyene nditọn̄ọ nditan̄ “mme n̄kpọ eke ẹdude ke heaven” ndọn̄ ọtọkiet “ke adan̄aemi edimek ini ekemde ọyọhọ ọyọhọ.” (Ephesus 1:10) Edimek ini oro ekekem ke Pentecost isua 33 E.N. Usen oro ke ẹken̄wan̄a edisana spirit ẹduọk mme apostle ye mme mbet eken, esịnede iren ye iban. (Utom 1:13-15; 2:1-4) Emi ama owụt ke obufa ediomi ọtọn̄ọ, onyụn̄ owụt ke esop Christian ye obufa idụt Israel eke spirit, “kpa Israel Abasi,” amana.—Galatia 6:16; Mme Hebrew 9:15; 12:23, 24.
5. Ntak emi Jehovah akanamde obufa “idụt” ada itie Israel eke obụk?
5 Ibet ediomi oro ẹkenamde ye nditọ Israel eke obụk ikanamke ẹnyene ‘obio oku, ye edisana idụt’ oro edinamde utom ke nsinsi ke heaven. (Exodus 19:5, 6) Jesus ama asian mme adaiso ido ukpono mme Jew ete: “Ẹyebọ mbufo obio ubọn̄ Abasi ẹnyụn̄ ẹyak enye ẹnọ idụt oro on̄wụmde mfri esie.” (Matthew 21:43) Mme Christian oro ẹyetde aran, emi ẹsịnede ke obufa ediomi, ẹnam Israel eke spirit emi. Apostle Peter ekewet ntem ọnọ ẹsọk mmọ: “Mbufo ẹdi ‘orụk eke ẹmekde, otu mme oku emi ẹdade ubọn̄, edisana idụt, mbon emi ẹdide akpan inyene, man mbufo ẹkpetan̄a nti ido’ enye emi okokotde mbufo osio ke ekịm esịn ke utịbe un̄wana esie. Koro mbufo mîkedịghe ikọt owo baba kiet ini kiet ko, edi idahaemi ẹdi ikọt Abasi.” (1 Peter 2:9, 10) Israel eke obụk ikedịghe aba ikọt ediomi Jehovah. (Mme Hebrew 8:7-13) Nte Jesus ekebemde iso etịn̄, ẹma ẹbọ mmọ san̄asan̄a ifet edidi ubak Obio Ubọn̄ Messiah ẹyak ẹnọ Israel eke spirit emi owo 144,000 ẹnamde.—Ediyarade 7:4-8.
Ẹda Ẹsịn ke Ediomi Obio Ubọn̄
6, 7. Ewe san̄asan̄a ediomi ke Jesus akanam ye nditọete esie eke spirit, ndien nso ke emi ọwọrọ ọnọ mmọ?
6 Jesus ọkọdọhọ mme anam-akpanikọ apostle esie okoneyo oro enye ọkọtọn̄ọde Editi n̄kpa esie ete: “Mbufo ẹdi mmọ emi ẹsọn̄ọde ẹda ye ami ke idomo mi; mmonyụn̄ nnam ediomi ye mbufo, kpa nte Ete mi akanamde ediomi ye ami, kaban̄a obio ubọn̄, man mbufo ẹkpedia ẹnyụn̄ ẹn̄wọn̄ n̄kpọ ke okpokoro mi ke obio ubọn̄ mi, ẹnyụn̄ ẹtie ke mme ebekpo ẹkpe ikpe ẹnọ esien Israel duopeba.” (Luke 22:28-30) Mi, Jesus eketịn̄ aban̄a san̄asan̄a ediomi oro enye akanamde ye nditọete esie eke spirit emi ẹdide owo 144,000, emi ẹdinamde akpanikọ “idem tutu esịm n̄kpa,” ẹnyụn̄ ẹwụt ke idi ‘mme andikan.’—Ediyarade 2:10; 3:21.
7 Kpukpru mbon oro ẹnamde ekpri otu emi ẹfre ẹban̄a idotenyịn edidu uwem ke nsinsi ke isọn̄ nte mme owo oro ẹnyenede obụk ye iyịp. Mmọ ẹditie ke ebekpo ke heaven ẹkara ye Christ, ẹkpe ikpe ẹnọ ubonowo. (Ediyarade 20:4, 6) Idahaemi ẹyak ineme mme itie en̄wen ke N̄wed Abasi oro ẹbehede mbon oro ẹyetde aran kpọt, emi ẹnyụn̄ ẹwụtde ntak emi “mme erọn̄ en̄wen” mîsitieneke ita ndamban̄a uyo inyụn̄ in̄wọn̄ ndamban̄a wine ke Editi n̄kpa Christ.—John 10:16.
8. Mbon oro ẹyetde aran ndita uyo owụt nso? (Se ekebe ke page 23.)
8 Mbon oro ẹyetde aran ẹyekụt ndutụhọ nte Christ okokụtde, ẹnyụn̄ ẹkpa orụk n̄kpa oro enye akakpade. Sia Paul ekesịnede ke otu emi, enye ọkọdọhọ ke imọ imeben̄e idem ndiyak se ededi atak imọ man ‘ikpenyene Christ, ikponyụn̄ ifiọk enye ye odudu ediset esie ke n̄kpa, nnyụn̄ ntiene mbuana ke ndutụhọ esie.’ Ih, Paul ama enyịme “ndikpa n̄kpa eke ebietde n̄kpa esie.” (Philippi 3:8, 10) Ediwak mme Christian oro ẹyetde aran ẹbiom “ndiọi edinam oro ẹkenamde Jesus” ẹsan̄a ke ikpọkidem mmọ.—2 Corinth 4:10.
9. Uyo Editi ada aban̄a nso orụk ikpọkidem?
9 Jesus ọkọdọhọ ntem ke ini ọkọtọn̄ọde Udia Mbubịteyo Ọbọn̄: “Emi ada aban̄a ikpọkidem mi.” (Mark 14:22) Enye eketịn̄ aban̄a ata ikpọkidem esie, oro ẹditịmde ke mîbịghike tutu iyịp ọwọrọ. Ama enen̄ede odot uyo eke leaven mîdụhe ndida mban̄a ikpọkidem esie. Ntak-a? Koro ke Bible, leaven ekeme ndida mban̄a idiọkn̄kpọ m̀mê idiọkido. (Matthew 16:4, 11, 12; 1 Corinth 5:6-8) Jesus ekedi mfọnmma owo, ndien idiọkn̄kpọ ikodụhe ke ikpọkidem esie. Enye ekenyene ndinọ mfọnmma ikpọkidem esie nte uwa usio isop. (Mme Hebrew 7:26; 1 John 2:2) Enye ndinam oro ayada ufọn ọsọk kpukpru mme anam-akpanikọ Christian, edide mmọ ẹdori enyịn ndidu uwem ke heaven, m̀mê ẹdọri enyịn ndidu uwem ke nsinsi ke Paradise isọn̄.—John 6:51.
10. Didie ke mbon oro ẹsin̄wọn̄de wine Editi ‘ẹbuana ke iyịp Christ’?
10 Se se Paul ekewetde aban̄a wine oro mme Christian oro ẹyetde aran ẹsin̄wọn̄de ke Editi: “Cup edidiọn̄ emi nnyịn idiọn̄de, nte enye idịghe edibuana ke iyịp Christ?” (1 Corinth 10:16) Didie ke mbon oro ẹn̄wọn̄de wine emi ‘ẹbuana ke iyịp Christ?’ Ke akpanikọ, idịghe nte ke mmọ ẹtiene ẹnọ uwa ufak, koro mmọ ke idemmọ ẹyoyom ufak. Ke ntak mbuọtidem oro mmọ ẹnyenede ke iyịp Christ enyene odudu ndifak mmimọ, ẹfen mme idiọkn̄kpọ mmọ ẹnyụn̄ ẹbat mmọ nte ndinen owo oro ẹdotde ndika heaven. (Rome 5:8, 9; Titus 3:4-7) Iyịp oro Christ ọkọduọkde anam ẹbat owo 144,000 emi ẹditienede enye ẹkara ke ‘edisana,’ ẹsio mmọ ẹnịm san̄asan̄a, ẹyet idiọkn̄kpọ mmọ ẹfep ẹnam mmọ ẹdi “ndisana owo.” (Mme Hebrew 10:29; Daniel 7:18, 27; Ephesus 2:19) Ih, Christ akada iyịp oro enye ọkọduọkde “edep mme owo osio ke kpukpru esien ye usem ye obio ye idụt, ọnọ Abasi, [onyụn̄] anam mmọ ẹdi obio ubọn̄ ye mme oku ẹnọ Abasi nnyịn, ndien mmọ ẹyekara isọn̄ nte ndidem.”—Ediyarade 5:9, 10.
11. Nso ke mbon oro ẹyetde aran ndin̄wọn̄ wine Editi owụt?
11 Ke ini Jesus ọkọtọn̄ọde Editi n̄kpa esie, enye ama ọnọ mme anam-akpanikọ apostle esie cup ete: “Kpukpru mbufo ẹbọ ẹn̄wọn̄; koro emi ada aban̄a ‘iyịp ediomi’ mi, emi ẹdiduọkde kaban̄a ediwak owo man ẹfen mme idiọkn̄kpọ.” (Matthew 26:27, 28) Kpa nte iyịp enan̄ ye eke ebot ọkọsọn̄ọde Ibet ediomi ke ufọt Abasi ye idụt Israel, ntre n̄ko ke iyịp Jesus ọsọn̄ọ obufa ediomi oro Jehovah anamde ye Israel eke spirit, ọtọn̄ọde ke Pentecost isua 33 E.N. (Exodus 24:5-8; Luke 22:20; Mme Hebrew 9:14, 15) Mbon oro ẹyetde aran ndin̄wọn̄ wine emi adade aban̄a “iyịp ediomi” owụt ke ẹda mmọ ẹdisịn ke obufa ediomi, ndien ke mmọ ke ẹbọ ufọn obufa ediomi emi.
12. Didie ke mbon oro ẹyetde aran ẹna baptism ẹdụk ke n̄kpa Christ?
12 Ẹti mbon oro ẹyetde aran n̄kpọ efen n̄ko. Jesus ọkọdọhọ mme anam-akpanikọ mbet esie ete: “Mbufo ẹyen̄wọn̄ cup emi ami n̄n̄wọn̄de, ẹyenyụn̄ ẹna baptism emi ami nnade.” (Mark 10:38, 39) Nte ini akakade, apostle Paul ama ọdọhọ ke mme Christian oro ẹyetde aran ‘ẹkena baptism ẹdụk ke n̄kpa Christ.’ (Rome 6:3) Mbon oro ẹyetde aran ẹdu uwem n̄waidem. N̄kpa mmọ edi n̄waidem sia mmọ ẹfre ẹban̄a idotenyịn edidu nsinsi uwem ke isọn̄. Baptism oro mmọ ẹnade ẹdụk ke n̄kpa Christ editre ke mmọ ẹma ẹkekpan̄a ẹnyụn̄ ẹnam mmọ ẹset ẹkabade ẹdi mme edibotn̄kpọ eke spirit man ‘ẹkekara ye Christ nte ndidem’ ke heaven.—2 Timothy 2:10-12; Rome 6:5; 1 Corinth 15:42-44, 50.
Ndita Ndamban̄a Uyo Nnyụn̄ N̄n̄wọn̄ Ndamban̄a Wine
13. Ntak emi mbon oro ẹdoride enyịn ndidu ke isọn̄ mîsitaha ndamban̄a uyo inyụn̄ in̄wọn̄ ndamban̄a wine Editi, edi ntak emi mmọ ẹsidụkde Editi emi?
13 Sia ndita uyo nnyụn̄ n̄n̄wọn̄ wine ke Editi ẹbuanade kpukpru emi, ana in̄wan̄-in̄wan̄ ke idotke mbon oro ẹdoride enyịn ndidu ke isọn̄ ẹta uyo ẹnyụn̄ ẹn̄wọn̄ wine. Mbon oro ẹdoride enyịn ndidu ke isọn̄ ẹfiọk ke mmimọ idịghe mbak idem Christ oro ẹyetde aran. Mmọ ẹnyụn̄ ẹfiọk ke mmimọ n̄ko idụhe ke obufa ediomi oro Jehovah anamde ye mbon oro ẹditienede Jesus Christ ẹkara. Sia “cup” oro adade aban̄a obufa ediomi, mbon oro ẹdude ke obufa ediomi kpọt ẹnyene unen ndita ndamban̄a uyo nnyụn̄ n̄n̄wọn̄ ndamban̄a wine. Mbon oro ẹdoride enyịn ndidu nsinsi mfọnmma uwem ke isọn̄ ke ini ukara Obio Ubọn̄ oro inaha baptism idụk n̄kpa Jesus, owo inyụn̄ imekke mmọ nditiene n̄kakara ke heaven. Edieke mmọ ẹtade uyo ẹnyụn̄ ẹn̄wọn̄de wine Editi, oro ọkpọwọrọ ndibian̄a idem. Ke ntre, okposụkedi mmọ ẹsitienede ẹdụk Editi ukpono ukpono nte mme andida nse, mmọ isitaha uyo isinyụn̄ in̄wọn̄ke wine Editi. Mmọ ẹwụt esịtekọm ẹban̄a kpukpru se Jehovah adade Eyen esie anam ọnọ mmimọ, esịnede edida iyịp oro Christ ọkọduọkde mfen mme idiọkn̄kpọ mmimọ.
14. Didie ke ndita uyo nnyụn̄ n̄n̄wọn̄ wine ọsọn̄ọ mbon oro ẹyetde aran idem ke n̄kan̄ eke spirit?
14 Ibịghike ẹmọn̄ ẹfịk ibat ibat Christian oro ẹmekde ndikakara ye Christ ke heaven idiọn̄ọ ẹkụre. Ndita ndamban̄a uyo nnyụn̄ n̄n̄wọn̄ ndamban̄a wine Editi aka iso ọsọn̄ọ mbon oro ẹyetde aran idem ke n̄kan̄ eke spirit tutu esịm ini oro mmọ ẹdiwade uwem mmọ ke isọn̄. Emi esinam mmọ ẹdiana kiet ye nditọete mmọ nte mbak idem Christ. Emi n̄ko anam mmọ ẹti ke ana inam akpanikọ tutu esịm n̄kpa.—2 Peter 1:10, 11.
Nditan̄ “Mme N̄kpọ Eke Ẹdude ke Isọn̄” Ndọn̄ Ọtọkiet
15. Mmanie ke ẹtan̄ ẹbok ye mme Christian oro ẹyetde aran?
15 Ọtọn̄ọde ke ufọt ufọt iduọk isua 1930, ibat owo oro akade-ka iso ọkọri, emi mîdịghe ubak “ekpri otu erọn̄,” kpa “mme erọn̄ en̄wen” emi ẹdoride enyịn ndidu nsinsi uwem mi ke isọn̄, ẹma ẹdiana kiet ẹnọ mbon oro ẹyetde aran ibetedem. (John 10:16; Luke 12:32; Zechariah 8:23) Mmọ ẹdi mme anam-akpanikọ nsan̄a nditọete Christ, ẹnyụn̄ ẹnen̄ede ẹn̄wam ke ndikwọrọ “eti mbụk obio ubọn̄ emi” nte ntiense nnọ kpukpru idụt. (Matthew 24:14; 25:40) Ndinam emi anam mmọ ẹdot ndidi se Christ edikotde mme “erọn̄,” onyụn̄ enịm mmọ ke ubọk “nnasia” mfọn esie ke ini enye edibierede ikpe ọnọ mme idụt. (Matthew 25:33-36, 46) Ke ntak mbuọtidem oro mmọ ẹnyenede ke iyịp Christ, mmọ ẹdidi “akwa otuowo” oro ẹdibọhọde “akwa ukụt.”—Ediyarade 7:9-14.
16. Mmanie ẹdisịne ke otu “n̄kpọ eke ẹdude ke isọn̄,” ndien didie ke kpukpru mmọ ẹdinyene ifet ndikabade ndi “nditọ Abasi”?
16 Ke ẹma ẹkefịk ofụri ibat 144,000 idiọn̄ọ, do ke ẹdisana “ofụm” nsobo ẹyak ẹfụk idiọk editịm n̄kpọ Satan ke isọn̄. (Ediyarade 7:1-4) Ẹyenam ata ediwak mme akpan̄kpa ẹset ẹdidiana kiet ye akwa otuowo ke ini Christ ye mme nsan̄a esie oro ẹdide ndidem ye mme oku ẹdikarade ke Tọsịn Isua. (Ediyarade 20:12, 13) Mmọ emi ẹyenyene ifet nditiene mbọ nsinsi uwem ke idak ukara Edidem emi edide Messiah, kpa Christ Jesus. Ke Ukara Tọsịn Isua ama ekesịm utịt, ẹyedomo kpukpru owo emi, oro ẹdide mme “n̄kpọ eke ẹdude ke isọn̄,” akpatre udomo. Mbon oro ẹdisọn̄ọde ẹda ẹnam akpanikọ ẹnọ Abasi ẹyekabade ẹdi “nditọ Abasi” eke isọn̄.—Ephesus 1:10; Rome 8:21; Ediyarade 20:7, 8.
17. Didie ke uduak Jehovah edisu?
17 Ntre ke Jehovah edida utịbe utịbe “ndutịm,” m̀mê nte esede aban̄a n̄kpọ esie, osu uduak esie nditan̄ “kpukpru n̄kpọ ndọn̄ ọtọkiet ke Christ, mme n̄kpọ eke ẹdude ke heaven ye mme n̄kpọ eke ẹdude ke isọn̄.” Ini oro, kpukpru owo ke heaven ye ke isọn̄ ẹyenem esịt ndidiana kiet nsụk ibuot nnọ edinen ukara Akwa Aduak-Uduak, kpa Jehovah.
18. Nso ufọn ke mbon oro ẹyetde aran ye mme erọn̄ en̄wen ẹbọ ke ndidụk Editi?
18 Edinen̄ede ọsọn̄ọ mbuọtidem nnyịn didie ntem ndikụt ekpri otu oro ẹyetde aran ọkọrọ ye ata ediwak mme erọn̄ en̄wen ẹsopde idem ọtọkiet ke April 12, 2006! Mmọ ẹdisop idem man ẹti n̄kpa Christ, kpa nte enye okowụkde ete: “Ẹka iso ẹnam emi nditi mi.” (Luke 22:19) Kpukpru mbon oro ẹdidụkde Editi emi ẹkpenyene nditi se Jehovah adade edima Eyen esie, Christ Jesus, anam ọnọ mmọ.
Ke Ndidụn̄ọde
• Nso ke Jehovah aduak aban̄a mme n̄kpọ eke ẹdude ke heaven ye ke isọn̄?
• Mmanie ẹdi “mme n̄kpọ eke ẹdude ke heaven,” ndien didie ke ẹtan̄ mmọ ẹdọn̄ ọtọkiet?
• Mmanie ẹdi “mme n̄kpọ eke ẹdude ke isọn̄,” ndien nso idi idotenyịn mmọ?
[Ekebe ke page 23]
“Ikpọkidem Christ”
Paul ama asiak “ikpọkidem” ke san̄asan̄a usụn̄ ke ini enye ekenemede ke 1 Corinth 10:16, 17 se uyo enen̄erede ọwọrọ ọnọ nditọete Christ oro ẹyetde aran. Enye ọkọdọhọ ete: “Uyo emi nnyịn ibụn̄de, nte enye idịghe edibuana ke ikpọkidem Christ? Koro uyo kiet odu, nnyịn idi idem kiet, okposụkedi iwakde, koro nnyịn kpukpru ibuanade ke uyo kiet oro.” Ke ini mme Christian oro ẹyetde aran ẹtade uyo Editi, mmọ ẹwụt ke kpukpru mmimọ idiana kiet ke esop mbon oro ẹyetde aran, emi Christ edide Ibuot.—Matthew 23:10; 1 Corinth 12:12, 13, 18.
[Mme ndise ke page 23]
Ntak emi mbon oro ẹyetde aran kpọt ẹsitade uyo ẹnyụn̄ ẹn̄wọn̄de wine?
[Ndise ke page 25]
Jehovah ayada ndutịm esie anam kpukpru owo ke heaven ye ke isọn̄ ẹdiana kiet