Tiene Uwụtn̄kpọ Jesus Nyụn̄ Kere Ban̄a Mme Ubuene

UBUENE ye ufịk ẹkpere ndibịghi nte ubonowo. Ibet oro Abasi ọkọnọde Israel ama ekpeme mme ubuene onyụn̄ anam mfịna mmọ osụhọde ubọk, edi ẹma ẹsifụmi ibet oro. (Amos 2:6) Prọfet Ezekiel ama asua ọnọ nditọ Israel aban̄a nte mmọ ẹkenamde n̄kpọ ye mme ubuene. Enye ọkọdọhọ ete: “Mbio isọn̄ ẹnam nnama, ẹnyụn̄ ẹwo n̄wo, ẹnyụn̄ ẹfịk eyen ukụt ye ubuene, ẹnyụn̄ ẹtụk esen owo ke ido eke mînenke.”—Ezekiel 22:29.

Ukem n̄kpọ emi ama etịbe ke ini Jesus okodude ke isọn̄. Mme adaiso ido ukpono ikekereke iban̄a mme ubuene ke usụn̄ ndomokiet. Ẹkekot mme adaiso ido ukpono emi “mme ama okụk” emi ‘ẹkediade ufọk mme ebeakpa,’ ẹkenyụn̄ ẹnen̄erede ẹsịn idem ẹnịm ido eset mmọ utu ke ndise mban̄a n̄kani owo ye mme ubuene. (Luke 16:14; 20:47; Matthew 15:5, 6) Kamse, ke n̄ke Jesus aban̄ade eti owo Samaria, ke ini oku kiet ye owo Levi kiet ẹkekụtde owo emi ẹkemiade ẹnọ unan, mmọ ẹma ẹsan̄a ẹbe ke n̄kan̄ eken utu ke ndituak nda n̄n̄wam enye.—Luke 10:30-37.

Jesus Ama Ekere Aban̄a Mme Ubuene

Mbụk Gospel aban̄ade uwem Jesus owụt ke enye ama enen̄ede ọfiọk mme mfịna oro mme ubuene ẹsisobode, onyụn̄ enen̄ede ekere aban̄a se mmọ ẹyomde. Okposụkedi Jesus okodụn̄de ke heaven, enye ama asana akamba idaha emi ayak, edidu uwem nte owo, onyụn̄ ‘akabade edi ubuene ke ntak nnyịn.’ (2 Corinth 8:9) Ke okụtde otuowo, Jesus ama “atua mmọ mbọm, koro ẹfiomode ẹnyụn̄ ẹsuande mmọ nte erọn̄ eke mînyeneke andikpeme.” (Matthew 9:36) Mbụk aban̄ade ubuene ebeakpa owụt ke se ikenen̄erede itụk Jesus ekedi ekpri etịbe emi ebeakpa oro ekesịnde, ikedịghe ikpọ enọ oro mme imọ owo ẹkesiode “ke nyọhọ-nsụhọ mmọ” ẹsịn. Se ebeakpa emi akanamde ama otụk Jesus koro enye “ke unana esie, ekesịn kpukpru se enye akpadade odu uwem.”—Luke 21:4.

Jesus ama atua mme ubuene mbọm onyụn̄ enyene udọn̄ ke idem mmọ. Enye ye mme apostle esie ẹma ẹnyene ekebe okụk emi mmọ ẹkesisiode okụk ẹn̄wam nditọ Israel oro ẹkebuenede. (Matthew 26:6-9; John 12:5-8; 13:29) Jesus ama esịn udọn̄ ọnọ mbon oro ẹkeyomde nditiene enye ete ẹdiọn̄ọ ke obiomo mmimọ ndin̄wam mme ubuene. Enye ọkọdọhọ akparawa kiet emi ekedide owo inyene ye andikara ete: “Nyam kpukpru n̄kpọ emi afo enyenede deme nọ mme ubuene, ndien afo eyenyene n̄kpọuto ke heaven; nyụn̄ ditiene mi.” Akparawa oro ndikesịn ndisana inyene esie nyak okowụt ke enye ama ama inyene esie akan Abasi ye ekemmọ owo. Ke ntre, enye ikenyeneke mme edu oro ẹnamde owo odot ndidi mbet Jesus.—Luke 18:22, 23.

Mme Anditiene Christ Ẹsikere Ẹban̄a Mme Ubuene

Ke Jesus ama akakpa, mme apostle ye mbon en̄wen oro ẹkedide mme anditiene Christ ẹma ẹka iso ẹkere ẹban̄a mme ubuene emi ẹkedude ke otu mmọ. Ke n̄kpọ nte isua 49 E.N., apostle Paul ama osobo ye James, Peter, ye John onyụn̄ eneme aban̄a utom edikwọrọ eti mbụk emi Ọbọn̄ Jesus Christ ọkọnọde enye. Mmọ ẹma ẹnyịme Paul ye Barnabas ẹka ẹbịne “mme idụt,” ẹkekwọrọ ikọ akpan akpan ẹnọ mme Gentile. Nte ededi, James ye mme nsan̄a esie ẹma ẹsịn udọn̄ ẹnọ Paul ye Barnabas ‘nditi mme ubuene.’ Ndien oro edi se Paul ‘ekesịnde ifịk an̄wana ndinam.’—Galatia 2:7-10.

Ke ini ukara Akwa Edidem Claudius, ọkpọsọn̄ akan̄ ama omụm nsio nsio ikpehe Obio Ukara Rome. Mme Christian ke Antioch ẹma ẹnam n̄kpọ ẹban̄a oro ẹnyụn̄ “ẹbiere, owo mmọ kiet kiet nte ekemde ye se owo enyenede, ndinọ n̄kpọ un̄wam ẹsọk nditọete emi ẹdụn̄de ke Judea; ndien mmọ ẹnam ntem, ẹnọ n̄kpọ emi ke ubọk Barnabas ye Saul ẹsọk mbiowo.”—Utom 11:28-30.

Ata mme Christian mfịn ẹdiọn̄ọ ke ana mme anditiene Jesus ẹkere ẹban̄a mme ubuene ye mbon unana, akpan akpan ke otu ekemmọ mme andinịm ke akpanikọ. (Galatia 6:10) Ke ntre, mmọ ẹsinen̄ede ẹkere ẹban̄a mme n̄kpọ obụkidem oro mbon unana ẹyomde. Ke uwụtn̄kpọ, ke 1998, ọkpọsọn̄ unana edịm ama ọnọmọ akamba ikpehe ufọt edem edere ye edem usiahautịn Brazil. Unana edịm oro ama owot edesi, ọkọti, ye ibokpot oro ẹketọde, adade okosụn̄ọ ke ọkpọsọn̄ akan̄ emi mbiet esie mîdụhe ke isua 15 oro ẹkebede. Ke ndusụk ebiet, ekedi ọkpọsọn̄ n̄kpọ ndinyene edin̄wọn̄ mmọn̄. Mme Ntiense Jehovah ke mme ikpehe eken ke idụt oro ẹma ẹsọsọp ẹtịm mme kọmiti unọ un̄wam, ndien ke esisịt ini, ẹma ẹnyene ediwak udia ẹnyụn̄ ẹkpe usụn̄ ẹda udia oro ẹsọk mbon oro akan̄ ọkọnọmọde.

Mme Ntiense oro ẹkenọde nditọete mmọ un̄wam emi ẹkewet ẹte: “Nnyịn imenen̄ede inem esịt nte ikan̄wamde nditọete nnyịn, akpan akpan koro imenịm ke imadat Jehovah esịt. Nnyịn ikedehedei ifre se ẹwetde ke James 2:15, 16.” Itie Bible oro ọdọhọ ete: “Edieke eyenete eren m̀mê eyenete an̄wan ananade edisịnen̄kpọ ye udia eke ekemde ke usen, edi owo mbufo kiet ọdọhọ mmọ ete: ‘San̄a sụn̄, kop ufiop nyụn̄ dia yụhọ’ edi mbufo inọhọ mmọ se inanade mmọ ke obụkidem, oro ọfọn ke nso?”

Odu eyenete an̄wan kiet emi edide ubuene, osụhọrede idem, onyụn̄ enyenede ifịk ke esop Mme Ntiense Jehovah ke obio São Paulo. Eyenete an̄wan emi esinam utom ọkpọsọn̄ man enyene se adade odu uwem. Enye ọdọhọ ete: “Idem okposụkedi ndide ubuene, etop Bible anam uwem mi enyene se ọwọrọde. Mfiọkke se ikpeketịbede inọ mi edieke ekemmọ Mme Ntiense mîkpakan̄wamke mi.” Ke ndusụk ini emi ẹkebede, Christian an̄wan oro anamde utom ọkpọsọn̄ mi okoyom ndika usiakidem edi ikenyeneke okụk. Nditọete Christian iren ye iban ke esop ẹma ẹnyịme ndinọ enye okụk akasiak idem. Ata mme Christian ke ofụri ererimbot ẹsinọ ekemmọ mme andinịm ke akpanikọ emi ẹdude ke unana un̄wam.

Nte ededi, inamke n̄kpọ m̀mê ifiọkutom emi enem adan̄a didie, ana in̄wan̄-in̄wan̄ ke utọ nti edinam emi idinamke ubuene etre. Okposụkedi mme okopodudu ukara ye mme n̄ka unọ un̄wam eke ofụri ererimbot ẹkụtde unen ke ndusụk udomo, mmọ ikemeke nditre ubuene, kpa mfịna emi ọkọtọn̄ọde anyan ini ko. Ntem mbụme oro edemerede edi, Nso iditre ubuene ye mme mfịna eken oro ẹnọmọde ubonowo?

Ukpepn̄kpọ Bible Ọnọ Un̄wam Oro Ebịghide

Mbụk Gospel ọdọhọ ke Jesus Christ ama esinam nti utom kpukpru ini ọnọ mme ubuene m̀mê mbon oro ẹkenanade mme n̄kpọ eken. (Matthew 14:14-21) Nte ededi, ewe utom ekedi ebeiso n̄kpọ ọnọ enye? Isan̄ kiet, ke Jesus ama akabiat ini an̄wam mbon unana, enye ọkọdọhọ mbet esie ete: “Ẹyak nnyịn ika ebiet en̄wen, ikodụk ke mme obio oro ẹdude ẹkpere, man n̄kwọrọ ikọ do n̄ko.” Ntak emi Jesus eketrede utom oro enye akanamde ndin̄wam mbon udọn̄ọ ye mme ubuene man afiak ọkọtọn̄ọ utom ukwọrọikọ esie? Enye ama anam an̄wan̄a ete: “N̄kọwọrọ ndi kaban̄a uduak emi [oro edi, ndikwọrọ ikọ].” (Mark 1:38, 39; Luke 4:43) Okposụkedi ndinam nti n̄kpọ nnọ mbon unana ekedide akpan n̄kpọ ọnọ Jesus, ata akpan utom esie ekedi ndikwọrọ mban̄a Obio Ubọn̄ Abasi.—Mark 1:14.

Sia Bible esịnde udọn̄ ọnọ mme Christian ‘nditiene nde ikpat Jesus ketket,’ mme Christian mfịn ẹnyene in̄wan̄-in̄wan̄ ndausụn̄ kaban̄a se ikpedide ebeiso n̄kpọ ke ini ẹyomde ndin̄wam mbon en̄wen. (1 Peter 2:21) Mmọ ẹsin̄wam mbon unana ukem nte Jesus akan̄wamde. Nte ededi, mmọ ẹda utom edikpep etop Bible aban̄ade eti mbụk Obio Ubọn̄ Abasi nte ebeiso utom ke uwem mmọ ukem nte Jesus akadade. (Matthew 5:14-16; 24:14; 28:19, 20) Nte ededi, ntak emi edikwọrọ etop Ikọ Abasi ekpedide akpan n̄kpọ akan mme usụn̄ efen oro idade in̄wam mbon en̄wen-e?

Mme ata ifiọk n̄kpọntịbe ke ofụri ererimbot ẹwụt ke edieke mme owo ẹfiọkde ẹnyụn̄ ẹtienede nti item oro Bible ọnọde, mmọ ẹyetịm ẹfiọk ndiyọ mme mfịna eke usen ke usen, esịnede ubuene. Akan oro, etop Bible aban̄ade Obio Ubọn̄ Abasi oro Mme Ntiense Jehovah ẹkwọrọde mfịn esinam mme owo ẹnyene idotenyịn kaban̄a ini iso—kpa idotenyịn emi anamde uwem enem, idem ke ini idude ke ata n̄kpọsọn̄ idaha. (1 Timothy 4:8) Nso idotenyịn edi oro?

Kop se Ikọ Abasi ọn̄wọn̄ọde ọnọ nnyịn aban̄a ini iso: “Edi mbufa enyọn̄ ye obufa isọn̄ ẹdu emi nnyịn itiede ibet nte ekemde ye un̄wọn̄ọ [Abasi], ndien edi mi ke edinen ido edidụn̄.” (2 Peter 3:13) Ndusụk ini oro Bible esitịn̄de aban̄a “isọn̄,” enye esiwọrọ mme owo oro ẹdụn̄de ke isọn̄. (Genesis 11:1, NW) Ntre, edinen “obufa isọn̄” oro Abasi ọn̄wọn̄ọde edi n̄kaowo emi ẹnyenede unyịme esie. Ikọ Abasi ọn̄wọn̄ọ n̄ko ete ke idak ukara Christ, mbon oro ẹnyenede unyịme Abasi ẹyebọ enọ nsinsi uwem ẹnyụn̄ ẹdu inem inem uwem ke Paradise isọn̄. (Mark 10:30) Kpukpru owo, esịnede mme ubuene, ẹyenyene utịbe utịbe ini iso emi. Ẹyetre ubuene ke nsinsi ke “obufa isọn̄” oro.

[Ekebe/Ndise ke page 7]

DIDIE KE JESUS ‘EDINYAN̄A UBUENE’?—Psalm 72:12

UNENIKPE: ‘Enye eyekpe ikpe mbon eke ẹtụhọrede; ayanyan̄a nditọ unana, onyụn̄ anuak owo utụk.’ (Psalm 72:4) Kpukpru owo ẹyenyene unenikpe ke ini Christ edikarade isọn̄. Udia-inọ—kpa se isinamde ediwak idụt emi ẹkpeforode ẹkabade ẹbuene—ididụhe aba.

EMEM: ‘Edinen owo ayafiari ke eyo esie; ye ediwak emem n̄ko tutu ọfiọn̄ okụre.’ (Psalm 72:7) Ekọn̄ ye en̄wan ẹsinam ediwak owo ke ererimbot ẹbuene. Christ ayanam mfọnmma emem odu ke isọn̄, etrede ekọn̄ ye en̄wan emi ẹsinen̄erede ẹnam mme owo ẹbuene.

MBỌM: ‘Enye ayatua eyen unana ye ubuene mbọm, onyụn̄ anyan̄a ukpọn̄ mme ubuene. Enye ayafak ukpọn̄ [mmọ] osio ke ukụt ye nnama: onyụn̄ ese iyịp mmọ ke n̄kpọ-uto.’ (Psalm 72:12-14) Eyen ubuene ye owo ukụt ẹyesịne ke otu ubonowo emi ẹkopde inemesịt mi, emi ẹdianade kiet ke idak ndausụn̄ Edidem Jesus Christ.

UFORO: ‘Uwak ibokpot ẹyedu ke isọn̄.’ (Psalm 72:16) Mme owo ẹyenyene n̄kpọ barasuene ke ini ukara Christ. Unana udia ye akan̄ emi ẹsiwakde ndinam mme owo ẹbuene mfịn ididụhe aba.

[Ndise ke page 4, 5]

Jesus ama esinen̄ede ekere aban̄a mme ubuene

[Ndise ke page 6]

Etop Bible esinọ ata idotenyịn