San̄a Kpere Abasi
‘Enye Iyomke Usụn̄ Ikpọn̄ Owo Nnyịn Kiet Kiet’
OWO idịghe n̄kpọ ndomokiet ke ẹmende ẹdomo ye akaka ekondo emi. Ekeme ndidi afo emesikere m̀mê ikpîkpu owo ekeme ndinen̄ede nsan̄a n̄kpere Ata Ọkpọsọn̄ Abasi. Nnyịn imekeme edieke Abasi emi enyịn̄ esie edide Jehovah oyomde nnyịn isan̄a ikpere imọ. Ndi enye oyom nnyịn isan̄a ikpere imọ? Se apostle Paul eketịn̄de ọnọ mme ọfiọkn̄wed ke Athens, nte ẹwetde ke Utom 17:24-27, ọbọrọ mbụme emi. Tịm se n̄kpọ inan̄ oro Paul etịn̄de aban̄a Jehovah.
Akpa, Paul ọdọhọ ke Abasi ‘akanam ererimbot ye kpukpru n̄kpọ emi ẹdude ke esịt.’ (Ufan̄ikọ 24) Ndiye n̄kpọ oro ẹnamde uwem enen̄ede enem ẹwụt eti ibuot ye ima oro Andibot nnyịn enyenede. (Rome 1:20) Ekpedi ndisịme ndikere ke utọ Abasi oro akpada nsannsan ọkpọn̄ mbonima esie.
Ọyọhọ iba, Jehovah “ọnọ kpukpru owo uwem ye ibifịk ye kpukpru n̄kpọ.” (Ufan̄ikọ 25) Jehovah edi Andinịm uwem. (Psalm 36:9) Andibot nnyịn ọnọ nnyịn ofụm, mmọn̄, ye udia emi ẹnamde idu uwem. (James 1:17) Ndi owụt eti ibuot ndikere ke Abasi nnyịn emi atatde ubọk ntem akpada nsannsan ọkpọn̄ nnyịn inyụn̄ iyakke nnyịn ifiọk owo emi imọ idide inyụn̄ isan̄a ikpere imọ?
Ọyọhọ ita, Abasi akanam “kpukpru idụt ubonowo ẹwọn̄ọ ẹto owo kiet.” (Ufan̄ikọ 26) Jehovah isinamke asari. (Utom 10:34) Ntak emi enye akpanamde asari? N̄kọ enye okobot “owo kiet,” Adam, emi kpukpru idụt ye orụk ẹwọn̄ọde ẹto. ‘Uduak Abasi edi nte kpukpru orụk owo ẹkpenyene edinyan̄a.’ (1 Timothy 2:4) Ntre nnyịn imekeme ndisan̄a n̄kpere enye inamke n̄kpọ m̀mê idi mfia m̀mê mbubịt, m̀mê ewe idụt m̀mê ekpụk ke nnyịn ito.
Paul ọdọhọ ke akpatre ete: Jehovah ‘iyomke usụn̄ ikpọn̄ owo nnyịn kiet kiet.’ Emi edi akpanikọ. (Ufan̄ikọ 27) Okposụkedi Jehovah enen̄erede okon̄, enye ekpere mbon oro ẹnen̄erede ẹyom ndisan̄a n̄kpere enye. Ikọ Abasi anam nnyịn ifiọk ke enye iyomke usụn̄, edi “emekpere kpukpru mmọ eke ẹsemede ẹnọ enye.”—Psalm 145:18.
Paul anam an̄wan̄a ke Abasi oyom nnyịn isan̄a ikpere Imọ. Nte ededi, Paul asian nnyịn ke sụk mbon oro ẹnyịmede ‘ndifiọn̄ọ ubọk nyom’ Abasi ẹkeme ndisan̄a n̄kpere Enye. (Ufan̄ikọ 27) N̄wed ndụn̄ọde oro mme akabade Bible ẹsidade ẹnam utom ọdọhọ ke ‘ikọ emi ọwọrọ ke mme owo ẹkeme ndisan̄a n̄kpere Abasi.’ Ke ndinam an̄wan̄a: Edieke ikan̄ mîdụhe ke ufọk fo, afo emekeme ndifiọn̄ọ ubọk oyom ebiet emi ẹsidomode ikan̄ ilektrik m̀mê ebiet emi usụn̄ odude, onyụn̄ ọfiọk ke oyokụt. Ntre n̄ko, edieke nnyịn inen̄erede ifiọn̄ọ ubọk iyom Abasi, nnyịn iditreke ndikụt enye. Paul ọkọdọhọ ke ‘iyokụt enye.’—Ufan̄ikọ 27.
Ndi omoyom ndisan̄a n̄kpere Abasi? Edieke ọbuọtde idem ye Abasi onyụn̄ ‘ọfiọn̄ọde ubọk oyom enye,’ afo udutreke ndikụt enye. Isọn̄ke ndikụt Jehovah, sia ‘enye mîyomke usụn̄ ikpọn̄ owo nnyịn kiet kiet.’