Mme Angel Ẹdi ‘Mme Spirit Oro Ẹnamde Utom Ẹnọ Mme Owo’
“Nte kpukpru mmọ idịghe mme spirit eke ẹnamde utom ẹnọ mme owo, eke ẹsiode ẹdọn̄ ndisan̄a utom nnọ mmọ eke ẹdidade edinyan̄a ẹnyene?”—HEB. 1:14.
1. Nso ndọn̄esịt ke Matthew 18:10 ye Mme Hebrew 1:14 ẹnọ nnyịn?
JESUS CHRIST ọkọdọhọ owo ekededi oro edinamde mme mbet esie ẹtuak ukot ẹduọ ete: “Ẹkụt ẹte mbufo isịnke kiet ke otu n̄kpri owo emi ke ndek; koro ndọhọ mbufo nte mme angel mmọ ke heaven ẹsikụt iso Ete mi emi odude ke heaven kpukpru ini.” (Matt. 18:10) Kop se apostle Paul eketịn̄de aban̄a nti angel: “Nte kpukpru mmọ idịghe mme spirit eke ẹnamde utom ẹnọ mme owo, eke ẹsiode ẹdọn̄ ndisan̄a utom nnọ mmọ eke ẹdidade edinyan̄a ẹnyene?” (Heb. 1:14) Ikọ emi ọdọn̄ nnyịn esịt onyụn̄ ọsọn̄ọ ke Abasi esida mme angel esie an̄wam nnyịn. Nso ke Bible asian nnyịn aban̄a mme angel? Didie ke mmọ ẹsin̄wam nnyịn? Nso ke ikeme ndikpep nto mmọ?
2, 3. Nso idi ndusụk utom oro mme angel ẹsinamde?
2 Ata ediwak angel oro ẹnamde akpanikọ ẹdu ke heaven. Kpukpru mmọ ‘ẹdaha uko, ẹnyụn̄ ẹnam uyo Abasi.’ (Ps. 103:20; kot Ediyarade 5:11.) Nditọ Abasi eke spirit emi ẹnyene edu mmọ oro ebietde eke Abasi, ẹnyụn̄ ẹnyene ifụre ndimek se mmọ ẹmade ndinam. Ẹbahade mmọ ẹdọn̄ ke ikpehe ke ikpehe, ndien Abasi ọnọ mmọ ikpọ itie. Michael (enyịn̄ Jesus ke heaven) edi etubom mme angel. (Dan. 10:13; Jude 9) Jesus edi “akpan ke otu kpukpru edibotn̄kpọ,” enye n̄ko edi “Ikọ,” m̀mê Etịn̄ikọ ke ibuot Abasi. Enye ke Jehovah okonyụn̄ ada obot kpukpru mme n̄kpọ eken.—Col. 1:15-17; John 1:1-3.
3 Mme seraph ẹsịne ke idak etubom mme angel, ndien mmọ ẹsitan̄a ke Jehovah edi edisana ẹnyụn̄ ẹn̄wam ikọt Abasi ẹdu uwem ekekem ye mme edumbet Esie. Mme cherub ẹdu n̄ko, mmọ ẹnọ ukara Abasi ibetedem. (Gen. 3:24; Isa. 6:1-3, 6, 7) Mme angel eken ẹsisan̄a nsio nsio utom ẹnọ Abasi.—Heb. 12:22, 23.
4. Didie ke mme angel ẹkenam n̄kpọ ke ini oro ẹketọn̄ọde ndinam ererimbot, ndien n̄kpọ ekpeketie didie ye ubonowo edieke Adam ye Eve ẹkpekedade ifụre oro Abasi ọkọnọde mmọ ẹnam eti n̄kpọ?
4 Kpukpru mme angel ẹma ẹdara ke ini ‘ẹketọn̄ọde ndinam ererimbot,’ ẹnyụn̄ ẹkop inemesịt ndinam utom oro ẹkenọde mmọ ke adan̄aemi Abasi akanamde isọn̄ akabade ebietidụn̄ ubonowo. (Job 38:4, 7) Jehovah ‘akanam mme owo ẹkpri esisịt ẹkan mme angel,’ edi enye okobot mmọ esịn ke “mbiet” Esiemmọ, ntre emi anam mme owo ẹnyene mme edu Abasi. (Heb. 2:7; Gen. 1:26) Edieke Adam ye Eve ẹkpekedade ifụre oro Abasi ọkọnọde mmọ ẹnam eti n̄kpọ, mmọ ye nditọ mmọ ẹkpekeka iso ẹdụn̄ ke Paradise nte ubak ubon Jehovah oro odude ke ofụri ekondo.
5, 6. Didie ke nsọn̄ibuot ọkọtọn̄ọ ke heaven, ndien nso ke Abasi akanam?
5 Ke akpanikọ, anaedi idem ama enen̄ede akpa ndisana angel ke ini mmọ ẹkekụtde nte nsọn̄ibuot ọkọtọn̄ọde ke ubon Abasi ke heaven. Angel kiet ke otu mmọ ikoyomke aba nditoro Jehovah, edi akakam oyom ẹtuak ibuot ẹnọ imọ. Enye ama akabade edi Satan (emi ọwọrọde “Andibiọn̄ọ”) ke ntak emi enye ọkọdọhọde ke ukara Jehovah inenke, onyụn̄ esịnde idem oyom ndisiak ukara idemesie. Satan akada n̄kari osu nsu ọnọ Adam ye Eve man mmọ ẹdiana ye enye ẹsọn̄ ibuot ye edima Abasi emi okobotde mmọ.—Gen. 3:4, 5; John 8:44.
6 Jehovah ama ọsọsọp ada akpa ntịn̄nnịm ikọ Bible ebiere ikpe ọnọ Satan. Enye ọkọdọhọ ete: “Nyonyụn̄ nsịn usua ke ufọt fo ye n̄wan, ye ke ufọt ubon fo ye ubon esie: enye ayanuak fi ibuot, afo oyonyụn̄ anuak enye nditịn̄-ikpat.” (Gen. 3:15) Usua ayaka iso odu ke ufọt Satan ye “n̄wan” Abasi. Ih, Jehovah ada esop esie ke heaven emi mme angel oro ẹnamde akpanikọ ẹdude nte edima an̄wan emi adianade ye enye nte Ebe esie. Okposụkedi emi ntịn̄nnịm ikọ emi ekedide “edisana ndịben̄kpọ” emi ẹkenyenede ndiyarade sụn̄sụn̄, enye ama ọnọ owo idotenyịn. Abasi ọkọdọhọ ke owo kiet ke otu ubon esie ke heaven oyosobo kpukpru mbon nsọn̄ibuot, onyụn̄ atan̄ “mme n̄kpọ eke ẹdude ke heaven ye mme n̄kpọ eke ẹdude ke isọn̄” adian kiet.—Eph. 1:8-10.
7. Nso ke ndusụk angel ẹkenam ke eyo Noah, ndien nso ke Jehovah akanam mmọ?
7 Ke eyo Noah, ediwak angel ẹma ẹkpọn̄ “nnennen ebietidụn̄ mmọ” ẹnyụn̄ ẹforo owo man ẹdiyụhọ udọn̄ idemmọ mi ke isọn̄. (Jude 6; Gen. 6:1-4) Jehovah ama otop mme ọsọn̄ibuot angel oro ọdọn̄ ke n̄kịmn̄kịm ukpe, ndien mmọ ẹma ẹdiana ye Satan ẹkabade “ndiọi spirit” ẹnyụn̄ ẹnen̄ede ẹsua mme asan̄autom Abasi.—Eph. 6:11-13; 2 Pet. 2:4.
Didie ke Mme Angel Ẹsin̄wam Nnyịn?
8, 9. Didie ke Jehovah akada mme angel an̄wam mme owo?
8 Abraham, Jacob, Moses, Joshua, Isaiah, Daniel, Jesus, Peter, John, ye Paul ẹdi ndusụk mbon oro mme angel ẹken̄wamde. Mme angel Abasi ẹma ẹsobo mbon oro Abasi okobiomde ikpe, ẹtịn̄ ntịn̄nnịm ikọ, ẹnyụn̄ ẹnọ ibet, emi esịnede Ibet Moses. (2 Ndi. 19:35; Dan. 10:5, 11, 14; Utom 7:53; Edi. 1:1) Sia edide imenyene ofụri Bible idahaemi, ekeme ndidi mme angel isinọhọ nnyịn etop Abasi aba. (2 Tim. 3:16, 17) Edi mmọ ke ẹsesịn ifịk ẹnam uduak Abasi ẹnyụn̄ ẹn̄wam mme asan̄autom Abasi kpa ye oro nnyịn mîkwe mmọ.
9 Bible ọdọhọ nnyịn ke “angel Jehovah ana akan mmọ eke ẹbakde enye okụk, onyụn̄ anyan̄a mmọ.” (Ps. 34:7; 91:11) Jehovah ayak Satan odomo nnyịn ke kpukpru usụn̄ ke ntak emi Satan ọkọdọhọde ke mme owo idisọn̄ọke ida inam n̄kpọ Abasi edieke ẹsobode idomo. (Luke 21:16-19) Edi Abasi ọdiọn̄ọ ini emi nnyịn iyọde idomo ebịghi ekem ndiwụt ke imọsọn̄ọ ida inam akpanikọ inọ imọ. (Kot 1 Corinth 10:13.) Mme angel ẹsidu ke mben̄eidem ndin̄wam nnyịn ke ini Abasi ọdọhọde mmọ ẹn̄wam. Mmọ ẹma ẹnyan̄a Shadrach, Meshach, Abednego, Daniel, ye Peter, edi ikọbiọn̄ọke mme asua ndiwot Stephen ye James. (Dan. 3:17, 18, 28; 6:22; Utom 7:59, 60; 12:1-3, 7, 11) Nsio nsio idomo ẹkesịm mmọ. Kpasụk ntre, mbon ukara Hitler ẹma ẹwot ndusụk nditọete nnyịn emi ẹkedude ke mme itienna ekikere, edi Jehovah ama anam ata ediwak mmọ ẹbọhọ.
10. Ke adianade ye Abasi ndidọn̄ angel esie edin̄wam nnyịn, nso idi usụn̄ en̄wen oro enye ekemede ndin̄wam nnyịn?
10 Bible idọhọke ke nnyịn owo kiet kiet imenyene san̄asan̄a angel emi esikpemede nnyịn. Ke ini ibọn̄de akam, imesinyene mbuọtidem ke “se ededi oro nnyịn iben̄ede ekekem ye uduak esie, [ke Abasi ọyọbiọn̄] utọn̄ ke eben̄e nnyịn.” (1 John 5:14) Edi akpanikọ ke Jehovah ekeme ndidọn̄ angel esie edin̄wam nnyịn, edi enye ekeme n̄ko ndin̄wam nnyịn ke usụn̄ en̄wen. Abasi ekeme nditụk nditọete nnyịn esịt man ẹn̄wam nnyịn m̀mê ẹdọn̄ nnyịn esịt. Abasi ekeme ndinọ nnyịn ifiọk ye ukeme ndiyọ “n̄kukịm ke obụkidem” emi etiede nte “angel Satan” amia nnyịn ufia.—2 Cor. 12:7-10; 1 Thess. 5:14.
Kpebe Jesus
11. Didie ke ẹkeda mme angel ẹn̄wam Jesus, ndien enye ndikọsọn̄ọ nda nnam akpanikọ nnọ Abasi okowụt nso?
11 Ẹyak ise nte Jehovah akadade mme angel anam n̄kpọ ọnọ Jesus. Mmọ ẹketọt emana ye ediset ke n̄kpa Jesus, ẹnyụn̄ ẹsan̄a utom ẹnọ enye ke ini oro enye okodude ke isọn̄. Mme angel ẹkpekebiọn̄ọ mme owo ndimụm enye n̄kowot. Edi utu ke oro, ẹkedọn̄ angel kiet ọkọsọn̄ọ enye idem. (Matt. 28:5, 6; Luke 2:8-11; 22:43) Man osu uduak Jehovah, Jesus ama akpa onyụn̄ afak ubonowo, ndien n̄kpa esie ama ọsọn̄ọ nte ke mfọnmma owo ekeme ndisọn̄ọ nda nnam akpanikọ nnọ Abasi kpa ye oro osobode ata ọkpọsọn̄ idomo. Jehovah ama anam Jesus eset edi heaven nte owo oro mîkemeke ndikpa tutu amama, onyụn̄ ọnọ enye “kpukpru odudu,” onyụn̄ anam mme angel ẹsụk ibuot ẹnọ enye. (Matt. 28:18; Utom 2:32; 1 Pet. 3:22) Ntem, Jesus edi akpan ubak “mfri” “n̄wan” Abasi.—Gen. 3:15, NW; Gal. 3:16.
12. Didie ke ikeme ndida “eti ibuot” ndu uwem nte Jesus okodude?
12 Jesus ama ọfiọk ke ikpọfọnke ndidomo nse m̀mê Jehovah ọyọdọn̄ mme angel esie ẹdinyan̄a imọ edieke ikoide-koi inam n̄kpọ oro ẹkemede ndinọ imọ unan. (Kot Matthew 4:5-7.) Ke ntre, ẹyak ida “eti ibuot” idu uwem nte Jesus okodude, iyọ ukọbọ uko uko, edi oro iwọrọke ndikokoi nsio idem nnyan nnọ afanikọn̄.—Titus 2:12.
Se Ikemede Ndikpep Nto Mme Anam-Akpanikọ Angel
13. Nso ke ikeme ndikpep nto uwụtn̄kpọ mme anam-akpanikọ angel oro ẹtịn̄de ẹban̄a ke 2 Peter 2:9-11?
13 Ke ini apostle Peter akasuade ọnọ mbon oro ‘ẹketịn̄de ikọ isụn̄i’ ẹdian mme asan̄autom Jehovah oro ẹyetde aran, enye ama asiak eti uwụtn̄kpọ oro mme anam-akpanikọ angel ẹnịmde. Okposụkedi emi mme angel ẹnen̄erede ẹnyene odudu, mmọ ẹsisụhọde idem, ibiomke owo ikpe “ke ntak ukpono emi [mmọ] ẹnyenede ẹnọ Jehovah.” (Kot 2 Peter 2:9-11.) Nnyịn n̄ko ikpobiomke mme owo ikpe, edi oyom ikpono mbiowo esop, inyụn̄ iyak kpukpru n̄kpọ inọ Jehovah emi edide Akakan Ebiereikpe.—Rome 12:18, 19; Heb. 13:17.
14. Nso uwụtn̄kpọ nsụhọdeidem ke mme angel ẹnịm ẹnọ nnyịn?
14 Mme angel Jehovah ẹnen̄ede ẹkpep nnyịn nsụhọdeidem. Ndusụk angel ikenyịmeke ndisiak enyịn̄ mmọ nnọ mme owo. (Gen. 32:29; Judg. 13:17, 18) Kpa ye oro edide mme angel ẹwak etieti ke heaven, angel iba kpọt ke Bible asiak enyịn̄—Michael ye Gabriel. Ndien emi iyakke nnyịn idue inọ mmọ ukpono oro ikpọnọde Abasi. (Luke 1:26; Edi. 12:7) Ke ini apostle John ọkọduọde ke isọn̄ ete ituak ibuot inọ angel, angel oro ama ọdọhọ enye ete: “Kpeme idemfo! Kûnam oro! Ami ndi sụk ekemmọ ofụn nte afo ye nditọete fo.” (Edi. 22:8, 9) Nnyịn ikpenyene ndituak ibuot nnyụn̄ mbọn̄ akam nnọ Abasi ikpọn̄-ikpọn̄.—Kot Matthew 4:8-10.
15. Didie ke mme angel ẹkpep nnyịn ime?
15 Mme angel ẹkpep nnyịn ime n̄ko. Kpa ye oro esinen̄erede ọdọn̄ mmọ ndidiọn̄ọ ndisana ndịben̄kpọ Abasi, owo iyarakede kpukpru ndịben̄kpọ emi inọ mmọ. Bible ọdọhọ ke “ọdọn̄ mme angel ndinyụn̄ọ nse mme n̄kpọ emi.” (1 Pet. 1:12) Ntre nso ke mmọ ẹsinam? Mmọ ẹsinyene ime tutu ekem ini oro Abasi aduakde ‘ndida esop’ esie nnam ẹfiọk “akwa orụk ọniọn̄” esie.—Eph. 3:10, 11.
16. Didie ke edu nnyịn esitụk mme angel?
16 Mme Christian oro ẹyọde ukọbọ ẹdi ‘n̄kpọ ndise ẹnọ mme angel.’ (1 Cor. 4:9) Mme angel ẹsikop inemesịt ndikụt nte nnyịn inamde akpanikọ inọ Abasi ẹnyụn̄ ẹdat esịt ndikụt anamidiọk akabarede esịt. (Luke 15:10) Mmọ ẹsikụt nte nditọete nnyịn iban ẹten̄ede Abasi. Bible ọdọhọ ke ‘n̄wan akpana enyene idiọn̄ọ edikara ke ibuot esie ke ntak mme angel.’ (1 Cor. 11:3, 10) Ih, mme angel ẹsidara ndikụt nte nditọete nnyịn iban ye mme asan̄autom Abasi eken ke isọn̄ ẹsụkde ibuot ẹnọ ndutịm ukara Abasi ẹnyụn̄ ẹtienede ndausụn̄ itieibuot oro ẹnọde. Utọ nsụkibuot emi anam mme angel ẹti ke mmimọ n̄ko inyene ndisụk ibuot nnọ Abasi.
Mme Angel Ẹsinen̄ede Ẹn̄wam Nnyịn ke Utom Ukwọrọikọ
17, 18. Ntak emi ikemede ndidọhọ ke mme angel ẹsin̄wam nnyịn ke utom ukwọrọikọ?
17 Mme angel ẹnyene ubọk ke mme n̄wọrọnda n̄kpọ oro ẹtịbede ke “usen Ọbọn̄” emi. Emi esịne Obio Ubọn̄ emi ọkọtọn̄ọde ndikara ke 1914. Mmọ n̄ko ẹma ẹda ye Michael ẹsio Satan ye mme demon esie ke heaven ẹduọn̄ọ ke isọn̄. (Edi. 1:10; 11:15; 12:5-9) Apostle John ama okụt ‘angel efede ke ufọt enyọn̄, onyụn̄ enyene nsinsi eti mbụk nditan̄a nte etop idatesịt nnọ mbon emi ẹdụn̄de ke isọn̄.’ Angel oro ọkọdọhọ ete: “Ẹbak Abasi ẹnyụn̄ ẹnọ enye ubọn̄, koro ini ikpe esie edisịm, ntre ndien ẹtuak ibuot ẹnọ Enye emi akanamde enyọn̄ ye isọn̄ ye inyan̄ ye idịm mmọn̄.” (Edi. 14:6, 7) Mmọdo, mme asan̄autom Jehovah ẹfiọk ke mme angel ẹdu ye mmimọ ke ini ikwọrọde eti mbụk Obio Ubọn̄ Abasi oro ama ọkọtọn̄ọ ndikara ke heaven, kpa ye ibak ibak ukọbọ oro Devil adade etiene mmimọ.—Edi. 12:13, 17.
18 Mfịn, mme angel isitemeke nnyịn ebiet emi idikụtde mbon oro ẹmade akpanikọ nte angel eketemede Philip onyụn̄ ọdọhọ enye okosobo ye eunuch owo Ethiopia. (Utom 8:26-29) Nte ededi, okposụkedi emi nnyịn mîkemeke ndikụt mme angel, se isitịbede mfịn ẹwụt ke mmọ ke ẹn̄wam nnyịn ke utom ukwọrọikọ Obio Ubọn̄, enyụn̄ ẹda nnyịn usụn̄ man ikosobo ye mbon oro “ẹnyenede eti esịt ndinyene nsinsi uwem.”a (Utom 13:48) Edi akpan n̄kpọ didie ntem ndiwọrọ an̄wautom kpukpru ini, man itiene iyom mbon oro ẹmade ‘ndituak ibuot nnọ Ete ke spirit ye ke akpanikọ’!—John 4:23, 24.
19, 20. Nso ke mme angel ẹtiene ẹnam ke “utịt editịm n̄kpọ emi”?
19 Eyo nnyịn emi ke Jesus okokot “utịt editịm n̄kpọ” oro mme angel ẹdibaharede “ndiọi owo ẹsio ke otu nti owo.” (Matt. 13:37-43, 49) Mme angel ẹtiene ẹbuana ke akpatre editan̄ mbon oro ẹyetde aran mbok ọtọkiet nnyụn̄ mfịk mmọ idiọn̄ọ. (Kot Matthew 24:31; Edi. 7:1-3) Ke adianade do, Jesus edisan̄a ye mme angel idibahade “erọn̄ ye ebot.”—Matt. 25:31-33, 46.
20 Ke ini “ediyarade Ọbọn̄ Jesus emi editode ke heaven edi ye mme okopodudu angel esie,” ẹyesobo kpukpru “mmọ eke mîfiọkke Abasi ye mmọ eke mîsụkke ibuot inọ eti mbụk Ọbọn̄ nnyịn Jesus.” (2 Thess. 1:6-10) Ke ini John okokụtde ukem n̄kukụt emi, enye ọkọdọhọ ke Jesus ye udịmekọn̄ eke heaven ẹwat mfia enan̄-mbakara ẹka ndin̄wana ekọn̄ ke edinen ido.—Edi. 19:11-14.
21. Nso ke angel emi akamade ‘ukpọhọde editụn̄ọ ukpe ye akwa n̄kpọkọbi’ edinam Satan ye mme demon esie?
21 John ama onyụn̄ “[okụt] angel kiet otode ke heaven osụhọde edi ye ukpọhọde editụn̄ọ ukpe onyụn̄ akama akwa n̄kpọkọbi ke ubọk esie.” Angel emi idịghe owo efen ikan Michael, kpa etubom mme angel, emi edimụmde Devil ọbọp onyụn̄ otop enye ye mme demon esie ọdọn̄ ke editụn̄ọ ukpe. Ẹyekpọhọde mmọ ẹyak ke ekpri ibio ini ke utịt Tọsịn Isua Ukara Christ, kpa ini emi ẹdidomode mme mfọnmma owo akpatre udomo. Ekem, ẹyesobo Satan ye mbon nsọn̄ibuot eken. (Edi. 20:1-3, 7-10; 1 John 3:8) Ntre, idụhe owo oro edisọn̄de aba ibuot ye Abasi.
22. Nso ke mme angel ẹditiene ẹnam ke mîbịghike, ndien didie ke emi okpotụk nnyịn?
22 Ibịghike ẹmọn̄ ẹnyan̄a mme owo ẹsio ke idiọk editịm n̄kpọ Satan emi. Mme angel ẹyenyene ubọk ke n̄kpọ emi man ẹwụt ke Jehovah enyene unen ndikara, ke enye oyonyụn̄ anam kpukpru se enye akaduakde ọnọ ubonowo ye isọn̄. Ke akpanikọ, mme angel Abasi ẹdi “mme spirit eke ẹnamde utom ẹnọ mme owo, eke ẹsiode ẹdọn̄ ndisan̄a utom nnọ mmọ eke ẹdidade edinyan̄a ẹnyene.” Mmọdo, ekọm ye itoro ẹnyene Jehovah Abasi emi adade mme angel an̄wam nnyịn inam uduak esie onyụn̄ ọnọ nnyịn idotenyịn nsinsi uwem.
[Ikọ Idakisọn̄]
a Se Jehovah’s Witnesses—Proclaimers of God’s Kingdom, page 549-551.
Didie ke Afo Ọkpọbọrọ?
• Didie ke ẹbahade mme angel?
• Nso ke ndusụk angel ẹkenam ke eyo Noah?
• Didie ke Abasi ada mme angel an̄wam mme asan̄autom esie?
• Nso ke mme angel Abasi ẹnam ke eyo nnyịn?
[Ndise ke page 21]
Mme angel ẹsikop idatesịt ndinam uduak Abasi
[Ndise ke page 23]
Mme angel ẹsidu ke mben̄eidem ndinyan̄a nnyịn ke ini Abasi ọdọhọde mmọ ẹnyan̄a, kpa nte ẹkenyan̄ade Daniel
[Mme ndise ke page 24]
Kûyak idem enyek fi, sia mme angel ẹdu ye nnyịn nte inamde utom ukwọrọikọ Obio Ubọn̄!
[Ebiet Ẹdade N̄kpọ Ẹto]
Ekondo: Foto NASA